《耶穌言行錄》

| | | 轉寄

Tē-94-chiuⁿ,Bâi-chóng Iâ-so͘

作者 Ko Kim-seng. 2010.01.24

（Má-thài 27：57-61；Má-khó 15：42-47； Lō͘-ka 23：50-54；Iok-hān 19：31-42）
Iâ-so͘ tèng si̍p-jī-kè ê ji̍t sī lán ê pài-gō͘.Iû-thài lâng ê an-hioh-ji̍t sī lán ê pài-la̍k，Jû-oa̍t-choeh lāi ê an-hioh sǹg sī tōa An-hioh，só͘-í Iû-thài lâng put-chí m̄-ài sin-si ji̍t kùi tī si̍p-jī-kè，chiū kiû Pí-lia̍p-to hoan-hù peng-teng khì kòng-chi̍h tèng tī si̍p-jī-kè ê lâng ê kha-kut，hō͘ in khah kín sí，thang liâm-piⁿ pàng sin-si lo̍h-lâi.Peng-teng khì，chiong saⁿ-kap tèng ê lâng chi̍t-ê chi̍t-ê kòng-chi̍h kha-kut.Kàu Iâ-so͘，khòaⁿ-kìⁿ I í-keng sí，chiū bô kòng-chi̍h I ê kha-kut，to̍k-to̍k ēng chhiuⁿ chha̍k I ê heng-ha̍h；huih chúi lóng lâu chhut-lâi.Sèng-chheh só͘ kóng，"I ê kut bô chi̍h，"koh kóng，"Lâng beh khòaⁿ in só͘ chha̍k ê "ū èng-giām.Teh-beh àm，ū pù-lâng chiū-sī A-lī-má-thài ê lâng，miâ kiò Iok-sek，chòe chun-kùi ê gī-sū，him-bō͘ Siōng-tè ê kok，sī Iâ-so͘ ê ha̍k-seng；chóng-sī kiaⁿ Iû-thài lâng，siông-siông ka-kī ún-khǹg，taⁿ hó-táⁿ ji̍p-khì kìⁿ Pí-lia̍p-to，kiû Iâ-so͘ ê sin-si.Pí-lia̍p-to ún—i，sûi-sî khì siu sin-si.Koh ū Nî-ko-tí-bó͘，bat mî-sî chiū-kūn Iâ-so͘ ê lâng，tòa bu̍t-io̍h kiau lô͘-kòe iok-liōng ū chi̍t-pah kun lâi.Chi2nng7 lâng chiong Iâ-so͘ ê sin-si ēng iù-pò͘ chham hiuⁿ-liāu lâi pau，hē tī chio̍h chha̍k ê bōng，kō tōe tè chio̍h that bōng-mn̂g，chiū khì.Hit ê bōng sī Iok-sak ê.Sèng-chheh ū kì-chài kóng，"Iâ-so͘ sí liáu kap pù-lâng saⁿ-kap bâi-chòng，"án-ni ū èng-giām.

Chèng chè-si-tiúⁿ，Hoat-lī-sài lâng chū-chi̍p kìⁿ Pí-lia̍p-to kóng，"Goán kì-tit hit ê phiàn-lâng—ê oa̍h ê sî bat kóng，"Saⁿ ji̍t āu góa koh-oa̍h，"só͘-í lâi chhiáⁿ lí hoan-hù tio̍h saⁿ ji̍t kò͘-siú hit ê bōng；kiaⁿ-liáu I ê ha̍k-seng mî-sî thau I，kóng I tùi sí koh-oa̍h. "Pí-lia̍p-to kóng，"Hō͘ lín pé-siú ê peng，chòe lín khì chīn sim kian-kò͘ siú. "Sûi-sî khì kò͘-siú hit ê bōng，hong-chio̍h siat-peng.

Tùi Ka-lī-lī kap Iâ-so͘ saⁿ-kap lâi ê hū-jîn-lâng kúi-nā ê khòaⁿ hit ê bōng，sòa khòaⁿ sī cháiⁿ-iūⁿ chóng hit ê sin-si；tò-tńg khì pī-pān hiuⁿ-liāu kap hiuⁿ-iû；an-hioh-ji̍t chiàu kài-lu̍t lâi hioh.

思羅安台語點字網站