《台灣之愛：盧俊義牧會筆記》

| | | 轉寄

真感謝大家溫暖ê愛

作者 盧俊義 2007.10.14

頂禮拜日（六月廿四日）下晡二點，我ê gín-á東元結婚。我原本認為若是有二百人來參加就真滿足loh，thài會知，一點半未到，印兩百份ê禮拜程序表就已經無了。只好拜託惠卿kap芭奈趕緊加印，結果koh印二百二十份，但iáu是有真chē人無the̍h-tio̍h，真是非常抱歉。雖然tī禮拜chìn前，冷氣突然失靈，害得大家kui身軀汗chho̍p-chho̍p流，而且一直無停the̍h禮拜程序表當做葵扇，ē-sái講是kui間禮拜堂人塞塞tīⁿ，後來我chiah知影連教育館三樓mā有一陣來賓teh看銀幕轉播。怎樣會有chiah-ni̍h-chē人來？真正hō͘我kap淑英感覺相當ê意外mā深感溫暖，特別是陳登壽兄，為tio̍h beh hō͘阮ê「茶餅會」有豐富ê內容，並且hō͘所有來賓lóng ē-tàng滿意，伊是全場親自坐陣指揮，真是多謝伊ê辛勞。

為tio̍h東元boeh結婚，真chē兄姊真正真幫忙、關心，一直問我in thang認為阮做甚麼？阮lóng是講：「M̄免，只要來參加，阮就滿足loh。」Á大家mā真正如阮所期待ê，日頭hiah大ê天lóng特別撥駕來參加lah。Koh-khah歡喜ê是，參加茶餅會ê人是hiah-nih-chē，這是阮意想bē-tio̍h ê事。事後，我kap幾位兄姊講：「若是無講台，thang騰出koh-khah chē空間，就ē-tàng請幾個琴手來giú琴、彈琴演奏，我mā ē-tàng chhōe一個伴，先開一個舞，he一定koh-khah-chán。」

講真正，我真歡喜「茶餅會」chit種宴客方式，雖然食bē飽，但bē致使iau餓，而且菜色真豐富，大家ē-tàng自由行動，四界chhōe朋友交談、聯誼，koh ē-tàng kap tú結婚ê新人hip相留念。Chit-pái，我只宴請親家kap家己ê親族；咱教會ê兄姊，我mā只宴請兩位名譽長老作伴，其他ê就是證婚ê張仁和牧師、林以撒傳道等。

我真感動ê，是一陣tùi關山來ê會友，iáu帶來關山眾修女ê致意。眾修女甚至講阮無請in來參加宴席，hō͘ in真失望，尤其是今年得tio̍h醫療奉獻獎、來自奧地利ê ê裴彩雲修女，伊iáu特別強調伊是東元ê好朋友neh！因為in聽tio̍h講有關山ê會友講beh留落來參加晚宴，就抱怨起來，這hō͘阮感覺非常抱歉kap遺憾，真無想tio̍h in是án-ne熱情kap關心。Á東元到taⁿ iáu ē-tàng一一叫出chit群tùi關山來ê會友ê名字，特別是林繼堯，iáu有李士傑，in lóng是tùi悅文kap東元出生以後，就照顧、保護in到讀國小，直到阮tī一九八四年離開關山為止。Hit段期間tī關山，in不時帶姊弟兩人四界去sńg。Chit-pái in兩人lóng特別來參加，hō͘阮感覺相當興奮。Mā非常歡喜嘉義西門ê兄姊，特別起來一陣人，in來，真正hō͘阮一家人lóng感覺相當溫暖，特別是鄧水造長老（台大醫學院鄧哲明教授ê父親），伊mā是tī幾年前得tio̍h醫療奉獻獎ê一位可敬ê醫師，tī信仰上相當敬虔，阮一家tī嘉義非常受in全家人ê照顧。已經kiōng-boeh九十高齡ê伊，mā特別來參加，真hō͘阮感動。

Tio̍h特別多謝大家，尤其是真chē兄姊lóng主動協助幫忙接待來賓，mā幫忙阮打理教會裡外。有bē少會友真關心，盧壯智兄mā特別請in公司製作兩百份小雞卵糕，thang hō͘大家tī茶餅會上享用，真是設想周到。Mā有bē少會友表示beh送果子來，但因為我有委託陳登壽兄ê公司負責設法，為tio̍h驚亂了in公司ê色樣，真是真抱歉，無接受chiah-ê美好ê愛心。也tio̍h多謝周永祥執事，為tio̍h我beh宴請親家kap親人，伊開車載我去chhōe飯店，mā替我想菜單，iáu替我kap餐廳ê頭家談價錢。A2hou7我感動ê是陳登壽兄，伊放落家己ê西餐廳，tùi頭到尾lóng tī飯店teh陪伴，iáu恐驚飯店出菜有疏忽，特別委請伊過去ê同事chhōe餐廳ê主廚，一定會幫忙出[拿手]ê好菜。宴會結束了後，伊iáu親自chhōa阮南部ê親人去坐高鐵，一直到阮/送行所有親人lóng離開了後，伊chiah陪伴阮tńg來到教會來。

我tùi上午禮拜結束了後，就一直bē放心，kan-ta知影tī教會四周行來行去，四界看看，mā m̄知影家己到底是teh看甚麼，有真chē兄姊問我有食過午餐á無，我lóng是笑笑無回答，kan-ta知影車隊去迎親lah，mā知影in就tehboeh來到教會loh，卻iáu是一直行來行去。我去禮拜堂一樓副堂，kap tī hia準備練唱ê眾姊妹講：「我mā m̄知影家己ài做甚麼，kan-ta知影行來行去。」Chit群阿嬤們聽了後lóng大笑出來，in一再恭喜我teh-beh升級做ta-ke，mā祝賀我明年做「阿公」。

Mā有真chē人lóng kā我講：「牧師，從來m̄-bat看過你笑kah得chiah-ni̍h開心過，希望以後查經班mā會是án-ne。」這hō͘我感覺真奇怪，後來有bē少人kā我講，平時看我lóng真嚴肅，非常少有笑面出現。真正是án-ne mah？ 真chē朋友認為我無接受大家贈送ê紅包，是真「不近人情」ê事。Mā因此，有bē少朋友回應我ê方式，就是tī參加婚禮了後，連茶點mā替我「省」落來，害阮差一點á m̄知影應該怎樣辦？因為chhun落來大約夠額三十人份ê茶餅。Iáu好，有原住民聚會ê兄姊，in tú好有聚會，就請in同齊來分享chiah-ê「高檔」ê茶餅。後來我chiah知影陳登壽兄總共準備了將近五百人份ê量，若是大家lóng有留落來用，應該是會tú好chiah-tio̍h，登壽兄真正真老斗，一看場面就知影需要jōa-chē人份。

其實，我kap淑英ê想法是：阮是真正真歡喜ē-tàng邀請大家同齊來分享chit份喜樂。阮原本就計畫想beh chhōe一個機會向大家講一聲「多謝」，chit九年來，全體兄姊對阮一家人ê關心kap支持，tú好有東元結婚ê事，tùi án-ne想藉tio̍h chit-ê機會來向大家講：「多謝」，「茶餅會」就是tī chit種ê背景之下決定ê。若是下pái有機會為悅文辦婚禮，阮mā是會用chit種方式請大家同齊來分享chit種生命中ê喜樂。M̄收賀儀ê原因，是阮真正iáu有能力請大家用「茶餅」ah！

早tī東元kap姿尹決定boeh tńg來台灣結婚ê時，就有真chē人問我會chhōe誰來證婚？我無甚麼考慮，第一個想tio̍h ê就是請張仁和牧師。當確定結婚日期了後，我就kā張仁和牧師講，請伊為東元kap姿尹證婚。後來chiah知影伊緊張有chit-chūn-á，因為這是伊第一pái為人證婚，但koh-khah有意思ê是：十gōa年前，張牧師當年結婚是由我為in證婚ê。

當我建議東元選一對年長ê夫婦，當作in學習ê楷模並擔任男女儐相ê時，in隨時表示贊成，並且表示boeh請陳寬墀兄kap秋娟姊，理由除了boeh多謝in多年來對伊tī美國讀冊ê照顧以外，也tio̍h kap in學習為人處世之道，chit點真hō͘阮感覺欣慰。我會建議伊kap姿尹chhōe一對年長ê夫妻，是因為我感覺男女儐相應該是結婚者學習ê楷模，m̄是像現在ê少年人，lóng是選一kóa「少男少女」型ê。這mā是最近幾年來，每pái有青年kā我講in boeh結婚，ài我替in證婚ê時，我lóng是先問有否決定男女儐相bōe？若是無，我就會án-ne建議，可惜ê是非常少被接受，只有許昱寰kap溫若伶，以及陳世昱kap楊皓如等chit兩對有接受我chit種ê觀點，in兩對lóng是選林信男長老夫婦。

我siōng感覺愉快ê，就是宴請親人ê晚宴是tī六點五分開始出菜，á kui-ê晚宴tī七點五十五分就結束loh。主要原因是中南部起來ê親人tio̍h坐暗時八點半ê高鐵班車tńg去。後來聽講ē-tàng因此向市政府申請一張獎狀，飯店mā會有加分，這顛倒是真有趣味ê一件事，阮當然bē曉去chhòng chit種「獎狀」。其實，應該感謝ê是所有參加宴席ê親人，in lóng真準時到飯店入席，chiah bē致使菜出來ah，iáu有一大堆空位。

Tùi無閒教育館落成奉獻感恩禮拜，直到東元kap姿尹結婚，我連續kúi-nā個禮拜無好好á睏過，á chit-má soah-koh beh開始無閒快樂兒童營，以及準備了後ê出國演講，ah，真是無閒kah be7tng2倒neh，ē-sái講是心中iáu是充滿tio̍h感恩。真感謝大家對阮一家ê厚愛。就tī祈禱中獻上chit份真誠懇ê感謝，求主紀念tio̍h大家ê愛心。

盧俊義牧師的個人網站。