《草地囝仔做牧師》

 | | | 轉寄

靈命ê繼續kap成長

作者 林宗要 2011.01.16

約翰一書一章5～10節

咱bat講過beh保tiâu「永生之道」，需要kap性命源頭ê主不斷來接觸，mā只有建立tī án-ne ê關係ê時，靈命chiah會發揮伊ê無限ê價值。

主耶穌不斷要求屬祂ê基督徒必須ài kap祂有人格ê結合，siōng具代表--ê thang tùi約翰福音十五章主是真葡萄樹ê比喻了解。因為離棄了性命根源——主耶穌，會成做乾枯ê性命，成做hō͘人棄嫌、放sak ê kap hō͘人踏ê廢物。

咱kap主耶穌ê交往，to̍h是基督徒信仰生活中bē-tàng欠缺ê屬靈過程，必須經由基督徒kap人ê關係來見証基督徒kap主耶穌ê實際關係。

基督徒屬靈性命重要ê存在，to̍h是見證主耶穌，tī人ê社會中，將「永生之道」紹介tī現實ê社會中。當然現實ê人，in看bē-tio̍h性命之道ê主耶穌，in所ē-tàng看tio̍h--ê，只是基督徒而已。而且人ê性格是偏重tī現實ê狀況，一般人ê興趣，tī in所看會tio̍h ê世界，這to̍h是咱時常teh強調ê，基督徒是主耶穌ê見證人，咱ài hông看出主耶穌ê存在，就是ài hō͘主耶穌成做基督徒身上ê生活者。若想tio̍h che，咱就必須用siōng謹慎ê心情來經營咱ê信仰生活。既然咱teh代表主耶穌，咱ê一舉一動lóng tio̍h活出有主耶穌價值ê內容。

雖然咱ê信仰是因信稱義，但是咱必須了解，咱ê生活是信仰ê siōng好解釋，這to̍h是約翰所講：「Bōe-sái疼ē-tàng看見ê兄弟，若ē-tàng疼看bōe-tio̍h ê上帝」。所以自稱是基督徒ê人，teh生活上ê表現，若是不法、惡質，kap人ê關係真惡劣ê時，相信伊ê基督教信仰，就bōe受肯定kap認同，tī chit種基督徒ê現實中，福音ê宣揚必定真困難。因為基督徒bōe-sái得tio̍h人緣，就bōe-sái吸引人，mā會hō͘人看輕，基督徒tī現實ê生活環境中，若無法度受人肯定，伊ê信仰生活就bōe真理想，原因tī伊bōe-tàng用生活來解釋信仰。咱tùi人類siōng早ê獻祭，「亞伯kap該隱」chit-ê事實來說明人類ê悲哀以及信仰kap生活ê問題。

為何上帝只接納亞伯soah無接納該隱所獻ê祭物？因此來致使兄弟之間ê不幸。Mā可能有贖罪ê問題，但是siōng主要ê，to̍h是上帝向該隱所講e5hit句話：「你若行了好，kiám bōe蒙悅納？你若行了無好，罪就phah tī門前」（創世記四章7節）。Tùi上帝所講ê咱thang了解一件事實，to̍h是獻祭kap生活是一致ê關係，無好生活配合ê獻祭，m̄是上帝所歡喜，祂所歡喜ê祭，是信仰者ê信仰kap生活一致，主耶穌tī馬太福音五章23、24節所講：「你tī祭壇上獻禮物ê時chūn，若想起兄弟向你懷怨，就kā禮物留tī壇前，先去kap兄弟和好」。Mā to̍h是kap人ê關係iáu未解決好勢ê時，必須先kā祭物khǹg好，先去處理好kap人ê問題了後，你ê祭禮chiah會hông悅納，mā to̍h是講，你必須先處理好人ê關係，然後chiah去獻祭hō͘上帝，這是基督教信仰ê內容。

Tī-chia主耶穌向咱提起禮拜ê先決條件，to̍h是先調整kap人有良好ê內容，koh再進一步入來kap上帝ê關係。因為上帝所歡喜ê禮拜，是建立teh用人間ê和樂做基礎。假使chiah-ê向祂敬拜ê人kap別人ê關係真慘，試想上帝kám會歡喜？

用父母kap kiáⁿ兒ê關係來講，父母心目中可取ê kiáⁿ兒，必定是tī社會上、khang-khè上kap別人有良好ê表現，主耶穌tī馬太福音六章14～15節：「Lín饒赦人ê錯誤，lín ê天父mā一定會饒赦lín ê錯誤，lín bōe-tàng饒赦別人ê錯誤，lín ê天父mā一定bōe饒赦lín ê錯誤。」tùi chia ē-tàng完全了解，主耶穌所教示ê信仰kap禮拜，以及信仰kap疼，chit種倫理ê原則，是基督徒tī上帝面前「因信稱義」ê真理，是bōe-sái分割--ê。因為基督徒白白領受上帝所賜豐盛恩典，同時必須ē記，上帝要求伊ê子民有純潔、善良ê心態，去對待伊生活kho͘-á中ê同胞，tī chit-ê情形中，基督徒chiah會真正發揮上帝ê恩典tī伊ê身上ê偉大ê效用。

教會ê存在mā是為tio̍h che，伊ê關鍵tī信徒ê靈命，tī chit-ê情況之下，基督徒屬靈ê性命，chiah ē-tàng維持，chiah ē-tàng成長，自然就有結實ê內容，但是ài如何達成？

一、 體驗赦罪ê事實
上帝賜hō͘人ê性命，是祂親身賜予是有屬上帝ê完全性，tī創世記講：「人被造有上帝ê形像」，chit-ê形像，是形成人ê價值kap偉大內容ê事實，人ê所以tī被造物中佔有真寶貴位ê主因，to̍h是tī人有上帝ê形像，mā to̍h是中國人所講「萬物之靈長」ê事實，因此tī被造物ê過程中，人是寶貴、有價值ê存在者，上帝koh將管理ê責任，交託hō͘人類，當然上帝mā要求人kap祂有靈ê交往，這是人ê權利kap義務，但是chit種偉大ê價值，soah因為人ê自私kap叛逆犯罪hō͘上帝所棄絕！人類ê性命mā失落，靈性性命，雖然有上帝ê形像，soah hō͘罪惡所掩蓋，是無法度發揮靈性性命有價值ê內容。基督徒必定ē-tàng了解，一個iáu未受贖ê性命是何等ê悲哀，保羅tī羅馬書第三章to̍h是以弗所書第二章11節以下to̍h講tio̍h iáu未接受福音ê人性悲慘ê情形，或者咱mā ē-tàng tùi舊約中詩人講tio̍h hō͘上帝棄絕ê心靈，是何等空虛來了解，因此chit種本來有上帝形像ê性命，因為罪來完全墮落，chit種墮落ê性命，必須ài經由上帝完全ê赦免，chiah ē-tàng回復上帝本來ê形像kap尊貴ê性命。因此，每一個人若beh把握chit種屬靈ê性命（mā to̍h是上帝hō͘人類真正有上帝形像ê性命），伊必須ài經由耶穌基督ê救贖，chit種恩典ê事實chiah ē-tàng得tio̍h屬靈ê新性命。除了che以外，無別條路。約翰福音第三章，耶穌kap尼哥底母講重生，尼哥底母是一位偉大人格者，無論tùi人格或者信仰方面，lóng是siōng完美ê人物，但是主耶穌soah慎重kā伊講，必須ài悔改重生，chiah ē-tàng進入上帝ê國。咱若koh看保羅ê信仰告白，伊bat講：照律法ê義是無thang指責ê，是一位標準ê人格者，但是伊soah講：tī眾人中，伊是罪魁（siōng pháiⁿ ê人），chiah-ê事實lóng teh kā咱講一件事實，to̍h是虧欠上帝榮耀ê人類，無法度自救！任何偉大ê道德kap修為，lóng無法彌補人tī上帝ê恩典來成做新ê存在者。

因此靈命繼續ê先決條件，是tī人必須ài體驗tio̍h上帝豐盛赦罪ê恩典，信仰ê生活就是ài無時無刻過認罪生活。

二、 行tī光明中（靈命ê根據）
一個犯罪ê性命必須經由上帝ê恩典，藉主耶穌救贖ê行為，來重新得tio̍h上帝所賜ê靈命，但是chit-ê靈命必須ài有繼續ê成長，chiah ē-tàng發揮靈命內在ê價值。

Tī-chia，咱必須注意一件事實，to̍h是靈命ê繼續kap成長，因為伊是性命ê本質！這是咱所深知--ê。一個性命ê誕生，是一件喜樂ê tāi-chì，tī台灣社會，過去有真chē人，因為新性命來臨chiah用演戲、請人客ê一kóa方式來慶祝。M̄-koh chit-ê性命若bōe成長，就會成做眾人ê一種負擔，會hō͘眾人tùi喜樂變做憂愁kap悲哀！相信tī咱日常生活現實中，lóng thang體驗tio̍h chia種情形。一個bōe-sái成長ê性命，以及有生長soah無內容ê人，伊ê存在對人類社會將無正面作用，顛倒危害人類！Hiah-ê歹徒，雖然mā一表人才，但是伊ê行為soah是不法kap惡毒，chit種性命就是無價值ê性命。

基督徒屬靈性命ê原理mā是án-ne，靈命beh繼續，同時mā tio̍h成長。Tī咱現今ê教會生活中，有真chē基督徒ê靈命，無法度繼續，甚至tī半途就失落了屬靈ê活命。Chiah-ê基督徒to̍h是tī平常ê屬靈生活中，無吸取靈命所需要ê養分，tùi此thang知，靈命確實需要靈糧來維持。基督徒靈性若營養不良，是一件驚人ê tāi-chì，伊無抵抗力來對付外來入侵ê攻擊者，真chē人ê所以喪失性命，to̍h是tī in ê性命中，欠缺chit種抵抗力所組成。因此咱知影，脆弱ê靈命，是基督徒ê致命傷，破病kap衰弱，對性命是一種威脅，是真驚人ê事實。但是約翰tī-chia kā咱講，beh克服靈命脆弱siōng基本ê辦法，to̍h是行tī光明中，因為性命ê源頭ê上帝是光，因此一個屬上帝ê人，若行tī烏暗中，就無符合伊ê身分，約翰一書第一章5～6節「上帝是光，祂完全無烏暗，所以若咱講咱kap祂有團契，soah iáu生活tī烏暗中，咱to̍h是講白賊，無行真理。」kap上帝交往ê先決條件，to̍h是行tī光明中。

因為kan-ta講是真實，真實是上帝，chit種行tī光明中ê情形，to̍h是分別基督徒ê真偽性格。基督徒是屬上帝ê人，因此伊ê行為，必須ài有屬上帝ê真實性，亦to̍h是光明ê實在。一個人若肯行tī光明中，表示伊確實需要光明，mā深知人間ê烏暗面，mā只有主耶穌ê光，chiah ē-tàng帶hō͘生活tī烏暗中ê人，有光明ê生活。這to̍h是屬靈眼光ê phah開，ē-tàng看出家己真正ê需要，koh靠上帝ê恩典kap能力，去實行光明中ê生活，mā to̍h是咱時常提起，「了解家己ê罪狀」。

Tī路加福音十八章法利賽人kap稅吏祈禱ê比喻，咱thang完全了解，一個罪人tī上帝面前ê情況！

罪人需要真光hō͘ in照射，chiah ē-tàng辨別符合上帝旨意ê人間ê行為，伊ê主因tī上帝ê kan-ta講是辨別人間所有事物ê基準。人若有chit種辨別事物ê準繩，生活就會符合主ê要求。這mā to̍h是約翰極力ài咱行tī光明中ê原由。行tī光明中，一方面是人kap上帝之間ê交往，另gōa一方面是人kap人生活內底有光明ê表現。當一個人，ē-tàng行tī光明中kap上帝交往，koh ē-tàng tī人間建立光明ê狀況ê時，chit種人生應該是上帝所要求ê人生。

三、 生存tī疼中：（靈命ê現實）
咱講tio̍h靈命ê根據，是人必須行tī光明中，mā知影「上帝是光，tī祂完全無烏暗」。因此，祂無願意屬祂ê人，行tī烏暗中，這是m̄免懷疑ê，mā是基督徒所應該ài有ê天性。但是基督徒（靈命ê持有人）ài確實了解，伊ê屬靈生活ê場所是人ê社會，雖然chit-ê社會充滿tio̍h不幸、悲哀kap惡毒，但是基督徒bōe-sái脫離chit種現實。咱做光做鹽ê所在，是chit-ê現實ê社會。但是社會環境是án怎？咱大家lóng真清楚。Tī-chia現實中，基督徒beh如何發揮伊ê靈命ê內涵tī人間社會中，這是一個嚴肅ê課題。當然to̍h是hiah-ê人siōng ē-tàng接受ê疼ê行為。因為疼是上帝ê本質，伊mā是形成基督徒ê要件，基督徒是hông認為是siōng認bat上帝ê人，事實mā是án-ne，但是咱必須記tiâu約翰所講ê一句話，認bat上帝ê認定標準安在？受洗、讀經、祈禱、參加禮拜、事奉教會？Chiah-ê約翰lóng無認定，伊所認定ê，to̍h是「疼」。因為伊講「無疼，就m̄-bat上帝」。所以認bat上帝確實ê根據，是tī hia-ê人身上是m̄是chhōe ē tio̍h疼，同時chit種疼，ài生活化，實踐tī行為上，m̄是只有嘴講--講或者觀念；是實實在在將疼ê行為表現tī生活中，選美活動主題曲「美是心中有疼」實在無夠，聖經中所強調基督徒ê疼，應該是有行動ê疼，亦to̍h是tùi疼ê實際行動（比如疼所ē-tàng看tio̍h ê兄弟姊妹）來證明咱疼上帝ê生活（chiah ē-tàng疼所bōe-sái看tio̍h ê上帝），這是基督教信仰ê內容，上帝ài咱chiah-ê體驗tio̍h祂ê疼ê人，ē-tàng將chit-ê疼反應tī人間。

英國詩人但尼生（1809～1892）講：「拒絕愛ê人，會hō͘愛所拒絕」kap聖經真理相符合。接受上帝ê疼ê人，必須將tsit-ê愛kap人分享。德國學者歌德（1749～1832，世界三大詩人之一）講：「天有星，地有花，人有愛」基督徒必須了解，咱ê靈命ê繼續kap成長，是確立tī信徒疼ê生活中。因為上帝是疼，所以屬祂ê信徒，必須ài生存tī疼中。Mā因為上帝ê國伊ê本質to̍h是疼，伊是tùi疼來成立ê。

上帝國ê信仰是基督徒siōng大ê希望kap安慰，伊是建立tī人類ê被疼ê基礎上。

綜觀前述，基督徒靈命ê繼續kap成長，是基督徒生活中所bōe-sái疏忽ê事實，咱必須用嚴謹ê心態，去體驗赦罪ê恩典；然後行tī光明中，活tī疼ê世界。因為in kap靈命有深切ê關係。