《草地囝仔做牧師》

 | | | 轉寄

繁榮ê人生

作者 林宗要 2010.11.21

約翰福音十五章1～16節

基督tī-chia用葡萄樹ê比喻來說明基督徒正確ê信仰生活。
舊約聖經中上帝kā以色列民族當做祂ê葡萄園（以賽亞書五章1～7節），耶利米mā講tio̍h變害ê葡萄樹（耶利米冊二章21節），以西結mā提起（以西結書十九章10節），何西亞書十章1節；詩篇八十篇8節，chiah--ê lóng teh說明以色列人是上帝ê葡萄園，事實上，葡萄園tī以色列人ê生活中佔真重要ê份量，葡萄園有豐收boh，直接影響tio̍h以色列人ê生活水準，tī戰爭中敵人來攻phah以色列，通常lóng會先毀掉境內ê葡萄園，可見伊tī以色列人ê生活中所佔ê地位是何等ê重要。

Tī聖經中葡萄樹象徵tio̍h以色列民族，但是舊約講tio̍h葡萄樹ê時，tiāⁿ-tiāⁿ是負面ê野葡萄，這完全kap上帝ê心意無符合。耶穌tī-chia用真（純粹、完全）來說明祂是真正合神心意ê葡萄樹，kap舊約時ê墮落、荒廢ê野生葡萄有所差別，只有chit種真正葡萄樹chiah ē-tàng真正結實纍纍，任何耶穌以外ê外在條件lóng 無可能引chhōa人親近天父上帝，這是chit段比喻ê主題，只有真正kap祂連結ê人chiah會結出完美ê果子，這to̍h是基督徒ê信仰生活，基督徒ê信仰生活to̍h是結果子ê生活，因為基督徒存在ê意義teh榮耀上帝，這是人生ê目的，耶穌講：「Lín加結果子，我老父就因此得tio̍h榮耀，lín mā to̍h是我ê門徒啊」（十五章8節），這是一句基督徒ài tiāⁿ-tiāⁿ省思ê偉大真理，咱ê生活是beh結出真chē果子（人生ê成就），但是m̄是榮耀家己，是beh將一切ê榮耀歸hō͘上帝！這是基督徒應該有ê信仰生活。

基督徒身上，ài結出真chē果子，施洗約翰向當時ê群眾所講--ê ài結出果子來kap悔改ê心相稱（馬太福音三章8節），因為這是beh kap主結連siōng基本ê要素，beh一生kap基督耶穌連結ê基督徒，必須ài有一個悔改ê心靈，然後chiah ē-tàng tī伊ê身上看tio̍h聖靈ê果子（加拉太書五章22～24節），基督徒ê信仰生活，m̄是kan-nā tī形式上，koh-khah重要ê是ài結符合聖靈ê果子，mā to̍h是追求基督徒品德ê完全，因為基督徒ê品德若kap一般人仝款，án-ne就表明基督耶穌ê靈無tī其中，伊mā是屬於世ê人。Chit種基督徒tī信仰生活上當然無美好ê見證，咱bōe pháiⁿ tùi現實生活中體驗tio̍h chit項tāi-chì。

信仰kap生活ê一致是耶穌基督一直teh要求咱--ê。有chit種信仰，基督徒自然會表現出事奉kap實踐ê生活內涵，這to̍h是福音ê結果！mā是基督徒信仰正確ê過程。一個重生悔改ê基督徒，一定有聖靈ê同在，真自然ê結出聖靈ê果子，因為伊已經hō͘聖靈充滿，tī任何方面lóng有無仝ê人生表現，尤其是tī品德方面koh-khah是án-ne，真自然就會運用伊信仰ê品德去實踐主ê道理，這to̍h是主耶穌所講：「Lín加結果子，我老父就因此得tio̍h榮耀」ê信仰表現，chit種偉大ê信仰ê關鍵tī信仰者必須掠準所信仰ê主有完全ê連結。只有tī chit種狀況之下，基督徒chiah有可能結出信仰ê果子。

咱ē-tàng講結果子ê人生是基督徒生活ê全部。因為基督徒ê存在to̍h是為tio̍h beh結果子，結果子是基督徒ê本分，koh-khah是應該有ê事工，若無結果子，就失--去價值，無盡本分，結果子mā是主ê心意，主耶穌講「這to̍h是我ê命令」（十五章12節），是一定ài做ê tāi-chì，因為主耶穌ê命令是非常嚴肅--ê，若m̄去實行to̍h是抗命，這是非常嚴重ê違規。約翰福音十五章16節「我揀選了lín，koh分派lín去結果子，叫lín ê果子常存」，這to̍h是基督徒ê信仰生活ê真實內涵，因為基督徒是beh完成上帝所託付ê使命——加結果子ê人生。

今á日咱tùi chit段聖經來思考一個問題to̍h是繁榮ê人生，現代人所期待ê，無非to̍h是人生ê繁榮或者人生ê phông-phài，世間上ê人lóng為tio̍h這teh phah拚奮鬥。過去日本kap德國惡質ê作為是hō͘人鄙視、呸喙瀾--ê，但是chit兩個國家tī今á日ê國際地位soah相當重要，甚至有巨大ê影響力，原因何在？Kám講是hiah-ê人bē記in過去侵略ê作為？M̄是！是因為in ê國家繁榮，尤其是tī自由kap經濟制度上，che二國ê經濟狀況當teh領導世界，有人形容日本，過去進行ê是軍事侵略，現在是經濟侵略，今á日ê日本產品全世界lóng有，chit種繁榮提koân了日本人ê世界地位，因此過去雖然有惡質、驚人ê侵略行動，但是lóng已經hō͘ chit-má繁榮ê事實掩khàm阿，因為ē-tàng用經濟ê援助改變hiah-ê人ê觀感，chit-ê事實teh kā咱講繁榮對人類是何等ê重要。

一、 有屬於耶穌基督ê性命
今á日咱tùi信心ê角度來思考繁榮ê人生，當然會kap世俗ê觀點無仝，tī chit段聖經中，耶穌教學生ài如何建立繁榮人生ê秘訣。祂用葡萄樹ê比喻來說明，咱知影果子通常lóng結tī枝頂koân，所以繁榮ê條件，是連結tī基督耶穌ê chit-ê事實上，所有ê基督徒lóng是枝，siōng重要ê就是beh連結tī樹枝chiah ē-tàng發揮枝應該有ê特質，因為基督徒beh kap有上帝祝福ê人生，伊必須先取tio̍h性命，因為若無性命，其他ê一切lóng是空殼。所以性命ê建立是基督徒靈命ê基本問題。同時chit-ê性命必須是屬於耶穌基督ê性命，chiah ē-tàng有屬於耶穌基督ê特質。人ê性命中，有真chē無仝ê領域，有人性命ê重心是tī事業，有人是tī酒色，有人是teh thit迌，有人是tī權力，有人是teh追求真理ê世界，有人soah是tī惡勢力中，咱ē-tàng tùi現實ê狀況去體會人生中各種無仝ê性命價值。

但是咱必須清楚一件tāi-chì，什麼特質ê性命就會結啥物特質ê果子，建立tī酒色頂koân ê性命，所結ê to̍h是酒色ê果子，建立tī權力ê性命，所表現ê mā是chiah-ê腐化ê權力。基督徒ài認清咱性命是beh屬於耶穌基督ê，咱是連結tī祂ê枝，當然m̄是所有ê枝lóng會真繁榮茂盛ê結果子，tú親像做田人所種ê果子樹仝款，仝一欉果子樹頂koân，有一kóa枝仔結實纍纍，有一kóa枝仔soah完全m̄結果子，只有好看ê外表，咱會記得主耶穌tī馬太二十一章有一段咒懺只有茂盛ê外表soah m̄結果子ê無花果樹，tī現實ê教會生活中，確實mā有chit種狀況，受tio̍h仝款ê教示kap教會生活，有一kóa基督徒有理想ê信仰生活表現，有一kóa表現平平，有一kóa人顛倒成做福音ê阻礙，chia-ê種種lóng說明基督徒無仝ê性命層次。

咱ē-tàng koh-khah詳細來思考chit種情形，來省思今á日咱ê屬靈性命。是啥物原因造成你bōe-sái結果？是所khiā ê位無正確，或者是bōe-sái充分吸取teh靈命成長時所必須ài ê養分？是啥物原因，啥物環境，阻礙你靈命ê成長？基督徒必須認清咱ê性命確實是屬於基督徒ê，若無會成做hông棄絕ê廢料，上帝創造人是beh榮耀上帝chiah m̄是成做廢料，咱若bōe-tàng完全了解chit-ê事實，咱ê人生就真有可能成做hông棄絕ê人生。

基督徒信仰生活ê特質是teh結連主，「因為離開我，lín就bōe-sái做啥物。」（十五章5節）雖然人費盡心機beh脫離上主，生活tī自我ê世界，但是用基督ê立場來講，生活tī無上帝旨意ê人生中，chit種ê人生是了然--ê。咱ē-tàng tùi信仰ê角度來看chit-ê問題，約翰福音二十一章，彼得kap耶穌ê學生beh去掠魚，聖經寫講in歸工勞苦soah啥lóng無得tio̍h，chiah-ê人lóng是真有經驗ê討海人，而且魚群真chē，為啥會啥物lóng無？主因是當時學生ê生活，無合主ê旨意，因為主基督要求學生ê m̄是去掠魚，是去傳福音hō͘世人。 Tī信仰ê世界，基督徒必須清楚chit-ê事實，基督徒若m̄是生活tī主ê旨意中，伊to̍h是teh浪費性命，若詳細省思咱ê生活狀況，咱bōe pháiⁿ體會出chit-ê真理。

問題ê重點tī：主真清楚kā咱講「若我離開我lín就bōe-sái做啥物」這是gōa-nih á悲哀ê人生！人生存在ê目的，是teh用繁榮，豐盛當做人生phah拚ê方向，但是若人生狀況ná親像當時ê學生，歸工勞苦soah啥物lóng無，這kám m̄是人生真大ê悲哀mah？「事實kap願望相違背」是人生siōng大ê不幸，主因to̍h是人無kap主結連，自然就無屬於基督ê性命。

二、 時常tī主內面
有屬靈ê性命了後，基督徒必須謹慎經營這屬靈性命ê成長，這to̍h是基督徒ê信仰生活，好親像咱ê肉體仝款，一個性命到世間了後，chit-ê性命必須ài經過真chē成長ê過程chiah ē-tàng有正常ê發展，譬如自出世了後ê性命，必須ài吸收養分來得tio̍h滋潤，hō͘性命正常成長，通常一個人beh達tio̍h結果子（人生生活ê成就或者khang-khè）必須ài經過二、三十年ê時間，自出世到受教育，koh經過專業ê訓練，chiah ē-tàng負擔人生ê重任。對chit項tāi-chì，耶穌教學生「Lín ài時常tī我裡面，我mā時常tī lín裡面，枝若無時常tī葡萄樹頂koân，家己就bōe-sái結果子，lín若無時常tī我內面，mā仝款án-ne，我是葡萄樹，lín是枝，時常tī我內面ê，我mā時常tī伊內面，chit種人就加結果子，因為離開了我，lín就bōe-sái做啥物」（十五章4～5節），tī-che二節經文中非常清楚kā咱講，基督徒kap基督耶穌ê關係，是ài不時tī主內面「Lín若時常tī我內面，我mā一定時常tī lín內面」來說明chit種基督徒屬靈性命ê互相來往，tùi chit種屬靈性命ê結合，基督徒ài得tio̍h屬靈ê滋潤來吸收祂ê話（養分），建立有耶穌基督氣質人生內涵，chit種有耶穌香氣ê信仰者真自然會實踐有神ê疼ê人生出來，kā福音傳揚到人間，這to̍h是主耶穌所講，結實纍纍ê信仰生活，因為tī chiah-ê基督徒ê身上，hiah-ê人會發現「Lín若互相sio疼痛，眾人就會知影lín是我ê門徒阿」。

這是基督徒信仰生活非常重要ê過程，因為每一個基督徒若ē-tàng真正用chit段經文來確立咱信仰生活，tiāⁿ-tiāⁿ用耶穌基督ê心做心，建立kap耶穌基督完全通順ê來往，耶穌基督ê靈一定會降tī chiah-ê人身上，基督徒mā有充分ê屬靈性命表現，表現出屬於耶穌ê信仰ê生活內容，真自然就ē-tàng tī人間實踐偉大ê基督教信仰，來彰顯基督，這是咱教會存在ê使命，mā to̍h是基督徒存在ê siōng大價值，基督徒ài tiāⁿ-tiāⁿ有chit種信仰ê決志，了解基督徒ê人生目的teh彰顯耶穌，當基督徒有chit種共識ê時，伊就會有chit種tī主內面ê人生內涵。

咱必須時常ùi耶穌tī馬太福音二十一章ê教示得tio̍h啟示，因為繁榮ê意義to̍h是結實纍纍，m̄是tī枝葉茂盛，這是咱信仰生活tiāⁿ-tiāⁿ有ê毛病。

三、 願意接受主人ê修剪
若bat親身實行chit方面ê khang-khè ê人，lóng有chit種經驗：Ài有phông-phài ê果實，必須ài有相當程度ê修剪，這tī園藝kap果農中是一個重要ê學問。修剪ê時當然會有一kóa心疼，這是必然ê，但是為tio̍h beh hō͘伊有khah美好ê結果，主人必須ài án-ne做，mā是無經過修剪--ê通常lóng bōe有好ê結果。一個基督徒beh結實纍纍，的確ài經過chit-ê過程。園丁用大小無仝ê器具，用siōng適當ê方法來處理，有時是剪掉亂枝老枝，hō͘伊生koh-khah好，thang好結果子，有時會除去蟲害，雖然蟲害開始ê時真pháiⁿ發覺tio̍h，但是細膩ê園丁一定真清楚伊ê影響，有時用自然ê方法，有ê時用藥仔去thau蟲，以免蟲害會影響tio̍h正常ê成長，妨礙tio̍h結果子。

基督徒ài了解取捨ê真理，當屬靈世界有雜枝出現，主人一定會kā伊修剪，另外tī基督徒ê屬靈性命中若有蟲害ê時，主人mā必須除去這弊病，因為只有án-ne，chiah有可能結實纍纍chiah會完成受託ê使命。

基督徒ài了解伊存在ê價值是teh結實纍纍，hō͘天父上帝得tio̍h應該得tio̍h ê榮耀，這是基督徒人生siōng主要ê目的。

基督徒teh得tio̍h屬於基督ê靈命了後必須ài時常tī主內面chiah ē-tàng彰顯出耶穌基督ê特質。當然tī基督徒信仰ê成長過程中，mā有可能產生雜枝來影響tio̍h生活內容，有時mā會tio̍h蟲，比如信仰生活ê缺失、迷失或者失敗ê信仰生活等等，chiah-ê對基督徒ê存在lóng有負面ê影響，tú-tio̍h chit-ê情形，基督徒ài有謙卑接受修剪或者除掉蟲害ê心態，因為chiah-ê 無正常ê雜枝kap蟲害，對基督徒ê信仰lóng有負面作用，若無修剪消除，有時會影響tio̍h基督徒整體ê信仰。Tī教會性命中有時咱會看tio̍h tī基督徒身上發出ê雜枝，若無改善，tiāⁿ-tiāⁿ會成做基督徒敗亡ê主因！教會生活中真che7chit種例。

基督徒ài用嚴謹ê心思不斷來省思觀察，咱ê信仰是m̄是有chit款雜枝kap蟲害？這是信仰成敗ê關鍵，bē-tàng 無謹慎！

結論：繁榮ê人生是人生存在ê方向kap目標，主耶穌真清楚kā咱講繁榮人生ê真實ê內涵。期待tùi約翰福音十五章1～16節chit段聖經會有真正ê體會。