《台灣之愛：盧俊義牧會筆記》

| | | 轉寄

Oah，怎樣會是án-ne﹗

作者 盧俊義 2006.08.06

一九九七年七月底，我the̍h-tio̍h行李正準備boeh行出加拿大溫哥華國際機場ê海關，kap台灣機場ê海關仝款，分成兩個部分，一個是beh報稅ê，另外一個就是家己認為無報稅需要ê通道。多數ê旅客lóng會tùi免報稅通道行出去。有kúi-nā位嘴講台語腔口旅客談笑ê聲音相當刺耳，而且囂張ê行徑引人側目，in手the̍h簡單行李，穿插入時，但舉止之粗俗確實有點á kap衫褲無對同。

M̄知是海關人員看bē順眼，á是感覺懷疑，兩個加拿大海關官員突然叫chit幾個人到另外一個檢驗台去。Chit-ê一叫，hō͘ in原本大聲講話、有講有笑ê聲音，頓時消音沉靜落來，彼此相看而且輕聲teh問︰「是啥物tāi-chì？」但iáu是按照官員指示ê方向行去。

He是當熱ê天氣，有人穿短ńg，也有人穿T-shirt、短褲、涼鞋等等，無人會去注意chiah-ê。可能chiah-ê官員眼尖pah，有一個官員早已經鎖定其中ê一位，伊對chit群台灣旅客中ê一位男士講︰「請將你ê護照hō͘我看一下。」Chit位旅客正手teh拖行李，tùi án-ne用tò手the̍h護照hō͘ chit位官員。Chit位官員接過護照翻了翻了後，就問chit位年紀約四十五歲左右ê男士，講︰ 「你手裡戴ê手錶是tī toh位買ê？」
答︰「Tī台灣。」
問︰「真正？jōa-chē錢買ê？」
答︰「當然是真正。真便宜lah。」
問︰「Jōa-chē錢買ê？tī台灣甚麼所在買ê？請the̍h落來我看一下？」

Chit位台灣同鄉開始有小khóa緊張，將正手ê行李放落來了後，就將倒手腕上ê金錶the̍h落來交hō͘官員，同時側面看其他被安排tī等待線頂ê同伴，有ê人kui面無奈表情，也有ê雙眼peh金金ê，kah-ná teh問講︰「有甚麼問題mah？」也有ê輕聲細語彼此互相問講︰「可能tio̍h課稅pah」。

驗證官員向後面同僚phah一個手勢，又koh招來另外一位官員，三個人chhi-chhi-chhu̍h-chhu̍h交談了一下á，koh-khah致使chit幾位同鄉緊張萬分。來ê chit另外一位官員theh8hit粒金光閃閃ê鑽戒手錶反覆teh看，然後隨口問講︰

「你講這是tī台灣買ê？有證明文件mah？」 Chit位台灣同鄉一時答bē出來，真緊張搖搖手講︰「這m̄是真正，是仿冒ê、假ê，無甚麼證件。」

官員面色有點á gōng-gia̍h，而且表情沉重隨時問講︰「假ê？你怎樣ē-tàng買仿冒ê手錶戴neh？」

伊回答講︰「Khah便宜ah，這tī阮台灣真chē，到處lóng ē-tàng買tio̍h。」

Chit位官員隨口講「OK」，thoah開thoah-á，the̍h出一支鐵鎚á，將chit-ê手錶tī檢查台頂狠(hiông)狠kòng落去，只見kui-ê鑽戒手錶就án-ne支離破碎散落tī地上，就tī hit時，chit幾位台灣同伴異口同聲用台語大叫一聲︰「Oah，ná會án-ne？」大家lóng起大gōng-gia̍h、講bē出話來。

官員對chit位錶主講︰「仿冒品是bē-tàng買賣ê，tī阮國家不准有仿冒品入來，因為是違法ê。既然是仿冒品，就需要銷毀。」講完chit位官員ài伊帶行李進入另外一間辦公室，我想可能是beh替伊好好「洗澡」（意思是詳細查驗行李kap「搜身」）一下。另外ê幾位同伴mā lóng被要求phah開行李箱，一一檢查。

就tī chit時chūn，我聽tio̍h有其他同班機看tio̍h chit-ê情景ê旅客用台語輕聲講著︰「Hit粒錶á至少也tio̍h五十萬。」也有人講︰「我看hit粒若m̄是 紅蟳，就是 露螺，tī瑞士最少也tio̍h四、五萬美金chiah買會tio̍h。」另外一個人則講︰「落(lak)tī土腳ê hiah-ê鑽á，m̄知是m̄是會hō͘ hiah-ê官員私下撿(khioh)去賣？Chit聲好孔ah﹗」

人群中ê台灣人你一句我一句，大家lóng teh為hit粒被phah碎ê「紅蟳」或「露螺」鑽錶感覺惋惜不已，無人討論為甚麼ài講白賊？為甚麼無坦白告知就好。

台灣人移民北美ê人真chē，有的確實是為tio̍h hō͘ gín-á有一個好ê教育學習ê環境，但也有為數bē少ê人並m̄是án-ne，只因為家己有kóa錢，就想chhōe一個世界公認美麗、社會福利好ê國家khiā起。Chiah-ê有錢人往往講話ê架勢kap行徑lóng真囂張，認為人lóng tio̍h買伊ê帳、禮讓伊三分，hit種財大氣粗ê樣式，表現出來ê不但俗氣，hō͘人看了明明是就會替台灣人感覺漏氣。

有錢，應該koh-khah會謙卑chiah-tio̍h。若m̄是tī正式而且重要ê場合，siōng好也khah mài將chiah-ê珠光寶氣、耀眼之飾物戴出來亮相有錢，應該koh-khah會謙卑chiah-tio̍h。，因為人m̄-nā看bē落去，in iáu想beh了解到底chiah-ê有錢ê台灣人tī別人國家享受hit種美好ê社會福利時，是m̄是也相對來報繳稅hō͘僑居國？
（原載tī自由時報2004年7月25日第15頁）

盧俊義牧師的個人網站。