《草地囝仔做牧師》

 | | | 轉寄

義重如山

作者 林宗要 2010.10.10

箴言十四章4～7節，二十七章6～10節；約翰福音十五12～15節

中國、埃及、巴比倫、印度是古代ê文化大國，有輝煌燦爛ê歷史，尤其是古代中國，有真chē值得誇耀ê史跡，但soah因此造成中國人ê驕傲性格，鄙視外族，視伊ê為蠻夷之幫，用天朝自居，閉關自守，排斥一切ê近代科技，比如義和團對抗八國聯軍，竟然相信家己ê刀仔會贏過外國人ê銃kap砲，結果造成二百年來中國ê悲慘運命。用當年日本明治維新來講，中國條件比日本優勢，可惜冥頑不靈，m̄知影改革，造成近代中國ê不幸。

確實，中國有真chē了不起ê文化，伊ê五倫、五常、四維八德ê論調非常有氣勢，可惜伊m̄-nā是中國人ê嘴口話，真gâu講，論述mā真清楚，soah欠缺實行ê生活，因此雖然有氣勢、理想ê美麗ê藍圖，soah無法度達tio̍h目標，人生ê理想目標若bōe-tàng達成，一切lóng是空嘴哺舌。

用守法來講，自認為是天朝之民，應該比附近番邦khah文明chiah合理，但是tī社會生活中，soah時常看著顛倒ê事實，hiah-ê hông看做番邦ê歐美人，tī守法頂面反倒tńg koh-khah完美。為何會án-ne？主因tī中國文化kap基督教文化ê差別，確實歐美人ê文化比中國文化khah差、khah慢，為什麼in會發展做現代文明國家？但是chiah-ê古文化ê中國、埃及、巴比倫、印度ê現狀無法度kap歐美文明相對抗？主因tī伊背後ê文化基礎，chiah-ê歐美文化經過基督教ê洗禮chiah完全革新了in ê社會、風俗、人心，mā to̍h是耶穌基督救贖ê福音tī人心kap社會中所發揮ê影響力，比如保羅所講：「人若tī基督內底，就成做新造ê人，舊事已經過，lóng變做新ê啊。」這是基督教文化kap其他文化無仝ê點。一般人感覺，只要靠自身ê修為kap行善ê功德就ē-tàng變化家己，但是對hō͘罪性所入侵ê人心，實在m̄是靠人ê修為ē-tàng kā伊改變--ê，這to̍h是為何tī中國，有án-ne完美ê倫理道德標準，但是中國人soah bōe-sái完全實行ê原因。

Tī中國倫理中，真少hō͘人悔改、認罪、重生ê生活，通常是hō͘人控制家己chiah達tio̍h人性ê完美，但是hō͘罪性所佔ê人性實在無可能用任何人為ê方法來修正，chit種對人性ê罪惡ê態度是形成人是m̄是ē-tàng重生悔改ê主因。

Tī教會中時常有人用「破去ê銅鑼」來說明，任何ê修補lóng iáu有破去ê聲，必須重新造一個新--ê，chiah ē-tàng恢復原來ê狀況，人ê原理mā相仝！

人若無tī基督耶穌救贖ê寶血內底重新徹底來悔改，是無可能恢復原有上帝形象ê人性！咱thang tùi耶穌kap尼哥底母ê對話來思考chit-ê問題，因為活tī上帝國ê生活方式to̍h是上帝創造人ê目的，伊soah因為人ê 罪chiah hông破壞，修復ê方法無teh óa靠人為ê任何修為或者積德，伊是teh接受耶穌基督ê福音，徹底悔改來成做重生ê人生，因為主基督已經用祂ê寶血來成做信祂ê人ê siōng好ê朋友，tú親像約翰福音十五章12～15節所講ê內容，耶穌基督叫學生做朋友，m̄是奴僕；（奴僕雖然會服從主人ê命令，但是伊khah機械性，khah m̄是人性ê服從，teh信仰上khah無價值），ē-tàng彼此相疼、互相信任，是成做朋友ê基本條件，耶穌基督以萬主之主、萬王之王ê身分，臨到世上，稱呼相信祂ê人——是罪惡滿滿ê重罪人做朋友，甚至替chiah-ê朋友失—去性命，chit種關係，咱用義重如山來形容，iáu感覺不足，這是基督徒信仰生活ê特質。約翰福音十五章16節：「M̄是lín揀我，是我揀lín，並且分派lín去結果子，叫lín ê果子常存」，tī-chia，咱看tio̍h主ê恩典tī信ê人身上。

基督徒ài體會「Hông揀ê信仰」是確立tī對上主ê主權kap恩典絕對ê信仰告白，使徒保羅tī加拉太書四章9節：「Chit-má lín既然認bat神，koh-khah ē-sái講是hō͘神所認bat ê……」腓立比書三章12節：「這m̄是講我已經得tio̍h啊，已經完全啊，我是盡力追求，或者ē-tàng得tio̍h基督耶穌所得tio̍h我ê」（日譯做hō͘基督耶穌掠tio̍h），chit種信仰告白to̍h是基督徒kap耶穌之間實實在在ê信仰體驗。

一、 一般ê朋友觀
咱thang tùi人生社會實況來看一般人所交ê朋友，有一位學者提出，四種朋友bē-tàng交往。
1） 忘恩背義ê人，bē-tàng kap伊做朋友。朋友來往是互相之間有理想，有健康ê來往關係，忘恩背義ê人無chit種條件。
2） 愛功勞貪利ê人，bē-tàng kap伊做朋友。Chit種人心態、價值觀已經無正，bōe-sái成做可取ê朋友。
3） 口是心非之人。假影偽善，對人扶扶tháⁿ-tháⁿ，但是時常有真驚人ê舉動，可能帶來真大傷害。
4） 卑鄙奸詐之人。當然若m̄是經過長時間ê交往，人ê心性真pháiⁿ完全了解。

Tī社會中，咱通常thang看tio̍h下列類型ê朋友：

(1) 利害關係ê朋友：
建立teh互相利用ê利害關係之上。當互相利用價值存在ê時，友情表現真理想、完美。譬如下港某地檢察處ê首席檢察官，平日朋友有夠 chē，而且是重量級人物，有一日因為案件牽連hông收押，chiah-ê朋友竟無一人去探訪關心，hō͘伊深深感慨人情ê現實，一年了後案件解決，chit位檢察官對朋友ê看法完全改變，無koh交任何利害關係ê朋友。

(2) 酒肉朋友：
Tī現實社會中，chit種關係ê朋友為數bē少，有享受、有利益ê時，不時高朋滿座，無享受無好處ê時，就lóng看無人影，德國俗話講：「酒肉朋友，伊ê性質to̍h親像酒仝款，一暝就過去啊。」因為人是現實ê存在，現實ê景況對人生ê態度影響真大，現實狀況好ê時，tio̍h有真chē朋友，實例：有一位sing-lí人seng-lí做得真好，全盛ê時有十gōa間店，厝內ta̍k頓lóng開二、三桌，因為食客真chē，但是無外久seng-lí失敗，樹倒猢猻散，全部走了啊，伊感嘆講：人實在太現實啊！因為chit種酒肉朋友只有teh有酒肉ê時chiah有友情，若無tio̍h完全無，當然chit種朋友mā 無可能有什麼值得收成ê果實！

(3) 勢利朋友：
有人形容人kap人ê友情ná親像狗ê世界，狗ê特性是「扶起不扶倒」，tī某一kóa情形之下確實是án-ne，尤其tī政治kho͘-á koh-khah明顯，這teh是說明人心中ê勢利心態，當一個人有絕對ê權勢ê時，伊ê朋友真chē，但是一位失勢ê政客，必定無人敢去親近伊。葉公超先生是中國近代史上一位傑出ê外交官，非常受肯定，可惜tī台灣chit-ê矛盾、偏差ê政治體制中，無法度發揮動力，伊ê見解無法度hō͘當局接納，台灣hông逼退出國際舞台ê時，當時盟友lóng認同台灣kap中國大陸是二個無仝ê政治實體，有意幫助台灣確保tī聯合國ê地位，可惜當時國民黨政府主張甘願玉碎無願意瓦全，帶hō͘現在台灣siōng大ê悲哀，葉先生tī伊ê傳記中講：伊hông軟禁ê時，無一位朋友，這是勢利眼ê現實社會。
有一個故事講：兩個朋友tī林中tú-tio̍h熊，甲無顧另一位，隨爬起lih樹頂，乙bōe赴爬樹仔，只好詐死，因為聽講熊bōe攻擊死人，熊行 óa乙用鼻聞伊，然後離開，一直到脫險，甲chiah tùi樹頂爬落來問乙，熊kap你講什麼？講：Tī危難ê時kan-ta顧家己安全ê人bē-tàng kap伊做朋友。孔子亦言益者三友，損者三友，巧言令色ê人，疼做假ê人，gâu扶tháⁿ ê人，lóng m̄值值去交往，tī社會中，咱lóng會有chit種體驗。

二、 朋友ê建立
人生在世，朋友確實非常重要，德國俗語講「無朋友ê人，只體驗一半ê人生」，tī人生社會中，朋友ê存在是關鍵性ê問題，伊mā成做人生成敗ê要素之一，真chē人因為交tio̍h損友chiah身敗名裂，反之，有kóa人因為益友之幫助而成大業。法國畫聖米勒少年ê時，家境惡劣，寒天酷寒pháiⁿ過，有一日好朋友羅素來訪知影情形了後，暗中用高價買伊ê圖，幫助伊渡過siōng困難ê日子，十gōa年了後，米勒拜訪羅素chiah發現，當時用三百箍買伊ê圖ê人竟然是好朋友羅素。

（A） 認bat kap了解是形成友誼siōng基本ê因素
若欠缺chit-ê要件，無法度形成知己ê朋友。箴言十八章24節：「有一個朋友，比兄弟koh-khah親密」，tú好說明了朋友之間ê情誼是建立tī深刻ê認bat kap了解ê基礎上，kap頂面所講ê米勒kap羅素ê情誼to̍h是確立tī chit種認bat kap了解。

今á日，基督徒ài了解kap chit位「Siōng好ê朋友」交往，咱到底有認bat基督莫？對祂了解jōa-chē？Tùi chia來形成基督徒kap基督之間往來ê情形，chit種關係是決定基督徒ê信仰品質kap內容ê基本問題。

（B） 性質ê仝款
這mā是形成友情要項之一，因為若二人觀念、思想差別siuⁿ大，就無法度有深入ê交往，所謂龍交龍，鳳交鳳，癮痀ê交tòng戇，to̍h是teh說明有共同特質ê人khah ê鬥陣，tī各方面亦khah ē-tàng完美發揮伊ê共同特質。以家庭來講，翁仔bó͘生活若bōe-tàng建立思想、價值觀ê一致性，往往會成做冤家ê原因，人生ê友誼mā仝款，若性質bē合，mā 無可能有深厚ê友誼，一位鱸鰻型ê學生無可能kap有品性、功課好ê學生做好朋友，因為一個beh chhōe娛樂，另外一個soah tio̍h用功讀冊。哥林多後書六章15節，保羅論基督徒kap無信主ê人tī本質上有真chē無仝，「基督kap彼列（撒但ê別名）有什麼相呼應neh？信主ê kap m̄信主ê有什麼相干neh？」當咱kap基督建立關係ê時，咱必須明白主基督ê特性kap伊所愛--ê，咱ài有kap主仝款ê性質，chiah ē-tàng kap主建立良好ê實質關係。

（C）信任kap真誠ê疼
建立互相信任ê態度是朋友之間siōng重要ê內容，因為teh互相信任ê基礎上，chiah ē-tàng推動朋友之間真chē有意義ê偉大作為，互相信任mā是推動人生真chē事工ê動力，有一篇故事講：有二位好朋友，A hông判死刑，但是伊ê小妹婚期到，內心有淡薄á著急，好朋友B自願代替做人質，向長官要求三工ê時限，hō͘ A thang好tńg去厝內處理小妹ê婚事，官准。A因為中途tú-tio̍h風雨，行程受阻礙，三工ê時限the-beh到，hiah-ê人向B講：A已經逃亡，但是B堅信伊ê朋友，到最後ê時，A趕tńg去完成交代，官長深受chit 二人互信ê友誼感動，最後赦免伊ê罪。「真誠ê疼」Mā是朋友之間所bē-tàng欠缺--ê，有人講友情是「靈魂ê結婚」，tī-chia所需要ê是用真誠ê疼來互相對待。

用這來省思基督徒ê信仰生活kap耶穌基督ê關係，咱對主ê信任到什麼程度？咱用jōa-chē真誠ê疼來對待chit位siōng好ê朋友？
三、 義重如山
咱已經將形成友情ê大概內容說明。耶穌基督已經叫咱（基督徒）做伊ê朋友，雖然咱深知家己無配，咱lóng是重罪ê人，但是主soah tī咱chit種現實中，謙卑家己成做咱siōng好ê朋友，咱用「義重如山」來思考chit位siōng好ê朋友主基督，當咱用人性ê事實來省思主tī咱身上所做ê工，以及伊對待咱ê種種，照理咱無配叫做基督ê朋友，因為人性ê罪是形成人無法度khiā-tī主面前ê事實，tī chit-ê狀 況之下，基督用朋友ê立場kap咱來往，這是因為祂絕對疼ê犧牲所帶來ê結果，因為祂ê疼，祂放sak性命，贖咱ê罪債，羅馬書五章6、8節「因為咱iáu koh軟弱ê時chūn，基督就按所定ê日期替罪人死……惟有基督tī咱iáu koh teh做罪人ê時chūn，替咱死，神ê疼就tī-chia向咱顯明啊。」為tio̍h罪人（kap上主對敵ê狀態），放棄性命，chit種絕對ê疼，hō͘咱眾罪人成做基督ê朋友。Chit種恩義，只有tī耶穌基督救贖ê事實內底ē-tàng完全體會。 所以主要求咱chiah-ê成做伊siōng好ê朋友ê軟弱ê眾人，應該tio̍h有互相相疼ê生活來完成伊所交待ê命令，「Lín若遵守實行我所吩咐--ê，to̍h是我ê朋友啊。」（約翰福音十五章14節），chit種經由耶穌基督所賜ê友情，是基督徒tī教會中好親像兄弟仝款ê信仰生活，信仰者lóng會體會tio̍h主內可貴ê情誼，是任何關係lóng無法度取代--ê。 面對chit位義重如山ê siōng好朋友——主基督，基督徒ê心態如何？是m̄是視主耶穌為知己ê心腹，主耶穌看咱是知己ê朋友，「我稱lín為朋友，因為我tùi阮老父所聽見--ê，已經lóng kā lín講了。」（約翰福音十五章15節）咱是m̄是向主坦白？我是m̄是有留後路？M̄敢公開？這to̍h是造成隔閡kap異心ê原因，主基督mā要求咱「Lín ài時常tī我內面，我mā時常tī lín內面。」Chit種一體性ê存在，mā to̍h是友情siōng可貴ê部份。 各位，面對咱ê主，咱ê信仰生活是m̄是kap主有完全ê連結？ 這是必須深思ê問題。用咱ê現實生活來反省，平時用什麼態度對待義重如山ê救主耶穌？咱認bat伊jōa-chē？是m̄是kap祂有共同ê性質？咱用jōa-chē時間去疼chit位替咱犧牲性命ê好朋友耶穌基督？ 有一工，咱mā會聽tio̍h主當日對西門彼得所講ê：「西門，你疼我比chiah-ê koh-khah深麼？」（約翰福音二十一章15節），咱tio̍h用什麼話來回答伊？這是咱信仰生活ê課題。 結論：「M̄是lín揀我，是我選lín，並且分派lín去結果子，叫lín ê果子常存，hō͘ lín奉我ê名，無論向老父求什麼，伊就賜hō͘ lín。」（約翰福音十五章16節），主基督選咱，去結果子，長久留存，che應該是基督徒phah拼ê方向！