《受恩蒙福的一生》

 | | | 轉寄

《受恩蒙福ê一生》林宗要牧師 自序

作者 林宗要 2010.07.04


我出世tī七十gōa年前ê傳統草地（彰化縣芳苑鄉），tī母胎裡就有基督信仰，gín-á時代就參加主日學，因為老母ê信仰。認為敬畏耶和華是智慧ê開端，認bat hit位聖者就是聰明，所以hō͘我成做族親中第一位受正規教育ê人。可見信仰對人生ê關鍵性影響。國校時代常常負責親族中農業品買賣ê賬項工作，當時tī心靈上充滿自信kap榮譽感（有可能影響我日後人生價值觀kap行為心態ê原因）。老母ê信仰對阮幼兒時代ê教育kap信仰，以及做人道理有決定性ê影響，幼兒時代就被要求tī品德上以及信仰方面ê嚴謹，結局造成一位草地gín-á ē-tàng完成神學教育，擔任牧師職，這過程hō͘阮體會tio̍h上主無限之恩典kap賜福tī阮ê身上。

神學院畢業時（1952年）雖然有四、五名教會代表chhōe我，ài我到in ê教會牧會，但是因為傳道師無選擇權，最後受派到由當時ê T.K.C.（台灣基督長老教會青年團契）所發起ê五角銀運動所創設ê新屋教會，十四年久tī新屋教會，確實體會tio̍h上主無微不至ê帶領，hō͘一位客語完全m̄-bat ê人，日後竟然ē-tàng用真標準ê客語來講道，十四年久tī新屋ê牧會確實真艱苦，負擔重、挑戰大，但m̄-bat因為肉體ê負擔以及牧會工作量大來灰心或失志過，反tńg tī辛苦ê牧會生活中體會tio̍h喜樂ê感受，因為教會內有幾位年紀kap我差不多ê青年人非常支持，協助教會事奉，牧師娘ê關懷探訪工作做得非常好，因此hō͘一間被當時教界認為弱小ê客家教會，tī五年內ē-tàng自立，七年了後就完成建堂工作（全無向外募捐），因此受總會指定為北部ê農村示範教會，常有外國朋友來訪參觀。

Tī 1966年五月中ê一個主日，有虎尾教會五名長老忽然間（無任何告知）來參加新屋教會禮拜，禮拜了後五名長老向我說明來意，就是boeh聘請我到該會牧會，徵求我意見，並提出一份聘書（主要是年限kap謝禮等）我即時回答in，期待tī祈禱中聽上帝ê指示，tī六月ê時回覆，後來就決定到虎尾。虎尾教會是一間組織良好，人才濟濟，尤其是對牧師ê謝禮上，thang做其他教會ê典範，虎尾教會hō͘我 ê謝禮是按照總會ê規定加六成，是一間有淡薄á顧慮tio̍h牧師實際生活ê教會，五名長老來新屋ê時，每一個人用無仝ê觀點觀察評估：牧師講道，師母司琴，牧師子女品德，以及看宿舍是m̄是整齊（每一個人tńg去ê時tī禮拜中向會友報告in所觀察tioh8e5內容）。

Tī虎尾教會十gōa年ê教會生活，thang用「戰戰兢兢」ê心情去面對牧會事工，每週至少負擔主日早起kap暗時二場禮拜kap每禮拜ê家庭禮拜，共三pái ê講道，另外每月有一pái ê青少年主日講道（青少年三十gōa名，主日學百名左右）以及主日學禮拜ê講道，工作量相當大，因此關懷ê事工差不多lóng由牧師娘負責（教會有雇用一位姊妹替代牧師娘ê煮飯、洗衫、清掃ê工作），hō͘牧師娘專心tī教會ê事奉，當時ê教會hō͘牧師ê謝禮是十四個月，但虎尾教會hō͘我ê謝禮是十五個月，包括每年一個月ê退職基金，由教會會計負擔保管生利息，到1974年ê時因為倒風日盛，會計恐驚牧師基金會發生意外，因此決定由牧師家己保管，隔年光寶公司成立需要創設資金，我就將hit七萬元交hō͘元生投資tī光寶，tī十gōa年了後，光寶股票上市，我所投資ê股票mā成做我經濟ê主要來源。

Tī-chia體會tio̍h一位清寒ê傳教者，上帝ê恩典kap賜福竟然chiah-ni̍h大，hō͘阮ê經濟生活完全改觀，若m̄是主ê恩典kap賜福是無可能ê tāi-chì，因此常常有感激ê心情面對上主所託付ê牧會事工，來報答主恩，因為子女lóng已經讀大學kap中學。所以阮khah有時間去關懷，尤其是牧師娘ê探訪thang用「行到腳底生繭」來形容她ê狀況，特別是有幾戶弱勢ê會友，阮所對in ê關懷hō͘ in真感動（關心in ê病疼kap實際生活ê需求），確實tī虎尾教會，阮有體會tio̍h上主無限恩典kap賜福，因為教會關心牧師ê子女教育、牧師ê生活，教會lóng表現出in細膩ê關愛，因此tī虎尾教會thang用「無後顧之憂ê牧會生活」來形容阮tī虎尾教會ê牧會。Tī我ê牧會規劃中，希望有機會對弱小或回故鄉，還福音債ê期待，卻因為我家庭ê因素無法度完成（只有真短ê時間tī台中東勢教會kap牧師娘ê故鄉路上教會），就結束tī長老會ê專職事奉，搬到台北kap元生（我ê長子）共同生活。

志芳（洪長老）知影阮ê情形，因此bat事先建言，是m̄是ē-tàng來木柵幫忙？我有答應伊，若只是講道應該是無問題，tī 1984年十二月十六日頭一pái tī木柵教會講道，題目：「理想ê基督徒」。自1985年三月起正式成做木柵教會ê牧師，kap主內兄姊建立了非常深厚ê情誼，二十年來，阮確實tī木柵教會體驗tio̍h這mā是上主無限ê恩典kap賜福，hō͘阮二位已進入老年ê人，體會tio̍h無thang比phīng、非常尊貴ê主內情誼，阮確信兄姊之間所付出hō͘阮ê是非常尊貴ê情誼，對阮人生晚境ê身心有正面價值ê積極作用，chit種上主美好ê安排，hō͘阮ê身心得tio̍h無限ê溫暖滋潤。

回顧五十gōa年來ê牧會生活，雖然tī工作上難免有瑕疵kap身心ê負擔，但整體來講，阮行走ê五十年來牧會ê路徑，我確實真用心tī講道ê準備kap經營牧會，chiah ē-tàng完成受託ê使命，無論牧會生活、子女ê成長kap就業ê過程，阮lóng繼承先人敬虔ê信仰，tī教導子女方面特別謹慎，尤其是牧師娘對子女ê信仰kap品德培育相當用心，因此阮ê子孫lóng免hō͘阮操心，in ê信仰kap愛主ê熱誠，投入參與教會ê事奉，是ē-tàng hō͘阮放心ê，這是阮二人tī人生晚境時siōng大ê安慰，並感謝主恩。

回顧七十gōa年來行過ê道路，任何時刻阮lóng不斷體會tio̍h上主恩典kap賜福滿滿，願阮ē-tàng珍惜上主所賜hō͘阮ê時刻，好好利用阮人生晚境來報答主ê恩典kap賜福，是阮目前所努力ê生活內容，因為「祢beh將活命ê路指示我；Tī祢ê面前有滿足ê歡喜；Tī祢ê chiàⁿ手有永遠ê快樂。」（詩16：11）