《赤崁樓ê情phoe》

 | | | 轉寄

Siû Bāng

作者 Koa Pek'êng 2021.04.18



Lí iōng hoeh kap eng gán
Kā sánchhiah chhèngsat
Chhèngchì phùnchhut ê hóechheⁿ
Kā chhengchhun sio‧sí

Chhiúkhàu khaliâu ê bôa hûn
Thunchia̍h chheⁿ bīn liâu gê ê chhiah liông
Ga̍k hûn chhàngchhiu
Amtà ji̍t go̍at
Kiôngpek lí khì thiaⁿ chhiû chīⁿ būn
Khì phīⁿ lô chhiûⁿ ê chhàuphú bī
Sí sek ê ba̍kchiu jîn
Khòaⁿ bē tio̍h tînsè ê miākeh
N̂gsng ê bīnpôaⁿ
Bô mê bô kak

Anpêng ê háihong kiáulām thóhái lâng ê hánhoah
Kǹgkòe thihthang ìnji̍p lí ê hīⁿkiàⁿ
chi̍t pho chi̍t pho hiongchhiû ê chehchàu
Búlāng kú nî chiùkhí ê thiu thiàⁿ
Tiuh! Lāupē ê chi̍t kù kàsī
Tiuh! Lāubú ê chi̍t siaⁿ thó͘khùi

Chiāmchiām, lí sakkhui àm iā
Lō͘chhut khihkak ê bāng khí
Iù’iù’á pō͘ tūilo̍h chêng ê kìtî
Chhunchhut iôchhoah ê chéngthâu’á
Thiahphòa khiauku chheⁿ pe̍h ê siû hûn
Chiāmchiām, lí ēng hâm sau ê siaⁿtòa, tèⁿ la̍t
Kekchhut gēsu̍t ê thâu siaⁿ
Ha̍ksi̍p phi chi̍t niá hibāng ê sekchhái
Chhiùⁿkoa

Háiⁿ! Kásek ê khathúi sngnńg bô la̍t
Tī lāu chhù ê lō͘‧lin, thun thun
Thò͘ thò͘, sô sô sô

Lí chíhó kā kakī
Tâiji̍p chi̍t mûi ô'á ê paktó͘ lāi
Kòa tī ô'á kè ê siōng thâu kàu
Tánthāi lāubú ê ba̍ksái
Kā ô khak
Phòa khui