《台灣之愛：盧俊義牧會筆記》

| | | 轉寄

Tī舊金山地區ê教會演講、培靈

作者 盧俊義 2008.01.01

我tī九月十日tùi密西根tńg來到舊金山。Tī出發前往密西根chìn前一晚，已經tī聖荷西ê台美教會有過一場演講。現在tńg來到舊金山陳寬墀兄ê厝，歇睏幾工後，tī十四日暗時應舊金山迦南教會ê邀請。Hit工暗時ê聚會是kúi-nā個小組將每一個禮拜固定ê聚會暫停，改chò聯合聚會，特別ài我為in做一場特別ê演講，紹介馬可福音chit本經冊。Hit暗出席ê兄姊非常多，有一百名左右，地點是tī教會ê副堂。

兩年前我bat tī chit-keng教會ê邀去專題演講tńg來後，tī咱教會週報「牧師專欄」頂頭介紹過chit-keng教會，tī欠缺傳道者牧養之下，全體長執們lóng真認真地té固守教會、看顧羊群，因此，教勢iáu-kú蒸蒸日上。Chit兩年來，in iáu-koh充滿活力，教勢iáu是繼續tī增長中；目前tú-teh積極chhōe土地蓋新ê禮拜堂。In中間有一位長老kā我講，講有chhōe-tio̍h一塊土地，地主要價高達一千六百萬美金，kap in準備ê siōng高目標一千萬kho，確實差距相當大。In積極chhōe地蓋新ê禮拜堂，是因為人數已增長到無法度容納信徒聚會和活動ê需要。Ná親像十四日是禮拜五，hit工暗時mā有英語部ê聚會，佔滿kui間禮拜堂。因此，阮ê聚會只好使用副堂。 演講tùi暗時七點半開始，直到九點廿五分，了後，我留二十分鐘hō͘大家發問。因為聚會必須tī九點四十五分chìn前結束，然後ài清理教會，tī十點chìn前完全離開，這mā是該教會為tio̍h kap厝邊有一個良善互動關係ê需要ê約束。In是非常注意在聽我ê演講，而且提出ê問題lóng真實在koh具體。這確實是一間真有水準ê教會，mā是我多年來tī海外非常少看tio̍h chiah-ni̍h有信仰品質ê教會。

隔工，九月十五日上午，我應中半島教會ê邀請，去參加一場家庭聚會，地點是tī一位會友林秀峰姊ê厝；仝款mā是beh我為in專題演講。這間教會黃文勇牧師帶來將近五十位兄姊參加，真正是真鬧熱。類似chit種ê聚會，tī加州ê聖地牙哥有過kúi-nā-pái，tī舊金山mā有過幾pái。我tùi台灣ê宗教現象講起，in中間就有幾位非基督徒，聽了我所講ê幾種宗教現象，lóng tìm頭，我想大概表示同意pah。我希望tī演講時，hō͘聽ê人感覺輕鬆，因此，聽眾ê笑聲lóng是chia起hia落。但beh hō͘聽眾bōe感覺無聊、而且感覺有趣味，就必須準備真chē材料，chiah-ê材料koh需要經過「熬煉」chiah ē-tàng有結果，因此，我chit-pái出國chìn前，確實是用了bē少時間來做準備。

九月十六日上午，我koh次去迦南教會講道。我tī七月廿二日、廿九日等兩個禮拜日，lóng是tī該教會講道。In每一個禮拜日聚會後，同齊享用簡單ê愛餐，將近四百個兄姊聚集tī副堂，有ê兄姊因為副堂已經無空間，就tī外面ê樹下腳、遮陽棚下用餐聯誼。這間教會活動力相當強，除了有英語聚會外，mā有華語聚會以及小朋友ê聚會；chiah-ê部門lóng有專任ê傳道者tī牧養，目前in欠缺ê是一位台語部門專任傳道者。就tī chit-ê禮拜日，長老kā我講，in已經聘請了一位名叫「蘇惠智」ê牧師，後來tùi陳南州牧師kap鄭仰恩牧師hia知影，蘇牧師就是蘇金謀牧師ê kiáⁿ兒。是tī美國讀神學出身，非常優秀。

用完愛餐，幾位長老陪同阮步行向停車場，突然有一位少年人過來問我一個問題：「盧牧師，你解釋聖經lóng是家己讀完了後，家己想出來ê neh？ Ià是有看甚麼冊？」我對chit-ê少年人提chit-ê問題感覺相當有趣味，反問伊怎樣會án-ne問？伊舉例講，比如我tī講耶穌其實有huat sèng-tē ê一面，特別是對當時ê宗教領袖所犯ê，耶穌是一點mā不hō͘ in好面色。以馬太福音第廿三章為例，伊罵當時代ê經學教師、法利賽人等chiah-ê宗教領袖。若是以現代ê語言來講，所謂「有禍了」chit-ê詞，等於就是tī罵一個人「會膨肚短命」仝款。耶穌進入耶路撒冷聖殿，隨意翻桌ê舉止，看tī當時宗教領袖ê眼中，那明明是就是「流氓ê行徑」；對hiah-ê社會邊緣人、低階層ê普羅大眾，耶穌chiah是真正ê慈悲者。伊問我，像我chit種ê解釋，是m̄是有甚麼根據？我kā伊講，一個傳道者準備講道，tī解釋經文時，本來就需要真chē參考冊chiah有辦法明白經文ê意思， bōe-sái單就字面上ê認知來解釋經文，這真容易出問題。Koh講，冊店有真chē書籍tī介紹有關耶穌ê事跡；因此，了解耶穌，看chiah-ê冊lóng會有幫助。伊聽了了後，隨時ài我紹介幾本或nah一種釋義ê冊。我mā因此提供了幾種值得參考ê冊本，紹介伊看ah些冊，希望án-ne thang幫助伊多多明白怎樣認bat耶穌。

結束tī迦南教會chit場講道了後，我chit chōa長達兩個月ê美洲巡迴訪問、演講、培靈等工作，就算全部結束loh。

真感謝上帝幫助、賜福，hō͘我有能力thang完成ù定ê工作，帶領我kap淑英thang安全經過每一個kak落；特別是tī南美洲ê行程lóng ē-tàng平安順利。

經過這一chōa旅行訪問、演講、培靈，我有了一個新ê想法。過去我lóng想tī退休了後，開「聖經補習班」，而且預定開八到十班。Chit-pái巡迴訪問了後，我重新思考chit件事：若是海外ê教會hiah-ni̍h/án-ne欠缺傳道者，我應該ē-tàng考慮當旅行傳道者。我雖然無開拓教會ê恩賜，但至少我ē-tàng牧養教會、養飼羊群。若是一個地區停留三個月或半年左右，行一chōa美洲欠缺傳道者ê教會，就夠額用去我五年ê時間。我想起咱教會鄭連德牧師，退休後，雖然人tī美國，但其實，伊不時去日本大阪、美國等地欠缺牧者ê教會，幫助hia需要牧者養飼ê羊群。Chit-pái去南美，有bē少教會長老私下kap我談，問我iáu有jōa久thang退休。每pái看tio̍h in him-bō福音信息ê表情，我就會ū一股tòe-le難過ê心情。

其實，並m̄是只有海外台灣人有真chē教會無傳道者，目前tī台灣，咱長老教會大約有兩百間教會欠缺傳道者，mā lóng迫切需要傳道者去牧養。Ē-sái講是另外一方面，tī咱台灣長老教會，mā有大約兩百位傳道者待聘中，chit種現象ē-sái講是過去所無ê，卻tī最近幾年特別嚴重。為甚麼會án-ne？真chē兄姊知影此現象了後，lóng 問我chit-ê問題。

「為甚麼會án-ne？」坦白講，我mā kong bōe出來。到底是甚麼原因有hiah-nih-chē ê傳道者待聘中？我知影一件事實：有jú來jú chē ê傳道者，年紀並無大，有ê chiah六十出頭，或是六十五歲左右，就申請退休了，這是過去所無ê現象。以前真chē傳道者lóng是直到the-be無法度動啊，chiah辦理退休。現在卻是身軀好好、就退休了，我神學院前後期ê同學，已經有kúi-nā位lóng退休了。就kah-ná目前台灣社會有真chē公教人員，年紀mā不過五十五歲左右，就已經辦理退休了仝款。為甚麼傳道者會tī六十到六十五歲之間就辦理退休？這是我teh思考ài做旅行傳道者ê時chūn，mā同時tī省思ê一個問題。這中間一定有真值得注意ê問題所在。

行了一chōa南美洲，我發現當地信徒確實是kap北美洲ê信徒無仝款；南美洲ê台灣人基督徒，tī信仰上ê態度非常認真，而且真甘心樂意奉獻，對傳道者真正是禮遇有加，特別是對傳道者尊敬ê態度，而且in mā鼓勵眾子女去神學院就讀、獻身當傳道。Tùi chiah-ê移民南美洲ê教會ê信徒身上，我看tio̍h三十三年前，我畢業後受派到台東關山牧會ê情形，感受tio̍h三十年以前ê農村教會對待傳道者，以及當時信徒信仰生活ê態度。Chiah-ê lóng m̄是tī北美地區台灣人基督教會信徒身上看ê tio̍h ê景象。

我自從一九八七年開始tī教會公報工作 liáu到taⁿ，tú好滿二十年。這二十年來，我四界去演講、培靈，lóng是會聽tio̍h會友講傳道者ê問題，看in論述傳道者ê hit種表情，聽in所用ê語句，lóng會hō͘我留落來深刻ê印象。我Boeh特別多謝總會傳道委員會林芳仲牧師ê好意，特別安排我去阿根廷、巴拉圭、巴西訪問。雖然因為時間上ê關係，智利ê行程無法度如願成行，但這擺南美洲之旅，確實是帶hō͘我真chē新ê經歷kap認知，mā豐富了我ê心靈。

盧俊義牧師的個人網站。