《當上帝開嘴講台語》

 | | | 轉寄

5.3.1.3 「語音」方面ê語感測驗

作者 梁淑慧 2009.03.08

表5.3.1.3a 無仝背景ê讀者對《巴克禮譯本》ê「語音」接受度以及χ2 檢定【省略，敬請有興趣ê人參考原冊】

Tùi表5.3.1.3a咱知 「年齡」、「聽台語講道時間ê長短」以及「kám有捷看《巴克禮譯本》抑是《台語漢字本》」chit三項變數對於《巴克禮譯本》ê「語音」接受度有顯著ê影響。Tùi各分項調整後ê殘差顯示：「年齡」tī 15歲到25歲ê人，對《巴克禮譯本》ê「語音」接受度顯著有khah kē；26歲到40歲以及60歲以上ê人，對《巴克禮譯本》ê「語音」接受度顯著有khah koân。「聽台語講道ê時間」tī半年以下者，對《巴克禮譯本》ê「語音」接受度顯著有khah kē；超過10年以上者，對《巴克禮譯本》ê「語音」接受度顯著有khah koân。「無捷看《巴克禮譯本》抑是《台語漢字本》」者，對《巴克禮譯本》ê「語音」接受度顯著有khah kē；「捷看《巴克禮譯本》抑是《台語漢字本》」者，對《巴克禮譯本》ê「語音」接受度顯著有khah koân。

Tī「語音」語感測驗中ê答題情形如下：

表5.3.1.3b 「語音」語感測驗ê題目kap答案統計

＃ 題目選擇人次佔總人數
1.耳仔
（1）hī-á ※ 23 9.83
（2）hīⁿ-á 213 91.03
2.迎接
（1）ngiâ-chih ※ 6126.07
（2）gêng-chiap 17976.50
3.禮物
（1）lé-mi̍h ※ 88 37.61
（2）lé-bu̍t 153 65.38
4.神蹟
（1）sîn-chek 106 45.30
（2）sîn-jiah※131 55.98
5.查甫
（1）ta-po͘ ※ 19 8.12
（2）cha-po͘216 92.31
6.天使
（1）thiⁿ-sài ※ 15264.96
（2）thian-sài 79 33.76
7.食物
（1）chia̍h-mi̍h ※ 117 50.00
（2）si̍t-bu̍t 12854.70
8. [勿會]熄的火
（1）bē hoa ê hóe 198 84.62
（2）bōe hoa ê hé ※38 16.24
9.咬牙切齒
（1）kā-gê chhiat-chhí ※64 27.35
（2）kā-gê chhiat-khí169 72.22


以上9題語音方面ê選擇m̄-nā有漳、泉腔口ê無仝，mā有文白音讀ê差異。一般來講，「＝PKL」代表《巴克禮譯本》kap《現代台語譯本》ê讀音，to̍h是語音上屬於「廈門腔」抑是「台北腔」，而且語詞大部分用「白話音」來發音。（＃9 ê「齒」讀做文音「chhí」是例外。）

Tùi結果咱看tio̍h除了使用頻率khah koân ê神學專有名詞，譬如＃4「神蹟」、＃6「天使」是「＝PKL」khah hō͘人接受以外，其他各題lóng是「≠PKL」khah hō͘人接受。

根據洪惟仁（1992b）《台灣方言之旅》冊內所整理出來ê田野調查資料，台語目前ê分佈狀況是：中央山脈東北麓kap西麓屬於「偏漳區」，台北盆地、西海岸狹長地帶屬於「偏泉區」，tī以上二者中間kap嘉南平原，花蓮壽豐以南ê一大片地區屬於「漳泉混合區」。「漳泉混合區」已經發展出一種「台灣優勢腔」，使得「偏漳區」以及「偏泉區」ê地盤漸漸縮小。

「台灣優勢腔ê語音系統，如果詳細分析，會tàng發現，漳州音所佔ê比例比泉州音khah優勢。M̄-koh泉州籍人口實際上比漳州籍人口khah多，按照1930年台灣總督府ê統計，泉州籍ê人有1,701,900人，漳州籍ê人有1,319,500人。泉州人大約ke將近四十萬，hit當時客家人口只有494,000人。為什麼泉州腔顛倒khiā弱勢？這是因為漳州人大部分khiā tī平原，khah容易早日融合做統一ê漳州腔，m̄-koh泉州人大部分khiā tī山邊海角，內部方言無容易融合，所以勢力分散，漳州腔自án-ne佔了優勢。」（洪惟仁，1992b：103）

咱ê問卷結果印證了「漳州腔」比「泉州腔」khah優勢ê事實，過去《巴克禮譯本》ê「廈門腔（泉chē漳少）」已經影響教徒ê語言習慣，致使部分教徒tī「口語」kap唸讀《聖經》時出現語音無一致ê狀況（註99），to̍h是原本「漳州腔」ê口音會為著唸讀《聖經》來改做「泉州腔」。新譯ê《現代台語譯本》無的確會tàng考慮出版無kāng腔口ê版本，hō͘教徒有選擇ê機會。

文白音讀ê選用方面，咱mā建議ke參考社會上普遍ê講法，才會tàng真正反映社會上ê語音實況。

註99：阮bat請幾位教會中ê長者分別讀三段無kāng文字ê《聖經》經文，將唸讀ê過程錄音落來，發現án-ne ê情形。咱tī 5.3.2.4節會詳細討論chit個實驗kap結果。