《赤崁樓ê情phoe》

 | | | 轉寄

Ékáu ê Iākhong ——Chhuki

作者 Koa Pek'êng 2021.07.18



Siān tauhtauh ê ji̍tthâu teh thoa âng hê ê sin’iáⁿ
Kúi lúi o͘ jîn lânglâng sangsang tiàu tī thiⁿténg bóe
Pehkhui kam’á sek ê hônghun
Khaisí chi̍t bān chi̍t bān thàngthiàⁿ ê thunlún

Tōa sè chiah tiko’á tī i ê iùbah téng
Peh khí peh lo̍h, ián lâi ián khì
Chi̍t chiah chi̍t chiah chhinchhiūⁿ léng lāi ê to
Chi̍t to chi̍t to ó͘nōa i ê chhengchhun
Chi̍t siaⁿ heku chhoán, ta̍h phòa chi̍t ê bāng
Kui tiáⁿ chhàukōaⁿ sng, imsí suhiong chêng

Sangsang nńgnńg ê iā, tòng bē tiâu chi̍t siaⁿ thó͘khùi ê tāngliōng
Khangkhang phàⁿphàⁿ ê ūi, ek chhut khó͘miā phiauphû ê sngeh
Khóliân iùjūn ê hoesim, iáu bōe hù khuipau
Bô siaⁿ bô soeh tâi tī sòegoa̍t ê koaⁿchhâ lāi, tiaulêng

Li̍hkhui ê khangchhùi
Ǹgbāng goe̍hniû thīⁿ sionghûn

Goe̍hniû ê iosin, chi̍t chhùn chi̍t chhùn siausán, koh hongbóan
Chhongnó͘ ê kha pō͘ siaⁿ, tùi hīⁿkhang pê ji̍pkhì
Chiù thiàⁿ ê sng pi, tùi hìkńg bū chhutlâi
Lāu khì ê thiⁿ íkeng seⁿsian
I choa̍tbāng ê ba̍kchiahmn̂g sitchiok tūilo̍h
Thó͘ chi̍t kháu khùi, khòa tī
Ékáu ê iākhang