《草地囝仔做牧師》

 | | | 轉寄

幸福ê人生（三）

作者 林宗要 2010.09.05

馬太福音十一章4～6節；提摩太前書六章11～16節
Tī北部ê台灣教會，只要講tio̍h馬偕博士（牧師），無人m̄知，伊確實是一位真了不起ê人。伊tī福音ê宣教史留真chē值得紀念ê偉大事蹟落來。伊過身了後，宣教ê khang-khè，mā由真chē宣教師繼承伊koh奠定穩固ê基礎。Chiah-ê宣教師將伊ê 一生ê青春貢獻hō͘台灣ê教會，其中受大家siōng推崇ê就是前台灣神學院院長孫雅各牧師翁仔bó͘。Chit對翁仔bó͘奉獻tī台灣教會ê心力，是無法度消除--ê。孫牧師擔任台神院長有二十四年久；孫牧師娘所創辦ê芥菜種會，是頂港有名聲下港有出名ê，對台灣原住民、有問題ê青年、烏腳病、雞爪瘋病人ê服務，tī當時ê台灣社會除了伊無別人阿，可見孫牧師翁仔bó͘對台灣ê貢獻有jōa大！In是tī馬偕牧師了後hông 認定ê第二號有功人物。

照聖經ê真理來講，chit種盡忠職守ê上帝僕人，應該受tio̍h上帝大大ê祝福chiah-tio̍h，但是事實並m̄是án-ne，孫牧師翁仔bó͘有一個後生一個 cha-bó͘-kiáⁿ，孤kiáⁿ叫做萬福（1930～1938），soah tī結婚兩年了後致tio̍h小兒痲痺，行路無方便，kap in bó͘離婚了後來到台灣倚靠父母，老母真細膩ê照顧伊ê生活。經過chiah-ni̍h大ê打擊ê孫萬福，m̄管伊ê信心有jōa好，一定是懊惱、失意，失--去無笑容，kui工坐teh輪椅頂koân等別人ê奉待伊，因為gín-á ê不幸，對chit-ê家加減mā有影響。

用台灣人ê眼光來看，孫牧師ê gín-á無傳宗接代，是一件jōa-ni̍h-á嚴重ê tāi-chì但是外國人或者現代人，khah ē-tàng突破chit種觀念。聖經中tiāⁿ-tiāⁿ會發現，上帝對順服者，有特別ê祝福，hō͘ in kiáⁿ孫萬代，好比海沙hiah-ni̍h濟，尤其是以色列人ê始祖亞伯拉罕，用撒、雅各等人lóng受過chit種祝福。其實chiah-ê屬世ê物件，是khiā-tī人ê立場去思考上帝ê應允。但是tī信仰ê領域內底是kap人ê想法全然無仝。有一kóa hông公認ê模範信徒或者忠心ê僕人，並無得tio̍h上帝特別ê眷顧kap恩待，有ê時koh受tio̍h koh-khah大ê災難，chit種類似ê事件，tī教會中不時teh發生，有熱心疼主、疼教會ê長老，伊ê孤kiáⁿ iáu未四十歲就過身ah，mā有本身致tio̍h癌症，iah koh真少年tio̍h過身--ê，有熱心教會事工，甚至iáu做一個人佈道ê長老，伊ê家境無好，kiáⁿ兒不才，著算是牧師，kui世人替主作工，mā有類似情形。Chit款類似ê問題，咱應該如何去面對neh？

頂面所講ê chiah-ê問題，其實lóng是信仰心態ê問題，每一個信徒ài如何去面對chit種嚴肅ê信仰生活？信仰ê tāi-chì，真chē是無法度用一般ê道理去解釋ê。當一個人tú-tio̍h無法度用人ê立場去解釋ê問題ê時，就需要用信心去面對伊。這就是所謂ê信仰生活。基督徒ài了解「信仰生活」m̄是kan-ta參與教會ê chit種服事而已，siōng要緊ê是當你tī/teh人生旅程上出現狀況ê時，ài怎樣去面對，án怎去榮耀主。當問題來臨ê時，你猶原疼主，盡心盡力ê事奉主，這就是信仰koân度ê表現。

所謂幸福ê人生，tio̍h是身體健康，有快樂ê精神，khang-khè順勢，事業有成，kiáⁿ兒將才等等。但是人生不如意ê tāi-chì十件有八、九件，tī人生ê過程中，tiāⁿ-tiāⁿ有病痛哀傷，不如意、生活有困難，kiáⁿ兒讀冊、khang-khè無順，或者seng-lí失敗等等，chiah-ê tāi-chì mā時常teh基督徒ê生活中發生，一個真實ê基督徒，tú-tio̍h chiah-ê問題ê時ài如何家己處理？He就是需要koh-khah堅定ê信仰，全心倚靠上帝，chiah ē-tàng克服、解決困難。

一、 掠tiâu主ê人生：（提摩太前書六章11～16節）
Chit段聖經是保羅向提摩太ê指示，主要是ài伊離開真chē無適當做耶穌基督僕人ê 不良行為（見提摩太前書六章3～10節），chiah-ê pháiⁿ行為對屬於上帝ê人是無好--ê，會有負面ê影響，所以ài逃避伊，去追求屬靈ê美德kap持守真道。保羅koh-khah ài提摩太掠tiâu上帝，倚靠祂，tī信仰ê比賽頂koân phah拚走chông，替家己得tio̍h永遠ê性命，這是信仰生活ê基本原則，基督徒若無法度持守伊ê信仰ê時，to̍h無適合叫做耶穌ê門徒。

舊約聖經約伯記，撒旦向上帝提起約伯，因為上帝特別賜福hō͘伊，所以約伯ê信仰kap人格chiah會hiah-ni̍h完美。假使上帝tùi約伯身上撤走hiah-ê hông認為是幸福條件ê財產kap kiáⁿ兒ê時，伊kám ē-tàng繼續疼上帝？為tio̍h考驗約伯ê信心，上帝允准撒旦攻擊伊、phah-pháiⁿ伊，結果證實約伯iáu 無因為本身受tio̍h災難，來影響伊對上帝ê虔誠信仰。撒旦用各種方法來打擊約伯，soah無法度成功ê時，上帝向撒旦講：「你雖然ài我去攻擊伊，無緣無故ê去phah-pháiⁿ伊，伊猶原持守伊ê純正。」（約伯記二章3節）雖然約伯受tio̍h hiah-ni̍h大ê苦難，家破人亡，全身生毒瘡，但是伊ê信心猶原堅定，一絲á lóng無受tio̍h動搖，連伊siōng親密ê bó͘，lóng無法度忍受hit種苦楚，chiah叫伊棄絕上帝去死！但是約伯顛倒講：「妳講話像無知ê婦人仝款，噯！kám講咱tùi上帝手內底得tio̍h ê福氣，kám m̄是受災禍mah？」Tī chiah一切tāi-chì頂面，約伯並無用chhùi犯罪，無講一句怨言。這是約伯使人景仰ê所在。換做咱kap伊仝款，tú-tio̍h hiah-ni̍h悲慘ê運命ê時，加減lóng會怨天怨地，m̄-koh伊soah無怨恨上帝，顛倒是koh-khah倚靠祂，chit種tùi真誠發出ê信仰，就是基督徒蒙福ê原因。聖經上講約伯最後受tio̍h上帝大大ê祝福。Chit-ê故事kā咱講幸福ê人生，就是倚靠主基督持守真道ê人生。這kap保羅向提摩太所講ê真理相仝。伊講：「做一個上帝子民，必須『持定永生』，同時『ài守chit-ê命令』，一屑á lóng袂使用tio̍h lah-sap，一直到咱ê主耶穌基督顯現。」（提摩太前書六章14節）chit種信仰chiah有伊ê價值。當咱得tio̍h信仰ê應允了後，ài一直teh信仰ê道路上向前走tsông，一直到終點，就是khiā-tī主耶穌基督面前ê時。一個人ê信仰，好親像走相迮，無論出發ê時走了gōa緊，終點chiah是決定輸贏ê關鍵。有一kóa基督徒ê信仰過程是án-ne，一開始真完美、真理想，無想tio̍h tī半路中跋倒，有人會徛起來繼續走，有人就無法度koh徛起來，結果是失敗。所以基督徒必須ài了解掠tiâu上帝，持守伊ê命令，chiah是蒙福之道。以賽亞書五十六章1～2節耶和華án-ne講：「lín ài遵守公義，……án-ne持守ê人，tio̍h有福阿。」主耶穌用掖種ê比喻，向伊ê學生解釋啥物是好土地ê時，祂講：「那落tī好土地內底--ê，tio̍h是人聽道了後，持守tī老實善良ê心內，而且忍耐tio̍h結實」（路加福音八章15節）。

蒙福ê人生，一定是會結信仰ê果實，伊是掖tī好ê土頂koân，chiah ē-tàng結出美好果實。主耶穌mā講用誠心持守真理，chiah有可能結果子，結果子ê信仰，chiah ē-tàng得tio̍h上帝ê祝福。Chit-ê真理，咱thang tùi 二千年來，教會所發生ê事實看tio̍h上帝ê祝福時常是hō͘ hit kóa tī信仰頂koân有結果子ê人。我koh一pái ê強調，基督徒ê信仰生活，一定會持守上帝ê話。箴言ê作者勸少年人講：「持守真理ê人，有福了。」主耶穌基督tī啟示錄向當時ê教會來要求信徒ài持守真理。「lín ài持守，一直到我koh來。」（啟示錄二章25節）「你ài持守你所有--ê，mài hō͘人奪走你勝利ê華冠」（啟示錄三章11節）光榮ê見主，kap得tio̍h榮耀ê冠冕是基督徒siōng值得驕傲ê信仰。主教咱ài持守真理、tòe祂，chiah ē-tàng得tio̍h幸福ê人生。

二、 告白基督信仰ê人生：（馬太福音十六章17節）
有一pái耶穌問伊ê學生：「人子是siáng？」有人講是施洗約翰，有人講是先知以利亞或者耶利米。西門彼得講：「你是基督，永生上帝ê 後生。」耶穌對伊ê 回答真滿意，馬上向伊講：「西門你有福ah。」（馬太福音十六章17節），che說明，講出耶穌基督信仰ê人有福氣。耶穌講，祂ê教會boeh建立tī ná親像彼得有講出耶穌基督ê信仰ê基石上，教會有chit種信仰了後chiah ē-sái叫做教會。

主耶穌對「幸福」chit-ê詞ê看法，kap別人無仝，祂所強調--ê人生ài具備對基督耶穌堅定的確ê信仰、大聲講出信仰，m̄是tùi人本身主觀ê認知，是tùi父神所啟示，tùi上天來ê屬靈幫助ê信仰，chiah會hō͘人帶來真幸福。世上有一kóa教派ê信仰非常異常，表現出真無人道ê作為，像中南美洲，毒殺全體教徒，1993年4月美國大衛教派kap政府發生槍戰，八十六名信徒全部死亡，教主柯瑞許家己號做有罪ê救世主，伊有十九ê bó͘；1996年2月，基督教天體會會友，主張人m̄免穿衫。Chiah-ê教徒in lóng有講出tùi耶穌基督ê信仰。但是chit種異端ê信仰，並無符合上帝ê旨意，m̄是真誠ê信仰心聲，無屬靈ê感動，bōe ē-tàng替人類帶來幸福正面ê影響。

進一步討論，講出tùi基督ê信仰，m̄是kan-ta用chhùi講講--ê承認表白，siōng要緊ê是ài實際來行動，tùi生活中去見證信仰。Mā就是主耶穌tī馬太福音七章24節所講--ê：「聽見我chiah-ê話chiah實行--ê，ná親像khiáu-khiáu人kā厝起tī磐﹝盤﹞石頂koân。」chit種信仰ê基石若穩固，無論風涌有jōa大，lóng bōe歪bōe搖。這就是主所講--ê智慧ê人生。

一個基督徒，tī伊ê人生ê旅途中，若ē-tàng將伊全部ê生活，依賴主、﹝，﹞交託hō͘主，完全照主ê旨意去實行，相信伊一定ē-tàng體會tio̍h上帝無限ê恩典kap祝福。若是咱一生得tio̍h充分ê神恩kap賜福，m̄就是幸福ê人生mah？

基督徒beh得tio̍h幸福ê人生，其實真簡單，只要持守主耶穌ê道理，tī日常生活中確實去實行伊，幸福ê人生就會向你ia̍t手。

三、 無因為基督chiah跋倒ê人生：（馬太福音﹝章﹞十一章6節；路加福音七章23節）
一個人若對主耶穌產生giâu疑、誤解、chiah來跋倒、棄絕，chit-ê人斷然無法度享受tio̍h主耶穌基督豐盛ê慈愛kap祝福。Chit句話，就是主耶穌基督面對施洗約翰ê質問chiah向伊ê學生所講--ê。我tī學生時代（神學院）bat去看電影，事後mā時常kap同學、先生討論「看電影、pok薰lim酒」ê問題，討論結果就ná哥林多前書十章23～24節所講--ê「萬項tāi-chì lóng thang做，但是無一定lóng有好處。只要是tāi-chì lóng thang做，但是無一定lóng ē-sái hō͘人成功。」「無論啥物人，m̄-thang要求家己ê好處，只要求別人ê好處。」（十章31節）「lín無論做啥，食啥、lim啥，lóng tio̍h ài為著榮耀神chiah做。」「若食物會hō͘我ê兄弟犯罪，我就永遠bōe koh食bōe koh lim，以免hō͘我ê兄弟犯罪。」（哥林多前書八章13節）「mài因為食物來破壞上帝ê khang-khè，一切食物lóng ē-tàng食，但是你食ê若hō͘別人來犯罪，án-ne就m̄-tio̍h了，所用siōng好mài食肉、mài lim酒、mài做任何會hō͘你ê兄弟會犯罪ê tāi-chì。」（羅馬人書十四章20～21節）

Tùi頂koân幾tiâu聖經經文，咱略略仔﹝為﹞ē-sái了解，基督徒ê生活kap行為會影響別人對基督耶穌ê看法，bē-tàng 無謹慎。主耶穌講chiah-ê話，一方面是ài咱用喜樂虔誠ê心去接受耶穌基督，另外一方面ài咱行為端正，mài hō͘人因為你ê 不良品行來跋倒。Chit兩項lóng bē-tàng有têng-tâⁿ，若無tio̍h無法度hông叫做基督徒。有一kóa人信主真緊，但是日後ê言語行為soah時常違反主ê教示，伊敗壞ê行為，時常hō͘信心軟弱ê人跋倒。這kám是真實ê信徒？身為基督徒，生活上tio̍h ài 謹慎、自愛，mài做出危害教會kap hō͘人跋倒ê tāi-chì，阻礙了福音ê傳播。馬太福音十八章6～10節：「若有人beh hō͘ chhìn-chhái一個基督徒來離開我，不如用大磨石頭縛tī伊ê頷頸á頂koân，kā伊淹死tī深海。……hit kóa跋倒ê人有災厄阿，所以lín ài細膩，bē-tàng看輕這小子內底ê 一個。」Tùi chia咱知影，基督m̄-nā要求接納祂ê人生活上ài符合上帝ê心意，對真細ê人或者事koh-khah ài-beh看重，因為小所在往往是hō͘人失敗ê主因。一個hông救贖ê基督徒ài重視主耶穌所講ê chit句話「只要mài因為我跋倒--ê，就有福了。」ài如何chiah bōe跋倒？必須堅固信仰，hō͘信仰生活ê基石穩固。馬太福音十三章20～21節，「當今歡喜領受，只因為心內無根，不過是暫時--ê，一直到因為道來tú-tio̍h困難，或者是迫害，隨就跋倒（隨放棄）。」chit段經文tú好teh說明信仰根基ê重要性。

總講一句，持守真道，大聲講出tùi耶穌基督ê信仰，bē-tàng因為基督來跋倒，án-ne chiah ē-tàng創造幸福ê人生。