《草地囝仔做牧師》

 | | | 轉寄

教會ê使命

作者 林宗要 2010.11.14

路加福音二十四章44～49節

近年來台灣教會時行福音二千年運動，koh有相當koân ê目標，大家對chit-ê問題各人有無仝ê意見，比如taⁿ只chhun二、三年時間，教會是m̄是ē-tàng達成伊ê目標，這是一個值得思考ê問題。

長老會ê倍加運動（十年久）配合當時ê教會環境，淡薄á有收成，m̄-koh自1967年了後，雖然有各階段ê宣教運動，比如新世紀宣教運動、忠僕運動kap十一增長運動，lóng研擬了相當程度ê內容kap目標，但是soah無法度照安 排來完成宣教ê果實。

這實在是教會ê重大課題，mā是牧師kap長執tiāⁿ-tiāⁿ思考ê問題，尤其是身為牧師ê人，伊ê生活中所關心ê to̍h是kui-ê教會ê成長，過去台灣教會tiāⁿ-tiāⁿ用chē當做評鑑傳教者ê指標。

聘請牧師ê條件之一，tiāⁿ-tiāⁿ是看伊過去所牧會ê教會是m̄是理想，但是有ê時chiah-ê mā m̄是絕對--ê。

因為傳教者kap教會ê關係，有真chē因素形成，尤其是教會ê環境，往往是形成教會成長ê主要原因，教會若有適當ê傳教師去牧會，可能對教會ê成長有正面ê作用，但是若無全體會友ê配合，自然mā bōe成功，這是事實。大部分ê傳教師lóng期待教會ê運作，正常chiah有生機、有理想ê表現，但是教會所存在ê社會境況kap教會本身ê作為，mā是一件重大ê事實。尤其是teh劇變ê現實社會中，教會ê存在的確ài面對真chē問題kap挑戰。當環境發生變化ê時，自然界ê生物就會自動調整家己來適應新環境，求得生存，chē mā是今á日ê教會必須認真思考ê事實。過去台灣教會流行一句話：福音無變，社會teh變，傳道應變，soah-koh有人講：世界上siōng oh改變ê有二項，to̍h是宗教kap傳統，所以宗教tiāⁿ-tiāⁿ kap現實社會脫節。Teh牧會上tiāⁿ-tiāⁿ tú-tio̍h chit類ê問題，譬如：Tī拜堂內受爭議ê活動，乒乓比賽、跳土風舞，講台頂koân kám ē-tàng hō͘ gín-á khiā teh司會等等問題。

巴特（Barth）強調時代中ê傳教者應該一手提聖經，一手提報紙，chiah bōe hō͘時代篩掉。

Teh劇變ê社會中，教會當然bē-tàng kap社會妥協tháu脫，bē-tàng違背聖經真理原則，但是教會mā bōe-sái kap社會脫節，因為教會是tī現實ê環境中，chit種教會無脫離現實ê情形，是教會事工複雜ê所在，tī chit種情形中，教會ê營運，傳教者ê心態，必須ài有ná主耶穌所講：「靈巧kap智慧」，chiah ē-tàng完成教會ê使命。因為教會生活ê環境siuⁿ複雜，若無chit種智慧kap靈巧，實在真pháiⁿ應付。

Tī chit種社會變遷中ê教會，beh如何適應，chiah ē-tàng傳福音，這是教會ê使命。當然tī異教社會中，beh廣傳福音確實真艱苦，而且處處面對挑戰ê事實。教會beh完成受託ê使命chìn前，教會必須成做一個受祝福ê教會，到底受祝福ê教會有什麼特色？是人數？財力？氣質？或者信仰ê內容？

Tī現代教會中，通常提起成功ê教會，tiāⁿ-tiāⁿ會想tio̍h韓國教會，確實，tī chit-má ê基督教國家，基督徒漸漸衰弱，khah受肯定ê教會是韓國教會、阿根廷ê五旬節教會、洛杉磯水晶教會等等，lóng有khah優秀ê表現，主要teh人ê增長（自然財力mā會增加）。

有一ê學者研究韓國教會增長ê幾項要件：
1) 教會充滿異象，差不多所有ê韓國基督徒lóng期待in會成做二十一世紀世界ê宣教中心，in有一個異象，因此共同向chit-ê目標邁進。
2) Tī聖靈ê真正合一，本來人tio̍h是自私--ê，基督徒mā仝款，除非充滿聖靈，若無真pháiⁿ克服人性ê弱點（比如本位主義），m̄-koh in真正克服私己，用真實共同體ê性命去經營in ê信仰生活。
3) 是祈禱ê教會koh肯揹十架tòe tio̍h基督，祈禱山tùi韓國傳入，kui暝祈禱真普遍，為福音貢獻家己kap一切，為真理kap公義敢爭取kap願意受苦ê心志……。比如真久chìn前國會通過使用有象徵佛教記號ê銀錢，教會起來反對，三百萬基督徒決心m̄使用，最後政府收tńg去重新發行。
4) 基督徒有愛心kap事奉主ê心，真正ê實踐道理ê人，實實在在將福音印證tī生活，chit種信仰ê解釋是siōng ē-tàng感動人，基督徒有活ê見證，chiah ē-tàng發揮基督ê香味。
5) 勇敢傳福音ê熱情，所有ê基督徒對真理（聖經）真清楚了解，會記得ê基督所託負教會ê使命。

相信教會有chiah-ê表現，應該是真理想ê存在，的確會建立teh成功ê境界，發揮教會應該有ê使命。

一、 宣教ê異象
受祝福ê教會，是完成主所託付ê使命，主基督託付教會ê使命，記tī馬太福音二十八章19～20節「天頂地下所有ê權柄lóng賜hō͘我啊，所以lín ài去hō͘萬民作我ê門徒，奉父仔kiáⁿ聖靈ê名，hō͘ in施洗，只要我所吩咐lín ê，lóng教示in遵守，我就時常kap lín同在，一直到世界ê最後。」所以一個成功ê教會，必須ài有chit種完成大使命ê異象。咱若看使徒行傳十六章6～10節保羅一行tī亞西亞加拉太hit位，bat得tio̍h基督聖靈ê指示，保羅tī特羅亞ê時，看見一個異象，to̍h是有一位馬其頓人向保羅講，請過來馬其頓幫助咱。Chit-ê異象對當時保羅一行是非常重大ê影響，in認為這是上帝ài in去馬其頓傳福音。這是保羅tī亞西亞ê第二次傳道，in ê目的地是隔壁ê庇推尼，是tī亞西亞ê東北，但是tī-cha保羅看見一個異象，基督ê靈不准in去庇推尼，同時mā聽見有人講：「請過來馬其頓幫助阮」，chit-ê異象，to̍h是保羅將福音傳入馬其頓ê腓立比城ê關鍵，tī-chia雖然因為基督ê福音受盡苦楚，但是mā建立一間理想ê腓立比教會，雖然保羅tī-chia ê表現ê是一小步，但是tī基督教歷史上soah是一大步。因為tùi保羅chit-ê行為soah形成了基督教出入歐洲社會，chit-ê舉動是起因tī異象，mā to̍h是上帝ê靈ê指示，主ê聖靈引chhōa保羅in到馬其頓。本來in是beh去庇推尼，m̄-koh上帝之靈soah指引in去馬其頓傳主ê福音ê明確指示，雖然了後in到馬其頓ê傳道無一定是順境，但是信仰者只有一項事實to̍h是順服上帝ê指示，因為這是教會ê使命。

現代教會ê重大使命，就是ài有像保羅chit種信仰ê心態，放棄主觀自我ê主張或者選擇，真誠聽從上帝ê指示，當然chit種信仰ê境界是需要不斷克服自身ê軟弱，一直仰望主基督ê生活，chiah ē-tàng真正聽tio̍h聖靈ê聲音。Tī台灣教會中，四界lóng有靈恩運動，教會若無警醒，無細膩to̍h會造成負面ê結果，教會需要追求聖靈ê充滿，但是必須是teh正常生活中，有上帝ê靈ê生活發揮。同時koh-khah需要有宣教ê異象tī每一個基督徒心中，因為伊是教會ê大使命，這是指基督徒心中ê意念kap實際生活上有chit種福音ê見證。Mā to̍h是tī基督徒身上chhōe出--來（看會tio̍h）福音ê氣質，對教會ê成長自然有正面ê作用。

也to̍h是，基督徒ê生活對教會有正面積極ê意義，to̍h是完成chit種大使命（聖詩三○八首第三節），因為咱所ē-tàng做ê就是án-ne！譬如咱ê心態，對別人ê感情，日常生活中ê積極態度，教會生活ê和諧，家庭生活ê圓滿，人際關係ê良好等等，雖然kan-nā tī咱ê生活上ê細項tāi-chì，但是伊lóng是傳福音siōng好ê工具，通常引人入信ê lóng是chit-kóa細項ê基督徒生活ê結果。

二、 完成異象ê必具條件——信心
當基督徒體驗tio̍h異象ê時，伊ê生活中必須有推動伊ê動力——信仰ê存在。

Tī基督教史上有真chē偉大ê傳道人，tī in ê傳教生涯中，咱看出一ê共同特色，to̍h是chiah-ê名牧身上有非常強大ê信心。比如日本ê田崎健作牧師募捐建堂ê tāi-chì，少年ê時tī西陣教會，會友lóng是工人kap學生，教會經濟能力真bái，bat一次聘請名牧木村牧師來培靈會，結束ê時hông指名問道：「Beh tòa-tī chit種破糊糊ê教會到tang時？Kám無勇氣建堂？」只來二年，koh無經費，木村牧師命伊提出認捐冊，ài伊先寫落來beh捐jōa-chē，經木村牧師ê huah-hiu鼓吹，認捐bē少，但是mā是不夠經費ê十分之一，田崎咬指頭tī白手巾上畫十架表示決心，禁食祈禱三工了後正式出去募捐，先去chhōe一位心中ê理想者，hông拒絕，灰心失志ê時，醫生派三輪車來載伊，講—著昨晚ê tāi-chì，受tio̍h真深ê感動（平常田崎對這醫生印象真bái）替伊治病，然後自動捐獻koh寫三封紹介批，但是募捐iáu無理想。後來hông紹介去chhōe三井ê大cha-bó͘-kiáⁿ——廣岡淺子，嫁廣岡家，翁婿是beh食m̄討趁，家運敗害，淺子向細姨講，翁婿hō͘你，我boeh去挽回家運，重建家庭，但是精神鬱卒悲哀，困為tī人生問題，就進入大阪教會入洗歸主。兩人相見ê時，淺子一看又koh是捐獻？看tio̍h我就捐獻！田崎回答講：m̄情願ê錢無稀罕，若是真誠ê心，一kho͘ mā真感激，淺子講你是真趣味ê青年，好！明仔載早起九點來三井tau見面，因為hit日天氣無好，田崎穿插koh無啥好，hō͘管理員認為是m̄是chhōe m̄-tio̍h人，通報了後，淺子出來，先整理穿插kap洗腳，問伊是m̄是決志做牧師？當然！若驚三井ê大門就免想beh做牧師。貴族、好額人、苦惱chē，用伊做例，難得你有牧師ê使命，我ē-tàng答應負擔一半ê金額，但是對你無好處，盡力去做，若有問題koh來。田崎終其尾用信心克服萬難，chiah完成事工，當然必須ài自覺chit條路是艱苦ê路，但是只要有信心，就ē-tàng完成使命。

會記得tī讀者文摘看tio̍h美國大學校長ê條件：
1) 會曉募捐。2）有政治手腕。3）優秀ê學者。 真chē偉大ê名牧kap教會ê成功，lóng是建立tī無比ê信心頂koân。台灣ê華神teh經營上khah有chit種信心ê表現。二十年前只有四、五十人ê師生，敢起五千萬ê神學院，若無相當ê信心是做bē到ê！但是in kan-nā推動二、三年就kā伊完成。

舊約時代先知以賽亞、耶利米受召ê時，in lóng有聽見一個聲音，我boeh差siáng neh？若m̄是信心ê回應是無法度完成上帝所託付ê使命。

問題ê重點teh召命獻身，是回應上帝ê呼喚siōng好ê事實，伊是確立tī一個基督徒ê救恩ê體驗chiah形成基督徒ê信仰ê價值觀，chit種信仰ê價值觀建立，to̍h是基督徒信仰ê內容，mā to̍h是完成教會使命ê siōng好工具。

這to̍h是咱教會一直teh強調ê——基督徒信仰生活ê強化，透過教會各方面無仝ê事奉kap聚會，加強基督徒信仰生活ê內容，用hō͘基督徒ē-tàng成做一個名符其實ê基督徒，chiah ē-tàng完成受託ê使命。

三、 行動
基督徒（教會）有了異象，必定ài用信心做根基，而且koh付出積極ê信仰行動，chiah-ê lóng是互相關連，lóng是beh完成教會ê使命所bē-tàng或欠缺--ê。

主基督teh行神蹟ê時，tiāⁿ-tiāⁿ要求當事人有chit種信心行動ê配合，相信主ê話，然後to̍h是家己ê行動，提起家己ê褥子行（約翰福音五章9節），完成信仰是信仰ê行動。基督徒ài如何才能有真誠ê行動，siōng主要ê to̍h是體驗信仰（Ài有真誠ê悔改，chiah ē-tàng迎接聖靈來充實家己），然後去實行疼上帝kap疼人ê信仰生活，真正ê信仰kap生活，記會ê 以前有一部電視影片，叫浩劫餘生：德國軍官負責虐待猶太人，用盡方法殺害in，一旦執行害死六千名猶太人，tī聖誕暝soah kap kui家伙坐tī聖誕節樹腳，唱詩慶祝主ê降生。看tio̍h chit-ê場面內心感受有淡薄á深，tī-che狀況中ài如何去看信仰ê問題？Tī基督徒ê信仰現實中，無一定是一帆風順ê信仰路徑，不斷有真chē人生ê問題kap阻礙，因此基督徒必須ài學習phah拼kap靈巧，mā to̍h是像頭前所講ê主基督吩咐學生必須ài有智慧像蛇，純潔像粉鳥，確實用chit種靈巧kap智慧ê信仰生活，會幫助基督徒完成信仰ê使命。Tī咱ê社會生活中，咱tiāⁿ-tiāⁿ會聽tio̍h一句話，hit-ê人ê頭親像khōng-ku-lí，tēng-khok-khok m̄知變通，無可能接納別人ê意見（明知影têng-tâⁿ iáu-koh堅持！），chit種心態對基督徒ê信仰生活有負面ê效果，的確tī基督徒ê人生生活中會有真chē問題，基督徒ài有智慧kap純潔ê心，機智koh靈巧ê面對問題，chiah ē-tàng建立信仰美好ê結果，koh有一機智ê例：古早時代殿試ê時主考官出題目：三寸格仔內寫三千字：所有ê人lóng拼性命寫，只有一ê人無寫，teh交卷chìn前寫了「化三千」！結果伊錄取啊，基督徒ài了解信仰生活是主所交託ê使命，beh將基督ê福音紹介hō͘ hiah-ê人，mā to̍h是咱beh將什麼款ê基督徒紹介hō͘別人？To̍h是講hō͘人啥物？Siōng好ê事實to̍h是你必須ài成做基督福音ê見證！Mā to̍h是別人tī你ê身上看tio̍h基督ê事實，這to̍h是保羅所講--ê成做基督ê香氣，以利teh信仰ê傳播，chiah-ê lóng是基督徒信仰生活ê內容，雖然是真細ê tāi-chì，但是伊lóng是成全教會大使命ê工具（聖詩三○八首）。

結論：有一個日本學者訪問德國，看見西柏林ê朝氣，soah下結論講：市民ê氣魄kap phah拼，人民ê支持kap合作，環境ê配合。M̄管任何人才或者理想ê事業，若失去周圍ê同情或者合作，to̍h無簡單有成就，基督徒ê信仰生活koh-khah需要整體ê結合，建立共同心態，做夥向仝一目標去完成使命。