《台語家庭》

 | | | 轉寄

愛哭青kap Hô͘-lin豆chiaⁿ ê故事(6-1)

作者 Teng Hongtin 2006.02.12

Ài-khàu-chheng kap Hô͘-lin-tāu-chiaⁿ ê kò͘-sū
愛哭青kap Hô͘-lin豆chiaⁿ ê故事(6-1)
──為 5 歲ê 心肝á cha-bó͘-kiáⁿ Chheng-chheng所寫ê台語gín-á故事

編故事：Teng Hongtin (丁鳳珍) -----2001.4.15第1版，2006.2.6第2版，台中
繪本製作+畫圖：Lí Chheng-chheng (李青青) -----2006.2.6-10，台中

Thàu早ê風吹過細條田hōaⁿ-á路邊--á ê hit排竹á，mā吹過1 khu 1 khu ê hô͘-lin豆田，粉白ê hô͘-lin豆花tī柔軟ê風--nih輕輕á搖來搖去，chhiⁿ-gèng-gèng ê hô͘-lin豆頂頭ê露水，hō͘ khùi力飽足ê日頭chiò kah金sih-sih。

Kôaⁿ-kiuh-kiuh ê冬天已經tńg去hioh睏--lo͘h，妖嬌ê春光phiàn chiò田園，chiò tī青青紅kòng-kòng ê嘴phóe，i tiām-tiām-á倒tiàm hô͘-lin豆田ê稻草堆頂koân，睏kah嘴唇kap目chiu尾á lóng笑bún-bún。

「Oeh！青青！日頭chiò kha-chhng--lo͘h！你是beh睏kàu siáⁿ-mi̍h時chūn？青青！Kín起--來-lah！」

青青大力péng chi̍t下á身軀，oa̍t頭繼續眠夢。

「愛睏豬！好！我ài用特別ê手段chiah ē-tàng。我m̄信叫你叫bōe起--來，用稻草來ngiau你ê鼻á好--a。」

「Ah......Hah-chhiùⁿ！Hah-chhiùⁿ！Ah！Chia是siáⁿ-mi̍h所在--leh？我nā ē tī chia？Ma-ma......Pa-pa......」

青青oa̍t頭相--過-來看--過-去，想beh chhōe pa-pa kap ma-ma，m̄-koh，m̄-nā無看tio̍h in，竟然koh有1隻生做chhiⁿ-gèng-gèng ê妖怪khiā tī i ê身軀邊。

Chit隻妖怪ê身軀chhan像1 ngoeh hô͘-lin豆，sán koh po̍h-pán，tn̂g-lò-lò，ām-kún koh kat 1隻大紅色ê ia̍h-á，頭殼nā像是1粒chhiⁿ色ê豆á仁，圓lìn-lìn，頭殼頂koh有1粒粉紅á色ê大花m̂。

青青peh--起-來，發覺chit隻妖怪竟然tú好kap i pîⁿ koân，koh用烏mì-mà ê大粒目chiu仁，lia̍h青青金金相。

「O͘h！你總算cheng神--a！你知影beh叫你起床有jōa-á-nī-á辛苦--無？」

想bōe kàu chit隻怪物koh ē-hiáu講人話，青青chhoah-chi̍t-tiô soah哭--出-來，一直哭beh chhōe i ê pa-pa kap ma-ma，i 想bōe-hiáu ka-kī nā ē無tī厝--nih，mā想bōe出為siáⁿ-mi̍h ka-kī ē出現tī chit個chhiⁿ-hūn ê所在，i choaⁿ-á繼續大聲háu，目sái直直流，哭kah目kho͘紅kì-kì。

「好--a！M̄-thang koh哭--lo͘h-lah！你nā koh哭，我mā beh哭--a-o͘！」

妖怪竟然哭kah比青青koh khah大聲，哭kah kui粒頭殼liam-mi紅liam-mi烏，看--起-來chiâⁿ傷心，頭殼頂ê hit粒花m̂ soah hiông-hiông倒頭栽--落-來，tú好khàm tio̍h i ê目chiu，實在chiâⁿ好笑。

(這篇文章 iáu-bōe soah,後禮拜歡迎繼續收看。)