《草地囝仔做牧師》

 | | | 轉寄

勵進ê意志

作者 林宗要 2011.01.09

腓立比書三章1～14節

人類jú文明，jú ē-tàng用家己ê能力去推動、開發生存ê世界，hō͘人類ē-tàng tī文明中生活，人ê問題就jú複雜。就ná現代ê原子能去發展幫助人類ê生活，無論tī科技或者醫學上lóng有良好ê結果，但是mā是危害人類生存ê驚人武器。有人認為推動人類生存關鍵是經濟。近來世界ê經濟競爭真激烈，用第二次大戰了後ê德國kap日本做例，這兩國理當hông phùi嘴瀾，但是事實上，這兩國tī現代ê國際舞台頂佔真重要ê位，主因是tī in ê經濟力量非常厚。Tú親像台語俗語講：「有錢使鬼會e磨」，tī真chē方面只要有經濟能力，對tāi-chì ê幫助真大，近年來台灣tī國際政治上是劣勢，中國大陸ê打壓，一直想beh消滅台灣ê政治空間，佳哉台灣近年ê經濟建設相當出色，若無台灣ê處境一定會koh-khah艱難。Tī現實ê環境中mā是án-ne，有經濟能力ê人beh做任何tāi-chì lóng ē-tàng放手去做，成功機率大，事實上chiah-ê好額人ê子弟ê才智kap能力無一定比一般人狀況khah好，只是in有一個真有利ê條件，to̍h是有上世人ê經濟做後盾，tùi此咱ē-tàng體會tio̍h經濟環境是推動世界ê一種力量，但是iáu有真chē ê問題並m̄是經濟ê力量ē-tàng去化解ê，咱ē-tàng tùi好額ê國家ê社會問題去了解chit種事實。愛情ê力量mā是hō͘人認為siōng有影響力之一，俗語講：世界ê運命是掌握teh推動搖籃ê手，所強調ê是母愛，確實是án-ne，一位對世界運命有影響力ê人物，通常是因為背後ê母親ê教養kap培育所產生，以上ê影響力lóng存在，但是並m̄是絕對--ê，tī人ê一生中有一件非常重要ê，是人ê心，mā to̍h是人ê感情kap意志，是人生生活ê關鍵。近代學說對人ê心理相當重視，確實人ê情意是推動人類生存ê主要關鍵，同時伊mā是形成人類比其他動物khah優秀ê重要因素，這to̍h是人所以成做萬物之靈ê主因，一方面是人有上帝ê形象kap靈性ê存在，另gōa一方面因為人ê心志成做人真大ê生活動力，人ê心志通常用teh思考、選擇、實行ê過程，chit-ê過程to̍h是所謂ê人格行為，雖然其他被造物中mā有chiah--ê，但是soah無比人類有志氣、有作為ê決心kap毅力。Tùi人對世界ê真假善惡，是非判斷，thang看出人ê人格運作。仝款是人，但是gín-á kap成人tī人格表現上就有差別。Gín-á因為iáu未成熟，因此對選擇kap思考判斷ê問題無一定準，譬如一個iáu未tàng辨別是非ê gín-á，有時會做出真危險ê動作來，比如刀傷、燙傷、火傷等等。In ê人格iáu未成熟，所以父母ê教養koh-khah重要。現代生活追求自由，父母若bōe-sái完全了解自由ê真意，soah用kù-chāi伊去ê方式教養kiáⁿ兒ê時，往往會發生一kóa不幸ê後果。今á日青少年犯罪增加，主因就tī父母對kiáⁿ兒ê教養，平時父母無論tio̍h或者m̄-tio̍h lóng盡力滿足kiáⁿ兒ê需求，無hō͘ in對「是kap非」ê問題糾正ê機會。日後chit-ê青少年若有需求不滿ê時，就有可能用異常ê手段設法得tio̍h所ài ê物件，chiah來犯法。可見人格ê健全是一件重要ê事實，這kap kui-ê人生有決定性ê關係，通常是包括tio̍h思考、選擇、決定kap實踐ê意志。

單一意志——gín-á時有衝動ê動作kap幼稚ê行為！複雜意志——成人ê人格、慾望、想像，經過判斷chiah去實行。譬如：對食物，無成熟ê人或者異常人格者會無選擇去食物件，但是成熟人格者會kā伊辨別、判斷了後chiah去食，teh生活中咱mā時常看tio̍h gín-á或者異常人格者m̄管啥物物件lóng塞入去嘴內！成功ê動力是由成熟ê人格，ē-tàng思考、選擇、實行、發揮意志力。基督徒勵進ê意志mā kap chit-ê原理仝款，相信每一個信徒lóng想beh成做理想可敬ê基督徒，chit-ê目標ê完成是建立tī基督徒對信仰ê意志力。可惜ê是現代基督徒tī信仰生活上往往欠缺chit種力量，致使表現出來ê信仰生活是有名無實ê，行為無檢點、性格奇怪，chit種情形當然bōe結信仰ê果實，顛倒成做異端ê信仰。Tī腓立比書三章1～14節，咱ē-tàng看出保羅ê人格所表現出來ê信仰意志，1）伊思考基督ê救恩了後，2）伊選擇伊當teh行ê人生方向，伊用認bat基督為至寶，3）然後伊將chit-ê理念付諸實行；這to̍h是保羅ê傳道生涯，伊用「我活teh是為基督」，chit-ê事實來表明伊ê人格kap全人生涯。Chit種信仰是值得基督徒去效法ê偉大信仰內容。

一、 Kap上帝建立良好ê關係
基督徒ê信仰意志，伊ê對象siōng主要是以基督為主，因為祂是信仰ê開始kap終點。所以基督徒ài確立家己kap上帝ê關係，若無清楚ê時，其他ê狀況就真pháiⁿ講啊。基督徒對上帝ê意志必須ài相當ê謹慎警醒。因此kap上帝ê關係，是信仰生活ê基準，kap上帝ê關係良好ê時，信仰生活自然通順，伊ê結果是有正面ê價值。若是án-ne，信徒對上帝ê意志siōng需要ê是啥物neh？Tī信仰ê世界中或者是項目siuⁿ-chē，但是其中一項非常重要ê to̍h是聽從上帝ê話，遵行上帝ê旨意。彼得tī使徒行傳五章29節「順從上帝無順從人是應該--ê」，相信tī上帝ê眼光中，祂要求屬於祂ê子民siōng迫切ê to̍h是聽從上帝ê命令，這to̍h是信仰，因為信仰to̍h是順服ê意思。Tī撒母耳記上卷，上帝通過撒母耳向掃羅王所講ê to̍h是chit種順服ê信仰，因為耶和華所喜樂ê祭拜to̍h是人ê順從「聽命勝過獻計祭，順從勝過公羊ê油」（撒母耳上十五章22節），基督徒必須用聽上帝ê命令作為phah拚ê目標。保羅ê信仰表現是尊主為大。表現出主基督ê榮耀tī伊身上是伊生活ê全部內容，對信仰ê主有所交待，mā to̍h是生活tī主ê旨意之下，這是伊面對上帝ê基本條件。Chit種信仰ê建立自然tī生活上就ē-tàng表現出對上帝ê服從，kap發自內心ê尊敬。因為若無尊敬ê心，tī伊ê人生中就無可能表現出順服ê信仰，敬重主是基督徒信仰ê重要因素，因為這關係tio̍h基督徒對主耶穌信仰ê態度。你看主是án怎ê人物？是一般人，是偉人，是先知，或者是為你捨命救贖你ê救主！由你對主耶穌ê看法來決定一個基督徒對主耶穌ê感情，因為尊敬ê內容是tùi價值來評判。對上帝價值ê認定形成基督徒對上帝ê心態來成做信仰內容，tī現實教會中，基督徒所表現出ê信仰內涵lóng對上帝ê價值評判ê根基。Tī一般未信者中，對上帝ê看法kap tī基督徒問對主耶穌ê觀點lóng無仝，同時tī信徒中mā有所分別，主因tī伊對上帝ê理解kap體驗無相仝。因此基督徒ài tī信仰生活中建立信仰ê意志，siōng重要ê是beh確立kap上帝之間ê人格關係，to̍h是對上帝ài順服，對基督ài存敬重ê心去經營信仰生活，因為一個信徒ài尊敬基督，chiah ē-tàng活出以主為首ê生活。自然所表現出來ê生活ē-tàng符合主ê要求，tùi此to̍h ē-tàng看出人ê理想kap正確ê人生價值。

二、 對你本身——肯定家己疼家己
勵進意志ê重點，一方面是面對上帝，已經如頭前所講ê。對家己mā是件重要ê現實。

Tī信仰ê世界，大多數ê人tiāⁿ-tiāⁿ重視心靈ê追求強化，soah疏忽了現實ê人生部分，信仰ê對象雖然是看bē-tio̍h ê上帝，但是soah實際發生tī人ê生活中，所以對信仰ê觀點，tú親像約翰所言，必須tùi看會tio̍h ê人類去見證看bē-tio̍h ê上帝。約翰一書四章20節「無愛看會tio̍h ê兄弟，就bōe-sái疼看bē-tio̍h ê上帝」。約翰tī-chia已經完全解釋了咱ê信仰。一個對上帝熱心ê基督徒，若tī現實生活內底對人對家己lóng無盡本分，試想這kám ē-tàng算是可取ê基督徒？相信咱lóng ē-tàng了解，一位hō͘上帝所肯定ê基督徒，伊m̄-nā tī信仰上有優秀ê表現，to̍h是tī現實生活中mā有正面價值ê人生表現，án-ne chiah ē-tàng算是一位理想ê信仰者。

為何主耶穌一直批評法利賽人ê信仰（馬太福音二十三章），主因tī chiah-ê法利賽人只偏重tī對上帝方面ê表現，soah疏忽了人際關係ê現實面。Chit種信仰是失敗偽善ê，當然mā bōe結出聖靈ê果子，是無價值ê信仰。所以基督徒ê信仰應該重視心靈，同時mā重視看會tio̍h ê自己，hō͘家己ê存在ē-tàng真正替主耶穌作見證，mā to̍h是ē-tàng有主ê清芳之氣，達成上帝對祂子民ê所要求ê——ē-tàng實實在在ê成做上帝所喜樂ê殿。這是基督徒phah拚ê方向。保羅tī羅馬書教咱ài疼惜家己，善用上帝所賜各種無仝ê恩賜，去盡各人ê本分，phah拚建立chit種信仰生活，bē-tàng行入極端ê信仰，只看重屬靈ê事實，看現實生活是垃圾，自視清高，tī現代ê基督徒中mā有chit種信仰態度ê人，當然chit種極端ê信仰表現tī現實ê人生是bē有美好ê信仰見證。因此一位有理想ê基督徒必須tiāⁿ-tiāⁿ策勵家己，ē-tàng完全遵行上帝ê旨意來生活，一方面保守家己ê信仰，另gōa一方面phah拚發揮信仰ê內容，彰顯主耶穌ê榮耀，chit種決心，是基督徒對家己ê勵進意志ê siōng好表現，tùi此thang看出信仰ê果實經由基督徒chit種意志表現出完全ê人生內容。

三、 對人——疼鄰比如己
Tī現實ê信仰世界中，基督徒所接觸ê m̄-nā是家己，iáu有家己以外ê人，這是基督徒信仰生活發揮ê對象，經過kap人ê接觸，基督徒ê信仰內容tiāⁿ-tiāⁿ會得tio̍h無仝程度ê評估，因為現實ê人類所看重ê，khah m̄是玄奧ê信仰真理，卻是基督徒平日生活ê表現，這to̍h是聖經強調ê信仰ê生活。Mā to̍h是信仰kap生活ài相仝，因為任何偉大ê信仰教義或者真理，對未信者來講是無興趣ê，mā無心去理解，但是當in tī世俗ê世界中發現一位有主耶穌氣質ê基督徒ê時，in會去注意，甚至會表現出好感。Tùi chia看出一個好ê基督徒是hō͘人kap福音有一個接觸ê點。這to̍h是傳福音siōng有利ê器具，mā是每一個基督徒必須細膩去思考ê問題。咱必須善用上帝所賜各樣恩賜，去發揮上帝tī咱身上ê信仰價值，存在社會中，這to̍h是基督徒活tī現實生活中ê價值。過去基督徒時常用聖徒自居，chiah稱未信ê人是世俗人，tī過去ê教會生活中時常有chit種聖俗之分，特別強調基督徒ài分別為聖，或者者是受保羅tī哥林多後書六章所影響，「Lín一定ài tùi in中間出來，kap in分別」（哥林多後書六章17節），確實基督徒ê生活ài有所分別，但是tī-chia所指，khah m̄是隔離ê意思，是表現上ê無仝，tú親像頂面所講ê用基督徒美好ê氣質ê人生內容去感化hiah-ê世俗人。這是基督徒良好信仰ê生活態度，是一切信仰ê根本，mā lóng tī「盡心盡力疼主你ê上帝，koh ài疼人如己」。Chit種聖經ê中心思想，是基督徒信仰意志bē-tàng欠缺ê生活重心。因為對人ê態度是印證基督徒ê信仰中心問題，to̍h是kap上帝ê關係，mā to̍h是約翰所講ê tùi疼看會tio̍h ê兄弟（人類）chiah證明咱疼上帝ê信仰。所以一個真正ê基督徒必定會用疼別人如己ê信仰去見證上帝ê疼ê生活者，chiah thang完成主基督ê理想「願你ê國降臨，願你ê旨意行tī地上ná親像行tī天頂」，這to̍h是主耶穌向世人紹介ê天國真理。Tī上帝ê真理中，天國m̄是只限定tī來世而已，tī現實中人就有可能實現活tī天國ê事實，那mā to̍h是tī人生中去成全上帝ê旨意。只要屬於祂ê人有chit種心態kap chit種生活內容to̍h是活tī天國啊。有盡心盡力疼上帝koh有疼鄰如己ê理想生活內容，這是基督徒勵進意志所必須具備ê根本信仰。

當然人ê意志力是軟弱無完全ê，基督徒ài tī伊ê人格中追求那完全ê，ài把握上帝！M̄是已經得tio̍h，是向chit-ê標竿一直走，chit種期待，是基督徒勵進ê意志動力。