《耶穌言行錄》

| | | 轉寄

Tē-96-chiuⁿ,Iâ-so͘ chhut-hiān hō͘ Sù-tô͘ khòaⁿ

作者 Ko Kim-seng. 2010.02.07

（Má-khó 16：12，13；Lō͘-ka 24：13-48）
Iâ-so͘ koh-oa̍h hit ji̍t ū chhut-hiān hō͘ Pí-tek khòaⁿ；ia̍h hit chi̍t ji̍t ū nn̄g ê ha̍k-seng khì Í-má-ngó͘，nn̄g lâng saⁿ-kap kóng só͘ keng-kè ê tāi-chì，Iâ-so͘ kūn-óa kap in saⁿ-kap kiâⁿ.Ha̍k-seng bê-ba̍k bōe jīn-tit.Iâ-so͘ kóng，"Lín kiâⁿ ê sî saⁿ-kap tâm-lūn sī sím-mi̍h tāi-chì，chiah ū iu-būn ê bīn-sek？"Chi̍t lâng kóng，"Lí tī Iâ-lō͘-sat-léng kiám sī toaⁿ-sin lâi hioh，iā m̄-chai kūn-ji̍t só͘ keng-kè ê tāi-chì mah？"Iâ-so͘ kóng，"Sím-mi̍h tāi-chì？"In chiū kóng，"Ná-sat-le̍k lâng Iâ-so͘ ê tāi-chì：I chòe sian-ti lâng，tī Siōng-tè kap chèng peh-sìⁿ ê bin-chêng，só͘ kóng，só͘ kiâⁿ，chiâu-chn̂g hó，nā-sī lán ê chè-si-tiúⁿ，iú-si-koaⁿ kè-sàng I，gí sí-chōe，tèng I tī si̍p-jī-kè.Chit ê lâng goán pêng-sò͘ ū ǹg-bāng beh sio̍k-hôe Í-sek-lia̍t ê peh-sìⁿ；m̄-nā án-ni，koh chit ê tāi-chì í-keng chiâⁿ ū saⁿ-ji̍t；goán ê tiong-kan kúi-nā ê hū-jîn-lâng hō͘ goán put-chì gông-ngia̍u，sī in chá-khì thàu-chá khì bōng-nīh bōe khòaⁿ-kìⁿ hit ê sin-si，tò-lâi kóng ū khòaⁿ-kìⁿ thiⁿ-sài chhut-hiān，kā in kóng Iâ-so͘. "

Iâ-so͘ kóng，"Bû-ti ê lâng ah，cháiⁿ-iūⁿ m̄ sìn sian-ti lâng só͘ kóng w5 ōe，ia̍h sim kàu chiah tūn？Ki-tok siū hāi chaih tit-tio̍h êng-kng，kiám m̄-sī eng-kai？Hit tia̍p Iâ-so͘ tùi Mô͘-se khì，í-ki̍p chia̍h ê sian-ti lâng，hoān-nā Sèng-chheh só͘ kì-chài ka-kī ê tāi-chì ê，lóng-chóng siông-sè kóe-bêng.

Kūn-óa só͘ khì ê hiuⁿ-siā，Iâ-so͘ ná chhin-chhiūⁿ beh kiâⁿ khah hn̄g；nn̄g lâng kiông lâu I，kóng，"Sî í-keng òaⁿ，ji̍t beh lo̍h，chhiáⁿ kap goán saⁿ-kap hioh；"Iâ-so͘ chiū kap in hioh.Chē-toh ê sî，Iâ-so͘ the̍h piáⁿ chiok-siā，chiū peh-phòa hō͘ in.Nn̄g lâng ba̍k-chiu kng，ōe jīn-tit Iâ-so͘，hut-jiân bô khòaⁿ-kìⁿ.Chiū saⁿ-kap kóng，"I tī lō͘-nih lán kóng-ōe，khui-thiah Sèng-chheh ê sî，lán ê sim kiám bô jia̍t mah？"Chek-sî khí-sim tò-khì Iâ-lō͘-sat-léng；tú-tio̍h cha̍p-it ê sù-tô͘ kap tâng-phōaⁿ ê lâng chòe tui teh kóng，"Chú chin-chiàⁿ koh oa̍h hō͘ Se-bûn khòaⁿ-kìⁿ. "Chí nn̄g lâng ia̍h chiong lō͘-nih só͘ tú-tio̍h，kap peh-piáⁿ jin-tit Iâ-so͘，chiah ê tāi-chì lâi kóng.Teh kóng ê sî，Iâ-so͘ khiā tī in ê tiong-kan kóng，"Lín chèng-lâng pêng-an. "Kóng ê sî，chiong chhiú kap heng-ha̍h hō͘ in khòaⁿ；ha̍k-seng khòaⁿ-kìⁿ chiū hoaⁿ-hí，iáu-kú bô sìn lâi kî-koài.Iâ-so͘ chiū kóng，"Ū mi̍h thang chia̍h á bô？"In hō͘ I，Iâ-so͘ tng in ê bīn-chêng chia̍h.Chiū kóng "Mô͘-se ê lu̍t-kap sian-ti lâng ê chheh，kap Si-phian só͘ kì-chài chí góa ê tāi-chì lóng-chóng ōe èng-giām，góa pêng-sò͘ kap lín tī-teh ê sî bat kóng. "Hit tia̍p Iâ-so͘ chiū khui in ê sim-khiàu，hō͘ in ōe thong-ta̍t chiah ê Sèng-keng.

思羅安台語點字網站