《台灣之愛：盧俊義牧會筆記》

| | | 轉寄

展開美洲ê旅程

作者 盧俊義 2007.09.30

除了一九七九到八○年去英國進修外，chit-pái出國ē-sái講是siōng長ê一pái，而且是帶淑英同齊出門，時間tùi七月十七日出發，tio̍h一直到九月十九日chiah tńg到國門。Chit-pái boeh訪問ê地區，除了美國、加拿大之外，iáu-boeh去訪問包括阿根廷、巴拉圭、巴西等南美洲地區ê台灣人教會，這mā是阮第一pái去南美。Koh-khah特別ê是，將tī八月廿七到三十日，連續四工tùi早起到暗時，boeh為當地華人神學院ê學生授課，講《創世記》。採密集式上課，有兩個學分。

Chit-pái出國，其實是早tī兩年前就答應人ê事。原本巴西聖保羅ê大安教會，是希望我舊年就過去培靈、演講，但因為起教育館ê關係，我舊年lóng無答應國外教會ê邀請，因此，舊金山ê迦南mā只好延期到今年暑假chiah去。該教會bat tī前年（2005）十一月邀請我專程去做連續三工共計六場ê演講。因為反應bē-bái，特別是tī同鄉會ê演講，hō͘真chē台灣同鄉感受真特別，tùi án-ne in希望舊年koh過去tī in舉辦ê暑假靈修會當主講者，但我答應tī今年過去。因此，in早tī舊年就kap我有約，á巴西則是兩年前就約好了chit-ê時chūn去。

巴西聖保羅大安教會之所以會邀請我過去演講，是因為該教會有一位名叫吳炎山長老ê，tī前年tńg來台灣省親，特別來咱教會參加禮拜三上午ê查經班。無想tio̍h參加幾pái了後，有一工就tī結束了後，特別約我談話，為tio̍h是boeh希望我答應伊，去巴西一chōa為教會信徒培靈、專題演講。伊非常積極，早tī舊年十月，就由in教會吳督行牧師，代表教會發出用葡萄牙文寫ê正式邀請函，thang hō͘我kap淑英辦理簽證之用。直到今年年初，總會傳道幹事林芳仲牧師聽講我受邀請boeh去巴西，伊就希望我mā行一chōa阿根廷、巴拉圭。就án-ne，kui-ê八月lóng tī chit三個國家，先去阿根廷一禮拜，了後巴拉圭一禮拜，然後巴西兩個禮拜。

Tī巴西，我因為以前bat替關山ê會友陳天來執事一間辦理移民ê事，因此，in聽tio̍h我kap淑英boeh去巴西，相當歡喜，chiap-chiap khà電話來。 原本，我是想boeh帶淑英去歇睏一下，chit兩年來為tio̍h起教育館ê事，心神緊張弓ân，情緒mā bē穩定，發莫名其妙ê脾氣時常有，mā因此得罪了bē少人。後來有兄姊勸我kap淑英去chhōe一個所在好好á歇睏，in一直teh關心問講：「Kám講你lóng無假期mah？」其實，假期是有，小會mā從來m̄-bat講過「m̄」，甚至有kúi-nā位長執lóng希望我chhōa淑英去度一個假，只是我從來就無想過boeh請假去度假ê事。除非有演講之類ê，我chiah會想tio̍h「順續度假」。Tī前年，去日本大阪、美國舊金山演講，lóng是一落飛機隔工就演講，講完隔工隨時搭機tńg來國內。Á前年，也bat chhōa過一陣好友去一chōa德國、瑞士之旅，但kap我出門ê人lóng知影，我bē曉來chit種「純度假、旅遊」之類ê，準講是旅遊，mā是teh做功課。

通常有人來邀請演講，我非常少拒絕，原因是演講對一個傳道者來講，是一個真重要ê功課，特別是當邀請者m̄是基督教單位ê時，我會koh-khah重視chit種ê演講。原因是這提供hō͘我一個訓練ê機會，hō͘我學習怎樣kap非基督徒對話。特別是當in hō͘我ê題目是關係到台灣社會議題ê時，我ài怎樣講？講kóa甚麼內容？怎樣用基督教信仰ê觀點看社會議題？既然ài kā基督教信仰ê觀點帶入主題，koh mài hō͘人感覺真「宗教」，有ná tī「佈道」，卻koh ē-tàng kā社會ê問題khiú出來，用信仰ê觀點論述，這恐驚就需要花費花費真chē時間chhōe資料、分析，iáu-ài擔心萬一講得無好，m̄-nā hō͘推薦我去演講ê人失禮，koh-khah可能因此來hō͘人對基督教牧師ê觀感變差。當然，我mā會擔憂因為家己無講好，來phah-pháiⁿ咱台北東門教會ê名譽。Chiah-ê看起來，kah-ná我lóng是teh[庸人自擾]，但卻是我久長以來，每pái應邀出門演講，無論是tī國內、國外，心中從來m̄-bat疏忽過ê一件大事。我從來m̄-bat kā外出演講當作是一個人問題而已，我lóng將伊看做是teh代表咱長老教會、東門教會牧師ê角色。

最近幾年到國外去演講，主辦單位mā會同時邀請台灣同鄉朋友參加。Chit chōa去美國舊金山、密西根、巴西、巴拉圭等地，mā lóng同時有chit種ê安排。我bē曉像hiah-ê政治人物，in開嘴、閉口lóng是講kap台灣獨立有關ê議題，若無就是談進入聯合國、世界衛生組織等國際性ê話題，或是政治、政黨等問題，á我對chiah-ê問題外行koh生份，而且m̄-bat參與過，根本無任何[著力點]thang談。我知影家己對聖經kap信仰ê基礎比較khah清楚，因此，談家己領域ê範圍，一pái講起二點鐘m̄免停止，mā bōe有問題。但對同鄉會ê鄉親講基督教信仰，除非聽講ê民眾是án-ne要求，ná親像我bat kúi-nā pái被佛教邀請去講「基督教kap社會關懷ê信仰基礎」，若無，對同鄉講基督教信仰，用腳頭u就thang想像會tio̍h，bē有同鄉會án-ne辦。但怎樣kā基督教信仰帶入社會議題中去講，這chiah是促成hō͘我腦力激盪ê一個重要功課，mā是幫助我進步ê一個催動力。

Chit-pái除了南美是第一pái去訪問外，美國密西根mā是第一pái去。過去到現在lóng仝款，我不時接tio̍h邀請單位來電話ê時，對方lóng會事先表示歉意，講參加人數可能bē真chē，希望我bē致意。我lóng是回答：「重要ê m̄是人數chē少，只要lín真心邀請我去，án-ne就有夠。」

Chit幾年來印象中真深刻ê一pái，就是tī三年前接受莊路德君、方耀群君in當時tī美國ê教會──Ohio/Columbus ê邀請去演講、培靈，後來chiah知影聽演講者中間，有一陣是來自肯德基台灣人教會ê兄姊，in由姓溫ê牧師帶領，共計開四部車，連續開七點鐘來參加。我原本m̄知影，直到禮拜六演講boeh開始，路德kā我講kám ē-tàng最後一場ê演講提早開始，等講完了後chiah食晚餐？我問講原因，伊chiah kā我講，有一陣來自比較khah遠ê兄姊，in iáu-boeh開車tńg去。我講當然ē-tàng。但當我演講完，送chit群開車趕boeh tńg去準備隔工主日禮拜ê兄姊ê時，我看tio̍h溫牧師kap會友祈禱了後，就上路。溫牧師kā我講，in tī車上有人先食教會為in準備ê便當，有ê人先開車，án-ne thang替換，in tio̍h連續無停開長達七點鐘ê路程chiah ē-tàng tńg到厝。Á我看hit時已經是暗時七點gōa lah，in整理一下，出發時大約是暗時七點半，算算leh，等tńg來到肯達基ê厝，將近深夜兩、三點loh。我目chiu看teh in離去，心中ê感動明明是無法度用言語來表達，差一點á就流下目屎來。

每pái想tio̍h有人開車七點鐘，而且由牧師親自帶領會友來聽演講，我就有講bē盡ê感動。我會想tio̍h：若是無好好á準備講稿，怎樣ē-tàng對得起主辦ê單位？怎樣ē-tàng對得起chiah-ê來聽演講ê人？

Chit-pái boeh去南美等地演講，我對阿根廷、巴拉圭、巴西lóng是非常生份，只知影巴西國家土地真大，我顛倒無希望會發生有人搭飛機來聽演講ê事，因為hit種會hō͘我心理ê負擔siuⁿ過沈重。每pái帶淑英去出國，伊lóng是我siōng忠實ê「聽眾」，因為伊專心斟酌teh聽講，lóng是帶hō͘我真chē鼓勵。有時我會tī演講中故意用伊作例，然後自我消遣一下，真chē聽眾lóng會真自然kā頭轉向伊、看tio̍h伊，但伊lóng是用微微á笑回應眾人ê眼光。因為伊深深知影我teh舉ê例，是為tio̍h boeh hō͘大家「消暑解勞」。 M̄是我真會演講，卻是上帝賞賜hō͘我有敏銳ê觸感，mā hō͘我知影怎樣將所知影ê整理出一套有系統ê理念。但除了chiah-e5tui3上帝來ê恩賜以外，若是無大家ê關心、代禱，我所擁有ê一切，lóng將是空空ê、無實在ê。因此，請大家一定會tī祈禱中紀念阮chit chōa遙遠ê南美kap北美之行。

盧俊義牧師的個人網站。