《耶穌言行錄》

| | | 轉寄

Tē-45-chiuⁿ,Chhân phōe-á ê phì-jū

作者 Ko Kim-seng. 2009.02.15

(Má-thài 13:24-53;Má-khó 4:26-34).
Iâ-so͘ koh siat phì-jū kóng，Thian-kok chin-chhiūⁿ lâng iā hó ê chéng-chí tī chhân-nih；the khùn ê sî，tùi-te̍k kàu，iā phōe-á tī be̍h-lāi chiū khì.Be̍h kàu thò͘-sūi kiat-chí，chiū phōe-á ia̍h chhut-hiān.Chhân-chú ê lô͘-po̍k lâi kā i kóng，"Chú ah，lí kiám m̄-sī ēng hó ê chéng-chí iā tī chhân-nih mah？cháiⁿ-iūⁿ ū phōe-á？"

Chhân-chú kóng，"Sī tùi-te̍k chòe. "Lô͘-po̍k kóng，"Goán khì khau i thang mah？"Kóng，"M̄-thang，kiâⁿ-liáu khau phōe-á，be̍h iā hō͘ lín pu̍ih khí-lâi.Tio̍h iông-ún nn̄g hāng pîⁿ-pîⁿ tōa，thèng-hāu beh koah；koah ê sî，góa kah koah ê lâng tio̍h tāi-seng chiong phōe-á khioh kui-tui hâ teh，ēng hé lâi sio，āu-lâi siu be̍h ji̍p chhng. "Iâ-so͘ ji̍p chhù，ha̍k-seng chiū-kūn I kóng，"Chhân phōe-á ê phì-jū tio̍h bêng-bêng kà-sī goán.”Iâ-so͘ kóng，"Iā hó chéng-chí ê sī Jîn-chú；chhân sī sè-kan；hó chéng-chí sī thian-kok ê peh-sìⁿ；phōe-á sī pháiⁿ-kúi ê peh-sìⁿ，tùi-te̍k iā phōe-á ê sī Mô͘-kúi；siu-koah ê sî，sū sè-kan ê lō͘-bé；koah ê sī thiⁿ-sài；ēng phōe-à khioh kui tui hé-nih lâi sio.Sè-kan ê lō͘-bé ia̍h sī án-ni:Jîn-chú the- beh chhe I ê thiⁿ-sài，tùi I ê kok-lāi chiong hō͘ lâng khì hoān-chōe ê kap chòe pháiⁿ ê lâng khioh chòe tui；hiat lo̍h hé-lô͘，tī hia ū ai-chhám，thî-khàu，kā-gê，chhiat-chhí.Hit-tia̍p hó-lâng the-beh kng-kng chhin-chhiūⁿ ji̍t，tiàm i ê Pē ê kok. "

Sè-kan ū nn̄g téng-hō ê lâng saⁿ chham，āu-lâi tio̍h pun-khui，ū lâng tit-tio̍h tōa hok-khì，ū lâng tú-tio̍h tōa chhiⁿ-chhám.Lán tio̍h kiû Siōng-tè pang-chān lán sêng-si̍t chòe I ê peh-sìⁿ，kàu hit sî m̄-sái thó͘-khùi kóng，"Hē-thiⁿ ê ji̍t í-keng kè，siu-sêng ê sî í-keng bêng-pe̍k，ia̍h goán iáu-bē tit-tio̍h chín-kiù. "

思羅安台語點字網站