《當上帝開嘴講台語》

 | | | 轉寄

4.2.3 《現代台語譯本》ê詞彙特色-2

作者 梁淑慧 2007.05.06

4.2.3.2 人名、地名ê修改

《聖經》ê中文譯本自1919年ê《和合本》翻譯完成了後，成做流傳siōng闊ê中文《聖經》，一直到1979年chiah有《現代中文譯本》ê出版，1988年將原有ê《和合本》改採新標點出版，1995年koh出版《現代中文譯本修訂版》。Chit幾個中文譯本tī人名、地名方面加減lóng有做修改，以kap現代社會上常用ê翻譯名詞一致。《現代台語譯本》tī chit方面mā有kāng款ê努力，雖然目前《現代台語譯本》只有印製數卷新約「試讀本」，m̄-koh咱thang看出它ê譯名應該會kap《現代中文譯本修訂版》中ê譯名一致chiah是。

表4.2.3.2 各譯本ê常用人名、地名比較（按：本表格共列出15個人名、地名tī三種台語版本以及四種華語版本中ê比較，因為表格khah複雜，無法度tī網頁chia呈現，請有興趣ê讀者，自行閱讀原書，多謝！）

根據《新標點和合本》ê說明，人名ê修改有幾項原則：（1）修改不雅ê譯名。譬如：＃8將「流便」改譯做「呂便」。（2）避免性別誤解。譬如：＃10將「尼哥底母」改譯做「尼哥德慕」，以免人誤會伊是女性。＃4將「友阿爹」改譯做「友阿蝶」，＃7將「拉結」改譯做「蕾潔」，以免hō͘人掠準講in是男性。（3）出名ê歷史人物抑是人名改採現代音譯。譬如：＃5將「該撒」改譯做「凱撒」（註73），＃3將「以利沙伯」改譯做「伊利莎白」。地名ê修改主要是beh kap目前社會通用ê講法一致，譬如：＃1將「亞拉伯」改譯做「阿拉伯」，＃2將「推羅」改譯做「泰爾」，＃3將「希利尼」改譯做「希臘」，＃7將「革哩底」改譯做「克里特」，＃10將「呂彼亞」改譯做「利比亞」，＃12將「伯拉大河」改譯做「幼發拉底大河」，＃13將「郇」改譯做「錫安城」，＃14將「士斑雅」改譯做「西班牙」，＃15將「大馬色」改譯做「大馬士革」。

註73：＃5「凱撒」原本是凱撒大帝ê名字，後來成做羅馬皇帝ê頭銜。