《草地囝仔做牧師》

 | | | 轉寄

疼ê原則

作者 林宗要 2010.10.03

箴言2十七章5節；哥林多前書十三章4～7節

一般ê人tī人生舞台頂，雖然無一定ē-tàng扮演主角，但是lóng有一個共同ê特點，to̍h是beh án怎建立屬於家己ê家庭ê完美kap理想，因此一般ê人lóng會盡siōng大ê 力量追求家庭生活ê充實chiah享受幸福ê家庭生活，相信這是一般ê人想beh確立ê人生條件。

成做chit-ê事實ê to̍h是人間ê疼，因此厝內ê人互相ê愛ê表現ē-tàng看出人生phah拼ê結果，這to̍h是保羅tī哥林多前書十三章所強調--ê：「比如taⁿ時常有ê有信、有望、有愛，這三項其中siōng大ê是愛」，確實tī咱ê人生中，四界lóng ē-tàng體會tio̍h chit種仁愛對人生ê關係kap影響是guā喏仔深刻，若是tī人間hiah-ê不幸悲哀kap敗亡ê tāi-chì，通常lóng是欠缺愛，mā to̍h是講欠缺愛tiāⁿ-tiāⁿ會造成負面ê人生狀況。

人ê一生中，家是siōng ē-tàng顯明愛ê實質內容。愛是tùi人心肝內所產生ê自然行為，m̄是外在條件所成立--ê，若將愛ê關係限定tī用外在條件為主ê時，tiāⁿ-tiāⁿ會有不良ê後果，「美國式ê離婚」Chit部電影，說明一對青年tī文明社會中結婚了後，恩愛幸福，因為in用愛做婚姻ê基礎，共同奮鬥，經過十七年in有一個健康ê家庭，生活美滿koh舒適，翁婿mā做一間公司ê總經理，但是chit時太太soah感覺悶悶不樂，不明原因，請教婚姻專家mā無結果，最後用離婚收soah，翁婿為tio̍h贍養費，生活真艱苦，太太mā無因此感覺快活，反倒tńg增加心裡ê壓力kap負擔，雙方了後雖然有異性朋友，但是暗中lóng一直懷念對方，tī一個偶然ê機會相tú，舊情復燃chiah koh再結合，雖然iáu-kú有冤家kap問題，但是終其尾是因為愛對方chiah願意共同生活。伊teh kā世人講，愛情固然是家庭ê基礎，但是久長ê翁仔某生活，除了愛情之外應該iáu有其他ê裝飾品……比如了解、體貼對方、溫柔ê性格kap互相尊重等等。若用建築做例，只有外殼ê基石堅固，無一定hō͘人有好看ê感覺，tī穩固ê地基kap外殼以外，ài hō͘人感覺tio̍h美觀ê家庭，tī厝內必須ài有相當ê室內佈置，mā to̍h是裝潢ê工夫，但是有ê時咱mā會看tio̍h店面非常美麗，但是若將裝潢拆開，是非常害ê建築。

由chit-ê比喻，咱ē-tàng體會翁仔bó͘生活ê根本條件是用愛做根基，但是若欠缺翁仔bó͘生活中所必須具備ê裝飾品ê時，tiāⁿ-tiāⁿ會發生問題，為何tī真chē恩愛ê翁仔bó͘中iáu有真chē人離婚？

Chiah-ê離婚ê人，in結合ê時是m̄是無意愛？為何會án-ne neh？是因為愛情以外koh需要一kóa重要ê裝飾品來kā伊美化，hō͘婚姻ē-tàng koh-khah完美kap理想，án-ne chiah ē-tàng平衡，hō͘伊ē-tàng永遠保持。

美國有一位心理學者講：婚姻好親像汽車ê四ê輪仔。必須ài有真正 常平衡ê運轉chiah安全，比如失去平衡就會發生真驚人ê問題，比如車禍、傷害等等。相信chit種關係m̄是tī翁仔某關係上，甚至tī人生ê一切狀況lóng是chit種--ê。

今á日咱用疼ê原則來思考chit-ê對人人lóng有深切關係ê人生問題。

一、 關懷是疼ê真諦
人若用幸福為題ê時，往往會想著愛ê問題。但是咱知影愛是抽象--ê，若無加共伊具體化，愛就bōe-sái顯明tī人間，因此有人認為愛ê具體to̍h是先建立tī人關懷ê性格上。

確實，咱愛某某人，咱會表現出關懷ê情誼，chit種感情，咱ē-tàng tùi實際ê生活中體會tio̍h。因為關懷是表示對對方感情ê流露。Ná親像父母對kiáⁿ兒ê態度，咱ē-tàng完全體會。或者年老ê父母kap kiáⁿ兒ê問題，m̄是只有生活條件ê滿足，mā是tī關懷父母ê存在，chit種真實ê關懷，chiah ē-tàng叫做有孝。通常tī愛ê境況中，人性ê態度往往是用佔有為主。咱bōe-sái否認，愛有佔有ê成分，（過分ê佔有是自私，顛倒是傷害tio̍h愛ê本質），但是完美ê愛，m̄是只有佔有而已，伊同時mā是奉獻。Tī人生現象中，確實有chit種為所愛ê人願意付出一切ê愛ê行為。因為tī真實ê愛內面，所想著ê只是對方ê一切ê生活。關懷所愛ê人，to̍h是愛ê真實內容。

關愛本身是表示咱對愛ê對象發出愛心ê行動，藉著che，會hō͘咱所愛ê人有安全幸福ê感受，這to̍h是人生有價值ê生存內容。Hō͘人有安全kap幸福，chit種是上帝所希求ê人生，伊是tī愛ê世界內chiah ē-tàng成立--ê。

二、 人性ê基本需求－－欣賞
愛ê偉大是ùi內心本能ê意願，無負擔或者勉強，是ùi心內所發出ê真誠心態。Chit種愛ê形式時常tī人生生活中表現出一種欣賞ê性格。確實tī人性中，hō͘人欣賞是有相當正面ê啟發作用。咱若用人ùi細漢e5gin2-á時期到老人ê世界來看，hiah-ê人lóng愛hông欣賞，父母若ē-tàng用欣賞ê態度去處理孩童ê tāi-chì，對塑造孩童ê人格形成一定有正面ê作用，因此tī現代心理學中，儘量hō͘人去欣賞--人，適當ê欣賞確實是一件有意義ê tāi-chì，因為tī-chia，人基本需要ê愛會帶來適中ê滿足感，心中有滿足是人格形成中一件重要ê事。欣賞是表現愛ê方法之一。咱lóng知影愛是人生生活ê根本基礎，但是伊必須經過真chē人生ê生活形式來kā伊表現出--來，若無伊只是一種抽象ê事實，對人生無什麼作用。

欣賞ê人生，就是beh將chit種抽象ê愛，kā伊生活化kap具體化ê 一種積極ê作為，有學者用花草kap水份來比喻疼愛kap欣賞ê情形，美麗ê花草，若無水ê潤澤ê時，to̍h會lian去。

而且，愛若無用適當ê方法kā伊表現出--來ê時，往往無法度發揮伊無比偉大ê力量，但是必須ài tī適當ê狀況上表現，bē-tàng過分。

欣賞雖然是非常平常ê tāi-chì，但是確實ē-tàng有非常大ê效果。有ê時對gín-á 一句關鍵性ê話kā伊表示你ê欣賞，有可能決定gín-á未來成功ê動力，tī人kap人ê間ê 一句欣賞ê話，有ê時會表現出真chē人生ê快樂、溫暖kap幸福。Bat有一位青年講--著父母bē曉欣賞伊，考試成績好ê時，就講：無實力，死讀冊是無路用--ê，無讀冊ê時就講伊pîn-tōaⁿ，the讀冊ê時就講伊是teh讀hō͘父母看--ê。伊講：我無論án怎做lóng得bē-tio̍h欣賞，這是一位跤步踏差ê青年ê心聲。
Tī-chia，咱ē-tàng明白tī人生現象中，人所追求kap phah拼ê美好ê人生，是teh愛ê表現kap會曉欣賞ê世界。若ē-tàng用欣賞ê人生做愛ê原則而且多多發揮ê時，咱ê人生必定有完美ê成果。

三、 時常被疏忽ê禮貌kap尊重
人生ê愛，大部分是發生teh出世互相認bat ê人之間，但是teh熟識ê狀況中，人真簡單會疏忽chit種tī人生生活中互相關係上另外一種非常重要ê禮貌kap尊重ê態度。阮tiāⁿ-tiāⁿ會想講是熟識ê人，to̍h m̄免行chiah-ê禮數，這是咱tī生活上ê時常犯ê毛病kap缺點。

俗語講：厚禮人bōe怪，著是講多多表示禮貌，chiah bōe疏忽soah hō͘人責怪，因為咱知影，tī人生社會中，禮貌是重要ê因素，伊ē-tàng hō͘社會和諧、安詳，咱看tio̍h台灣社會ê混亂，探討了伊ê原因著是人kap人之間欠缺chit種維持社會ê安祥kap禮貌ê態度所造成。以交通ê情形來看，ta̍k位駕駛人若ē-tàng用禮互相對待，台灣ê交通一定bōe chiah-ni̍h亂，因為欠缺禮貌互相讓步chiah造成塞車。無禮貌是無敬重對方，有自私ê心理，充滿主觀kap驕傲，人若有chit種心態ê時，人生社會自然就會混亂，這to̍h是目前台灣社會ê亂源。

因為各人lóng用搶第一為主，驚hō͘人先得tio̍h，chit種心態充分表露出人性ê自私kap驕傲ê特質，有chit種人格ê人，tī社會中，無可能有完美kap理想ê人生狀況。關於禮，孔子公講：「M̄知禮無thang徛起。」伊mā提出人生中所有ê美德，若無禮ê配合會變做弊病「恭而無禮則勞，慎而無禮則葸，勇而無禮則亂，直而無禮則絞」，恭、慎、勇、直lóng是人生ê美德，若無禮ê配合to̍h變做勞（徒然勞苦）、葸（驚惶）、亂、絞ê弊病。

人生生活所追求--ê是完美kap理想ê美德，這是形成tī禮貌ê世界，因為伊mā包含tio̍h尊重人ê事實，所以禮貌kap尊重ná親像共同體，主耶穌講：「所以lín願意人án怎對待lín，lín mā ài怎樣對待人，因為這to̍h是律法kap先知ê道理」（馬太福音七章12節）。伊完全講出人生ê主題，主耶穌講chit種心態是人生ê全部內容，每一個人若ē-tàng照chit-ê原則經營人生，chit種人間社會，就比如天國，這是人所希求，伊是建立tī人間充滿tio̍h禮貌以及互相尊重ê基礎上，mā to̍h是孔子公所講--ê克己復禮。

Tī咱ê社會中，時常用相敬如賓來祝賀新婚ê夫妻，to̍h是要求chit種真熟識親密關係比如翁仔bó͘，生活mā必須用禮貌kap尊重來互相對待，tī-chiah一定ē-tàng體會tio̍h人生ê喜樂kap幸福！

四、 愛ê siōng koân表現－－真誠kap容忍
一對翁仔bó͘時常因為日常tāi-chì來冤家，自覺若是án-ne落去傷害家庭siuⁿ-tōa，有一工二人同齊去請教專家，最後專家kā in講：翁仔bó͘若無真誠對待，任何人lóng無法度幫忙解決問題。

相信咱ē-tàng體會tī人生生活中，真誠ê重要性，伊ê另外一面是欺瞞，瞞騙tī人間社會中，是真普遍--ê，尤其kap家己有利害關係ê時，人lóng會用che來維護家己ê權益，像1994年台灣省議會議長ê選舉，差不多大多數人相信有賄選，一票ùi五十萬到一千萬，但是當檢察官kā in叫去詢問ê時無一個人承認，lóng用瞞騙ê心態去應付伊。

咱知影瞞騙是真惡質ê品行，但是現代人lóng真普遍運用tī伊ê人生中，chiah形成了社會亂象，失去真誠，處處表現出chit種互相欺瞞ê狀況，ùi政治環境講到seng-lí上ê來往，或者是社會中人kap人ê關係lóng用欺瞞互相對待，這to̍h是造成咱ê社會失去真誠ê原因，台灣支票ê退票率是世界冠軍表示台灣人ê 無老實。

基督徒ài明白，真誠是kap上帝建立關係ê唯一事實，因為咱ê主本身to̍h是慈愛kap誠實ê主，tī聖經中tiāⁿ-tiāⁿ用耶和華是誠心、老實來對人（撒母耳記下二章6節，十五章20節；詩篇二十五章10節）上帝所喜樂ê to̍h是內心老實人（詩篇五十一章6節），主耶穌本身mā教咱「上帝是一個靈，所以敬拜伊--ê，必須用心靈kap誠實去拜伊」（約翰福音四章）。

初代教會ê復興，原因之一to̍h是基督徒將in ê信仰kap生活建立tī誠實ê基礎上：「In ta̍k工同心合意，恆切ê tī殿內底，koh tī厝內擘餅，存tio̍h歡喜誠實ê心用飯。」（使徒行傳二章46節），使徒約翰mā kā咱講：「咱相愛，mài kan-nā tī言語kap喙舌頂，mā ài tī行為kap誠實上」（約翰一書三章18節）。

無論kap上帝ê關係或者人本身ê生活，lóng必須用真誠替主，chiah ē-tàng真正屬於上帝，上帝是愛、是信實ê，屬於祂ê人，mā to̍h是疼kap信實ê存在，chit種存在ê表現就是beh生活tī誠實ê世界，無欺瞞ê行為，che是箴言所強調--ê：「當面ê責備強kan-nā背後ê愛情」，這是teh說明愛siōng需要ê是真誠，無論是對或者m̄-tio̍h lóng ē-tàng用真誠對待伊，（詩篇一四一篇5節）「我甘願接受義人愛心ê責phah，soah無願意惡質ê人尊敬我」（現代譯本）。當teh說明愛ê真誠，伊kap欺瞞ê心態是絕對無仝ê。

真誠是上帝ê屬性，屬於上帝ê基督徒mā應該有chit-ê屬性，用真誠ê心態去經營人生，但是án-ne iáu無夠，因為tī人生確實有真chē複雜ê狀況，必須ài有容忍ê心去面對，因為若bōe-sái養成容忍ê個性ê時，生活必定tiāⁿ-tiāⁿ出現問題。Tī保羅所強調ê愛，容忍mā是重要因素，「愛是恆久忍耐，koh有恩慈，無怨妒……bōe求家己ê好處，bōe計算人家ê惡，愛是凡事ǹg望，凡事忍耐……」（哥林多前書十三章4～7節），因為tī人生中，容忍ê事實kap人生生活ê成敗有關鍵性ê關係，tī-chia，咱看保羅teh講疼ê性質ê時，特別加強愛是恆久忍耐，凡事包容，凡事忍耐。

結論：咱ài會記，愛必須ùi信心去完成伊，共同ê成長會hō͘愛koh-khah完美。改善你ê個性、價值觀kap思想，用khah積極ê心態去適應你ê人生環境，一定ē-tàng收成人生理想ê目標kap結果。切記！停頓不進會將愛teh死！人生就會烏暗無希望。