《台語家庭》

 | | | 轉寄

Ûi-lîm台語Kó͘-chui話 (16)

作者 Teng Hongtin 2007.03.25

Ûi-lîm台語Kó͘-chui話 (16)
Teng Hongtin 記錄 (2007.2.18 phah字)

44.困難是ē-hiáu，簡單是bōe-hiáu。(2006.10.3)

暗頭á，媽媽去幼稚園chhōa Ûi-lîm。
Ûi-lîm看tio̍h chi̍t ê老師行過-來，to̍h講：「媽媽，伊是『美陶課』ê Toh-toh老師。」
媽媽：「O͘h，你kám有想beh koh上『美陶課』？」
Ûi-lîm：「無愛。」
媽媽：「Ūi-siáⁿ-mi̍h？」
Ûi-lîm：「因為siuⁿ簡單a。」
Chheng-chheng：「應該是siuⁿ困難chiah tio̍h！」
Ûi-lîm：「Lóng kāng-khoán。」
媽媽：「你kám知影siáⁿ-mi̍h是簡單？siáⁿ-mi̍h是困難？」
Ûi-lîm：「困難ē-hiáu，簡單bōe-hiáu。」
媽媽：「簡單to̍h是ē-hiáu，困難to̍h是bōe-hiáu。」
Ûi-lîm：「Án-ni是siuⁿ困難a。」

45.細細聲講，chiah bōe hō͘嘴齒ê蟲聽tio̍h (2006.11.27)

Ûi-lîm嘴齒疼，去看醫生。看soah，媽媽問Ûi-lîm：醫生有kā伊講siáⁿ-mi̍h話bô？
Ûi-lîm：「我kā醫生講：我chiok勇敢ê！我細細聲講，án-ne chiah bōe hō͘嘴齒ê蟲聽tio̍h。」

46. 綠島有he關人ê所在，我會驚 (2006.11.29)

食暗tǹg ê時chūn，Ûi-lîm問講：「媽媽，你kám知影我ūi-siáⁿ-mi̍h beh koh去墾丁chhit-thô？」
媽媽：「M̄知。」

Ûi-lîm：「因為我kah意墾丁。墾丁khah好sńg，ē-tàng看phìn-gù (khiā-gô)，koh ē-tàng sńg水，koh ē-sái sńg沙，koh ē-sái食mi̍h-kiāⁿ，ah-koh ē-sái跳來跳去。因為綠島(火燒島)有he關人ê所在，所以我會驚。」