《台灣之愛：盧俊義牧會筆記》

| | | 轉寄

教gín-á知影ài感謝上帝真重要

作者 盧俊義 2007.06.10

今年ê新春感恩禮拜，我特別要求奉獻ê時，由執事用奉獻盤送傳hō͘大家奉獻，並且ài大家教導gín-á，用紅包貯(té)感恩奉獻ê錢，然後tī khǹg落去放上奉獻盤ê時，會記得講一聲「感謝上帝」。

小gín-á siōng歡喜農曆過年，因為ē-tàng the̍h-tio̍h真chē親友送ê紅包。但請一定ài會記得，教導gín-á ài知影獻上感恩，chit點比甚麼lóng重要。教導ê方式，就是ài kā伊講，tùi所得tio̍h ê紅包中the̍h一小部份，然後mā是用一個紅包裝起來，頂面ē-sái hō͘ gín-á寫家己ê名字，當奉獻盤傳到咱面前時，kā gín-á講將紅包khǹg tī奉獻盤中ê時，也tio̍h順嘴講一聲「感謝上帝」。

Mā可能你聽起來會感覺真無聊，mā有可能，你會認為án-ne做真奇怪。但我beh kā大家講，án-ne m̄-nā bē無聊，mā無奇怪，相反ê，這是一門非常重要ê信仰功課！

感謝上帝ê事，永遠lóng bē感覺真無聊，mā bē感覺加了工或是奇怪，一點á mā m̄是！反卻是無teh教導gín-á感謝上帝，chiah是奇怪。基督教信仰hō͘咱學習知影：凡事感謝。Ná親像使徒保羅所講ê：「tī任何環境中lóng tio̍h感謝。這是上帝為lín chiah-ê屬tī基督耶穌ê人所定ê旨意。」（帖撒羅尼迦前書五：18）無錯，就是án-ne，無論tī甚麼境遇之下，lóng tio̍h獻上感謝。使徒保羅tī監獄中寫phoe hō͘信徒ê時，伊mā án-ne講：「無論做甚麼，講甚麼，lín lóng tio̍h奉主耶穌ê名，藉tio̍h伊感謝父上帝。」（歌羅西書三：17）

我不時看tio̍h身為父母、祖父母ê，看tio̍h親朋好友送禮物hō͘ gín-á ê時chūn，lóng會教導gín-á講一聲「多謝」。從來無任何一個人會講父母或祖父母chit種ê教導真無聊、無必要。相反ê，就算父母tī教導gín-á，而gín-á iáu未反應出來ê時，咱mā會跟tòe教導gín-á「講多謝ah」等chit種ê話。

Gín-á iáu teh稚齡ê時chūn，咱ē-sái決定tio̍h用jōa-chē錢khǹg入紅包中，hō͘ gín-á作為奉獻用。當gín-á漸漸長大，特別是當gín-á已經teh讀書ah，就應該向in說明，為甚麼需要感恩奉獻，án-ne做就是家庭宗教教育ê第一步，千萬m̄-thang疏忽。無論in講beh the̍h出jōa-chē錢作為感恩奉獻，lóng tio̍h鼓勵in，hō͘ in肯定。M̄-nā án-ne，身為父母ê咱，知影in得tio̍h真chē紅包，á願意the̍h出來ê，是相對ê少ê時，就應該tio̍h好好á kap in討論，hō͘ in知影感謝上帝ê事，m̄-thang斤斤計較。上帝是永遠bē虧待咱ê，只有ê是咱永遠常常感覺無夠。

台灣chit幾年來，出生率jú來jú低，兒童人口下降真chē，真chē學校減班到必須kap其他學校合併。仝款ê現象mā出現tī chit-má ê基督教會中，兒童主日學ê gín-á jú來jú少，á基督徒父母對兒童宗教教育mā無koh像過去hit種重視ah。大家比較khah重視ê，是兒童ê才藝kap學校課業，但我只ē-tàng講，若繼續án-ne落去，有一工咱lóng tio̍h付出真大ê代價。原因只有一點：缺乏宗教教育ê薰陶，即使擁有一切，mā是枉然。

咱chit-ê時代，生活環境中ê誘惑siuⁿ-chē，比起咱過去祖先到頂一代所經歷過ê總和，koh-khah-chē。Mā因此，遠離聖經教示ê情況是jú來jú嚴重。大家lóng teh尋求刺激，想beh tùi感官得tio̍h滿足，連宗教界mā是án-ne，對聖經上帝ê話無興趣，歡喜追求滿足家己ê需要，卻m̄知感恩、敬拜ê意義是甚麼，chit點thang tùi真chē禮拜形式ê改變看會出來。非常少有人願意tī聖經ê話語上努力下功夫，甚至koh-khah嚴重ê是，真自高研習聖經ê話語。

最近幾年，真chē pái聽tio̍h兒童營gín-á ê家長kā我án-ne講：「牧師，lín教會辦chit種兒童營非常好，我發現gín-á m̄-nā歡喜來參加，而且最近竟然會kā阮講『食飯ài先感謝上帝』。我kap阮bó͘聽了後，lóng起gōng-gia̍h。因為阮mā m̄知該怎樣感謝。因此，我只好kā cha-bó͘-kiáⁿ講，請伊chhōa阮感謝。當伊teh祈禱感謝ê時，我偷偷á瞄伊一眼，我發覺伊非常虔誠，雙手ân-ân合作伙，頭lê-lê、雙眼mi-mi。」

Chit位父親講tio̍h chia時，伊ê bó͘續落來講：「但siōng hō͘阮感動ê，是伊tī祈禱中，iáu求上帝ài賜福hō͘爸爸、媽媽，講爸媽工作真辛苦。我kap我先生聽了後，目屎差一點á就lak落來。Hit-pái了後，阮每工暗時同齊食飯ê時，就由cha-bó͘-kiáⁿ負責感謝。禮拜日是三餐lóng作伙食飯，每餐lóng是伊祈禱。」

看pah，教導gín-á會感謝上帝，in真自然tek就會想tio̍h感謝父母。Tī兒童營食點心ê時間，阮就是教gín-á beh tùi感謝上帝開始，上課mā是仝款。阮lóng是tùi感謝上帝開始，mā以感謝上帝結束每工ê功課。當咱ê gín-á tī厝裡生活中，若是ē-tàng tī in睏chìn前，教導in怎樣獻上感謝ê祈禱，tī食飯ê時chūn，mā教in學會曉感恩謝飯，chit種ê gín-á，真自然tek就會想tio̍h因為有父母辛苦工作，in chiah會有食、穿、lim、tòa、行ê等等夠額所需。

Mài小看chit種ê信仰功課，即使是siōng微小而且短短ê一句「感謝上帝」，mā是真重要。因為chit句「感謝上帝」，至少已經講出咱身上所擁有ê，kap上帝ê賞賜有絕對ê關係，若無m̄免感謝上帝。這就kah-ná咱the̍h物件hō͘ gín-á ê時，當in雙手接落來物件ê時，教in講一聲「多謝」，mā是ài in知影伊the̍h chiah-ê物件ê時ài會曉「感謝」仝款。當咱kā gín-á講講「感謝上帝」ê時，in意識中便ē-tàng清楚知影：chit-ê紅包kap上帝ê賞賜有bē-tàng分割ê關係。

千萬mài吝嗇教導gín-á「感謝上帝」，大家一定tio̍h謹記chit點：會知影感謝上帝ê gín-á，一定koh-khah會曉感謝父母。當我教導gín-á tùi in ê teh年錢中，the̍h出一小部份作為感謝上帝ê奉獻ê時，請一定ài會記得：如果gín-á講ê數字遠比咱原先想像ê khah-chē，而且加出真chē時，mài kap伊計較，mā mài講「無需要」，卻是beh了解伊為甚麼會想tio̍h chit種ê數字。Mā可能伊是無意識ê開嘴講講leh，因為伊m̄知「感謝上帝」是甚麼意思，chit時chūn，你就ài好好á kā伊講解。若是gín-á ē-tàng講出伊之所以boeh奉獻hit種「chē」ê理由ê時，請會記得，ài肯定、o-ló伊。因為he是gín-á心甘情願ê，伊bē心痛。只有tī被父母勉強之下，即使是非常微小，mā會感覺心疼。Á hit種ê奉獻就失去意義loh。

我並m̄是beh勉強大家一定要hō͘細漢gín-á lóng有奉獻，我只是想boeh kā 大家講，tio̍h把握機會教導眾細kiáⁿ知影「感謝上帝」。

盧俊義牧師的個人網站。