《草地囝仔做牧師》

 | | | 轉寄

基督徒ê容貌

作者 林宗要 2010.11.28

使徒行傳六章8～15節

Tī教會歷史上有一句名言「殉道者ê血是教會ê籽」（The blood of the martyrs is the seed of the church），的確tī歷代教會中，確實有真chē聖徒（殉教者）ê血tī其中，尤其是初代教會史或者是一個地方初代宣教史，比如百年前台灣kap中國大陸ê宣教師lóng受tio̍h非常大ê迫害，甚至有真chē人殉教，但是耶穌基督ê教會soah無因為迫害受tio̍h影響，顛倒koh-khah忠誠事主，chit種事實，初代教會tàng看kah真清楚。初代教會hit種無組織，無規模ê團體，面對極強盛、有組織ê羅馬帝國ê極力迫害，若照一般情形，必定是瓦解、消滅，但是事實並m̄是án-ne，這是teh說明教會本質ê問題，教會m̄-nā是人ê教會，伊是屬於主ê團體，耶穌基督是伊ê頭，是全能者所有ê教會。若無當時只有hiah-ê無學問ê普通人（大部分是討海人）——耶穌ê十幾名學生所組成ê團體，是beh án-na去面對猶太教kap羅馬政府ê強壓手段？

當然tùi使徒行傳一～二章，咱ē-tàng了解，tī hit種軟弱、驚惶kap無力感中，聖靈充滿是教會成長kap有能力面對迫害ê主因。彼得ê一生，當耶穌hō͘掠ê時，tī人群中連續三次m̄認耶穌，但是當伊hō͘聖靈充滿了後，伊soah勇敢khiā-tī官員面前見證耶穌是救主！

這to̍h是教會teh強調信徒必須受聖靈充滿ê原因，因基督徒若受聖靈充滿ê時，就會完全改變，以前mā可能是驚惶，但是聖靈充滿了後，tī任何境況中lóng會有勇敢ê表現，以前是無力感，chit-má是勇敢勇壯，以前m̄認主，chit-má soah以基督徒為榮、做誇口，這to̍h是聖靈tī信徒身上ê能力，初代教會因為有聖靈充滿，雖然處tī極端ê危難中，iáu堅立tī信仰。

今á日咱教會，mā需要聖靈臨在每一個信徒身上，因為hō͘聖靈充滿 ê人，必定ē-tàng結聖靈ê果子，伊to̍h是感動人接受主kap帶動教會成長ê主因，因為聖靈會啟示引chhōa人了解耶穌基督奧妙ê真理，一個人若完全了解主基督ê真理，tī伊ê人生生活中就會活出屬於基督所有ê一切事實，chit種有屬於基督ê生活ê見證to̍h是信仰ê結果，mā是歷代教會siōng ē-tàng榮耀主ê基督徒ê生活。Tī聖經中，耶穌基督時常要求屬於伊ê人ài kā伊結連來結果子，to̍h是指信徒chit種有見證ê信仰生活。Chit種有見證ê信仰生活，無論是活tī世上或者是因為基督ê緣故殉道，仝款lóng有積極作用，使徒行傳六章記載，當時教會興旺，信徒增加，koh再看使徒行傳二章，當時教會ê發展，m̄是漸進ê，是成長真緊，因為bat有一次三千人受洗ê紀錄（使徒行傳二章41節），chit種增長是教會m̄ bat有ê現象，因為chit種急速成長，致使chiah-ê學生無法度處理教會事物，因此另外koh再選七名執事來協助分擔使徒ê事奉，六章1～3節，記載執事ê形成掠準條件：好名聲、hō͘聖靈充滿而且智慧充足ê人，kap保羅tī提摩太前書kap提多書講執事ê條件仝款。司提反是一位有完美人格kap熱情ê信仰者，雖然是平信徒，soah有良好ê信仰表現。

一、 平信徒司提反
照聖經記載，司提反是頭一個基督教ê殉教者，關於伊ê記載無chē，但是thang tùi chiah-ê經文中看tio̍h，伊實在是一位偉大ê信仰者，值得基督徒去學習。使徒行傳六章中紹介伊是一位具備良好品德kap真誠ê信仰者，「伊有好名聲」。Tī群體中，一個人beh得tio̍h其他人ê肯定m̄是一件簡單ê tāi-chì，身為牧師，對chit方面感受特別深！

Tùi使徒行傳二章尾段，咱thang了解初代教會興旺ê情形，非常完美ê教會生活表現在in ê信心中，雖然án-ne，á是有一kóa不滿kap怨言，tī六章，咱看tio̍h，教會增長真緊ê情形mā帶來問題，這是地上ê教會ê正常情形，因此基督徒ài了解，咱ê教會生活難免會有一kóa缺失，因為教會to̍h是tùi一陣有罪ê人所集合成ê團體，自然會有問題。當時司提反tùi初代教會選出擔任執事，ē-tàng分擔教會事工，減少信徒之間ê不滿kap怨言，tī當時教會中，伊是有好名聲ê人，聖經二二八首「品行端莊模樣正，會內會外好名聲」，可見chit位平信徒ê司提反實在值得咱學習。「hō͘聖靈充滿，智慧充足ê人」，是當時選執事ê標準之一，品德是tī行為部分，tī教會ê事奉中，只有品德是無夠--ê，必須ài有屬靈ê恩賜，mā to̍h是聖經所講有聖靈充滿，因為伊chiah ē-tàng辨別屬靈ê範圍，但是若只有聖靈充滿，無充足ê智慧，tiāⁿ-tiāⁿ會變成有熱心soah無智識ê人，chit種情形tī教會生活中，tiāⁿ-tiāⁿ會發生，確實有一kóa基督徒非常熱心，但是無智識，信仰kap智識是現代基督徒必須ài加強ê信仰訓練。

基督徒一定ài有phông-phài ê屬靈內容，同時必須兼具良好ê品德kap敏銳ê判斷力，mā就是beh成做有智慧ê人生，這to̍h是主耶穌要求信徒ài「靈巧ná蛇，馴良ná粉鳥」ê人生。

「了解聖經ê真理」mā是司提反ê特色，當伊hông掠去公會前，向當時ê宗教領袖見證福音，使徒行傳七章，咱看出伊tī真理上非常熟手，tī短短一章內，司提反完整說明猶太人ê信仰史，指引hiah-ê人應該回歸神ê真理，m̄是親像in ê祖先，用無知kap罪惡來敵擋神所差遣ê使者，七章51～53節，司提反對in ê指責是非常嚴厲--ê。

「忠貞tī主」mā是司提反信仰生活美德之一，伊hông選做七位執事之一，即時投入teh事奉主ê事工，因為伊良好ê條件（Tī屬靈kap品德方面lóng有美好ê見證），好親像聖經所記「司提反滿得恩惠能力，tī間行了大奇事kap神蹟」（使徒行傳六章8節），因此，伊ê khang-khè m̄-nā限tī一般教會事務，進一步koh直接投入第一線ê傳道事工，tī猶太人中見證耶穌基督，伊ê作為刺激tio̍h當時傳統猶太教領袖，掠伊到公會，tī án-ne景況中，司提反iáu堅守主道，忠貞tī主所託付ê使命。

二、 容貌ná親像天使ê司提反
「Tī公會內底坐ê人，lóng真專心teh看伊，看伊ê面貌，kah-ná天使ê面貌」（六章15節）。

面貌是人一切感情統合ê外在表現。人ê一舉一動，或者所有ê感情lóng會表現tī面部，心情愉快，一定面帶喜樂笑容，傷心ê人就無法度表現喜樂ê笑容，人生社會ê實況，特別tī厝內，人所遭遇ê tāi-chì，tiāⁿ-tiāⁿ會完全表露tī每一個人ê面頂koân（Gín-á例外），鬼面kap天使面是兩個極端ê對比，事實上，chit兩種面咱lóng m̄-bat看見，但是soah ē-tàng了解chit兩個ê意義kap無仝，當咱想像天使ê容貌，必定是非常美麗koh可愛，tī人間社會真無簡單有án-ne完美ê肖像。有一個故事講：一位滿面春風，真gâu講話koh詼諧ê seng-lí人，專門teh賣護面霜，因為伊ê外表、詼諧kap喙水水，四界受歡迎，seng-lí真好，但是無gōa久，伊ê bó͘過身，長子koh hō͘大水沖走來失蹤，chhōe了一、二個月chhōe bōe-tio̍h，chit-ê seng-lí人變kah真消極，內心非常悲傷，但是為tio̍h生活，只好koh去賣面霜，但是因為伊面憂憂，soah致使seng-lí直直落，無人相借問。Ná會án-ne？當然是生活景況影響道內心kap容貌！

天使ê容貌如何？有笑容，美麗可愛，滿面春風，光明燦爛，這是天使面容ê特色，tī天使容貌中，可見到其中集是上所有美德，比如加拉太書五章22～23節，聖靈ê果子：仁愛、喜樂、和平、忍耐、恩慈、善良、信實、溫柔、節制，lóng ē-tàng tī天使ê容貌中見tio̍h。

講到鬼面？橫逆、殘忍、驚人、黯淡，是伊ê特色，加拉太書五章19～21節，hiah-ê由人ê情慾所產生出來ê惡形，to̍h是鬼面ê特寫。台灣民間宗教或者畫冊所描寫ê鬼，伊ê角、目、鼻、嘴lóng是兇殘ê模樣，hō͘人ê印象是pháiⁿ沖沖、驚人，kap天使完全無仝，這是兩個對立ê描寫，用完全無仝ê容貌呈現tī人ê面前。天使ê容貌hō͘人ê印象是善良、溫純、和平、安詳、光明kap快樂，鬼ê容貌hō͘人ê印象是恐怖、絕望、憂鬱、不安、橫逆、悲傷，咱ē-tàng下結論：人生所期待ê生活內容是ē-tàng展現kā天使ê面貌仝款ê人生內涵。

至少基督徒ài具備ná司提反ê面貌，這是替耶穌基督作見證siōng好ê工具，因為一般人對基督徒，siōng直接ê接觸to̍h是信徒平時kā人往來ê態度，其中面貌tio̍h是siōng主要ê關鍵，一個ta̍k工目頭結結ê信徒，人kám ē-tàng tùi伊身上發現耶穌基督？這是無可能--ê。

司提反ê面貌，無論tī任何時刻，lóng表現出天使ê面貌，著算tī極端危機中，聖經soah形容伊容貌像天使！這實在是難能可貴ê信仰表現，當時伊ê狀況是tī悲慘ê危機中，但是使徒行傳六章15節，伊khiā-tī公會受審ê時，七章54～56節，群眾對伊咬牙切齒ê時，kap七章59～60節hō͘暴民用石頭kā伊phah死chìn前，伊iáu大聲求主mài將chit-ê罪歸hō͘ in，kap主耶穌tī十架頂ê祈求仝款！Chiah-ê舉動，to̍h是因為司提反平時有美好ê信仰kap親像天使ê容貌ê累積ê結果。Tùi chia咱thang知影，一位真實ê基督徒，無論伊ê景況如何，lóng仝款絕對忠誠tī主基督，特別是處tī極端危難中，對主ê忠誠koh-khah難能可貴！

三、 基督徒ê容貌——你用啥物容貌hō͘人看？
或是講，一般人看tio̍h你ê容貌是啥物？頭前講過，面貌是一個人kui-ê人格所表現出來ê事實，台灣ê相命仙，至少會觀察tio̍h人部分ê生活內容，hit-kóa遭遇不幸ê人去chhōe相命仙，相命仙會tùi伊ê五官來斷定伊心中ê煩惱，這to̍h是為啥物有人信相命仙ê原因。因為大多數ê人lóng會將心事表現tī面容頂koân，人有喜事精神爽，滿面春風是伊ê特色。Tú-tio̍h不如意，表現tī容貌上to̍h是目頭結結，因此咱大約thang tùi人ê表情來了解伊ê人生狀況！

用chit-ê原理來思考今á日身為基督徒ê容貌，一個有基督ê聖靈所充滿ê信徒，伊ê容貌特色就會表現有屬於基督ê氣質。Chit種hō͘人看出是屬於基督ê信徒，to̍h是初代教會安提阿hiah-ê基督徒ê生活特質，hō͘人一看to̍h ē-tàng斷定是屬於基督ê人！

和尚kap修女因為伊ê特殊穿插，自然真簡單tio̍h會hō͘人認出身分，基督徒雖然無特別ê識別證，但是至少咱ài tī現實生活中，hō͘人簡單知影咱是屬於基督ê人，chit種識別證，並無特別ê記號，掛十字架ê金練雖然真流行，但是無一定lóng是基督徒，siōng重要ê是基督所講「結出屬於主ê好果子」。好樹結好果子，用che來證明咱是屬於基督ê人。當然咱ê信仰是因信稱義ê信仰，但是一位tī社會上hō͘人印象真bái ê基督徒，人會批評伊是信惡教ê人，若是一位tī社會上hō͘人良好、完美印象ê基督徒，相信hiah-ê未信者，必定對基督教有好感。

Tùi chiah-ê事實，咱thang了解，今á日ê基督徒揹tio̍h對福音決定性ê影響，因為耶穌基督ê福音ài hō͘ in hiah-ê人好感或者惡感lóng tī in所看看tio̍h ê基督徒ê容貌所有ê。當然，容貌kap生活境況有關係，但是koh-khah重要ê是每一個人內心ê感受，mā to̍h是伊心中ê一切，人ê人格、人ê性格，人生ê人際關係，chiah-ê lóng會表現tī人ê面貌頂koân。若想tio̍h án-ne狀況，基督徒ài提高警覺，充實咱ê人生kap屬靈ê增長，chiah ē-tàng發揮有ná天使一般ê面容tī人生現實中！Ài二方面ê配合chiah ē-tàng hō͘ in基督徒koh-khah完美ê人生！

結論：耶穌基督交代所有ê信徒ài替福音作見證，所以：（A） 基督徒是福音ê籽。（B） 基督徒ê存在是成做榮神益人ê存在。（C） 保持美好ê面貌來見證信仰。