《台灣之愛：盧俊義牧會筆記》

| | | 轉寄

Chit款tāi-chì應該先chhōe牧師

作者 盧俊義 2007.06.03

會友ê親人往生，chit款tāi-chì先chhōe牧師、傳道者是tio̍h ê。身為教會ê會友，chit款tāi-chì mài先chhōe葬儀社，或是甚麼「生命禮儀公司」之類ê，而是beh先chhōe傳道者、牧師，in有責任、mā有義務，為往生ê會友，或是會友ê親人料理chiah-ê tāi-chì，這是傳道者、牧師ê職責。

為甚麼tio̍h先chhōe傳道者？原因是伊會知影怎樣協助料理相關ê事務，包括tī病院臨終chìn前ê「安魂」祈禱，mā包括處理入殮、告別、安葬禮拜等等。

Jú來jú商業化ê台灣社會，已經有真chē所謂「約定今生禮儀公司」等chit種行業出現，in甚至有專門處理教會會友後事ê特約「牧師」、「聖歌隊」、「司琴」等工作者，á其他宗教ê法師、道士就koh-khah免講loh。

有一pái，我去一間教學病院處理會友ê後事，當我帶領in一家人為往生ê親人換穿衫了後，太平間ê工作者來了，帶頭ê是一位姊妹，身邊帶tio̍h兩個隨從，一進入來病房就講：「來，我帶lín家屬祈禱。」我就tī伊ê身邊，我看tio̍h主家表情尷尬，但我一聽tio̍h伊講beh祈禱，真緊閉上目睭。雖然tī這chìn前主家bat提醒chit位女士講「he是阮ê牧師」，但我m̄知伊是m̄是有聽tio̍h，chit位女士隨時就目chiu kheh起來祈禱講：「天頂ê神，阮ê親人離開lah，tńg來到天頂你hia，請你hō͘伊tī天頂ē-tàng時常保護chiah-ê厝裡ê人，hō͘伊ê子孫lóng ē-tàng tī祖先ê庇蔭下有享受福氣、平安。阿們。」

我聽了後，kiōng-boeh烏暗眩，因為chit種ê祈禱，我真正無法度跟tòe講「阿們」，但我bē-sái講話，我唯一ē-tàng做ê，就是bî-bî--a笑來對付。

等遺體送到太平間，chit位女士態度親切來邀請主家進入辦公室，並用去kiōng-boeh一點鐘ê時間，teh紹介伊公司ê墓園，以及ē-tàng替會友辦理所有ê後事等等。其實，伊siōng重要ê工作，就是替公司賣khǹg骨灰ê墓園或是塔位。Chit位會友真清楚kā chit位女士講，講：「失禮，阮已經有安排ah。現在車mā tī外面teh等。」Chit位女士一聽，態度馬上有真大ê轉變，無koh是細jī，卻是顯露出一副真無歡喜ê表情，然後家屬就án-ne被「趕」出來。

別ê傳道者、牧師怎樣做？我m̄知，mā bōe去管別人ê事，但至少我會án-ne幫助會友處理親人往生ê後事，包括教導怎樣替親人擦拭身軀、換穿衫。然後聯絡葬儀社ê人來病院太平間，將遺體轉送到殯儀館去khǹg。無論是甚麼時間，除非我無tī-teh、外出，若無即使是三更半暝，lóng必定會設法趕到病院或是喪家去。這mā是為甚麼我夜間從來m̄-bat關掉電話ê原因，就是驚有會友臨時出狀況，boeh chhōe牧師。

我絕對bē紹介會友採用toh一間葬儀社，我會hō͘會友知影有toh幾位葬儀社，in ē-sái自行決定並作選擇，我ē-tàng幫in聯絡，或是由in家己直接kap葬儀社ê人聯絡。棺木、墓地、骨灰罈等chit方面ê事，我認為那應該是喪家家己ài去看、選擇，我lóng bē有任何意見。但我一定tio̍h負起帶領禮拜ê責任，身為傳道者，我認為怎樣kā禮拜帶好chiah是傳道者tio̍h挑起ê責任，mā是應該tio̍h有ê擔當。

Tī聖經ê教導中，禮拜是非常神聖ê一件事，bē-sái馬虎。禮拜就是teh敬拜上帝，伊chiah是咱tio̍h敬拜ê對象，是咱生命ê主宰，或生、或死，lóng tio̍h以歌頌上帝ê名作為禮拜ê主。因此，聖歌隊tī婚喪禮拜中，lóng是teh讚美歌頌上帝，chit-ê認識是非常重要ê。但可以許可聖歌隊準備另外一首詩歌來安慰哀傷ê家庭。Chit時，當唱慰詩ê詩班唱完了後，喪家chiah起立向詩班敬禮，表示謝意。Mài tùi頭到尾khiā-teh聽，he是非常奇怪ê現象，講khah好聽一下，是表示「感謝」，講khah pháiⁿ聽一下，kah-ná詩班teh唱慰詩，喪家tio̍h khiā-teh聽，jōa-ni̍h-á無對tâng ah！

最近教會lóng teh流行為往生ê親人製作投影片，tùi出生到長大、建立家庭、創立事業、兒孫長大等等，將chit部份khǹg tī「故人略歷」ê節目中，有kóa相片看起來就會hō͘人愛笑，結果kui-ê禮拜ê氣氛lóng轉變lah。但問題並無tī chia，ná親像頭前已經講過，禮拜是以上帝作中心，人ê重要性tio̍h降低chiah-tio̍h，tī禮拜中teh紹介一個人jōa-ni̍h-á「重要」、「偉大」，我想boeh問ê是，án-ne是teh禮拜mah？如果禮拜是面對上帝，人ē-tàng講真「偉大」mah？當咱lóng tńg來到敬拜ê上帝面前時，咱ē-tàng講某某人真「重要」mah？m̄-tio̍h，án-ne m̄-tio̍h！咱若是真正以敬虔、謙卑ê心tńg來到boeh敬拜ê上帝面前時，咱唯一ē-tàng講ê，就是「主ah，憐憫我chit-ê罪人」，何況是一個往生ê人，koh-khah需要伊ê家人用chit種ê心境來辦理告別禮拜chiah-tio̍h，怎樣會是chit種一再凸顯家己親人ê特別「偉大」neh？真奇怪ê信仰ah！

Tùi嘉義西門到現在，我lóng主張一個基本信念：踏入教會ê門，無論貧賤富貴，大家lóng仝款。因此，我堅持禮拜堂內mài有任何特別ê佈置，ná親像平時禮拜仝款，tī講台兩pêng各有一盆花，án-ne就有夠ah。Koh來，就是tī khǹg骨灰罈ê桌á頂佈置一kóa花，án-ne就好。我siōng bē-tàng接受ê，就是甚麼「教會葬」、「中會葬」等chit種奇怪名詞。我mā無認為「教會葬」、「中會葬」就真偉大、光彩。咱長老教會ê創會者約翰•加爾文siōng偉大lah，但伊是連死後埋葬tī何處，lóng boài hō͘人知影，伊ài咱學習伊ê樣式：將一切榮耀歸hō͘上帝。

每pái參加告別禮拜，我常會有真深ê感觸，he就是告別禮拜ê程序單中有一個節目，是「慰電」、「慰片」等。司儀lóng會唱出寄chit種慰問信函、慰問卡片ê人名，甚至會唸幾張慰問信hō͘參加聚會ê人聽。我想boeh問ê是：到底是出席參加ê人比較khah重要？iáu是寫慰問卡片ê人重要？如果專程去參加ê人，tio̍h坐tī hia聽hiah-ê無來，只寄來慰問信、卡片ê人ê名字，kap in所寫ê話，án-ne參加ê人koh算是甚麼neh？比hiah-ê缺席者koh-khah無重要loh？而且有ê人既然已經參加ah，iáu需要寫chit種慰問信、卡片mah？應該講，特別出席參加ê人siōng重要，人是請假，koh開錢坐車來參加。Hō͘ in án-ne費神，又ài聽chiah-ê無來，只寫慰問信、卡片者ê名字，真是輕重顛倒khǹg ah。每pái收tio̍h chit種傳真、電子郵件，我lóng會將伊直接the̍h hō͘喪家去，hō͘ in知影有誰對in表示關心。

我不時teh想一件事：甚麼是懷念？我認為真正ê懷念，就是對所懷念ê親人，將in好ê言行舉止kā伊傳承落來，chit點chiah是siōng重要。若是只有tī告別禮拜中講得jōa-ni̍h-á動人心弦，意義並無大，甚至會跟tòe日子ê轉逝，真緊to̍h會hông bē記得kah清氣liu-liu。

身為傳道者，若是tī處理會友，或是會友ê親人ê喪事，iáu the̍h紅包謝禮ê話，he是非常無應該該ê。因為chit項事是傳道者應該做ê份內ê tāi-chì，就算教會ê工友mā不該the̍h chit種紅包，只要是教會有活動，當教會工友ê就應該協助整理場地，hō͘聚會ē-tàng順利進行。Á司會者，或是司琴者mā好，chiah-ê lóng是teh帶領眾人參與敬拜，無應該該the̍h喪家hō͘ in ê紅包。喪事án-ne，喜事亦然。Tī教會裡，就是一個信仰團契，信仰團契ná親像一個大家庭，有喜事，大家同齊分享；有哀傷ê事，大家同齊分擔苦難，應該是án-ne chiah-tio̍h。

以我chit種ê態度替會友辦理喪事，坦白講，除了墓園ê事外，無論án怎用，mā bōe開jōa-chē錢。身為傳道者，若是beh開會友辦理喪事ê錢，坦白講，是非常容易ê。但我想講ê一點是：大家thàn錢真辛苦ah，ē-tàng節省ê，就盡量節省落來pah。我tī嘉義tú-tio̍h一對兄弟，十gōa年前，in ê父親是非常敬虔ê佛教徒。Chit對兄弟tī辦理父親ê後事時，就真簡樸，而且共計節省下八十萬元。兄弟兩人將其中ê六十萬元，捐hō͘台東關山天主教病院，另外ê二十萬元，則捐hō͘當時設立tī大武鄉尚武村，天主教修女所辦ê「救星教養院」。He是一間專門收留腦性麻痺兒童ê中心，目前已經遷移到台東市郊康樂chit-ê地方。

如果無信耶穌ê人家lóng會án-ne做，身為基督徒ê咱，kiám無應該做得koh-khah chē、koh-khah好chiah-tio̍h？

盧俊義牧師的個人網站。