《台灣之愛：盧俊義牧會筆記》

| | | 轉寄

六十歲過後一直teh想ê事

作者 盧俊義 2007.05.20

舊年過六十歲，我cha-bó͘-kiáⁿ悅文chhōe一間小小餐廳替我辦一個慶生宴，邀請幾位伊認為是我ê好友相kap聚集聊天。Hit工了後，我就開始想tio̍h該怎樣繼續往後直到退休chìn前ê傳道工作。

一九七四年八月，我開始tī關山教會牧會。Hit時，身軀勇壯，自認為思想簡單、個性活潑，tùi án-ne四界kap會友聊天。Tī教會ê一位執事帶我行一chōa會友ê厝了後，往後ê家庭拜訪工作lóng是家己一個人去ê。我依照家己手上ê筆記簿所畫ê路徑，有大水溝、電線柱á、大樹、商店招牌、路名牌等記號，一間厝探訪、koh再探訪。每pái去探訪，tú-tio̍h m̄-bat見面ê會友，lóng bē bē記得phah招呼講：「平安，我是tú來ê傳道盧俊義。」對方一聽是新來ê傳道，hit種喜樂馬上表現tī面上，歡喜kah回頭往厝內大聲喊叫：「傳道來囉，大家趕緊出來oh!」

兩個gín-á出生後，每pái lóng是全家出去探訪，悅文坐tī機車ê汽油箱á頂，淑英一手抱東元，一手攬tiâu我ê腰。就án-ne開始不時不斷teh四界走，認識環境，mā認識當地ê居民生活形態，kap人文景象。後來台北市衛生局副局長李鐘祥教授ài我寫一份人文、生活、環境簡介ê報告，mā成做後來推動大關山區社區衛生健康教育ê藍本。一直到現在，我iáu kap台大醫院ê宋維村、周松男教授有聯絡，伊bat去過關山協助社區健康教育ê工作。Hit段時間，我參與輔導大專學生聖經神學研究班ê工作，mā積極參與總會青年事工。 Hit段時日中，siōng值得回憶ê,就是tī監獄ê工作，每一個禮拜一固定去監獄（其實，平時mā不時去），mā搭三點gōa鐘ê小火車加上公路局班車去玉山神學院兼課。

十年，真緊to̍h過去。一九八四年八月，我開始tī嘉義西門牧會，mā是仝款。教會hō͘我騎ê機車比關山ê koh-khah小，我kap淑英兩人共乘一台五十西西ê機車，連輪胎都kā我講伊ê壓力真大。Hit時，hō͘我siōng陶醉ê事，恐驚就是推動兒童教育事工，包括幼稚園ê師資訓練，以及推廣寒、暑假兩pái ê兒童營。Á當時開辦ê老人營會mā hō͘我懷念不已。第一梯次ê營會就有林信男長老專程落去協助。

Tī嘉西ê期間，當時總會總幹事高俊明牧師，kap向前行政院長張俊雄兄去遊說兩pái,chiah hō͘嘉西小會同意放人，hō͘我去主編教會公報。Mā是tī hit段時間，我用所有時間埋首tī紙堆裡爬格á,he是真正teh爬格á,當時iáu無電腦，所有新聞稿、專欄、文章等lóng是用手寫tī稿紙頂面。Tī hit段長達六年ê時間裡，hō͘我學會曉每一個禮拜手寫一萬gōa字ê稿件，甚至koh-khah chē。特別是為tio̍h beh出版受難週特刊，tī hit段期間，我寫了幾pái受難週經文ê默思kap代禱資料，有淡薄á受tio̍h好評。

Koh再次tńg來到嘉西牧會是tī一九九四年元月（我tī九三年七月赴任，了後就出國去維也納kap溫哥華等地協助牧養教會），我kā時間khǹg tī去各地國、高中學校，為學生、老師kap家長們演講，並且mā tī有線電視台、電台主持宗教心靈節目。活動量iáu-kú真大，每工總是有無閒bē了ê功課ài做。就tī hit段時間中ê我，經歷了生命第一pái大手術——頸椎五、六、七節ê開刀；mā是hit一pái,我真認真而且嚴肅想tio̍h生命終結ê事。

一九九七年九月，好友謝淑民長老因為tī開小會時突發心肌梗塞去世，hō͘我受創非常大，mā決定離開hit間會hō͘我觸景傷情ê教會。雖然有真chē好友、長輩，包括楊啟壽牧師、王憲治牧師、林文珍長老等等，lóng一再安慰、鼓勵我，希望我會繼續留tī嘉義西門，但我iáu是堅持離開，並決定暫且歇睏一年ê時間。但chiah tú開始歇睏iáu bē一禮拜，就接tio̍h鄭仰生長老phah過來ê電話，ài我隨時起來咱台北東門講道。我原先是想：講道，就講道pah。Nah知，講道了後，隨時koh來ê竟然是談聘牧ê事。

一直到現在，每pái kap淑英談起tī chia工作ê一kóa瑣碎ê tāi-chì,阮iáu是感覺當時ê決定確實是真倉促。原本計劃boeh歇睏一年，利用時間好好á整理些資料，kap寫kóa公報社工作回憶記錄ê,但事kap願望相違背。

時間過了真緊，來台北東門一目nih久就過了九年。Tī chia,我無甚麼特別ê作為，只有ê,就是帶查經班，開拓了東門學苑以及暑假兒童營。兒童營ê事工是tùi畢業去牧會了後，就開始推動ê,包括文化大學、東海大學等學生團契，以及嘉義西門ê青年lóng bat去協助過，真自然tek,tī chia mā繼續推動chit項事工。現在大家看慣勢，mā bōe有甚麼新鮮ê感覺pah。現在東門學苑ê茁壯，thang媲美當年tī關山ê「福幼托兒所」。當年ê「福幼」是真有品牌ê幼兒教育機構，現在咱教會ê神學生張軒愷kap伊ê小弟、我ê kiáⁿ兒東元，lóng是「福幼」ê畢業生。Á咱現在ê東門學苑，mā確實是真有口碑ê社區學苑。

非常有趣味ê是，我tī關山起一間幼兒歇睏室，tī嘉義西門起一間工友宿舍，tī chia起一棟教育館。唯一ê差別是：前二者lóng是違章建築，而且材料簡單，但lóng擋能tiâu巨大風颱ê吹襲，kap地震ê搖晃。兩地lóng bat被檢舉tio̍h拆，結果mā lóng無來拆。Á tī chia則是一切lóng依法行事，公文來、公文去ê,hō͘我感覺真「麻煩」，但是無án-ne做，koh bē-sái。

我對牧會工作ê規劃是：十年換一間教會。Tī關山十年，轉換到嘉西ê時chūn,原本mā是計劃十年，無想tio̍h chiah三年gōa,就被總會遊說去承擔教會公報ê編務，但我iáu是tī hia加擋接近一年了後chiah正式離開。公報編務六年時間，我將伊改換真chē面貌，mā建立了電腦作業kap專任記者ê制度。後四年ê嘉西牧會，原本mā是計劃用十年，但卻無想tio̍h會發生淑民兄離開ê意外，mā hō͘我原本ê計劃提早改變。

現在，我tī chia已經過了九年，明年三月就會滿十年，我該怎樣進一步想下一階段ê傳道工作？ 應該講，傳道是無所謂屆齡「退休」ê。以前ê傳道者就是án-ne,ná親像以前ê長執mā是無年齡限制ê。現在總會真清楚明文規定，年滿七十歲就強制退休。我是m̄是ē-tàng活到七十歲？m̄知。但我知影一點：明年tī chia牧會就滿十年，mā是該想看：續落來ê階段該做甚麼？我想換一個職場領域ê走道，或是甚麼款ê教會？這是目前一直積極teh思考ê方向。我當然清楚家己ê獻身使命，就是一生ê日子做傳道者。既然是獻身傳道，就無所謂ê「退休」。若是身軀iáu好，我一定會繼續像目前帶查經ê工作，mā會繼續寫講道稿，因為我有chiù-chōa過，ài tī有生之年，將聖經新舊約六十六卷lóng講完而且寫完。雖然無牧會，就無機會講，但我認為並無一定ài有講台chiah寫講道稿，mā無一定ài有牧會，chiah來寫關於牧會ê事。我手頭就有一整箱ê資料，lóng是關於教會生態kap發生過ê事件，寫幾本關於chiah-ê方面ê回憶記事，應該是真精彩koh有趣味ê,而且對台灣教會史加減lóng會有所幫助。雖然我m̄是教會史學家，但至少寫kóa教會「野史」、「旁史」之類ê物件，相信koh-khah會引人注目pah。Chiah-ê就是我想寫ê回憶記事，日前小khóa估計一下，應該ē-tàng寫一百萬字pah。 Chit九年來ê牧會工作，我感觸真深，特別是tī近兩、三年來尤其深刻，對我生命有真chē新ê啟示，對牧會ê理念mā改變bē少，坦白講，chiah-ê改變並m̄是我所歡喜ê,但卻是必須ê。我體驗tio̍h真chē傳道者為tio̍h beh完成獻身ê理念，或礙tī家庭因素，á必須改變原本ê獻身使命。過去有一chūn-á,我總是bē了解為甚麼tú tùi神學院畢業做傳道無幾年，就「變質」ah,而且變kah hit種俗氣koh俗化？我常常怪神學教育出了甚麼問題。現在，我開始漸漸認識tio̍h,m̄是神學教育出甚麼大錯，或是神學教育ê方針有甚麼無對tâng,卻是現在ê教會環境kap生態，受tio̍h kui-ê社會大環境ê影響非常大，進一步koh hō͘傳道者獻身ê理念漸漸薄弱、消沉落去。這chiah是現今教會真正ê問題所在。

Tùi舊年過六十歲生日了後，我就一直teh思考怎樣安排koh來ê chit十年。直到最近，我整理過幾pái原有ê決定後，koh再次重新規劃未來該行ê方向，但求上帝hō͘我夠額ê智慧kap信心，知影所決定ê方向，是伊ài帶領我行ê。

盧俊義牧師的個人網站。