《台灣之愛：盧俊義牧會筆記》

| | | 轉寄

拚全力做好兒童營事工

作者 盧俊義 2008.07.20

過去tī嘉義西門教會有舉辦過幾pái「老人營」活動。營會活動時間是tùi早起九點開始，一直到下晡五點結束。中晝歇睏兩點鐘，包括午餐kap午休在內，á hō͘我印象非常深刻ê一件事，就是一工kan-ta教一首短歌，tùi上午一直重複koh再重複地唱，但chit群年滿六十以上ê老兄姊，是tú踏出教會大門，就有幾位koh行tńg來kā我講：「牧師ah，請你koh再唱一pái hō͘我聽。」

老人營期間，boeh講ê話lóng需要特別小心，因為講m̄-tio̍h去，甚至發音無正確，lóng會hō͘ in用hit種真「奇異」ê眼光直視tio̍h。In動作慢，bē-sái催，只ē-tàng慢慢á等，因此，雖然時間是tùi上午九點到下晡五點，其實，真正ē-tàng用ê時間真短。每pái歇睏需要長達二十分鐘以上，帶in唱、動等，lóng需要慢慢來，小khóa一緊，可能lóng會造成意外。如今回想起來，hit時我iáu真是大膽，竟然敢辦老人營，而且長達一禮拜ê時間。

牧會以來，tùi關山到嘉義西門，直到現在tī咱台北東門教會，每年lóng會舉辦暑假兒童營。Chit幾年來，咱將兒童營時間tùi原來ê一禮拜，延長到兩禮拜（十工）。Tī chit兩禮拜中，咱教十首歌曲，有時koh-khah chē，有趣味ê是所有gín-á每首歌lóng會曉背，而且bē走調，音lóng掠得真準。咱教gín-á暗唸金句，然後in ē-tàng tī營會ê最後一工，將kui-ê兒童營ê詩歌、金句lóng背起來。Tī chit十工ê營會期間，咱kā-in講五篇、九篇ê聖經故事，in m̄-nā ân-ân記tiâu，iáu會曉家己將聖經故事編導為戲劇，甚至有toh一kóa聖經故事是兩年、三年、四年前講過ê，in lóng會記得非常清楚。這mā是為甚麼，咱boeh將過去十年所教過ê聖經故事重新整理過，而且準備tī明年koh 再重整理一套新教材。因為就是希望有一個完整ê兒童營教材，thang hō͘每年來參加兒童營ê gín-á，bē聽tio̍h重複ê故事。Án-ne，等到明年，一部thang使用六年，而且真完整ê兒童營教材就thang完成loh。

我提老人營kap兒童營，是boeh hō͘大家知影，細漢gín-á ê 可塑性遠比任何一個超過兒童階段ê年齡者lóng khah緊而且高。因此，對一個gín-á傳講聖經福音ê信息，其接受度遠比任何一個年齡層ê人lóng khah容易。但就是因為án-ne，咱絕對bē-tàng馬虎應付了事，tio̍h用koh-khah積極kap認真正態度，做好chit件事。

千萬mài小看兒童營chit件事，tùi過去到現在，我看過bē少家庭並m̄是基督教信仰背景ê青年，就是tùi兒童營開始，進入教會來參加團契，然後受洗成做基督ê信徒。我mā看tio̍h有幾個家庭來加入信仰ê行列，就是因為gín-á來教會ê關係，chiah-ê lóng hō͘咱看tio̍h，tī chiah-ê細漢gín-á ê身上，有上帝ê靈teh引chhōa tio̍h in，帶領in kap in ê家人來接近上帝國ê福氣。我真歡喜耶穌所講ê chit句話：「Lín tio̍h小心，bē-tàng看輕任何一個至微細ê人。我kā lín講，tī天頂，in ê天使boeh常常khiā tī我天父ê面前。」（馬太福音十八：10）確實án-ne，mài小看兒童營chit件事工，這是teh掖種，當咱tī教導gín-á聽聖經故事ê時，就是teh撒聖經信息ê種子。詩人án-ne講：「流目屎掖種ê，必歡呼收割！」（中文和合本詩篇一二六：5）chia所講ê「流目屎」，mā指流汗ê意思。

今年兒童營雖然因為腸病毒肆虐ê關係，加減影響tio̍h報名kap出席ê人數，但咱絕無放棄任何一個gín-á，ná親像我堅持兒童營絕對mài收費，理由是仝款ê。只要所有gín-á願意來教會，這就是咱ê機會。即使koh再thiám，mā ài做好chit件福音ê事工。兒童營事工ê每一個時段，lóng是經過策劃過，而且所用ê教材，lóng是咱家己用真長ê時間編撰出來ê，包括詩歌lóng是家己創作，咱是用chit種方式teh回應上帝揀選ê愛。真少人會想tio̍h，chiah-ê教材ê編寫，是tùi舊年ê十月就開始ê，然後tī今年二月完成所有修改kap編輯ê工作。明年ê教材mā是boeh tùi今年ê十月開始，chit點iáu期待大家tī祈禱中紀念，懇求上帝ê憐憫kap帶領。因為明年教材總會已經預約，希望ē-tàng推廣hō͘所有ê教會使用。

過去我tú-tio̍h幾間教會，為tio̍h boeh giú-tiâu細漢gín-á，boài有報名á出席bē穩定ê情形發生，因此採用了收費ê方式，然後只要全程出席，就thang退費。我向來就是反對chit種態度kap作法，原因在tī兒童營事工應該當作是撒福音種子；因此，只要有人歡喜來，即使是一點鐘，mā是咱ê機會。若是有gín-á因為來了了後，感覺無興趣，he是咱tio̍h檢討ê功課。咱無可能做得完美無缺，這是無可能ê事，即使像迪斯奈樂園án-ne ê所在，mā有gín-á無歡喜。咱tio̍h學會曉珍惜每一個gín-á出席ê任何一段時間，就算是一點鐘、兩點鐘等，lóng是非常珍貴ê；á盡心盡力地將chit份工作做到siōng好，chiah是咱教會應該保有而且堅持ê基本態度，只有án-ne chiah ē-tàng講是teh 為福音掖種，為福音盡心力。

牧會以來，我lóng是培養一個觀念：只要ē-tàng幫助一個人因為聽tio̍h福音來得救，咱ê生命mā得救一半lah；chhun落來ê一半，就ài看上帝ê恩典kap憐憫。若是咱ē-tàng將兒童營ê事工，盡心盡力來做好，就是等於幫家己朝向hit-ê得救ê旅途推進仝款。我mā一再講過，聖經hō͘咱知影每一個人ê生命中有兩項物件，其一是生命冊，其二是天使。當有一工，咱ài面對上帝審判ê時，天使會將咱ê生命冊呈到上帝面前。生命冊ê記錄者m̄是咱家己，是跟tòe咱來到世界上ê天使，伊teh俯視kap跟tòe咱，記落來了咱所言所行ê一切。因此，千萬m̄-thang看輕兒童營chit項事工，當咱努力tī chiah-ê細漢gín-á身上所做ê福音事工，mā會被chiah-ê gín-á身上ê天使記錄落來。咱只管掖落來chiah-ê福音ê種子，甚麼時chūn，chiah-ê種子會開花、結果，上帝自有伊ê時間。

Chit兩禮拜ê兒童營，就hō͘咱拚盡全力來做好chit項事工，kā chiah-ê參與ê同工一kóa鼓勵，祈求上帝賞賜hō͘所有參加ê小朋友，有喜樂ê心靈，聽tio̍h上帝透過咱chit-pái ê兒童營所傳達ê信息，成做in成長ê生命力量。當咱lóng盡心、盡力來完成chit項事工後，án-ne，咱chiah ē-tàng向上帝祈求講：上帝ah，阮已經盡力loh！

盧俊義牧師的個人網站。