《赤崁樓ê情phoe》

 | | | 轉寄

Kámsiā Lí ê Ba̍ksái ——-Kapo̍k siūhāi hūlú

作者 Koa Pek'êng 2021.07.25



Kámsiā lí ê ba̍ksái
Tī lí chho͘ pêpê ê chhiútê līkhui góa iù mimi ê chhùiphóe liáu’āu
Lí ba̍kkho͘ kâm chúi, kóng lí ài góa
Góa goânliōng lí

Kámsiā lí ê ba̍ksái
Tī lí tōa’ôan ê kûnthâubó͘ kâm góa ê phīⁿkhang hoeh liáu’āu
Lí ba̍ksái liàn lo̍hlâi, kóng lí lim chiú chùi
Góa goânliōng lí

Kámsiā lí ê ba̍ksái
Tī lí kohchài giâkhí íthâu’á khòaⁿ góa un tī thô͘kha liáu’āu
Lí ba̍ksái sìlâmsûi, kóng lí chi̍t-sî sitchì
Góa goânliōng lí

Kámsiā lí ê ba̍ksái
Tī lí la̍ktio̍h góa ê thâuchang khian tùi piahtó͘ liáuāu
Lí ba̍ksái tiòng chúichai, kóng ūitio̍h lán ê gín’á
Góa goânliōng lí

Che sī chòe’āu chi̍t pái beh kámsiā lí ê ba̍ksái
Tī lí gia̍h to chhakji̍p góa ê hengkhám phùn kah hoeh saisai liáu’āu
Lí ba̍ksái chúipangsoaⁿ, kūi tiàm góa ê bōngpâi chêng
Góa m̄bián koh goânliōng lí