《草地囝仔做牧師》

 | | | 轉寄

幸福ê人生（一）

作者 林宗要 2010.08.22

申命記五章29～33節；詩篇一二八篇1～2節

Tī中國古早時有一個老大人ê馬phàng見ê故事，是teh說明，目chiu前雖然有損失，但是伊禍是抑是福iáu bōe-sái確定！禍福ê定義，是以現實ê狀況來決定，因為chit款tāi-chì tī 現實生活中，是定定會發生--ê。

1982年八月台灣三義ê天頂有一ê大空難，其中有一對翁仔某（太太已經有身三個月），翁婿tī公司尾牙時摸彩抽到幸福獎，就是去高雄耍二暝三日kap兩張機票，hit時全公司ê人，lóng認為伊是siōng好運ê人，因為抽到特別獎，但是伊選一九八二年八月二十二日ê hit-pang 飛lemg5機，soah tī三義ê天頂發生爆炸，機上ê人全部受難，chit-ê時chūn，無人會講伊是好運--ê，soah講，伊ê運氣實在真歹運！若是he時chūn mài抽到特獎就好阿！相信tī 人間社會中，chit種禍、福ê狀況，實在m̄是咱chiah無完全、有限ê人生所ē-tàng設想或者是料想會tio̍h--ê，相信tī咱每一個人ê人生經驗中，對chit種禍福ê定義，必定有深刻ê感受，chit種狀況，tú好說明人生ê有限性kap無完全。

雖然是án-ne，但是每一個人tī有限ê性命裡，猶原一直追求tio̍h心中所認為幸福ê具體事實，親像財富、權力、健康、趣味等等，但是有chiah-ê條件ê人到底有幸福boh？相信咱ē-tàng用咱ê思考去了解，實際上無完全ê！因為有真chē 有chiah-ê條件ê人，tī其他ê方面soah無一定是幸福--ê。

Tī一般人ê眼中，運命好、境遇順--ê，就是幸福！因為in對幸福ê定義是指thang值得歡喜ê福氣，mā就是tī人生中常有值得歡喜ê事，這就是hiah-ê人眼中ê幸福，若以人生有thang值得歡喜ê事來做幸福ê要件時，相信tī咱ê人生中，每一個人加減lóng會對幸福有所感受。

過去ê中國人社會ê三多五福（三多：多財、多壽、多男丁；五福：壽、富、康寧、有好德、考命終），tī農村社會ê門聯或者la̍h-ji̍t-á ê花草，定定是以財、子、壽為主題， tī人心中所ǹg望ê人生內容，確實是chit種ē-tàng滿足人現實ê三多五福，m̄-koh伊kám是人生實實在在 ê絕對幸福？

M̄-koh事實上，造成人對幸福ê觀感ê問題，較m̄是tī外在條件，是tī內在感受。（當然這kap人生ê現實狀況以及人生價值觀，lóng有深刻ê關連。）tī順利ê環境中ê人生，伊ê生活啥物lóng無欠，ài啥就有啥，m̄知天地有幾兩重，因此往往無法度對幸福有所感受。活tī順境ê現代少年家，若kap前一代ê生活相比較時，頂一代ê人lóng會認為現代ê gín-á實在好命！但是chiah-ê 食好穿好ê現代少年家，無一定認為in ê命好到toh位去！事實上，咱mā ē-tàng tùi in ê生活中去體會tio̍h，確實tī in ê人生路途上，有無數ê壓力kap各方面ê負擔，（kan-nā以學業做例，咱就會明白in ê重擔實在夠重！tī chit種負擔中，in ê人生kám ﹝ē-tàng﹞有幸福感？）咱知影幸福是人ê心中無過分ê負擔，chiah有幸福thang講，一個處tī極端ê負擔中ê人生，實在真pháiⁿ體會tio̍h幸福，chē是以現實ê環境條件評定人生有幸福á無。但是有一kóa人，因為有純正ê人生觀，對tī現實狀況所發生ê問題，就會有無仝ê表現，譬如：某長老ê孤子，三十gōa歲就tio̍h血癌死去，因為伊ê信仰，tī處理上有非常堅強ê表現，另外來看一有一位婦人，因為後生發生不幸，伊因為ta̍k工操煩，變成精神失常。

Chit種狀況teh說明，人ê心態以及價值觀，往往對人生有決定性ê影響，chiah會hō͘人生ê結局有真大ê差別。一ê老婦人有二個後生，一e5teh賣鹽，一e5teh賣雨傘，因為án-ne伊ta̍k工lóng會怨嘆、掛慮後生ê生活，驚會因為天氣ê關係影響後生in ê事業，後來經過人ê指點，請伊用kap過去無仝ê想法看天氣kap gín-á ê職業時，結果就完全無仝！果然，chit位老婦人了後ê生活，是以感謝來代替怨嘆。Chit件 tāi-chì teh說明，仝款ê一件tāi-chì，經由價值觀念ê轉變，所產生出來ê效果完全無仝。

Chit種價值觀念改變人生ê事實，是咱每一個人生中定定會發生--ê。因此，咱ê人生若ē-tàng以信仰kap智慧去建立純正ê人生價值觀（符合神旨ê人生）時，相信每一個基督徒ê生活，lóng會確立tī上帝所喜樂ê人生狀況中，對基督徒來講，生活符合神旨，就是成做人生幸福ê要件。誠然，一個基督徒ê生活若一直活tī上帝所喜樂kap祝福（這兩件事實在聖經中是定定連作伙--ê）ê過程中，伊的確會感受tio̍h生活中ê福樂滿滿，chit種現實會tùi基督徒ê信仰生活開始，以充滿感恩ê心情去面對所有ê人生現象，往往會有真豐沛ê人生，tùi chit種生活中表現出來，chē就是幸福ê人生。

真chē人「人在福中不知福」，chit種人ê特色，就是無感恩ê心，in所有ê lóng是不滿或者怨嘆。假使，人是用chit種不滿kap怨嘆建立in ê人生ê時，無論伊ê人生境況如何，lóng無可能有幸福感！因為幸福是發自內心ê滿足，m̄是由外面sak入就有。確實tī人生ê現放中，咱ē-tàng深刻ê體會tio̍h，chit種ùi心中所滿出來ê幸福，chiah是真正ê幸福，伊bōe受tio̍h現實ê任何境況來kā伊改變或者轉換--ê。

（一） 倚靠上帝ê人生（申命記五章29～33節）
「凡投靠伊ê，lóng是有福ê」。（詩篇二篇12節）

「Lín ài tam tam主恩ê滋味，便知影伊是美善，投靠伊ê人有福了」。（詩篇三十四篇8節）「萬軍ê耶和華ah！倚靠你ê人，便是有福」。（詩篇八十四篇12節）「當將你ê事交託hō͘耶和華，並倚靠伊，伊就必定成全」。（詩篇三十七篇5節）其他iáu有真chē經節提起，凡是óa靠上帝ê人生，ài得tio̍h豐盛（箴言二十八篇25節），凡是倚靠耶和華ê，to̍h得tio̍h安穩（箴言二十九篇25節），詩人mā講：倚靠耶和華ê人，kah-ná錫安山，永遠bōe動搖（詩篇一二五篇1節）。

Tī咱ê一生中，若有安穩、豐沛koh永遠bōe動搖ê景況時，chē ē-tàng講就是幸福ê人生。聖經強調，chit種人生的確立是在tī倚靠耶和華，耶利米書十七章5～8節，先知明白指出人生ê兩條路，一條是倚靠人ê道路，另外一條是倚靠上帝ê道路，先知以生長tī曠野中沙漠ê樹á做例說明，兩者之間ê差別，ná親像tī詩篇一篇3～4節，詩人以栽tī溪邊ê樹á來形容伊ê茂盛kap發達，耶利米書十七章7～8節講倚靠耶和華ê人生，mā是án-ne：「倚靠耶和華，以上帝為伊所倚靠ê人有福氣，伊beh像水邊所栽ê樹，樹根伸入水中，m̄驚旱災、燒熱，樹仔ê葉仔時常chiah青，tī乾旱無水ê年頭mā bōe煩惱，並照時chūn結果子」。Chit種描寫實在充分表現出倚靠上帝ê人生伊ê完美結局。

Tī實際生活中，確實有真chē ê基督徒，in信仰ê果實，是超過人所想像ê，上帝無限ê恩典kap賜福tī in身上，ná親像教會生活中，真che7tui3上帝忠實ê傳教者，以in當時生活ê清苦，根本無可能有加ê能力去教育kiáⁿ兒完成高等教育，但是有一kóa人soah有非常完美、理想ê kiáⁿ孫，是超出人所ē-tàng理解--ê。就是先知耶利米所講--ê，chiah-ê專心倚靠上帝ê人，in ê人生ná親像栽tī溪邊ê樹á，無論外在境況如何，in lóng受tio̍h充分ê保護kap照顧（來自上帝ê祝福！），tùi聖經中約瑟ê生涯，咱mā thang看出，伊是一位完全倚靠上帝ê人生，無論伊ê境況比如何，伊所表現ê人生內容，就是完全確信上帝，hông賣做奴才ê時、tī衛兵長in-tau做總管ê時、因為堅信上帝受害tī獄中，以及後來chiok chhiaⁿ-iann7teh 做埃及首相時，伊所表現出來ê生活，就是倚靠上帝ê人生。

倚靠上帝ê人生，難免mā會tī人生過程中有真chē問題，但是有上帝ê保守kap照顧，問題ē-tàng得tio̍h化解，因為倚靠上帝ê人，伊kap上帝之間已經確立了對上帝ê信賴、尊敬、欣慕kap疼ê關係，人生kap上帝若有chiah-ê信仰ê因素ê存在，自然kap上帝ê關係是非常有價值，chiah-ê就是幸福ê人生條件。

（二） 敬畏上帝，行祂ê道路ê人生（詩篇一二八篇：耶利米書七章23節）
只有倚靠上帝，iah無法度完全表現一個人對上帝信仰ê具體、積極ê心態，所以一個確信上帝，倚靠上帝ê人生，必須以敬畏ê心去行上帝所要求ê信仰ê道路，這就是咱所beh思考ê問題，敬畏上帝，行祂ê道路ê人生是幸福ê人生。Tī路加福音十一章27～28節mā有記載，主耶穌辯駁猶太人ê言論了後，有一位婦人聽了真感動才o-ló耶穌講：懷你胎ê kap乳養你ê有福了（十一章27節），但是，耶穌講：是，soah不如聽上帝之道才遵守ê人有福了（十一章28節），tī-che對話中，咱ē-tàng了解真正ê幸福ê人生，是建立tī一個人ē-tàng敬畏上帝才行祂ê道路ê人生，tī教會ê信仰生活中，咱定定ē-tàng體會tio̍h chit種信仰所帶來ê人生ê幸福。

台灣教會ê頭一位基督徒高長，伊初信基督時一無所有，心內只有上帝，同時mā完全行祂ê道路，chit種結束，造成了上帝ê祝福tī伊ê kiáⁿ孫ê身上，這是台灣教界所留落來ê信仰ê美談！確實，一位真正敬畏上帝koh行祂ê道路ê人，必定會受上帝ê祝福，有上帝祝福ê人生就是幸福ê人生。

咱看詩篇一二八篇1節「只要敬畏耶和華，遵行祂道ê人，便是有福」，第2節以下tio̍h開始列出具體ê受祝福ê人生，食家己所得ê食物，享福kap事事順利，非常完美理想ê人生，bó͘-kiáⁿ ê親愛kap平安、健康（第3節），同時chit種上帝ê祝福ài繼續到伊ê kiáⁿ孫（第5～6節），雖然只有六節聖經，但是ē-tàng完全看出一位敬畏上帝行祂ê道路ê人，上帝án怎賜福，先知耶利米提起上帝只吩咐以色列人一件tāi-chì，就是聽上帝ê話，「我就做lín ê上帝，lín mā做我ê人民，lín行我所吩咐ê一切道，就ē-tàng得福」（耶利米書七章23節）。先知tī-chiah所講ê kap詩篇一二八篇1節ê內容完全仝款，就是敬畏上帝kap行teh祂ê道路ê人生。

對一位倚靠上帝，確信上帝ê人來講，伊ê生活ê主要內容，必定是敬畏上帝，而且完全行祂ê路，意思就是照上帝ê道理、上帝ê要求去生活ê人生。

Tī-chia咱必須明白「敬畏上帝」ê意思，敬就是尊敬、敬疼ê意思，畏乃是有驚惶ê意思﹝義﹞（心服chiah尊敬），基督徒是m̄是敬畏上帝直接關聯到咱ê生活，當咱生活tī正面ê世界時，咱會體會tio̍h上帝ê仁慈，就會敬愛祂，ná是咱生活tī反面ê世界時，上帝ê公義就會顯現在咱身上，咱就會驚惶上帝chiah反悔認罪。Chit種敬畏ê心態，to̍h是基督徒信仰生活ê真正人生內容，人就會體會出「敬畏耶和華，是智慧ê開端」，chit種智慧ê人生，是引chhōa人活tī上帝ê旨意ê世界。Tī-chiah，人所有ê表現lóng是符合神旨ê要求，mā就是行祂ê道路ê人生，mā就是咱所強調ê幸福ê人生（箴言八章32～36節）。

（三）喜愛tòa-tī上帝ê聖殿ê人生（詩篇八十四篇1～7節）
主基督教示學生講「因為你ê財寶tī hia，你ê心mā tī hia」（馬太福音六章21節），咱ē-tàng了解主基督所講ê chit句話ê意義，tī人生中，咱mā有chit種經驗——有時為tio̍h一件tāi-chì或者事業來專心投入，soah疏忽了其他ê存在，譬如有一kóa事業家全神貫注tī khang-khè上，來疏忽家庭chiah產生悲劇ê情形時常聽會tio̍h。確實，人ê財寶tī hia，人ê心mā tī hia。一個受上帝祝福ê人，伊kap上帝ê關係必定是建立tī完美ê過程中，chit種完美ê信仰過程，成做伊kap上帝之間ê心靈契合，伊是基督徒個人ê信仰生活。當然包括伊ê心靈kap上帝間ê靈交。以及個人teh屬靈ê追求、靈修、研經、默想等等，lóng會幫助人kap上帝之間建立美好心靈ê果實。除了chia—ê，信仰者欣慕憶著上帝ê聖殿，mā是成就了人kap上帝tī心靈上ê互動。一個憶著、欣慕上帝ê聖殿ê人，伊ê心必定充滿tio̍h對上帝ê敬仰kap愛慕，因為聖殿是上帝tī ê所在，所以一個欣慕、意愛上帝ê聖殿ê人，自然就會敬仰上帝，而且以上帝做伊人生ê準則，chiah實踐符合上帝心意ê生活，是發自內心ê深深喜愛，就是信仰ê動力。同時chit種欣慕意愛上帝ê聖殿ê行為，mā包含一個人因為信仰chiah表現出來ê行為，因為信仰者若無行為是無價值ê，是死ê信仰，chit種信仰對人kap社會lóng無好處。

一個欣慕意愛上帝聖殿ê人ê生活，確實m̄是將伊當作一種儀表或者形式，he是通過上帝ê聖殿ê實際（積極）ê運作，來表現出具體ê信仰內容tī社會中，這就是咱tī教會生活中一直強調ê有見證ê信仰，m̄是像法利賽人式--ê，只有外表ê形式。

Koh借tio̍h參與kap投入上帝聖殿ê種種作為，成做信仰ê動力，進一步發揮到ē-tàng造就、幫助對人類社會有影響力ê基督徒生活，這chiah是聖經中所提起ê欣慕上帝ê聖殿實在ê內容。詩篇八十四篇2節「我羨慕夢想耶和華ê庭園。我ê肉體、我ê心腸、向永生上帝呼籲」表示全人格（感情、理性、意志）ê欣羨上帝，chit種出自全人格ê信仰決定，自然會造就有深度、有內容ê人生。Chit種人生，一方面對人類會有正面ê價值，另外一方面伊本身mā成做領受上帝無限祝福ê人生。

咱若看詩人tī詩篇八十四篇6～7節ê說明，伊tī心靈上所得tio̍h ê喜樂kap祝福是無tè比﹝無thang可比﹞--ê，目屎山谷變做泉源之地，koh有秋雨ê福蓋滿了kui山谷，in teh行ê時一定會koh-khah食力。

Chiah-ê描寫lóng說明了，身在荒蕪沙漠者ê人生體驗，大概無一項祝福會比chit種泉源以及秋天ê雨水，koh jú行jú有力量thang可比--ê。詩人ê體驗，確實是對耶和華ê聖殿ê羨慕kap夢想ê結果。

因此咱ē-tàng講，幸福ê人生是來自心靈欣慕上帝ê聖殿。伊ê重點是tī「心」所產生ê愛意、ǹg望存有愛心kap上帝之間ê心靈契合！（以男女之間ê交往ê狀況tio̍h ē-tàng明白欣慕kap互相意愛ê實在！）

結論：追求人生ê福樂，是人生生活ê重點，雖然幸福ê觀點kap定義，每一ê人無仝，但是對一個信仰者來講，伊確實是建立tī kap上帝ê正確關係頂koân。