《CTT出頭天園地》

 | | | 轉寄

魚肚kap肉燥

作者 Chiúⁿ Ûi-bûn 2006.01.29

Nā lí sit-loân ê sî-chūn,
若　你　失　戀　ê　時　chūn

Lâi Tâi-lâm, góa chhiáⁿ lí chia̍h
來　台　南，　我　請　你　食

Hî-tō͘ kap bah-sò
魚　肚　kap　肉　燥.



Bô chhì bô kut,
無　刺　無　骨

Kan-taⁿ ū lām kiuⁿ-si ê kam-tiⁿ,
kan-taⁿ 有　lām　薑　絲　ê　甘　甜

Chi̍t-óaⁿ hî-tō͘
一　碗　魚　肚

iù-mî-mî
幼　綿　綿

Khah iâⁿ tó tī siàu-lú ê heng-chêng,
卡　贏　倒　tī　少　女　ê　胸　前

Chi̍t-óaⁿ bah-sò
一　碗　肉　燥

Phang kòng-kòng
香　貢　貢

Bô su siàu-lú ê chheng-phang,
無　輸　少　女　ê　清　香



Nā lí su-hiong ê sî-chūn,
若　你　思　鄉　ê sî-chūn

Lâi Tâi-lâm, góa chhiáⁿ lí chia̍h
來　台　南，　我　請　你　食

Hî-yō͘ kap bah-sò.
魚　肚　kap　肉　燥



Bô chhì bô kut,
無　刺　無　骨

Kan-taⁿ ū chham kò͘-hiong ê chu-bī,
kan-taⁿ 有　摻　故　鄉　e　滋　味

Chi̍t-óaⁿ hî-tō͘
一　碗　魚　肚

Ku̍t-liù-siù,
滑-liù-siù

Khah iâⁿ pau-hî kap ián-o͘,
卡　贏　鮑　魚　kap　燕　窩

Chi̍t-óaⁿ bah-sò,
一　碗　肉　燥

Hó bē thè,
好 bē　退

In-ūi
因　為

Che ū lām thó͘-tē ê bī-sò͘.
這　有　lām　土　地　ê　味　素


--11/25/2003 府城台南