《赤崁樓ê情phoe》

 | | | 轉寄

Chiùchhng ê Hônghun Tô͘

作者 Koa Pek'êng 2021.04.11



Chhekchiáu'á chhōe bô tiūchháu lâng ê kengkah
Tō͘kún'á suh bô kamchià hn̂g ê lengchúi
O͘ bīn lāpoe bāng bô pe̍h iâm'iâm ê bînchhn̂g, chi̍tphiàn
Hônghun, hāⁿ ji̍p·lâi. Moa tī
Chhânkap'á hō͘ tathô͘ hang kah tio̍hsoa
Sihsut’á hō͘ cha̍pchháu kiaⁿ kah ékáu
Ahbî'á hō͘ lahsap chúi sīⁿ kah n̂gsng
Ê pakpêng piⁿ. Hâ tī lâmpêng piⁿ ê
Chòsit lâng jú lâi jú sán
Phahng tē jú lâi jú pûi
Chúigû kah pe̍hlēngsi sio siámsin ê ba̍ksîn
Jú lâi jú chheⁿso͘
Ji̍tthâu kah goe̍hniû siochiohmn̄g ê tâisû
Jú lâi jú chheⁿléng
Chi̍t chiah sinhêng ê phùnsiāki bô siaⁿ bô soeh
Poe chhut hônghun ê siōng tangpêng
Chi̍t pû kiuchúi ê chiáu'á sái bô lám bô ne
Tòm lo̍h hônghun ê siōng saipêng

── che sī chi̍t pak gēsu̍t ōe
　 khàm chi̍t niá thô͘soa hún un, tī bûnbêng ê siōng piahkak
　 bînbāng kìtî lâi kiò khíchhn̂g------------
Chi̍t tūi pe̍h káuhiā pûi nńg pûi nńg, ùi ōekheng
Chiùchhng ê kapphāng sô chhut·lâi
Chhat thâu chhat hīⁿ thâu tú thâu
Thauthau'á hòngsàng
Si So Mi ê khektiāu