《當上帝開嘴講台語》

 | | | 轉寄

4.5 文字ê探討-2

作者 梁淑慧 2008.06.22

4.5.2 漢字

台語ê漢字文來自福建、廣東地區ê閩南語文字，目前siōng早ê文獻是明代嘉靖年間刊行ê《荔鏡記》。清朝將台灣納入科舉制度中，致使台灣文風向中國傳統漢學看齊，影響到taⁿ。

用漢字書寫台文ê優點：（1）有表意ê功能。（2）無kāng時代m̄-koh同語源ê詞，著算發音改變，猶原會tàng使用kāng一個漢字。（3）無kāng方言中間ê書面語互相看有，容易溝通，mā容易互相移借詞彙。

M̄-koh漢字teh表記台語ê時有伊ê限制：（1）無法度反映所有ê台語音節。台語內底為數bē少ê「非漢語詞素」（註91）kap「擬聲詞」、「擬態詞」、「合音詞」等無法度用漢字本字寫出--ê，必須透過訓用、假借、造字等方法來補足，造成用法上ê混亂。（2）無法度見字發音。台語語音中成系統ê文白異讀猶原需要用音標輔助chiah會tàng正確發音。（3）學習負擔大。至少ài認bat 3000~4000漢字chiah會tàng做普通程度ê閱讀（Norman, 1988）。（4）資訊處理無方便。（5）檢索無方便。需要靠部首抑是筆劃，費時間、費精神。（6）真oh標準化。各辭典kap文學作品中ê漢字選用出入真大，約有10﹪ê常用語詞大家使用無一致（鄭良偉， 1989a、1990a）。研究者熱心teh chhiau-chhōe「本字」，卻無一定會tàng得tio̍h各界ê認同。（7）漢字台語詞用法kap所熟悉ê華語詞意思無仝，容易產生困擾。譬如下列台語詞：做生理【做生意】、倒去【回去】、火車頭【火車站】……等（鄭良偉， 1990a）。

M̄-koh著算講用漢字書寫台文有chiah-ni̍h chē不便，長期以來漢字tī社會上hō͘人當做是正統ê表述漢語ê文字，mā是目前台灣社會上所通行ê主要文字系統，所以黃宣範（1995：377）表示：

「漢字tī一般人心目中ê地位猷原是特別重要--ê。台灣話文字ê建立固然需要漢字，一切以台語為基本ê『文化運動』恐驚tī最近ê將來也必須透過漢字一途。」


註91：包括源於閩越語、台灣原住民語、英、日外來語等。