《草地囝仔做牧師》

 | | | 轉寄

快樂尊嚴ê歲月

作者 林宗要 2010.09.26

利未記十九章32節；提多書二章1～3節
舊年重陽節主日，bat用「成熟ê人生」做題目來思考老人階段，to̍h是成熟ê階段，其中分享三要點：（一）完全無缺點ê人生（二）健康koh體面ê人生（三）家己有自知kap自我不斷進步ê人生。的確，一位長者，若是有頂面所講ê生活要項，ē-sái講是成熟ê人生。雖然，這kah-ná是無簡單達成ê理想，但是只要立定目標，就可能hō͘伊ê人生koh-khah完美、成熟。可惜ê是，長者tiāⁿ-tiāⁿ因為一kóa不明ê原因chiah無法度達成chiah-ê理想境地，譬如：健康是老年人siōng切身需要ê身心條件，但是事實上，因7為人ê有限，老年人絕對無可能有少年時ê勇壯體能，chit種老化ê現象to̍h是人無佮意老ê主因。因為變老會帶hō͘人真chē約束kap限制，同時mā會產生一kóa人無歡喜ê現象，比如因為生理機能ê退化造成各方面ê問題：耳孔聽無、目睭無金、嘴齒bái、腰酸背痛、記智退化kap行動不便等狀況，只要chit種種現象並bē因為人無kah意chiah來離開人生，進入老年是人生必定ài經過ê路途，現代ê醫藥hiah-ni̍h 進步，老年ê生活可能是另外一段人生真久長ê階段neh！ Chit-ê階段有可能比其他人生階段koh-khah長，若是以活到九十歲甚至一百歲ê人來講，伊ê老人階段就有三十年chiah久。台灣社會自1994年就進入高齡化社會（有百分之七以上ê老人人口是六十五歲），但是日本kap其他koân度發展ê國家，in-ê老人竟然占全人口總數ê五分之一，這是一ê值得重視ê現象，為tio̍h beh應付chit-ê現象，見若政治ê政策、社會ê福利kap家庭ê環境long2ai3有相當ê準備。但是siōng重要ê是當事人一定會有萬全ê準備，絕對bē-tàng有時到時擔當，無米chiah煮番薯湯ê僥倖心理，以免老--來chiah造成悲哀不幸ê景況，只要是有準備tio̍h會赴，m̄事先準備tio̍h真有可能會án-ne，有真chē老人會無幸福，to̍h因為in無作好各方面ê準備，尤其是chit種準備，絕對無可能是tī短時間內造成-ê，he是ài有相當長ê時間chiah ē-tàng達成，若照生涯規劃來講，理想ê狀況，應該是ùi高中ê時就ài有人生規劃，這to̍h是我一直teh強調「四十歲想六十歲」Chit-ê課題ê原因，用我ê家庭做例，阮早tī四十歲ê時就預想tio̍h年老ê狀況，而且koh替六十歲了後ê階段提早作心理準備，ná親像kiáⁿ兒大漢結婚了後角色ê調整，媳婦嫁入門了後心態ê適應，互相認bat、了解、退休了後ê生活kap家庭主權ê轉移等等問題，lóng tī事前作過充分ê思考，因為chiah-ê若無處理hō͘妥當，（比如有一kóa阿公阿媽m̄肯放棄對孫仔ê管教權）Tiāⁿ-tiāⁿ會產生困擾家庭ê問題。除非有其他特殊狀況，若是無，tī一般家庭中，角色ê分配kap運作若有合理ê規則，thang避免真chē無聊問題ê產生。

社會上，少年時替伊ê kiáⁿ兒盡心盡力，年老ê時soah得bē-tio̍h kiáⁿ兒ê報答，這款情形四界lóng看有。我bat看過一個實例：有一ê姊妹，少年ê時尪tio̍h過身去，家己嘴齒根咬—咧chhiâⁿ養兩男兩女，生活勤儉刻苦，真無簡單chiah將kiáⁿ兒chhiâⁿ養大漢，其中第二ê kiáⁿ考tiâu台大醫科，畢業了後tī北部開婦產科，後來趁伊ê老母無tī ê時，偷偷仔kap某囝移民到美國，一直到老母hō͘護士通知，chiah知影真相：病院已經全部賣hō͘別人，kiáⁿ兒mā tī三工前飛去美國。老母teh傷心ê時，轉到大漢kiáⁿ tòa ê所在chhōe安慰、溫暖，誰知影，大kiáⁿ 竟然kap伊回答講：「妳kap媳婦bōe合，妳來chhòng啥？」Chit位老母ê心親像刀teh割hiah-ni̍h疼，終其尾伊投木自盡，結束伊ê後半世人，這是gōa不幸ê悲劇ah！

咱ē-sái明白實例中老姊妹所困擾ê千萬心結，因為伊家己tháu bōe開，kui氣死死eh。若是伊e5kiann2兒新婦ē-tàng用khah正面ê態度來對待老母ê時，一定ē-tàng寬慰老人ê心，kā一世人ê辛勞放袂記。的確，年老ê時，只有kiáⁿ孫愛ê滋潤、包容thang化解過去所tú-tio̍h ê不幸kap辛苦，只有愛ê力量thang化解老人所行過--ê坎坷路途kap ê辛酸痛苦。感慨ê是事實kap願望相違背，這是現代老人ê悲哀。根據專家調查指出：老人希望kap kiáⁿ孫tòa作伙ê人占百分之七十～百分之八十；Kiáⁿ兒希望kap老人tòa作伙ê人占百分之二十～百分之三十，tùi chaih thang看著老年人tī kiáⁿ兒心目中ê份量。Koh用現在ê建築隔間來看，通常是三房一廳或者是二廳，kah-ná是特意故翁仔bó͘一間，後生、cha-bó͘-kán 一人一間，老人neh？睏塗跤枋？真明顯根本無考慮tio̍h老父母ê空間。

關於頂面所講ê種種，面對老年ê生活，應該作好萬全ê準備：
一、 成熟ê人生
一位食老ê人若ē-tàng有成熟ê內涵kap表現，chiah ē-tàng達tio̍h快樂尊嚴ê理想。

古早人對長者ê看法，有所謂「敬老尊賢」Chit-ê講法，因為年老ê時tiāⁿ-tiāⁿ包含tio̍h人生豐富ê經驗，mā是知識kap權威ê象徵。的確，老年人因為有khah長ê人生經驗，對人事ê豐富觀察，有相當ê見識kap學問，俗語有講：老人食過ê鹽比少年人食過ê米koh-khah chē，意指老人ê 一個大特色to̍h是伊一定有豐富ê人生閱歷。老年人若ē-tàng善用chit種人生資源，koh用活到老、學到老ê精神，雖然年過七、八十歲，iáu ē-tàng kap少年人開講、溝通，因為伊bōe靠勢，伊是不時teh吸收新知。愛爾蘭詩人有講：「原來老並m̄是衰敗，是性命ê圓熟，koh-khah光koh-khah水」，chit種認bat tī老年人建立快樂尊嚴ê時光真有幫助。所以老人千萬mài認為家己是「老廢á」（台語：指無路用，拖累kiáⁿ孫、是包袱--仔ê意思。），因為老人tiāⁿ-tiāⁿ the tú-tio̍h病痛ê時就認為家己無前途、無ǹg望；或者是認為家己無人緣、老頑固，產生種種負面消極ê心態，chiah-ê lóng是無健康、無正確ê想法，對老人lóng無好處。基督徒koh-khah應該ài了解，上帝所賜ê人生是ùi出世到人生ê終點ê全程，包含紅嬰仔時、gín-á時、青少年時、壯年時期，tùi án-ne講到老年期ê全部，咱必須用相仝ê心去面對每一個階段，bē-tàng有差別之分，每一個階段lóng有伊ê特色kap可貴ê所在，所以應該好好仔掌握伊ê特色好好á來應付，koh發揮伊ê價值kap光輝。老人ê生活方式kap少年人必然會有無仝，比如麥克傑克遜來台演唱ê時，風靡全台，soah m̄-bat看過六、七十歲ê老年人有去鬥鬧熱，師母mā講to̍h算是貼錢請伊去，伊mā m̄去。老人家己mā應該ài有自我ê認bat，對一kóa bōe-sái勝任ê體會活動應該謹慎避免或者盡力來做。總講一句，bē-tàng因為種種現實ê限制來產生無妥當ê自我暗示kap 錯誤偏差ê觀念，應該ài建立積極正面ê心態，因為快樂一定建立teh自我肯定kap積極ê心態。有了積極ê思想chiah ē-tàng產生快樂ê果實。若是lóng是將家己ê不幸或者不如意ê原因sak tī別人或者環境，chit種消極ê思想kap自我無肯定tio̍h會造成鬱悶ê人生。狄更斯tī《雙城記》ê頭一句話：「這是siōng好ê時代，mā是siōng bái ê時代」有一kóa處境看起來kah-ná siōng惡劣，m̄-koh危機抑是轉機，所以mā是siōng好ê處境，關鍵全tī個人用toh一種心態去面對，因此，個人ê心態是好或者是bái是決定因素。同理用chit-ê觀點來思考老人問題，快樂ê關鍵是tī人本身。只要老人認bat家己（家己有自知）kap認bat家己所處ê環境（了解時務ê人是俊傑），老啊ê後半世人，就ē-tàng體驗「夕陽無限好」ê感受，chiah khah無「只是近黃昏」ê遺憾。老人若beh無落伍、boài hō͘人淘汰、boài hō͘人看輕，就ài建立尊嚴，chiah有快樂thang講。若beh達成chia-ê目標，並m̄是一帆風順，一下á to̍h ē-sái 完成--ê，是ài有相當ê覺醒，下定決心，koh ài phah拼、實際實踐ê過程，（當然方式kap青壯年無仝）。Ē-tàng用chit-ê心態去經營人生，thang講成熟ê人生。

二、 快樂、尊嚴何在？
依現實狀況來講，老人ài有快樂尊嚴實在真困難，kan-ta ê生理器官ê退化，視力、聽力、體力衰退，頭毛白蒼蒼，目chiu茫霧，滿面皺痕真chē慢性病纏身，同時心理狀況mā受tio̍h影響，記智無好、厚疑猜、頑固、拒絕新觀念、思考溫吞、反應khah慢、信心受打擊，án-ne惡性循環，甚至對死亡驚惶。Koh-khah有一kóa人因為權力kap財力ê喪失，來引起ê心理驚惶，chit-kóa事例to̍h是人因為退休了後生活狠狠失去重心kap所託chiah會來破病死亡ê原因。根據統計，有bē少koân級職位ê人士因為退休chiah發生急速死亡ê事例，是因為無法度面對chit種失落感所造成ê心理衝擊ê結果，mā因為未事先防範chiah準備bē赴ê原因。所以，事先tio̍h-ài確立當事人ê觀念kap親人ê協助，hō͘老人ē-tàng有獨立自主ê人生觀，ē-tàng盡量處理家己ê生活，莊博士淑旂紹介高齡者過身心快樂ê生活，伊ê結論是盡量hō͘伊去活動，家己ē-tàng做ê tāi-chì，kiáⁿ孫mài去處理，這kap以前「大家lóng驚老人活動，萬項tāi-chì iû kiáⁿ孫代勞」ê觀念大大無仝。續落來是應該ài鼓勵當事人多多學習kap參與活動，老人mài驚新ê 試驗，「活到老，學到老」是真理，我tī 1993年9月參加了環亞知性生活講座，當時我是參與者中年歲siōng koân--ê。各種書、雜誌kap大眾媒體lóng是得著資訊真好ê來源，tùi老人吸收新知真有幫助，另外mā應該盡量主動去參與教會或者社區ê活動。最後，有健康、老伴、朋友、老本，就koh-khah ē-tàng體會快樂koh有尊嚴ê後半世人，但是事實上，chiah-ê條件會ta̍uh-ta̍uh-á離開有歲ê人，比如厚病、無健康，老伴、朋友一個一個來離開世間0，比如台神同學錄內、過身ê人lóng用+做記號，已經一直óa ùi我chit-ê年代；koh來tio̍h就老本來講，伊並m̄是絕對--ê，但是有了經濟做後盾，真明顯ē-tàng減少老人某一kóa限制，滿足某一kóa需要，chiah bōe造成欠缺，koh-khah簡單得tio̍h快樂。

Koh-khah特別ê--是，基督徒應該有由信所得tio̍h ê快樂kap尊嚴，咱thang ùi聖經中得tio̍h真chē寶貴ê教示，詩篇十六章8～11節，類似「因信心歡喜，體驗救恩」ê經文，四界thang看，保羅tī羅馬書五章中所講--ê，teh患難中mā tio̍h歡歡喜喜，是因為體驗tio̍h上帝豐富ê救恩；伊tī腓立比書三章中告白講因為得tio̍h基督ê喜樂chiah甘願放棄世間上一切功名富貴，因為chiah-e5kam2-ē-tàng kap基督ê喜樂相比neh？Koh tùi撒該ê例來看，伊本是一個好額但是不仁ê人，人看人怨慼ê 無快樂ê人，但是自耶穌救贖伊了後，親像聖經中所描寫，伊得tio̍h平安kap喜樂，koh比如神蹟中病得tio̍h醫治ê人，伊ê喜樂ê程度是無法度形容--ê，chit種因為信仰所建立ê心靈層次ê喜樂，是時時刻刻用心靈kap上帝交通chiah ē-tàng得tio̍h--ê，所以老人koh-khah應該骨力kap主交通，建立美好信仰管道，chiah ē-tàng應付種種人生狀況，隨時有管道通到上帝處，比如我ê母親在世ê時骨力讀聖經，聽收音機中ê福音節目。

三、 好好á行完家己ê路
除了頭前所講ê當事人應該有相當ê體認kap行動ê實踐外，做人kiáⁿ兒應該ài協助長輩對財務、人際關係、生活空間、社會參與作一ê整體ê規劃，因為siōng好ê安養院mā kap 可貴ê親情bōe比ê。人生kah-ná旅行，teh觀光旅遊中若beh滿意歡喜，要件之一to̍h是對當地其中一個風土民情ài有事先了解，án-ne chiahe7-tàng事先做準備，koh ē-tàng充分體驗享受chiah會得滿足快樂。同理tī現在流行ê生涯規劃，對人生有伊積極正面ê功能，可惜ê--是差不多lóng kan-ta看眼前ê利益，對人生siōng嚴肅ê時刻－－老年ê生活kap對死亡ê面對，罕得有人提起，基督徒生涯規劃當然無限tī功利思想上，應該是人生ê全部，特別是人生最後ê階段，對基督徒來講，這是人生siōng嚴肅ê時刻，伊是證明你ê信仰ê siōng好時機。

所以一個信仰者應該ē-tàng用（一）滿心期待ê心情khiā-tī主ê面前，來向主講明祂所託付hō͘咱ê一切。（二）用完成受託付ê使命見主ê時，就ē-tàng體會參見主ê無比ê喜樂，馬太福音二十五章21節「你chit-ê 又koh良善又koh忠心ê僕人……ē-tàng入來享受主人ê快樂」，tī積極ê人生意義上，相信無一個thang kap此喜樂相比評--ê。

信仰ê人生絕tùi m̄是偷食步或者充滿意外好運ê人生，比如學生考試用tàn錢來決定是非；M̄是善盡本分，完成所託ê人生，chiah有喜樂thang講。

人生在世是孤單--ê，ùi咱出世了後就ài家己行家己ê路，m̄是行父母ê路，tī環境中用咱ê自由意志去選擇家己ê路，路上有可能會跋倒，這是一定有ê，但是siōng要緊--ê，當接近終點ê時，千萬bē-tàng跋倒，因為tī chit-ê時陣已經無機會koh爬起來，光寶公司創立ê時，我kā長子元生講，二十gōa歲ê少年人值得試看覓，若是我是五十kúi-nā，就無適合，因為koh 越頭已經是百年身阿。Tùi chiah thang好看著，jú上年歲ê人，行事做人tio̍h-ài特別謹慎小心，因為伊jú óa嚴肅ê時刻，jú óa上帝面前交成績ê時刻。無論tī生理上或者心理上tio̍h-ài特別細膩謹慎，保羅tī提摩太前書四章6～8節有真好ê教導。

孔子「我十五歲to̍h下決心beh phah拚學習，三十歲時家己tī社會中已經有成就啊，四十歲ê時tùi ta̍k項āi-chì lóng ē-sái了解、明白，五十歲ê時知影進退、認份，六十歲ê時聽先王ê德行，心意伴耳相隨、順從，七十歲心身自由自在，守規矩、m̄犯法。」，這是人生siōng koân ê境界。凱撒大帝ê豪爽飄phiat，伊講：「死亡，是一個必然ê終結，teh beh來ê時，就會來。」這lóng值得咱深思。

結論：只要你用信仰來建立你ê人生，無論任何境況，你lóng會超越。