《當上帝開嘴講台語》

 | | | 轉寄

4.5 文字ê探討-1

作者 梁淑慧 2008.06.01

台語《聖經》ê文字形式有三種：（一）白話字（羅馬字）：《巴克禮譯本》、「紅皮聖經」kap《現代台語譯本》試讀本。（二）漢字：《台語漢字本》。（三）漢羅合用字：《路加福音傳漢羅試寫》。台語《聖經》ê三種文字形式實際反映目前台語書面語ê狀況，這是其他ê宗教經典iáu未見tio̍h--ê。

4.5.1 白話字（羅馬字）
自1865年英國長老教會正式tī台灣府（台南）設立傳教ê本部（賴永祥，1990：281）開始，傳教士in to̍h根據tī廈門傳教ê經驗，大力推sak「白話字」。因為基督教非常強調「個人」kap「上帝」中間必須ài有直接ê關係，m̄-nā是靠牧師來傳達教義，信徒必須ài家己勤讀《聖經》，領受其中ê道理，所以「白話字」tī chit當中to̍h扮演一個相當重要ê媒介。利用簡單ê幾個音素符號to̍h會tàng表記所有日常生活ê口語，koh會tàng利用印刷出版品來吸收新知，對tī當時無法度接受漢字教育ê大多數信徒來講，的確是真利便ê學習工具。此後百gōa冬，白話字ê使用kap推行to̍h成做台灣長老教會發展歷史中ê重要特徵之一。根據黃典誠tī 1953年ê統計，台灣有三萬人使用白話字（註89）。Tùi早期ê白話字文獻（註90）咱mā thang發現伊ê文章類型非常豐富，除了宗教類以外，iáu-koh有文藝、新聞報導、會議記錄、學術論文、醫藥、護理、地理、教材、辭典……等。

以「白話字」書寫台文ê優點主要來自心理語言學上ê優勢：（1）記音準確。（2）簡單易學。（3）對索引、拍字等文書處理，有效koh簡單。（4）資訊處理方便，幫助台文ê現代化。（5）對外來語ê譯音khah精確。（6）容易轉移到外語ê學習能力。

M̄-koh後來因為政治力量ê介入，迫使教會ê白話字教育bē-tàng公開進行。加上「國語政策」ê推行，入學校受教育人人lóng ài講「國語」、寫「國字」，致使台語白話字發展ê空間受tio̍h極大ê限制kap迫害（黃宣範1995；陳美如，1998；張裕宏，2001）。漢字教育ê普及mā hō͘白話字tī教會內底衰微，少年一輩ê信徒雖然會曉講台語，m̄-koh大多數已經看無白話字。這mā是將《巴克禮譯本》ê文字形式改做漢字，另外出《台語漢字本》ê原因。

可見以「白話字」做書面語ê困難khah chē來自社會語言生態：（1）長期受tio̍h政府打壓禁止，阻斷「白話字」學習kap推展ê環境。（2）以漢字為主ê社會oh得接受羅馬字，kā伊看做是外來文字。（3）學校教育系統無支援，hō͘真chē人因為對羅馬字生份來排斥。（4）政府並無肯定台語ê社會地位，致使台語文字久久bē-tàng標準化，社會無法度提供夠額ê報酬來吸引學習者。

M̄-koh白話字因為會tàng準確記錄台語ê發音，koh有豐富ê文獻資料，成做學習台語、研究台語不可欠缺ê工具。王育德（1993：45）bat講過：

「教會羅馬字kap基督教教義並無相干，m̄-koh kap過去、現在以及將來ê台灣文化ê發展有密不可分ê關係。」

尤其是80年代開始，因為母語意識ê抬頭，白話字tī民間自發性ê母語運動推行之下，再度蓬勃發展，而且層面擴及社會，已經無koh侷限tī教會人士ah。咱tùi下面chit段話會tàng看出白話字對台灣人ê意義：

「教會為著傳教ê目的使用當地ê母語，m̄-kú教會所傳ê白話字ê意義m̄-nā限制tī-leh宗教nā-tiāⁿ。對台灣人來講白話字就是台灣字，是台灣人ê文化資產。」（張復聚等，2001）。

透過教會外ê人士對白話字ê認同，阮相信白話字tī未來iáu有極大ê發展空間。


註89：黃典誠（1953）〈從閩南白話字看出拼音文字的優點〉《中國語文》7月號。轉引自張學謙（1997）〈書寫的意識型態分析：以《台灣青年》為例〉。

註90：楊允言ê網站提供詳細ê白話字書目：http://203.64.42.21/iug/ungian/SoannTeng/POJ.htm