《台灣之愛：盧俊義牧會筆記》

| | | 轉寄

M̄-thang看輕兒童營chit項事工

作者 盧俊義 2007.10.28

一般教會有兩個毛病，就是對兒童主日學ê教育輕視，另外一項就是對查經班ê工作無teh重視。前者，差不多是今á日咱台灣長老教會普遍ê現象，後者則是koh-khah嚴重。

Tī真chē所在，準講tī城市ê教會，mā會發現兒童主日學ê學生jú來jú少，原因是父母認為gín-á真可憐，平日學校課業，koh加上補習就已經hō͘ gín-á非常少有「好好á睏一下」ê時間，禮拜日tú好ē-tàng滿足gín-á chit種ê需求。因此，等到有一工發覺無對tâng，á ài gín-á來參加兒童主日學ê時，gín-á根本就無想beh koh來ah。然後，gín-á對信仰ê事jú來jú生份，mā對教會ê感覺距離jú來jú遠。

其實，ài m̄-ài參加兒童主日學，lóng m̄是甚麼學校課業或是補習等ê問題，重要ê問題是：有無認真teh思考gín-á靈性生命ê事，這chiah是根本問題ê所在。因為準講咱開辦週末兒童營，無chhōa gín-á來參加兒童主日學ê父母，iáu是bē帶gín-á來參加週末營ê活動。

為甚麼我會總是要求大家重視兒童主日學kap兒童營ê事工？並m̄是根據家己細漢時ê經驗，卻是家己牧會ê心得。我已經發現真chē例，包括tī咱教會mā看tio̍h chit種ê例bē少，就是因為gín-á來參加兒童營ê活動，續落來gín-á來參加主日學，後來，連父母mā跟tòe gín-á來教會，並且參加主日禮拜ê聚會，chit種例tī關山、嘉義西門，直到現在lóng繼續teh發生，無停止過。

M̄-nā án-ne，咱已經看tio̍h真chē個例，是有kóa gín-á長大了後，並無繼續到教會來，特別是上了國、高中了後，因為課業繁忙，加上不時tio̍h補習，一pái無來，兩pái無來，後來就無koh繼續到教會來。但有一工，伊生命tú-tio̍h瓶頸，tú-teh煩惱kap chhōe出路ê時chūn，chit時耳邊突然想起過去孩童時代唱過ê詩歌、暗唸過ê聖經金句，tùi án-ne，in teh試tńg來到教會來，而且chit-pái一tńg來，m̄-nā無koh離開，甚至是連厝裡ê人lóng chhōa來。Chit種ê例我是一再tú-tio̍h，一點mā無新鮮。因此，我lóng是kap大家提醒一點：投入兒童營、兒童主日學ê工作，就kah-ná teh掖種仝款。Iáu-beh培養另外一個認bat，就ná耶穌基督所講ê：「『一人栽種，另外一人收割』這話是真正。我差遣lín去收割lín所無耕作ê田地；別人辛勞，á lín享受in辛勞ê成果。」（約翰福音四：37—38）

咱收割別人掖落來ê種子，ná親像咱今á日掖落來ê種子，有一工mā會hō͘別人去收割仝款，這就是上帝國。真正ê福音，就是為tio̍h見證上帝tī耶穌基督裡ê救恩，m̄是為tio̍h家己ê教會擁有jōa-chē人。

今á日ê gín-á看起來真有主見，父母要求in到教會來，in iáu無一定會跟tòe行。但，chiah-ê並m̄是真正ê理由，若是有tī關心細漢gín-á心靈功課ê父母，一定會想出所有ê辦法hō͘ gín-á知影，到教會來上主日學，聽聖經ê故事是jōa-ni̍h-á重要，án-ne細漢gín-á iáu是會跟tòe來。

我當然知影有真chē信徒無koh鼓勵gín-á去上兒童主日學，原因是教會tī chit方面並m̄是真重視，老師tī chit方面ê用心mā無夠，既然無準備，只知影應付。Koh-khah嚴重ê，是傳道者對chit項事工ê無重視，á長執們mā冷淡無關心，這chiah是真正ê問題核心。但我ē-tàng非常確定來講：無重視兒童主日學功課ê傳道者，m̄是好ê傳道者，mā m̄是認真ê傳道者！理由是因為chit項工作，是牧會工作中siōng需要付出，卻真oh得有現成果實thang收ê事工。

我印象中siōng深刻ê一幕，就是一九七○年七月，我tī台北松山教會實習，hit時傳道者是吳憶清牧師，伊每一個禮拜日早起六點有祈禱會，兒童主日學ê小朋友來參加ê相當chē，這確實hō͘我感覺相當gōng-gia̍h，到現在我lóng iáu無法度理解he是怎樣形成ê。伊培養兒童主日學ê gín-á學會曉祈禱，mā親自主持chit項祈禱會，á tī兒童主日學，伊lóng是親自參與，包括兒童講壇，lóng有伊ê份。Koh-khah特別ê是，伊mā編印兒童主日學週報，mā有姊妹團契ê週報，chiah-ê lóng是吳憶清牧師親自編寫。Hit時，松山教會tī吳憶清牧師ê牧養下，每一個禮拜ê週報已經厚到十六頁。到現在，我腦海中iáu深刻烙印當時tī禮拜堂樓腳一樓副堂，小朋友hit種出席真kheh ê景況，á青年朋友則是相當熱心投入chit項教學ê工作。如今，當年ê兒童主日學小朋友，現在有ê已經成做教會菁英，á當年ê老師則是教會ê長執loh。 Tī高雄ê左營教會kap岡山教會，則是開辦週末兒童營siōng成功ê教會；左營教會差不多就是tùi週末兒童營帶動起來ê，教勢發展之快則是有目共睹。原因是真chē社區細漢gín-á到教會來參加週末兒童營，眾姊妹出來煮晚餐hō͘小朋友食，結果連gín-á ê父母mā跟tòe來煮飯，到最後是跟tòe gín-á到教會來參加聚會，教勢就tī chit種ê情況下，蒸蒸日上。

岡山教會mā是仝款；in發展得非常特別，tùi週末兒童營一直到國中生ê輔導營，人數chē到必須「候補」chiah ē-tàng排入去，就kap左營教會ê週末兒童營仝款，真chē小朋友lóng必須排隊候補，福音事工做到chit種ê地步，mā算是一件值得紀念ê事。Chit兩間教會lóng是發展到人數超過一百六十名以上。Ná親像過去tī嘉義西門教會，tī每年ê暑假兒童營事工，mā bat有過kap頂面仝款ê經歷。真chē家長透過長老來參詳拜託，希望教會ē-tàng koh再破例收一個名額，hō͘ in ê gín-á有機會參加兒童營，當我看tio̍h tī兒童營開始ê第一工，就有超過三十位ê家長排長隊，teh thèng候有人無來報到來ē-tàng遞補ê缺ê時，我心中真正有講不出ê感動。Chit種情形ná親像咱教會tī第三、四年辦兒童營ê時仝款，因為收ê人數已經超過thang使用ê空間環境。

今á日少年一代，生育人數少，只生一個gín-á ê現象非常普遍，因此，對細漢gín-á ê教育mā jú來jú重視，甚至lóng是以gín-á ê意見為意見，深恐違逆gín-á ê意見，就會失去gín-á仝款。其實，父母chit種ê態度有時mā ē-sái講是真無負責任ê。尊重gín-á ê意見固然bē-bái，但幫助gín-á清楚認bat生命中siōng重要ê事，chit種教育kap功課，絕對是父母應該認真去做ê事。甚至有時是bē-sái hō͘ gín-á有妥協ê空間。因為如果連chit種關係到生命教育ê功課，lóng會kap gín-á妥協，表面上看起來是teh順gín-á ê意，卻是違背了身為父母應負起ê教導責任。

宗教教育ē-sái講是生命教育，這是目前台灣siōng欠缺ê，mā是近年chiah開始teh重視ê功課，卻是咱長老教會久長以來siōng美好ê傳統，可惜今á日教會卻是jú來jú無重視。但我真ǹg望咱教會所有兄姊lóng會重視chit項事工，將伊看做是咱教會存在ê指標之一，án-ne chiah是正確ê態度kap教會觀。無論有jōa-chē gín-á留tī咱教會參加兒童主日學，這是掖種ê工作，咱有掖種，chiah ē-tàng祈求上帝hō͘ chiah-ê掖落去ê種子，tī伊恩典ê照顧下，粒粒成長。

盧俊義牧師的個人網站。