《賴永祥講書》

| | || 轉寄

《教會史話》(2_144) 卓加弄家譜

卓其清(枝清)是拔馬(左鎮)上早期ê信徒;伊ê老父卓加弄(字天啟)厝前bat起拔馬第一所聚會ê所在。為tio̍h beh探討拔馬教會歷史kap平埔族人改信ê kòe-têng,góa感覺應該the̍h卓家族譜。Hó͘加在郭宣仁牧師代勞,卓榮祥牧師提供卓伊萬裔「系統表」、家譜稿本內底ê「卓道生信主心路歷程」、卓道生履歷等資料,甚感。卓加弄tī 1898年死去,72歲(看《台灣府城教會報》165期)。

無tiāⁿ góa ài先記錄卓道生寫..ê卓家信主ê kòe-têng……「始從兄(指其清,又作枝清)往木柵禮拜堂聽道。因為庄前事一佛名老王,2月前tiāⁿ-tiāⁿ作怪,採冒兄枝清,beh選做技徒。正月15佛ê聖誕真鬧熱,beh新技徒開葷,拋裘刺劍。無法度阻止,hó͘ ka在有親chiâⁿ朋友(卓文杞?)元宵前ùi木柵來厝nih有看tio̍h,chio老父(按卓加弄)祈禱上帝,教a兄(指其清)讀詩。15日庄內ê人起佛壇,kòe火盆,鑼鼓喧鬧,a兄果然平安無事。隔轉工拜託六ê朋友chio a兄元生去木柵拜堂禮拜,繼續招族親朋友二十gōa人,tiāⁿ-tiāⁿ去木柵聽道。三koh月後馬醫生(指馬雅各)同高長先生來探視,順soah去敝家做禮拜所二年gōa,tio̍h是chit-má ê 四七零番地。tiāⁿ-tiāⁿ有崗仔林二十gōa人奉道來禮拜。年gōa,馬醫生、馬醫生娘、李庥牧師、牧師娘,lóng來行tah;後來馬醫生支出銀四十kho͘ hō͘老父kā陳買地,起chit-má ê左鎮禮拜堂。所以gún-tau平安,庄民安駐,無koh sóa去後台灣(指東部)也。感謝上主恩憐拯救施恩格外,hō͘ gún-tau有chit-má ê順事。真感謝。卓道生筆」。

卓加弄,字天啟,tī「系統圖」內底是第四代。第一代卓伊萬(夫不詳)、第二代卓沙宜網(夫不詳)、第三代卓加禮(夫不詳),真明顯頂一代是女系譜。卓加弄,妻買兵涼,生四男二女,卓其清(妻標粉)排長,卓道生(妻蘭謹)排第三,其清、道生屬第五代。道生有一男二女,男卓良(妻莊豆鹽),長女卓美(適胡再享),次女卓甘(適郭孟揚),卓良之輩屬第六代。卓良生五男二女,卓榮祥是第四,是第七代。koh有第八代,包括卓榮祥子宗仁等,第四代起系譜已經是男系。

卓其清,bat做教會小學教員、傳道師,伊是府城kap旗後兩傳道養成所合併前ê受訓練者。卓道生列tī台南神學校(大學)開設以後學生名錄ê第一ê,tī 1876年入學。伊ê kiáⁿ卓良(koh叫做基良,1908年入學),孫榮祥(1949年入學),曾孫宗仁(1972年入學),四代lóng是台南神學院培養..出..來ê傳道者,真無簡單。

《台灣教會公報》 2038期 主後1991年3月24