《大人囡a2詩》

 | | | 轉寄

王錄仔á仙

作者 Li KhinhoaN 2005.12.17

listen



“Lâi-lâi-lâi, khòaⁿ-khòaⁿ-khòaⁿ
「來來來，看看看
Kín lâi khòaⁿ, bān lâi
緊來緊看，慢來
Lí to̍h kan-nā khòaⁿ chi̍t-pòaⁿ”
你to̍h kan-nā 看一半！」
Kóaⁿ-kín chông khì khòaⁿ
趕緊chông去看
Í-keng siuⁿ-kòe òaⁿ
已經siuⁿ過òaⁿ
Siàu-lú chhēng chi̍t-pòaⁿ
少女穿一半
Kûn-thâu phah kah tōa-lia̍p kōaⁿ sè-lia̍p kōaⁿ
拳頭phah kah大粒汗細粒汗
Khiā tī hn̄g-hn̄g khòaⁿ
Khiā tī遠遠看
It-chhè lóng thoat-sòaⁿ
一切lóng脫線
Kang-hu bô teh poaⁿ
功夫無teh poaⁿ
Ko͘-io̍h the̍h khí-lâi tōaⁿ
膏藥提起來tōaⁿ
Thô͘-soa-hún chò io̍h hông kiáu nōa
土砂粉做藥hông攪nōa
Chhiū-kin chhiat-phìⁿ bián koh choaⁿ
樹根切片免koh choaⁿ
Ko-lê jîn-sam lo̍k-jiông pó͘-io̍h-toaⁿ
高麗人蔘鹿茸補藥單
Cha-po͘-lâng chia̍h liáu chòng-iông koh pó͘-koaⁿ
查甫人食了壯陽koh補肝
Cha-bó͘-lâng chiah liáu àm-sàm-pīⁿ bē koh thòaⁿ
查某人食了àm-sàm病bē koh thòaⁿ
A-se--ê chi̍t-tōa-kōaⁿ
阿西--ê一大kōaⁿ
Chheⁿ-chhám jîm chîⁿ chhut-lâi ōaⁿ
Chheⁿ-chhám jîm錢出來換
Khok-khok tán beh khòaⁿ lēng-gōa hit-pòaⁿ
Khok-khok等beh看另外hit半
Siūⁿ beh cháu kòe-khì kā i khui hoa̍t-toaⁿ
想beh走過去kā伊開罰單
Kiaⁿ lâng kóng goán âng-pau ia̍h-beh siu ia̍h-beh kóaⁿ
驚人講阮紅包ia̍h-beh收ia̍h-beh趕
Kèng-chhat tú-tio̍h ông-lo̍k-á-sian
警察tú-tio̍h王錄á仙
Chí-hó tán kàu hì soah lâng sòaⁿ
只好等到戲煞人散
---2003/5/6 Harvard