《草地囝仔做牧師》

 | | | 轉寄

幸福ê人生（二）

作者 林宗要 2010.08.29

申命記二十八章1～4節；希伯來書十二章5～11節

每一個人心中lóng teh期待幸福ê人生，因此所有ê人mā lóng 盡力teh追求chit種人生ê幸福，當然，因為每一個人ê價值觀無仝，難免對幸福有無仝ê觀點。一般人ê觀念，人所追求ê幸福通常lóng是以現實為主，比如財富、權力、平安等等ê現實問題，tī聖經中mā有chit種情形。舊約中講福氣時，通常是指性命、長壽、財富、kiáⁿ兒kap平穩ê生活等等，chiah-ê觀點kap現實人生ê想法真相siâng。咱看聖經中上帝hō͘以色列人ê應允就知影，上帝要求以色列人kap祂ê關係ài純正，祂就會將hiah-ê人所愛ê性命、長壽、財富、kiáⁿ兒ê成就，以及平安ê人生賜hō͘只要遵守祂命令ê人，tī聖經中chit種講法四界thang見tio̍h，譬如十誡中ê孝敬父母，保羅講這是chah應允ê誡命，人若遵守這誡命，就會得tio̍h亨通長壽ê人生（以弗所書六章３節），約伯記一章２～３節，講約伯ê家境時，因為伊ê財富hō͘伊成做當地ê大好額人，mā是hō͘人認定為siōng有福氣ê人，而且伊ê財富kap眾kiáⁿ兒mā是hō͘人感覺幸福ê因素之一（詩篇一二八篇）。另外tī舊約中強調chit種幸福ê人生，除chiah-ê物質條件外，tī kap上帝關係上mā仝款--ê完美，chit種內在心靈ê完美mā是成做人生幸福ê要件。

基督徒ê幸福觀，當然有一般現實面ê考量，而且基督徒ê人生種種現狀，若是tī非常困難時，beh如何見證信仰生活ê價值？假使每一個基督徒lóng生活tī chiok惡劣ê現實環境中，如何向chiah-ê重視現實ê一般大眾，見證基督耶穌ê福音？這是非常困難--ê。所以tī現實ê世界，有成就之基督徒，若ē-tàng有見證ê生活， án-ne，tī上帝國ê宣教事工上必定khah有正面價值。Tī chit種情形之下，基督徒ài骨力phah拚，用伊所有ê智慧kap信心建立koh-khah有成就ê人生，來成為榮耀上帝ê工具，án-ne對教會chiah khah有正面ê影響。當然tī-chiah所要求--ê，是信仰kap生活完全一致，chiah ē-tàng表現出正面ê信仰價值。尤其是tī有利益tio̍h提、重利輕義ê台灣社會，基督徒koh-khah ài明白，咱ê信仰tī時代ê功能是什麼？

特別是對tī追求人生幸福ê心態上，基督徒必須ài有khah正確kap符合上帝心意ê價值觀，chiah ē-tàng tī現實中顯出信仰ê內容，咱ê信仰chiah ē-tàng真正成做光kap鹽來影響、調和社會，koh表現出信仰ê實際價值。

所以基督徒必須ài建立正確ê幸福觀以導正咱ê信仰kap生活ê真實內容。

詩篇十七篇14～15節「耶和華ah！求你用手救我脫離世人，脫離he只有tī今生有福份﹝分﹞ê世人，你kā你ê財寶充滿tī in ê腹肚，in因為有kiáⁿ兒就心滿意足，將in chhun--e 5財物留hō͘ in ê孩兒，講tio̍h我，我必定teh義中看見你ê面，我醒ê時chūn tio̍h看著你ê形像，就心滿意足。」二節經文lóng提起心滿意足。（請注意，人生狀況ê心滿意足，to̍h是咱所謂ê幸福ê人生），前者是tī物質ê豐盛kap多子多孫，後者是看見上帝ê形像，二者ê差別非常大，前者所重視ê是tī今生ê物質世界，好親像保羅tī腓立比書三章19節「in ê結局是沈淪，in ê上帝是家己ê腹肚，in以家己ê見笑做榮耀，專門以地上ê事為念。」一個人若只注重看會tio̍h ê今生（會記得！聖經中講—著世界時用花kap草來比喻伊，雖然有時真榮華，但是目一nih就乾乾阿，這是真實世界），kan-nā追求今生ê福氣，伊ê結局是虛空。詩人講：「世人行動實是幻影，in無閒真是了然，儉ê錢kap財寶，m̄知將有siáng beh來收走」（詩篇三十九篇6節），chit種人生現象是每一個人lóng會體驗tio̍h ê，只是人tī現實ê境況中，定定會因為利害關係來迷失，這是基督徒ài省思ê。通常基督徒lóng真清楚tī屬靈ê過程中，上主對咱ê要求kap咱應該有ê本分，只是有時tī現實ê人情世事頂面，咱無法度表現出khah符合信仰要求ê生活，soah造成基督徒ê信仰生活成做有名無實ê狀態。

一、 過失得tio̍h赦免，罪過得tio̍h遮khàm ê人生（詩篇三十二篇1～2節）
Tī-chia所講ê「過失kap罪過」lóng是指對上帝ê違背，破壞法律中上帝ê誡命，這就是聖經所講ê過失，講到罪過tio̍h是偏離中心，喪失人生正規ê圓，另外一種就是不義mā算別人hō͘-- ê罪過，心懷奸詐是指人性ê道德ê混亂，放sak了人生正道，生活tī惡質ê境況中，就是不義。

詩人以chit三種不法ê罪過得tio̍h上帝ê赦免、遮khàm，tī chiah-ê人心中，就是心無奸詐，chit種人生就是幸福ê人生，chit種人生ê特色，就是ē-tàng進入kap上帝有純潔ê靈交ê關係。

Chit種無罪（罪已經被上帝赦免）ê人生tī心靈上有無限ê喜樂kap充滿，chit種狀況就是成做人生幸福ê要件，因為一個幸福ê人，心中必定完全充滿tio̍h喜樂kap滿足。若無是無幸福thang講ê。咱以實際生活為例，一個普通人若犯了什麼對良心有負擔ê過失或者罪過時，mā可能伊ê作為無人知影，ē-sái講是伊會一直受tio̍h良心ê譴責，行動上有時會有無正常ê表現，主要因為伊所犯ê過失hō͘伊良心不安，甚至成做生活上ê負擔。心肝cho-cho koh驚惶不安ê人，是無幸福thang講。

有一個故事講一位優秀ê學生用彈弓phah死厝邊阿婆ê雞母，認為無人知影，soah hō͘另外一位居心不良ê學生看tio̍h，後者利用資優生ê弱點kā伊khà油，父母hō͘伊ê錢差不多全部hông提去阿，tú-tio̍h考試ê時，koh ài hō͘伊看答案，因此造成chit位資優生ê憂悶，bē食bē睏，因為án-ne來變瘦，hō͘阿母發現了後chiah共伊講實情，了後伊ê阿母 chhoah伊到阿婆in家會失禮koh賠償阿婆，伊得tio̍h阿婆ê赦免，koho-ló伊ê真老實，伊mā因為án-ne內心充滿tio̍h喜樂kap滿足。隔轉工hit位居心不良ê學生照常向伊khà油，伊坦然無驚惶mā無加共伊chhap，當chit位有心機ê學生kā 阿婆講ê時，顛倒hō͘阿婆罵。Chit-ê故事kā咱講一個真理，就是內心ê平安源自內心ê坦然自在ê感受，確實，一位基督徒kap耶穌建立完美良好ê信仰關係ê時，必定會體會tio̍h罪得tio̍h赦免ê hit種內心ê輕鬆，主耶穌teh傳教福音時，定定向hiah-ê求醫治ê人講「小子ah！你ê罪赦免阿」chit種罪得赦免ê情況，to̍h是形成基督徒充滿tio̍h喜樂ê原因。基督徒ê生活中，ài充滿tio̍h喜樂，chit種喜樂ê生活，是出自基督徒對罪得tio̍h赦免ê內心之感受，咱看撒該ê情形，就會明白chit種ùi內心發出ê喜樂真情ê流露，tī伊體驗基督hō͘伊ê救恩了後，伊所表現出來ê感情kap向基督ê決定，伊願意將財產ê一半救濟sàn-chhiah人，若有對人欺騙ài 還四倍，chit種出自內心喜樂ê人生結局，就是伊完全體會tio̍h罪得tio̍h赦免ê甜美。所以咱ē-tàng了解詩人tī-chiah所講ê chit種幸福ê人生ê內容是過失得tio̍h赦免，罪惡得tio̍h遮khàm ê人生。

二、 一生一世有上帝ê恩惠kap慈愛ê人生
頭前咱bat提起，過失得tio̍h赦免，罪惡得tio̍h遮khàm ê人生是有福ê，因為伊ē-tàng體會tio̍h被上帝赦罪時內心所充滿ê喜樂，實在是任何tāi-chì lóng無法度相比ê。但是基督徒必須ài清楚，被上帝赦免是一個人kap上帝之間ê關係ê起步，tī伊ê面前iáu有一段相當漫長ê人生路途必須ài去經營，起步雖然重要，但是koh-khah重要ê是繼續ê生活內容，因為人生m̄-nā tī起步，koh-khah是tī繼續行到人生ê終點，mā就是tī人生ê結局時，chiah ē-tàng論定人生ê成敗，咱由實際ê狀況來了解chit種情形，有真chē人ê起步真好，真有成就，ē-sái講是tī性命ê繼續中soah表現出失敗ê人生內容，因此到終點時，chiah來面對tio̍h悲慘ê人生狀況。

另外有一kóa人teh起步時ē-sái講是坎坷，無論做任何tāi-chì lóng無順利，lóng無成功thang講，咱甚至thang用問題一堆來形容，萬項tāi-chì lóng bē-sūn-sì，做tāi-chì無好ê結果，相信tī咱ê現實狀況中，每一個人lóng會有所感受。人生是嚴肅ê存在，bōe-sái chhìn-chhái、馬虎ê心態去經營，必須是嚴謹ê生活，chiah ē-tàng有美好充實ê內容，因此起步ê完美是無法度保證人生ê終結亦是完美ê。

Tī性命ê每一個時刻lóng必須盡心、盡力去面對，chiah ē-tàng建立理想ê人生景況。年輕ê時得tio̍h父母、家庭ê培養kap建立，到人格獨立時，每一個人必須親身面對人生，當然每一個人ê一生lóng 無可能完全仝款，有人ê一生充滿奮鬥，有人ê一生soah是輕鬆過日子，koh-khah有人ê一生是teh病痛中經過，一生m̄知流過外chē目屎，親像苦海歌所形容，人生ê苦難，實在有各種無仝ê問題。

Tī chit種情形中，一個上帝赦罪ê基督徒ài如何去經營人生？這是一個關鍵性ê問題，tī-chiah咱應該思考，詩篇二十三篇尤其是最後hit節「我一生一世一定有恩惠kap慈愛跟隨我，我koh ài tòa-tī耶和華ê殿中，直到永遠。」

詩篇二十三篇是咱lóng真熟練ê。描寫上帝照顧伊ê子民ná親像牧者照顧羊群一般，有chit種心靈經驗ê人生必定充滿tio̍h喜樂kap滿足，這是因為作者完全體驗tio̍h上帝斟酌ê照顧kap引chhōa，無論tī何種ê人生境況中－－是死蔭ê山谷或者敵人ê面前，lóng m̄驚gū害，因為伊完全經驗過上帝恩典kap慈愛ê同在kap保守，對一位被上帝救贖ê人民，這是無tè比ê經驗，tī你ê性命中，是m̄是體驗tio̍h上帝ê恩典kap慈愛跟隨你？這是基督徒ê信仰kap生活ê關鍵，是成做基督徒信仰價值ê重心，基督徒必須有chit種人生體驗，就是kap詩人仝款ê體驗，m̄-nā是口語上，卻是真實ê人生經驗，伊是確立tī基督徒對耶和華上帝ê信仰。Tī聖經中咱tiāⁿ-tiāⁿ會看tio̍h ê形容上帝ê屬性ê一句話「祂有憐憫、有恩典，bē chhìn-chhái受氣，而且有phông-phài ê慈愛。」（詩篇一○三篇8節），「祂ê慈愛是永遠存在」（詩篇一○六篇1節，一一八篇1節）也tio̍h「歸在敬畏祂ê人」（詩篇一○三篇17節），tī聖經中四界lóng有慈愛kap誠實，恩典kap慈愛，牧師ê祝禱文mā有「主耶穌ê恩典，天父ê慈愛，聖靈ê感動」，因為恩典kap慈悲實在是tī複雜ê人生狀況中siōng ē-tàng引chhōa屬於祂ê人行tī任何人生路途中ê siōng大ê動力，所以一個幸福ê人生，必須tī伊ê人生中，無論任何狀況，經驗tio̍h上帝ê恩典kap慈愛陪伴伊ê一生！

三、 聽從上帝，肯定祂管教ê人生
（申命記二十八章1～14節；詩篇九十四篇12節）
約伯記﹝紀﹞五章17節「上帝所處罰ê人是有福ê，所以你bē-tàng看輕全能者ê管教」，希伯來書引用箴言三章11～12節「bē-tàng看輕耶和華ê管教，mā bē-tàng厭siàn伊ê責備，因為耶和華所愛ê，伊一定責備，好親像老父責備所愛ê kiáⁿ兒」tī申命記二十八章1～14節是強調聽從上帝ê人ê祝福「你出mā蒙福，入mā蒙福」，出kap入是人生ê行動ê全部，伊是建立tī聽從上帝ê話ê世界，tī聖經中，聽從上帝ê話kap上帝ê祝福是bē-tàng分開ê，chit種應允是上帝kap以色列人立約ê根據，tī舊約中四界thang看tio̍h chit種應允。聖經時常用聽從祂ê教導koh有去行ê人，要求屬於祂ê子民ài有chit種信心ê行為。詩篇九十四篇12節「耶和華ah！你所管教，用法律所教示ê人是有福ê。」tī信仰ê路上，基督徒kap一般人仝款，mā會有起起落落ê人生狀況，尤其是上帝對伊ê子民，定定會藉tio̍h各種無仝ê方法，有時hō͘ in phông-phài ê恩典kap慈愛，hō͘人體會tio̍h人生phông-phài ê甜蜜，但是有時上帝mā會藉tio̍h人所認為ê苦難kap不幸ê事件，發生tī伊ê選民中，就是聖經中所講ê上帝ê管教kap督責，雖然chiah-ê管教kap督責是人無願意去承受ê。

咱若以父母對kiáⁿ兒ê管教kap督責來做比喻，咱就會了解父母the教示需要管教e5kiann2兒時，lóng是用心良苦，但是以kiáⁿ兒ê立場來講，in會真pháiⁿ接受，因為tī-chiah有責備，有時甚至會有體罰，kiáⁿ兒實在無願意接受父母chiah-ê處罰，m̄-koh對確實有問題行為e5kiann2兒，父母必須hō͘-in相當程度ê管教kap督責，主要是teh引chhōa in行向完美ê人生。

以chit種情形來思考基督徒kap上帝之間ê關係，咱就khah ē-tàng了解，聖經中所要求ê聽從上帝，肯受管教ê人生必定是上帝所祝福ê，因為上帝ê用心kap父母仝款是因為疼ê引chhōa，藉tio̍h管教kap督責伊ê子民，生活the符合祂旨意中，所以基督徒若有chit種聽從上帝而且肯受管教ê信仰生活時，必定有美好ê人生結局。

咱看主耶穌teh客西馬尼ê祈禱，向上帝祈求徙走苦杯。但是主耶穌完全順從天父ê意思，雖然祂必須面對痛苦ê十字架，但是伊ê結果咱若看保羅tī腓立比書二章6～11節，咱就會明白主基督順從天父ê旨意，甘願接受chit苦杯，結果祂成做全世人敬仰ê對象。啟示錄三章19節「凡我所疼疼ê，我就責備管教伊」。

結論：過失得tio̍h赦免，追求一生有上帝ê恩典kap慈愛，以順服ê心去聽從上帝ê話，肯接受上帝ê管教，絕對無m̄-tio̍h！