《《原鄉．夜合》 客語詩集》

 | | | 轉寄

秋夜放田水 Chhiû ya piong thièn súi

作者 曾貴海 白話字：邱淑華 2007.10.14

秋夜暗晡
Chhiû ya am pû
月公像一尾小白帶魚
Ngia̍t kûng chhiong yit mî se pha̍k tai ǹg
金金吊天邊
Kîm kîm tiau thiên piên

阿叔帶我去放田水
 suk tai ngài hi piong thièn súi
用腳頭挖開上坵田滣
Yung kiok theù yat khôi song khiû thièn sùn
就坐落來叭煙
Chhiu chhô lo̍k lòi pak yân
吸一口閃一絲光
Sut yit heú sám yit sî kông
遠遠ke庄肚
Yán yán ke chông tú
幾盞燈光眨著目珠想睡目
Kí chán tên kông ngiap tén mu̍k chû sióng soi mu̍k

水聲流過腳底ke田滣
Súi sâng liù ko kiok tái ke thièn sùn

靜靜ke田坵暗夜
Chhin chhin ke thièn khiû am ya
響起「蛙」仔同虫仔聲
Hióng hí koái é thùng chhùng é sâng
風吹過田坵尾ke竹頭樹
Fûng chhôi ko thièn khiû mî ke chuk theù su
盡多小鬼佇竹葉尾喊我等
Chhin tô se kúi thê chuk ya̍p mî hêm ngài tên

四周ke夜沒邊沒底
Si chû ke ya mò piên mò tái
阿叔恬恬毋講話
 suk tiâm tiâm m̀ kóng fa
帶我來到這黑暗世界ke中心
Tai ngài lòi to yá vû am sṳ kiai ke chûng sîm
像分人擲去世間暗角
Chhiong pûn ngìn chiet hi sṳ kiân am kok

驚到想噭泣ke時節
Kiâng to sióng kieu chṳ̂ ke sṳ̀ chiet
阿叔手指左邊ke大黑影
 suk sú chṳ́ chó phién ke thai vû yáng
月光下天頂上坐著南大武山
Ngia̍t kông hâ thiên táng hong chhô tén nàm thai vú sân
伊講山神一直看守我等
Kì kóng sân sṳ̀n yit chhṳ̍t khon sú ngài tên


這兜老公太ke後代
Yá teû ló kûng thai ke heu thoi
係毋係還會來放田水
He m̀ he vàn voi lòi piong thièn súi




腳頭＝鋤頭
叭煙＝抽煙
「蛙」＝青蛙
這兜＝這些
係毋係＝是不是