《耶穌言行錄》

| | | 轉寄

Tē-95-chiuⁿ,Iâ-so͘ koh-oa̍h hō͘ hū-jîn-lâng khòaⁿ

作者 Ko Kim-seng. 2010.01.31

（Má-thài 28：1-9； Má-khó 16：1-11；Lō͘-ka 24：1-12）
Iū-thài lâng ê an-hioh-ji̍t liáu-āu，chhit ji̍t ê thâu-chi̍t ji̍t，chiū-sī lán hiān-chāi ê an-hioh-ji̍t，phah-phú-kng ê sî，hiah ê hū-jîn-lâng tòa só͘ pī-pān ê hiuⁿ-liāu kàu bōng.Tī ō͘-nih saⁿ-kap kóng，"Chī-chiū-á ōe thòe lán sóa-khui bōng-mn̂g ê chio̍h？"In-ūi hit tè chio̍h chám-jiân tōa.Hn̄g-hn̄g teh khòaⁿ-kìⁿ，khòaⁿ-kìⁿ chio̍h í-keng sóa.Ji̍p- bōng khòaⁿ-kìⁿ chi̍t ê siàu-liân lâng chē tī chiàⁿ-chhiú pêng，chhēng pe̍h-saⁿ，hū-jîn-lâng chin kî-koài.Siàu-liân lâng kóng，"Bo̍h-tit kî-koài；lín kiám m̄-sī chhē tèng si̍p-jī-kè Ná-sat-le̍k ê lâng Iâ-so͘？I í-keng koh-oa̍h，bô tī chia lah，thang lâi khòaⁿ bâi-chòng ê só͘-chāi.Tio̍h khì kā I ê ha̍k-seng kap Pí-tek kóng. "Khì pò ê lâng ê tiong-kan，chi̍t ê chiū-sī Boa̍t-tāi-lia̍p ê Má-lī-a.

Pí- tek kap Iok-hān thiaⁿ-kìⁿ chi̍t ê siau-sit，chiū cháu khì bōng—nih.Iok-hān tāi-seng kàu，àⁿ-teh khòaⁿ，khòaⁿ iù-pò͘ tī-teh.Pí-tek lō͘-bé kàu，ji̍p-khì bōng-ni̍h khòaⁿ-kìⁿ iù-pò͘ tī-teh.Ū pau thâu-khak ê kun bô kap iù-pò͘ tī-teh，sī lēng-gōa tha̍h chi̍t ūi.Hit-sî ha̍k-seng tò-khì.Má-lī-a khiā tī bōng-gōa thî-khàu.Thî-khàu ê sî，àⁿ-teh khòaⁿ bōng-lāi，khòaⁿ-kìⁿ nn̄g ê thiⁿ-sài chhēng pe̍h-saⁿ chē tī Iâ-so͘ bâi-chòng ê só͘-chāi，chi̍t ê tī thâu-khak，chi̍t ê tī kha-nih.Thiⁿ-sài kóng，"Siáⁿ-sū thî-khàu？"Má-lī-a kóng，"Lâng the̍h góa ê Chú ê sin-si，m̄-chai hē tī tá-lo̍h？"Kóng-liáu oa̍t-thâu khòaⁿ-kìⁿ Iâ-so͘ teh-khiā，m̄-chai sī Iâ-so͘.Iâ-so͘ mn̄g i kóng，"Siáⁿ-sū thî-khàu？Lí chhē chī-chūi？"Má-lī-a phah-sǹg sī kò͘-hn̂g ê lâng，chiū kā I kóng，"Nā-sī lí kng lok tī tá-lo̍h，kiû lí kā góa kóng，góa beh khì siu. "Iâ-so͘ kóng，"Má-lī-a. "Má-lī-a oa̍t-thâu kóng，"Lia̍p-pho-nî，"（Ì-sù chiū-sī sian-siⁿ）.Iâ-so͘ kóng，"Tio̍h khì kā góa ê hiaⁿ-tī kóng，góa chiūⁿ thiⁿ kìⁿ góa ê Pē，chiū-sī lín ê Pē，góa ê Siōng-tè，chiū-sī lín ê Siōng-tè. "Má-lī-a chiong khòaⁿ-kìⁿ Iâ-so͘，pèng kap Iâ-so͘ kóng-ōe，khì kā ha̍k-seng kóng.

Āu-lâi Iâ-so͘ tú-tio̍h hiah ê hū-jîn-lâng，tī lō͘-nih ia̍h kā in kóng，"Goán lín pêng-an. "Hū-jîn-lâng chìn-chêng phō I ê kha，pài I.Iâ-so͘ kóng，"Bo̍h-tit kiaⁿ，chòe lín khì pò góa ê hiaⁿ-tī chai thang khì Ka-lī-lī，tī hia ōe kìⁿ-tio̍h Góa. "

Hū-jîn-lâng tò-khì ê sî，pé-siú bōng ê peng ji̍p siâⁿ chiong chiah ê tāi-chì pò chè-si-tiúⁿ chai.In kap tiúⁿ-lo saⁿ-kap gī-lūn，ēng chōe-chōe gûn hō͘ peng，kóng，"Lín tio̍h kóng，"Goán teh khùn ê sî，I ê ha̍k-seng mî-sî lâi thau I khì. "Siat-sú chóng-tok thiaⁿ-kìⁿ，goán chiū khǹg i hō͘ lín bô sū. "Peng-teng niá gûn，chiàu in só͘ hoan-hù lâi kiâⁿ.

思羅安台語點字網站