《台灣之愛：盧俊義牧會筆記》

| | | 轉寄

愛教會，就tùi siōng小ê事開始

作者 盧俊義 2008.01.15

愛教會，就tùi siōng小ê事開始 刊tī October 14th, 2007

八月十二日週報刊登莊壽洺兄ê公開信，呼籲大家為教會節省一kóa經費。伊提出ê建議是：將教育館洗手間ê自動烘手機關掉，mā盡量sui手關燈、冷氣開ê溫度mài siuⁿ 低，án-ne就ē-tàng避免不必要ê浪費。

莊壽洺兄ê呼籲引起真chē兄姊ê迴響，咱ê同工牧力兄弟，徵求我ê同意了後，隨時將烘手機ê電源關tiau，現在教育館ê烘手機已經無koh運作。咱mā盡量設法控制冷氣ê問題，á 有關地毯ê事，咱mā會妥善處理，hō͘伊達到樽節用電ê目標。

我跟tòe莊壽洺兄ê呼籲，進一步請大家同齊來合作，就是盡可能家己sui身帶手巾á。每pái去洗手間洗手了後，就用手巾á 拭手，án-ne，洗手間就ē-tàng m̄免放紙巾，這m̄-nā ē-tàng節省真chē紙，mā是間接teh推動環保。因為節省chit種紙ê消耗量，就ē-tàng少 chhò 一kóa樹木。

Chit-pái去巴西訪問，就聽tio̍h當地僑胞講起一件事，he就是有歐美財團到亞馬遜原始森林去收購原住民ê土地，準備大量chhò樹，chiah-ê樹木有ê年輪超過數百年，lóng是上等木材，非常珍貴。Chit件事已經引起巴西環保團體ê大力反對，甚至mā激起世界各地關心生態環境ê學者專家ê憂心。我tī巴拉圭時，mā聽tio̍h當地ê會友kā我講，chit國ê森林中有一種非常特別ê紅樹木，木質ê硬度，連鐵釘lóng無法phah落去。而tī巴拉圭東方市ê東方教會，禮拜堂大廳講台頂ê十字架，就是用chit種紅樹木ê原木製作ê，看起來並m̄是真粗大ê十字架，重量是重到無法度用人ê力量給架起來，當時iáu動用起重機真無簡單chiah將十字架裝khih li。In講chit種木材ē-sái講是世上唯一ê品種，年代少講mā有數百年或數千年。

咱用紙，就是tùi樹木得來；á樹木ē-tàng提供真充分ê氧氣hō͘人類kap動物之需要。目前世界貿易組織tī衡量一個國家外銷物品時，計價就是包括hit ê國家樹木提供ê綠蔭比率。因此，過去林務局tī造林時，偏重珍貴ê杉木林，現在是為tio̍h因應chit項全球公約，改採用成生做快、大葉子ê樹木，以減輕貨物出口稅ê負擔。

咱教會禮拜堂一樓副堂ê隔間板，就是採用tùi德國進口ê。當時tī裝置hit e活動門板時，我在場。Tùi廠商嘴中，我chiah知影hiah-ê木板lóng是用回收ê廢紙加工製成ê。密度之高，贏過tiam，當然隔音效果奇佳。

我有幾pái去德國訪問，就看tio̍h德國人民真守規矩，in tī每一個社區lóng有定點khǹg大型ê鐵櫃，專門回收玻璃瓶罐、紙等thang koh再製造生產ê物品，政府會有固定時間去收集，然後送到加工廠去。Ná親像咱舊年週報上bat轉載刊登德國為tio̍h推廣大家減少垃圾，特將垃圾袋售價提高到一個大袋子ài tāi phiò八百kho。mài講八百kho，若一個大垃圾袋價siàu五百kho，我看環保署長馬上就會hō͘立委諸公轟下台，甚至會講「官商勾結」將i移送檢調單位。

雖然咱國家ê科技尚且無法度jiok-tio̍h德國hit種先進，回收ê物品koh再製率mā無koân，甚至有kóa回收物iáu「外銷」到先進國家去。現在世界先進國家lóng是往科技比較真慢地區去收購廢棄但是kò thang用ê回收物品，將hia-ê當作「原料」，m̄-nā價siàu sio̍k，而且省真chē製造過程中ê時間kap人力。譬如拆船業提供鋼鐵材料、寶特瓶等就是真好ê例。

我自細漢就養成sui身帶手巾á ê習慣，到現在lóng是án-ne。我mā無jōa習慣tī洗手間用紙巾拭手，lóng是用手巾á拭手。每pái洗衫褲ê時chūn，多一兩條手巾á，kap少一兩條手巾á，teh用水量kap時間上lóng無差別。Án-ne落來，卻ē-tàng省真chē紙。若是咱大家lóng會家己帶手巾á拭手，án-ne，教會一個月落來至少thang省兩箱洗手間專用ê紙，一年落來就ē-tàng省下廿四箱。一箱473 kho，一年至少mā ē-tàng省11,352 kho。這雖然m̄是真大ê數目，但mā是替教會省一點錢。Koh-khah重要ê，án-ne mā是tī參與環保ê工作，mā是疼惜咱台灣chit塊土地ê第一步。

有幾pái，我陪人客去飯店用餐，因為是陪人客去用餐，我不便用sui身帶ê箸。我習慣使用餐廳提供ê竹箸chìn前，先用紙巾擦拭一下。結果餐廳ê頭家真緊阻止我，講：「盧牧師，mài用紙巾拭箸，我換一雙新ê hō͘你。Chit種紙巾lóng有漂白劑，拭箸，顛倒hō͘箸ê漂白劑koh-khah厚。」我聽了了後，隨時the̍h起手巾á拭箸，我發現手巾á lóng會留落來像「粉」ê物件。已經有jú來jú chē ê警告hō͘咱知影，台灣各地餐廳提供ê竹箸，大多是tùi中國進口，差不多lóng含有濃度真高ê漂白劑，使用chit種箸食飯，真容易生癌症病原。Mā因為án-ne，有jú來jú chē ê人已經習慣出門sui身帶箸，m̄-nā食了thang安心，而且iáu thang達到環保ê效果，因為至少thang避免亂使用漂白劑，造成koh-khah chē水源污染。

帶手巾á出門，m̄-nā thang拭手，mā thang/ē-tàng tī流汗時擦拭，tī外面食飯後，mā thang用來將tòe身攜帶ê筷子先拭清氣，tńg去厝裡koh再洗一pái。手巾á真正是多用途耶。有了手巾á，mā thang減少使用「面紙」，這真正是多用途。

小小手巾á，用途多，siōng好ê用途是用來拭洗後ê手，m̄-nā衛生，koh thang節省不必要ê浪費。雖然只是節省一點點小錢，但咱知影，chiah-ê錢mā是大家努力工作chiah thàn到ê，應該就beh節省使用。Thang hō͘節省落來ê錢，koh-khah chē用tī宣揚福音ê事工上。

為tio̍h達到chit項效果，我期待大家m̄-nā是大人án-ne做，mā教導咱ê眾細kiáⁿ學習帶手巾á出門ê習慣。Tùi咱開始，雖然算是一件真微小ê事，但卻是節約、無浪費ê好事。若是ē-tàng，我ǹg望用三個月時間來推廣，然後tùi明年開始，教會所有洗手間lóng無koh提供擦手用ê紙巾，甚至tī團契、小組聚會用餐時，mā無koh提供紙巾，大家lóng用家己帶tī身邊ê手巾á。希望chit種ê呼籲ē-tàng hò大家所接受。

盧俊義牧師的個人網站。