《草地囝仔做牧師》

 | | | 轉寄

淨化ê動力

作者 林宗要 2011.01.23

約翰一書四章7～21節

基督教ê三大真理，信、望、愛。有人用保羅、彼得kap約翰來做代表。保羅tī伊ê信仰中siōng強調ê to̍h是因信稱義ê真理，羅馬書kap加拉太書是siōng偉大ê作品。彼得tī伊ê phoe信中對當時hiah-ê受苦ê基督徒用希望ê信仰來安慰in，相信這是siōng切實ê真理。

Hông稱做疼ê使徒約翰tī伊ê phoe信中充滿ê是基督教siōng完全ê疼，咱看伊ê論調，完全流露出疼ê真諦。今á日咱所讀ê chit段聖經，教示基督徒生活ê真實內容，是tī完全相愛ê生活，雖然保羅tī哥林多前書十三章mā講tio̍h疼ê真理，但是約翰tī-chia kā基督徒講一定ài有相愛ê生活，因為伊是基督徒性命ê根源。咱知影基督徒是hō͘上帝ê恩典所恩膏ê人，mā to̍h是受上帝疼痛ê人。因為祂疼咱，所以祂要求咱必須相愛，因為愛是上帝ê屬性，tī創世記記載：上帝用祂ê形像創造人。一般人認為to̍h是指人有上帝ê屬性——愛，mā to̍h是講，上帝創造ê人是愛ê形象。

有學者對約翰福音三章耶穌叫尼哥底母ài「重生」hit件tāi-chì，解釋做tùi疼ê新生。確實約翰tī-chia kā咱講神kap人之間ê連結點是tī疼。

上帝是疼，伊kap世人ê疼無仝，世人ê疼是現實--ê、有條件--ê、無單純ê、片斷ê，被愛ê條件若有變化，疼就會動搖。但是上帝ê愛是純真正疼，特別是對tī無愛上帝ê世人，祂iáu用純真、絕對ê疼，施hō͘ tī咱chiah-ê配bōe起得tio̍h祂疼ê人身上。這to̍h是上帝ê疼kap人ê疼無仝ê所在。

雖然咱是有罪、反背、kā祂對敵，但是祂iáu用祂ê疼，將祂ê孤kiáⁿ耶穌基督賜hō͘咱，贖咱ê罪，這to̍h是約翰福音tī-chia強調咱必須相疼ê原因。

因為若無相愛，就無屬於上帝ê性命，mā就m̄是基督徒。所以相愛ê生活就等於基督徒ê人生。基督徒ê重要課題就是ài親近上帝，持守上帝恩典ê信仰，chit種對上帝ê信仰m̄是tùi研究ê方法或者人生ê智慧chiah來ê，是teh有疼心kap實行疼ê生活。一個人若beh認bat上帝，伊必須先了解疼ê道理，因此咱ē-tàng講認bat上帝ê資格tī疼ê人生。因為只要tī人間社會中，完全實行疼ê生活，個人ē-tàng用愛相待，就無人生ê問題、糾紛ê發生。近年來報紙差不多ta̍k工lóng有佛教界慈濟集團證嚴法師ê文章，咱若詳細kā看，就會了解，伊一直teh強調完全無私、付出ê疼，為何全台灣有120 gōa萬ê人加入chit-ê團體，奉獻出in ê心力，無為tio̍h私利，來替社會事工付出？

證嚴提出ài hō͘台灣社會有理想，需要tòa-tī台灣ê人多多付出無私、無求回報ê疼心。Ta̍k pái看tio̍h伊ê文章，心肝內lóng會想講：當咱做一個深深體會上帝疼ê基督徒，kám會不如chiah-ê佛教徒？In肯犧牲、控制家己來響應證嚴法師ê呼召，基督徒實在ài多多反省，因為疼是基督徒ê特徵，基督教ê記號to̍h是疼，因為主耶穌ê生涯，thang用完全ê疼來說明，祂ê降生是疼，祂kui-ê生涯是疼，尤其tī傳道生活中，祂表現出完全ê疼，特別是祂所行ê神蹟，有人講，基督ê神蹟是祂完全ê疼ê結果，因為疼ē-tàng解決任何tāi-chì，任何事物tī完全ê疼chìn前lóng會表現出馴良。聽講中世紀聖法蘭西斯常向毒蛇、猛獸證道，以賽亞書十一章先知描寫彌賽亞治理ê理想國是無紛爭、攻擊而且充滿tio̍h疼kap和平，siōng pháiⁿ ê動物lóng溫純tòa tàu陣，兒童thang kap毒蛇猛獸做伙（十一章1～10節）。

Chit種理想ê統治（國度）是建立tī用疼為基礎ê社會，今á日台灣ê社會景況混亂而且複雜，外人批評做無適合人tòa ê所在，為何án-ne？因為活tī台灣ê二千萬人，ta̍k-ê人自私、心中無疼心（若有mā只是嘴講--講），爭權奪利是台灣社會ê特色，一個欠缺疼ê社會，一定因為減少調和淨化ê因素來混亂。

家庭、尪仔bó͘生活若無愛，chit-ê家庭一定成做問題家庭，因為tī「siōng需要疼ê所在欠愛」，這是今á日社會siōng嚴重ê問題。上帝創造人類，將in安tī伊甸樂園，mā to̍h是有完全ê疼充滿ê所在，tī chia-ê人ē-tàng自由自在kap上帝溝通，chit種有完全ê疼充滿，koh ē-tàng自由自在kap上帝來往ê所在to̍h是天國。傳說彼得ê母親，行為無jōa理想，死了後落地獄，彼tio̍h向上帝求，上帝雖然心內了解，iáu令天使落去救彼得ê母親，其他ê人看見彼得ê母親hông救起--來，紛紛走—去kā伊ê腳掠tiâu，總共有十二ê人，伊看tio̍h，就開始出力kā chiah-ê人踢掉，結果一個一個hō͘伊踢tńg去地獄，彼得tī天堂一直叫母親bē-tàng án-ne做，最後天使看tio̍h彼得母親chit款情形，心酸放手，彼得母親koh落入去地獄，上帝行óa kā彼得講：你了解bo̍h？自私ê人是無法度入天國--ê。因為天國是充滿tio̍h完全ê疼ê所在！基督徒ê人生方向to̍h是面對天國--ê！

因此咱必須tī人生中有充分ê疼，chiah ē-tàng完成成做天國國民ê事實。主耶穌tī主禱文中有一句「願你ê旨意行tī地上，ná親像行tī天頂」，這是基督徒生活ê內容，咱一定ài ùi chit-ê目標phah拚，tī地上建立天國一般ê生活。

一、 基督徒生活ê現實場所：社會
基督徒ài了解一件事實，咱m̄是離開現實，是生活tī現實中，因此基督徒ê人生mā會受tio̍h真chē社會問題所影響。譬如家庭問題，kiáⁿ兒ê教育、khang-khè環境，人生ê遭遇，身軀ê病痛或者是人生真chē逆境，chiah-ê tī人間社會中所會發生ê狀況，基督徒lóng可能體驗tio̍h。因此tī咱ê信仰生活中，基督徒ài建立chit種共識，若無當你tú-tio̍h問題ê時，你ê信仰就會動搖或者產生危機。

主耶穌教示咱是世上ê kan-ta講是地上ê鹽，是說明基督徒ê現實信仰是tī社會。

所以一般ê人ê社會經驗，基督徒mā是必經--ê，因為咱ê存在，是為tio̍h社會chiah存在，這是近代教會特別強調ê基督教真理。

基督教m̄是用基督耶穌ê真理做籬笆特別kā伊圍起來ê一個團體，伊是設立tī社會生活中，因此必須kap社會有所接觸，ài關心社會ê問題，譬如病院ê經營以及啟智中心lóng是咱ê社會關懷之一。

因為咱是生活tī現實ê社會中，現實ê社會hō͘罪所控制，因此咱看見真chē烏暗kap紛亂，尤其是chit kui年來台灣政治ê爭權奪利，比如第八任ê總統選舉國民黨就分主流kap非主流派，社會ê烏暗混亂，交通、建築、空氣、水質、食品、文化等等ê混亂現象lóng teh降低咱ê生活品質，因此台灣hō͘人評定是chiok無適合人khiā起ê環境。基督徒家己知影生活tī chit種環境中，咱ê使命就koh-khah重大，ài如何tī án-ne社會中發揮咱ê信仰，來見證基督耶穌ê福音，同時hō͘咱ê社會成做koh-khah理想、完美ê社會，這是基督徒ê使命。

因為咱ài將天國ê事實實現tī人間，因此咱必須播真chē ē-tàng實現天國ê疼ê籽tī人間。

假使基督徒ê是會生活kap一般人仝款，咱就無可能完成使命，因此家己保持基督徒ê特殊ê氣質，hō͘人了解咱to̍h是基督徒，發出基督徒應該有ê清芳tī人間！

二、 淨化ê動力（疼kap事奉生活ê見證）
咱已經了解，基督徒生活ê場所，to̍h是人生現實ê社會，咱mā知影，目前咱ê社會實在是非常混亂kap驚人，但是基督徒bōe-sái無管，咱tī生活中，必須ài成做光kap鹽來淨化社會，雖然咱ê力量無一定大，但是只要咱堅持咱ê信仰原則，就ē-tàng發揮效用。有人比喻臭腥ê社會是濁水，做淨化ê基督徒是清水，清水chē濁水少，就真緊有淨化ê作用，但是目前台灣ê狀況soah是濁水chē，清水少，因此需要時間kap耐力，只要把握時間去做，有一日必定ē-tàng hō͘ chiah-ê濁水khah清淨，至少ē-tàng漸漸變清。

Chit種信仰ê原則to̍h是基督耶穌所講ê光ê光輝以及鹽ê鹽味，只要基督徒無變質，咱就會看見chit種淨化作用ê顯現。

基督徒若beh了解，咱ê使命to̍h是teh實行淨化作用。Tī濁水中，m̄是增加濁水，是清水，至少伊ê濃度會改變！若是濁水加濁水ê時，就仝款是濁水啊。這to̍h是基督徒ê生存原則。Chit種屬於清水ê信仰生活是啥物？或者是講基督徒ê啥物行動ē-tàng淨化人心？當然是只有基督耶穌ê福音，咱chiah-ê基督徒to̍h是有基督耶穌福音tī身上ê人，咱tio̍h用啥物來向人紹介基督耶穌ê福音？相信siōng有功效ê to̍h是基督徒相愛ê生活，因為伊是基督徒信仰ê根基，主耶穌向學生講「Lín若有互相相愛ê心，眾人因此就認出lín是我ê門徒了」。疼ê生活to̍h是基督徒ê標幟。

因為基督徒若無相愛就無屬於基督耶穌ê靈命tī其中，所以相愛ê生活是基督徒信仰ê根本問題，伊mā是siōng ē-tàng證明基督徒ê信仰ê真理。

伊是基督教信仰所激出ê清芳，接受伊ê人或者社會lóng ē-tàng無限量ê開花結果，tī教會生活中，有一kóa hō͘人認為chiok惡質ê人，因為基督耶穌ê疼chiah完全改變！因為hō͘人完全ê疼所感化。

基督耶穌ê疼比任何物質lóng有力量，只要tī社會中傳播chit種疼ê籽，伊就會淨化人間社會，因為有疼ê所在就有上帝！有上帝同在to̍h是天國，tī天國ê生活無人間ê悲劇kap混亂、紛爭，所充滿ê是和平喜樂，平安kap疼ê付出！

同時tī chit種疼ê生活中，必定有無求代價ê付出，mā to̍h是無私ê事奉，chit種生活方式若tī咱ê社會中充分實行，這kám-m̄是天國ê生活mah？Tī-chia人kap人中所看見ê to̍h是對自然無假仙ê生活，是真純真正ê人生。為何人間社會問題hiah-ni̍h chē？總講一句是無愛心。

耶穌為何ài門徒學習孩童？祂講上帝國是屬於有孩童心思ê人，無欺騙、無假仙、是絕對ê純真！現代ê社會欠缺chit種心態，chiah致使病態ê社會。

三、 落實ê信仰生活（教會存在ê意義kap價值）
基督徒ê信仰生活，必須以疼做出發點來表現出信仰ê事奉，因為伊是信仰ê見證，基督徒若beh告白家己ê信仰ê時，伊必定tio̍h用心經營疼ê生活kap信仰ê事奉。

因為一個人若發出真誠ê心懷去為別人做一件tāi-chì，m̄管hit件tāi-chì ê內容如何，一定會收tio̍h好ê效果。

Tī教會ê傳道史上，教會ê成長，是基督徒付出心力ê自然結果，天下無白食ê食物，存有佳哉ê心態，m̄是基督徒信仰生活ê正確態度。現代企業若略略仔有競爭性，負責ê人若無相當警覺，所有ê員工若無向心力，to̍h是hông篩掉。信仰生活ê原則kap che仝款，基督徒一定ài以戰戰兢兢ê心態來經營咱ê信仰，將咱ê信仰確立tī穩固ê磐石頂，然後chiah有能力去面對一切信仰ê挑戰。

基督徒必須自省：你ê人生ē-tàng提供人啥物？Mā to̍h是因為你ê存在，人án怎kā你評定？上帝創造咱ná親像天使，m̄是造成咱像惡魔，可惜人tiāⁿ-tiāⁿ用惡魔ê姿態經營伊ê人生，這to̍h是上帝痛心ê原因。基督徒ê人生，必須活出比如天使一般ê生活狀況tī人間。

雖然基督徒mā是軟弱無完全ê器具，但是一定ài ùi一個目標，比如基督所講「Lín ài完全，像lín ê天父完全仝款」（馬太福音五章48節）。為tio̍h beh達成chit-ê目標，基督徒一定ài用基督耶穌屬靈ê力量，來建立屬於咱ê信仰ê內容，hō͘咱ê信仰，實實在在kap咱ê人生發生密切ê關係，是經由咱ê完全了解清楚了後，所表現出來ê信仰內容，chit種有內容ê信仰，to̍h是所講ê落實。生活無論任何境況lóng無法度左右、影響信仰者kap基督ê關係，自然會結出真chē信仰ê花果！

Chit種信仰ê花果是榮耀上帝ê材料，是建立教會ê根基，同時mā是淨化社會ê動力！這to̍h是落實ê信仰生活ê偉大ê效力！

只要咱chiah-ê基督徒ta̍k-ê lóng ē-tàng建立án-ne ê信仰，tī任何方面lóng無koh驚惶。

結論：koh再認bat約翰所推介ê疼ê事實，用che來建立咱ê人生，來影響社會，這是教會存在ê價值。伊ê存在m̄是只為tio̍h基督徒，mā是為所有ê人！