《赤崁樓ê情phoe》

 | | | 轉寄

Bīpo̍ktôaⁿ ê Hoánpōe ── Kimmn̂g sióngsiōng chi it

作者 Koa Pek'êng 2021.11.21



Hīⁿkhang lāi putsî thiaⁿtio̍h
Chi̍t chūn chi̍t chūn lóng lóng ê siaⁿim
Saⁿ bān gōa ē bô kuichek ê chiatchàu
Gō͘ cha̍p nî lâi kín koh tāng ê kiaⁿ sim lún miā

Ūisiáⁿmih gún chi̍t chhutsì
Chùtiāⁿ sī húibia̍t
Húibia̍t jînbēng húibia̍t chhùthe̍h húibia̍t siâⁿpó húibia̍t
Sèkài

Hit nî ê Pat Jī Sam
Chó͘kok chho͘chhân ê chhiútê
Kā gún sak ji̍pkhì chi̍t ki chi̍t ki tōaphàu lāité
Tng gún saⁿ bān gōa jînkháu ê tōa kacho̍k
Chi̍t chhiong chhut phàukóng
Kui ê Kimmn̂g lóng kúnká khílâi

Gún lāupē chhiúⁿ tio̍h thâuhiuⁿ
Liàm tn̄g in lāupē ê thâukhak
Gún lāubú chi̍t oa̍tji̍p hāng’á lāi
In lāubú sûi tī hāng’á lāi siausit
Gún chek peh ko͘ chím ê paktó͘ thunchia̍h
In chek peh ko͘ chím ê tn̂g’á tn̂gtō͘
Gún hiaⁿ tī chí mōe ê kha chhiú pehthiah
In hiaⁿ tī chí mōe ê tn̄g kha tn̄g chhiú
Gún ê gín’á phōaⁿ kui tīn sio chio
Tī chhùi iûⁿiûⁿ ê ke’á lō͘ thiàu keh’á
Tī chiùⁿ kô͘kô͘ ê hoeh ‧ni̍h siûchúi

Tang tó sai oai ê chhùthe̍h un tī aikhàu tiong kúnliòng
Kíntiuⁿ ê hôngkhonghô pûn chhut kiaⁿhiâⁿ ê siaⁿtiāu
Kui bān tùn tôaⁿphìⁿ pàchiàm phīⁿsái tōa ê háitó

Hit nî ê Pat Jī Sam
Chi̍t tiûⁿ oa̍hmiā kap sísîn ê kaue̍k
Gún ê kecho̍k kap in ê sèkài
Lóng pī khekji̍p bōngpâi
Che kám sī gún póe bē khui ê miākeh?

M̄ gōan ēng góa ê chhùikut hunsi
Kauōaⁿ in ê khôekha phòasiùⁿ
Chíhó hoánpōe miākeh
Siáng ū chukeh koattēng lâng ê sèⁿmiā?

Tùi chó͘kok siā lâi kàu chia
Bih tī thô͘kha té àm bongbong ê téchàn
Gō͘ cha̍p tang ah
Góa kianchhî m̄ po̍kchà
Góa kianchhî
M̄ po̍kchà