《巴克禮普世版聖經「漢羅+Ruby」試讀本》

 | | | 轉寄

巴克禮普世版（試讀本） 路加福音第十七章

作者 巴克禮普世版小組 2013.08.04

論(lūn)罪(chōe)，信 心(sìn-sim)，服 事(ho̍k-sāi) (太(thài)17：20；18：6-7，21-22；可9：42)
1耶穌(iâ-so͘)koh對門徒(tùi bûn-tô͘)講(kóng)：「引起(ín-khí)人(lâng)犯 罪(hoān-chōe)ê tāi-chì難 免(lân-bián)，m̄-koh hō͘ hit-ê tāi-chì發 生(hoat-seng)ê人(lâng)有災禍(ū chai-hō)！2寧 可(lêng-khó)用(ēng)大 石 磨(tōa chio̍h-bō)吊(tiàu)tòa伊(i)ê頷 頸(ām-kún)，kā伊(i)hiat落海(lo̍h-hái)，mā m̄-thang hō͘至微細(chì-bî-sè)ê一個(chi̍t-ê)犯 罪(hoān-chōe)。3 Lín家己(ka-kī)mā tio̍h謹慎(kín-sīn)，若(nā)lín ê兄弟(hiaⁿ-tī)犯 罪(hoān-chōe)，tio̍h kā伊(i)責 備(chek-pī)。伊(i)若悔 改(nā hóe-kái)，tio̍h kā伊(i)赦 免(sià-bián)。4 M̄-koh若(nā)你(lí)ê兄弟(hiaⁿ-tī)一日(chi̍t-ji̍t)得 罪(tek-chōe)你(lí)七(chhit)pái，伊(i)七(chhit)pái lóng有(ū)倒(tò)tńg來(lâi)kā你講(lí kóng)：『我(góa)悔 改(hóe-kái)à。』你(lí)mā lóng tio̍h kā伊(i)赦 免(sià-bián)。」

論(lūn)信 心(sìn-sim)
5使徒(sù-tô͘)kā主(chú)講(kóng)：「求(kiû)祢(lí)加添(ke-thiⁿ)阮(goán)ê信 心(sìn-sim)。」6主(chú)應 講(ìn-kóng)：「Lín若有(nā ū)親 像(chhin-chhiūⁿ)一 粒(chi̍t-lia̍p)芥 菜 子(kòa-chhài-chí)hiah大(tōa)ê信 心(sìn-sim)，就是(chiū-sī)命 令(bēng-lēng)chit叢(châng)桑 材 樹(sng-châi-chhiū)講(kóng)：『拔(pu̍ih)你(lí)ê根(kin)去 栽(khì chai)tī海裡(hái-ni̍h)。』Hit叢(châng)樹(chhiū)mā會順 服(ē sūn-ho̍k)lín。」

奴僕(lô͘-po̍k)ê義務(gī-bū)
7 Lín中 間(tiong-kan)若有(nā ū)奴僕(lô͘-po̍k)tùi做穡(chò-sit)á是(sī)顧羊(kò͘-iûⁿ)tńg來(lâi)ê時(sî)，lín kám會(ē)kā伊(i)講(kóng)：『緊(kín)坐 落來(chē lo̍h-lâi)食 飯(chia̍h-pn̄g)？』8祢(lí)kám會顛倒(ē tian-tò)kā伊(i)講(kóng)：『準 備(chún-pī)hō͘我(góa)食 飯(chia̍h-pn̄g)，縖(hâ)圍(ûi)su裙(kûn)來服 事(lâi ho̍k-sāi)我(góa)。Thèng候(hāu)我(góa)lim食(chia̍h)soah，你(lí)chiah thang lim食(chia̍h)？』9奴僕(lô͘-po̍k)做 主 人(chò chú-lâng)所吩 咐(só͘ hoan-hù)ê tāi-chì，主 人(chú-lâng)kám tio̍h kā伊(i)說 謝(soeh-siā)？10 Lín mā親 像(chhin-chhiūⁿ)án-ne，lín做 完(chò-oân)受交帶(siū kau-tài)ê tāi-chì，tio̍h講(kóng)：『阮 是(goán sī)無路用(bô-lō͘-ēng)ê奴僕(lô͘-po̍k)，kan-tāⁿ盡 本 份(chīn pún-hūn)去 做(khì chò)niā-niā。'「

醫好(i-hó)十個(cha̍p-ê)癩 哥(thái-ko)病 人(pēⁿ-lâng)
11耶穌(iâ-so͘)去(khì)耶路撒 冷(iâ-lō͘-sat-léng)ê時(sî)，tùi撒瑪利亞(sat-má-lī-a)kah加利利省(ka-lī-lī-séng)ê交 界(kau-kài)經 過(keng-kòe)。12祂(i)入去(ji̍p-khì)一個(chi̍t-ê)庄 社(chng-siā)ê時(sî)，tú-tio̍h十個(cha̍p-ê)癩 哥(thái-ko)病 人(pēⁿ-lâng)。In khiā tòa遠 遠(hn̄g-hn̄g)ê所 在(só͘-chāi)，13大 聲(tōa-siaⁿ)hoah講(kóng)：「耶穌(iâ-so͘)老師(lāu-su)，憐 憫 阮(liân-bín goán)。」14耶穌(iâ-so͘)一下看(chi̍t-ē khòaⁿ)tio̍h就(chiū)kā in講(kóng)：「Lín本 身(pún-sin)去(khì)hō͘祭司(chè-si)驗(giām)。」In去(khì)tī路 中(lō͘-tiong)，就得(chiū tit)tio̍h清 氣(chheng-khì)。15其 中(kî-tiong)一個 人(chi̍t-ê lâng)看(khòaⁿ)tio̍h家己(ka-kī)ê病(pēⁿ)已經(í-keng)好(hó)，就(chiū)倒(tò)tńg來(lâi)大 聲(tōa-siaⁿ)o-ló上 主(siōng-chú)，16仆(phak)tòa耶穌(iâ-so͘)ê腳 前(kha-chêng)kā祂(i)感 謝(kám-siā)，chit-ê人(lâng)是(sī)撒瑪利亞 人(sat-má-lī-a-lâng)。17耶穌(iâ-so͘)問 講(mn̄g kóng)：「Kám m̄是(sī)十 個 人(cha̍p-ê lâng)lóng得(tit)tio̍h清 氣(chheng-khì)？其他(kî-tha)九個人(káu-ê lâng)tī tó位(ūi)？18 Chit-ê外 族(gōa-cho̍k)ê人(lâng)以外(í-gōa)，kám無別 人(bô pa̍t-lâng)倒(tò)tńg來(lâi)感 謝(kám-siā)上 主(siōng-chú)？」19耶穌(iâ-so͘)就(chiū)kā hit-ê人(lâng)講(kóng)：「起來(khí-lâi)，做(chò)你(lí)tńg去(khì)，你(lí)ê信 心(sìn-sim)hō͘你(lí)得(tit)tio̍h醫好(i-hó)à。」

上 主 國 度(siōng-chú kok-tō͘)ê來臨(lâi-lîm) (太(thài)24：23-28，37-41)

20有(ū)一(chi̍t)kóa法 利賽 派(hoat-lī-sài-phài)ê人(lâng)問耶穌(mn̄g iâ-so͘)，上 主 國 度(siōng-chú kok-tō͘)tī時(sî)會臨 到(ē lîm-kàu)。耶穌(iâ-so͘)應 講(ìn-kóng)：「上 主 國 度(siōng-chú kok-tō͘)臨 到(lîm-kàu)，m̄是人(sī lâng)看(khòaⁿ)會(ē)出 來(chhut-lâi)。21 Mā無 人(bô-lâng)ē-tàng講(kóng)：『Tī chia』，á是(sī)『Tī hia』因為(in-ūi)上 主 國 度(siōng-chú kok-tō͘)是(sī)tī lín ê中 間(tiong-kan)。」22耶穌(iâ-so͘)就(chiū)對門徒(tùi bûn-tô͘)講(kóng)：「時日(sî-ji̍t)teh-beh到(kàu)，lín真(chin)ài看(khòaⁿ)tio̍h人 子(jîn-chú)來臨(lâi-lîm)ê hit日(ji̍t)，lín mā看(khòaⁿ)bē-tio̍h。23有人(ū lâng)kā lín講(kóng)：『你 看(lí khòaⁿ)，tī hia！你 看(lí khòaⁿ)，tī chia！』 Lín m̄-thang出 去(chhut-khì)，mā m̄-thang tòe in去(khì)。24因為(in-ūi)人 子(jîn-chú)來臨(lâi-lîm)ê日子(ji̍t-chí)ná親 像(chhin-chhiūⁿ)閃電(sih-nà)，tùi天(thiⁿ)chit-pêng teh閃(siám)，光 照(kng chiò)到(kàu)天(thiⁿ)ê hit-pêng。25 M̄-koh祂(i)一定(it-tēng)tio̍h tāi先(seng)受(siū)真(chin)chē ê艱 苦(kan-khó͘)，mā hō͘ chit世代(sè-tāi)ê人(lâng)棄(khì)sak。26人 子(jîn-chú)來臨(lâi-lîm)ê日子(ji̍t-chí)kah挪亞(ná-a)ê時日(sî-ji̍t)仝 款(kāng-khoán)。27 Hit時(sî)ê人(lâng)，照 常(chiàu-siông)teh lim食(chia̍h)，teh嫁 娶(kè-chhōa)。到(kàu)挪亞(ná-a)入去(ji̍p-khì)大 船(tōa-chûn)ê日(ji̍t)，大 水(tōa-chúi)一下到(chi̍t-ē kàu)，眾 人(chèng-lâng)lóng淹死(im-sí) 了 了(liáu-liáu)。28 Mā kah羅得(lô-tek)ê時日(sî-ji̍t)仝 款(kāng-khoán)，人(lâng)照 常(chiàu-siông)teh lim食(chia̍h)、買賣(bé-bē)、種 作(chèng-choh)、起 厝(khí-chhù)。29 M̄-koh羅得(lô-tek)出(chhut)所多瑪(só͘-to-má)hit日(ji̍t)，tùi天(thiⁿ)有降 落(ū kàng-lo̍h)火(hóe)kah硫 磺(liû-hông)，kā in消 滅(siau-bia̍t)kah無 半 人(bô pòaⁿ-lâng)。30人 子(jîn-chú)出 現(chhut-hiān)ê日(ji̍t)，mā會(ē)親 像(chhin-chhiūⁿ)án-ne。31 「Hit日(ji̍t)，tú tī厝 頂(chhù-téng)ê人(lâng)m̄-thang落來(lo̍h-lâi)the̍h厝 內(chhù-lāi)ê物 件(mi̍h-kiāⁿ)，tú tī園 裡(hn̂g-ni̍h)ê人(lâng)mā m̄-thang tńg去(khì)厝 裡(chhù-ni̍h)。32 Lín tio̍h會記得(ē-kì-tit)羅得(lô-tek)ê bó͘所(só͘)tú-tio̍h ê tāi-chì。33想(siūⁿ)beh保 全(pó-choán)家己(ka-kī)性 命(sèⁿ-miā)ê人(lâng)會喪 失(ē sòng-sit)性 命(sèⁿ-miā)；所有(só͘-ū)喪 失(sòng-sit)性 命(sèⁿ-miā)ê人(lâng)會保全(ē pó-choán)伊(i)ê性 命(sèⁿ-miā)。34我(góa)kā lín講(kóng)，hit暝(mê)兩個 人(nn̄g-ê lâng)睏(khùn)仝 頂(kâng-téng)床(chhn̂g)，一個(chi̍t-ê)會(ē)hō͘人(lâng)chhōa去(khì)，一個(chi̍t-ê)會留(ē lâu)teh。35兩個(nn̄g-ê)婦人 人(hū-jîn-lâng)同 齊(tâng-chê)teh挨(e)石 磨(chio̍h-bō)，一個(chi̍t-ê)會(ē)hō͘人(lâng)chhōa去(khì)，一個(chi̍t-ê)會留(ē lâu)teh。36有兩個(ū nn̄g-ê)人(lâng)tī田 裡(chhân-ni̍h)teh做穡(chò-sit)，一個(chi̍t-ê)hō͘人(lâng)接 去(chiap-khì)，一個(chi̍t-ê)留(lâu)teh。」(註(chù)：有(ū)ê抄 本(chhau-pún)無(bô)chit節(cheh)。) 37門徒(bûn-tô͘)問耶穌(mn̄g iâ-so͘)講(kóng)：「主(chú)ah，這(che)會(ē)tī啥 物(siáⁿ-mi̍h)所 在(só͘-chāi)發 生(hoat-seng)？」耶穌(iâ-so͘)應 講(ìn-kóng)：「有屍體(ū si-thé)ê所 在(só͘-chāi)，鷹 鳥(eng-chiáu)就(chiū)會聚 集(ē chū-chi̍p)去(khì)tī hia。」