《趁iau2日时》

 | | | 转寄

盲人义工是我ê「兰巴伦」

作者 林俊育 2008.06.08

「人生以服务为目的」，「服务是爱ê表现」，「爱你ê邻居」，chiah-ê lóng是我1988年以来投入盲人义工ê原动力。

Tī从事各项盲人义工中，我渐渐体会到神ê大爱充满我ê生命，hit种爱ê力量mā时时催迫我去扩大我ê「兰巴伦」。我ê生活充满喜乐，我ê生命会得thang成长，盲人义工将成做我今生今世ê「兰巴伦」。

感谢神ê带领kap恩典，我有一个美满ê家庭kap顺利ê事业，四年半前，为tio̍h cha-bó͘-kiáⁿ ê教育而移居波士顿。太太tī一间大学会计部门上班，cha-bó͘-kiáⁿ就读麻省理工学院大学部，我为tio̍h seng-lí kap盲人事工而成为台美两地ê空中飞人，koh-khah有机会将美国khah进步ê盲人福利措施绍介hō͘国内参考。

回顾七年来，tùi实践基督教siōng基本ê信仰，mā就是耶稣ê新诫命「爱你ê邻居，ná亲像我爱lín仝款。」我体认到kap神同工ê喜乐。人bōe-sái只为家己而活，he是自私ê小我；若ē-tàng为「爱你ê邻居，而活，he就是大我ê永生之道，mā就是神ê国度降临人间。

周遭ê弱势团体就是咱ê邻居，当时教会中有二、三位盲朋友来参加主日崇拜，我就tùi关怀盲人开始。Kap in深入接触后，我发现盲人是弱势中ê弱势，但神虽然关闭in肉体ê目睭，却phah开in koh-khah明亮ê心灵目睭。

Tùi án-ne，我决定辅导成立一个超教会ê盲朋友联谊会，tī教会内ê二、三位盲会友陪同下，展开探访盲朋友ê工作。In lóng是从事按摩工作，暗时是siōng忙ê工作时间，只好利用我日时上班时间，抽空去做访问工作。

Hō͘我忘掉辛劳ê是，in lóng真欢喜地认同成立盲朋友联谊会ê构想，几位khah热心ê就马上成立筹备委员会。会记得第一pái举办阳明山郊游，两部游览车约八十人参加。阮tī教会内招募十几位义工，出发前举办义工训练，由盲朋友亲自教导义工如何kap盲人接触。原来盲人ê障碍m̄是目睭看bē-tio̍h，却是周遭ê人kap社会大众对in ê误解而产生ê歧视。In只是视觉无方便而已，并m̄是残障，in有双脚ē-tàng行路，所以mài牵in行，却是你ê手臂hō͘伊扶tio̍h，你行tī前方引chhōa方向。做义工ài有chit种siōng基本ê认bat，盲人期待ê是尊重，而m̄是你那高伊一截ê同情。

Chit-pái ê郊游，盲朋友kap义工lóng乐而忘tńg去，彼此第一pái ê心灵接触，留落来甜美ê回忆。真chē义工写出in ê感触文章发表tī教会ê杂志。报读hō͘ in听了，筹备委员ê信心倍增，tùi án-ne举办成立大会，选举干部，拟订章程kap工作计画，我以义工ê立场kā/hō͘伊协助kap辅导。

Chiah-ê盲朋友大多是tùi xx 毕业台中惠明盲校kap罗东慕光盲人重建中心，tī校期间深受神爱ê感动而受洗成做基督徒，但毕业后进入社会，tī残酷ê社会夹缝中，以按摩维生糊口。无情社会大众ê误解kap歧视，只好kā家己关tī厝里，忍气吞声地渡过漫长而寂寞ê乌暗岁月。神ê爱tùi án-ne消失殆尽，对教会mā失望，只好锢禁厝内。Chit-pái联谊会hō͘ in重新tam-tio̍h神ê爱，tùi教会开始有人接纳in，chiah有勇气行出家门koh再到教会礼拜，重新行入社会。

联谊会中有kóa爱唱歌ê惠明盲校毕业生，koh再次有机会唱圣诗，回忆tī校期间唱圣诗o-ló神ê喜乐，in kā我讲希望ē-tàng组成诗班，我举双手赞成，á我kā-in讲自chhōe团员、指挥kap伴奏，其他经费问题由我筹组后援会来募款。一切进行顺利，tī圣诞节晚会中，chit-ê盲人诗班一鸣惊人，掌声久久不绝，我mā感动得潸然目屎下，是喜乐ê目屎，那情景到taⁿ记忆犹新。

In虽然从事按摩工作到深夜，但tī神爱ê催迫下，诗班团员每周一kap周五上午十点到十二点练唱，in自作点字乐谱，用录音带录下上课老师教ê四部，tńg到厝了后各自努力练习，下次上课老师koh再将四部合起来练习。比明眼人boeh辛苦kúi-nā倍，但in乐此不疲，为tio̍h是boeh ài彰显神ê大能。In体认到神boeh重用目睭残缺ê诗班来o-ló神，我chit-ê做义工ê深受感动而催促家己koh-khah努力服务。

诗班受邀到各教会去献诗见证，我lóng bōe错过做义工陪in出去ê机会，in传达神爱ê信息不输hō͘专职传道ê牧师。我鼓励in继续努力，并将诗班定名为「西罗亚诗歌布道团」，tī圣经中记载耶稣叫一位盲人去西罗亚池洗目睭，结果医好瞎眼。西罗亚ê意思是「奉差遣」。In取chit-ê团名就是beh奉神ê差遣去宣扬神ê大爱。

我iáu鼓励in去监狱、戒毒所及国中学校演唱并见证，koh-khah kap伊甸残障基金会ê喜乐［盲人］四重唱联合，到全岛六个点举办「百万残障巡回歌唱见证会」，透过诗歌来拯救迷失而堕落ê灵魂。我这长期陪团ê义工ê心灵，mā被净化而充满喜乐。

我发现台湾盲用品ê供应短缺，尤其是弱视辅助器，对盲朋友来讲实在不公平。我tùi án-ne邀一位seng-lí往来ê工厂头家蔡辰光先生来开发盲用品， tāi先开发盲扙，mā是beh免费送盲朋友每人一支。最近koh开发倒水叫停器，mā是beh免费赠送盲朋友每人一个。阮希望ē-tàng开发koh-khah chē ê盲用品，in the̍h-tio̍h盲用品ê喜乐，mā是阮chiah-ê义工ê喜乐。

每年来往台美五到六次，我有机会认识退休移居洛杉矶ê程文辉女士，伊是出生tī广州ê盲人，自力奋斗求学上进，有机会到波全斯盲校求学，并tī海伦凯勒ê鼓励下，写成一本自传，英文版是“ONE OF THE LUCKY ONES”，中文版叫「失明hō͘我ê挑战」。我感觉盲人mā ē-tàng当作家，将心灵ê感受写出来，一定有真好ê作品。Tī kah意文学kap写作ê盲朋友要求下，我就到波士顿家附近ê“THE CARROLL CENTER FOR THE BLIND”kap“PERKINS SCHOOL FOR THE BLIND”ê研究图书馆，chhōe盲人ê作品来译成中文，thang hō͘国内盲朋友有阅读国外盲人作家ê作品。现在正无闲翻译「生命tī我ê手指尖」［作家是盲聋哑］，kap「光tī隧道ê hit端」［作家是全盲］二本册，忙得非常欢喜，我chit-ê盲人义工mā有机会欣赏盲人ê文学，真是感受良深，mā得tio̍h珍贵ê启示。

神hō͘盲人失去视觉，但tī听觉方面赋予超过明眼人ê才华。这七年来，我深觉应该tī台湾创造大环境来培训视障音乐人才，我chhōe几位有共识ê企业界朋友同齐出钱，成立台北市视障音乐文教基金会，大家推我当董事长。

我目前iáu担任教会盲朋友联谊会ê辅导、慕光盲人重建中心董事、视障协会顾问，iáu有波士顿ê THE CARROLL CENTER FOR THE BLIND kap VISION FOUNDATION, INC. mā邀我去当in ê董事。看起来我chit-ê「不务正业」而乐此不疲ê盲人长期义工，将tī无久就变成正业了。盲朋友kap我周遭ê人lóng讲我为盲人付出真chē，但我总回答讲，我因做盲人义工所得tio̍h ê生命成长比付出ê koh-khah chē。
1995.1.14