《台灣之愛：盧俊義牧會筆記》

| | | 轉寄

用嚴謹肅穆ê心來過受難週

作者 盧俊義 2008.03.25

今á日開始是一年一度ê耶穌受難週節期。Ná親像過去仝款，咱tī chit-ê禮拜一到五ê每工早起七點、暗時八點，lóng會舉行受難週祈禱會。

Tī我個人ê信仰觀點中，我一直認為重視耶穌受難ê事，比甚麼lóng重要。a 帶領信徒嚴守受難週節期，就是teh幫助信徒建構基督教信仰ê基礎。Mā因為chit-ê緣故，我bē同意在chit期間舉行任何喜慶活動，mā無希望眾信徒外出去參加旅遊，我希望大家lóng會撥êng參加教會舉辦ê早、晚祈禱會。

真chē時chūn，特別是tī有人請我去演講，紹介基督教信仰時，我lóng會真清楚說明：boeh認bat基督教信仰，就是beh tùi生命ê苦難開始。因為人ê生命有苦難，chiah會想tio̍h家己ê軟弱、有限，需要幫助。但chit種幫助往往m̄是tùi別人身上chhōe tio̍h，因為人ê力量是真有限ê，特別是對tī生命ê事，beh透過人ê力量來幫助，有時m̄-nā得bē-tio̍h，顛倒常常是反效果，真正是jú幫jú忙。因此，回頭來chhōe生命ê主宰──上帝，chiah是正確之道。基督教信仰就是tùi chia開始ê；當人陷入生命苦難中而發出呼求ê聲音時，聖經kā咱講，上帝聽tio̍h人「呻吟」ê聲音，知影人ê痛苦。因此，伊差遣獨生愛子耶穌降生到世界來，就是為tio̍h拯救世人脫離生命ê苦難。

我真歡喜使徒保羅ê chit句話：「但是上帝對咱顯示了無比ê愛：當咱iáu是罪人ê時chūn，基督已經為咱死去！」（羅馬人書五：8）無錯，耶穌是為咱ê罪所帶來ê苦難，死去，而且死tī十字架頂。上帝並m̄是等到咱悔改了後，chiah差遣耶穌降生，mā m̄是等到咱懺悔時，耶穌chiah受差遣降生到世界起來。M̄是chit種ê。聖經ê作者kā咱講，上帝是hit種愛咱（參考約翰福音三：16），因此，看tio̍h咱一直teh受苦中掙扎tio̍h，呼求無門ê時chūn，上帝先差遣耶穌到世界上，就是為tio̍h boeh咱tùi罪ê苦難中脫離。耶穌就án-ne背人類ê罪惡，被釘死tī十字架頂。這就為甚麼使徒保羅會án-ne講：「因為我the̍h定主意，當我kap lín作伙ê時chūn，除了耶穌基督kap伊死tī十字架頂ê事以外，甚麼lóng m̄提。」（哥林多前書二：2）看pah，傳講耶穌kap伊死tī十字架頂ê事，ē-sái講是基督教信仰siōng根本ê事。Mā因為án-ne，使徒保羅講：「如果咱kap基督同死，咱信，咱mā tio̍h kap基督同活。」（羅馬人書六： 8）基督教信仰siōng珍貴ê所在，就是復活。因為復活，就是生命ê ǹg望。mài bē記得，復活ê基礎，就是tī kap耶穌同受苦。

久長以來，咱台灣ê基督教會非常少重視耶穌受難節期ê意義，卻對耶穌降生ê聖誕節特別看重。馬偕牧師認為這是受tio̍h seng-lí人ê影響所致。因此，伊tī台灣傳福音ê年代，無慶祝聖誕節ê活動。不過，台灣ê基督教會除了重視聖誕節，mā會注意復活節。因此，每年復活節，教會iáu是會準備象徵tio̍h生命出生ê「蛋」，特別是將蛋染上紅色，以teh代表「喜樂」、「美好」ê意思。Ná親像有kóa彌月禮盒中，會放一粒紅色彩蛋仝款。

無人會歡喜生命tú-tio̍h痛苦，mā無人會歡喜生活tī苦難中。但卻偏偏tī每一個人生命ê成長過程中，lóng是充滿tio̍h苦難。有趣味ê是，神經醫學者保羅•布蘭德（Paul Brand）講：苦難是上帝賞賜hō͘人ê「禮物」，只不過這是一份不被歡迎ê禮物（Pain: The Gift Nobody Wants）罷了。伊ài咱學習將chit種生命ê苦難，看做是一種上帝特別賞賜ê恩典。其實，這是真有意思ê一件事，如果咱ê生命lóng無tú-tio̍h苦難（這差不多是無jōa可能ê事），咱ê生命就bē有意義。To̍h是因為有苦難，咱ê生命chiah會光彩、亮麗起來。

英國出名ê學者路易士（C. S. Lewis）就bat講過，生命有苦難，就kah-ná鑽石tī琢磨ê時chūn，發出ê hit種吱吱ah ah ê聲音。聽那聲音甚至會hō͘人感覺毛骨悚然，oh得承受；看見琢磨時迸出ê火花，mā會hō͘人無想beh koh加看一眼。但當鑽石經過細工琢磨了，當大家tī欣賞過鑽石ê美麗了後，lóng會不約而同地發出讚嘆ê聲音，gōng-gia̍h伊那散發來ê光。Chit時，bē有人去講琢磨過程中，hiah-ê oh得聽進耳孔ê吱ah聲音，mā bōe有人去講琢磨時所發出ê火花。伊講生命ê美ná親像án-ne；jú chē苦難，到最後，hō͘眾人看tio̍h ê，就是這生命tī苦難了後所發出ê光彩。但無仝款ê所在是：當真chē人tī讚美這燦爛ê生命時，lóng會用真chē無仝ê方式，來描述tī旅程中所經歷ê種種苦難、所流出來ê真chē血目屎，kap那tī苦難奮鬥過後所留落來ê痕跡。

當咱準備迎接耶穌復活ê喜樂來臨chìn前，咱必須牢記耶穌為tio̍h咱死tī十字架頂ê苦難，如果咱bē記得chit件重大ê事，咱就無法度清楚復活為生命所帶來新生ê ǹg望kap意義。

Tùi明á載開始，咱教會每工上午七點、暗時八點有祈禱會，為tio̍h是boeh喚醒大家會記得，tī咱生活ê周遭，有真chē比咱koh-khah困苦ê人，咱需要透過祈禱ê力量，hō͘咱知影應該怎樣來幫助in。同時，mā透過祈禱會，來喚醒咱注意並ē-tàng積極設法終止，今á日ê世界iáu有真chē所在，因為某種利益而紛爭不斷，特別是軍事武力ê衝突、族群之間ê仇恨、國kap國之間利益ê糾葛等等，hō͘真chē兒童自細漢就學會曉tio̍h用武力進行報復ê行動。另外，mā希望透過祈禱會，hō͘咱想tio̍h當今ê社會，確實有真chē無正確ê傳統習俗，成做生命喜樂ê枷鎖等等。

今年，我將過去為受難週節期撰寫ê手冊，改成以書籍ê樣式來出版，其中內容包括了五項：一是「身心疾病ê苦難」；二是「面對親友死亡ê苦難」；三是「暴力kap爭奪ê苦難」；四是「文化壓迫ê苦難」；五是「經濟壓迫下ê苦難」。Tī chiah-ê項目裡，早晚各一篇，án-ne共計十篇。每工lóng有一段經文thang供「默想」，mā有「代禱事項」。我深切地ǹg望，今年會有koh-khah chē ê兄姊來參加chit-pái受難週祈禱會，無論jōa-ni̍h-á無閒，至少mā會想出所有ê辦法來參加一pái。若是真正bōe-sái來參加，你mā會tī厝裡閱讀《tùi基督ê受難，koh再思人生ê苦難》chit本冊，用伊當作靈修ê書籍，mā tī你工作ê場所、生活ê厝裡，咱同齊同心來思想耶穌受難對咱生命ê意義，同時hō͘咱齊來為咱ê世界代禱。

請許可我koh提醒一pái，mài去參加任何喜慶歡樂ê宴席、聚會、活動，mā mài外出旅遊。Hō͘咱學習用嚴謹肅穆ê心，過chit-ê每年一pái ê受難週節期。

願上帝tī耶穌裡所賜ê平安kap咱同在。

盧俊義牧師的個人網站。