《趁iau2日时》

 | | | 转寄

趁 iáu日时

作者 林俊育 2008.06.01

路加福音十三章8~9节：Hit-ê园丁应伊讲，主ah,今年请koh容允伊；thèng候我四围掘松èng肥；后来若结果子，就好；若无，你chiah kā伊chhò起来。

我一生成长ê过程算是平坦koh无大波折，自细汉学到大学lóng保送直升，从来m̄-bat tam过联考ê苦楚，预备军官役结束后ê就业mā真顺利，成家mā顺家己意愿kap基督徒结婚来成做基督徒。Chit时，我chiah会晓感谢神ê恩典，tùi án-ne继续追求基督教ê信仰，mā hō͘我体会tio̍h耶稣讲：「我是真理、道路kap生命。」ê基督教要义。

结婚了后，tùi待遇bē-bái ê日本商社离职，kap新婚ê太太共同创业，从事出口贸易，业绩年年成长，thàn钱了后to̍h买车、买厝，jú买jú大，tī同辈中算是真难得ê。婚后二年ê圣诞节，mā是订婚二周年纪念日，太太生宝贝cha-bó͘-kiáⁿ，号名「佳恩」，to̍h是「圣诞佳节ê恩赐」。Cha-bó͘-kiáⁿ可爱、乖巧，以后学校成绩名列头前，阮夫妻常常掠做骄傲。

松土kap施肥
Tī教会受洗一年了后，我就被选做执事，参与教会内事工，无闲kah额头kho̍k壁，聚会ê时mā有时á见证讲：「感谢神，赐我美满ê家庭kap顺利ê事业，koh有机会tī教会服事。」Chit-má想起当时会讲chit种话，实在hō͘我面红，其实当时心存骄傲，讲话大声，目中无人，尤其是对待公司员工ê高傲态度，有辱基督徒之名。讲tio̍h教会服事mā只不过是参与聚会、主日崇拜收奉献，kap参加教会ê幼稚园kap大楼出租ê事业经营。教会事业经营是thàn了bē少钱，但无结圣灵ê果子，反tńg成做传福音ê障碍，对神ê恩赐实在是真见笑。

Chit种无结果子ê树早to̍h应该hông chhò掉，但神tī公义ê审判chìn前iáu有慈悲kap恩典，ná亲像路加福音十三章8~9节中，园丁向园主为hit丛三年无结果子ê树求情，koh再hō͘伊一年机会，神知影信仰追求ê成长kap树仝款是慢慢长大ê。咱每一个人lóng kap经文中ê hit丛树á ê条件仝款，无法度kan-ta靠家己结果子， ài周围环境ê帮忙，神安排有人挖松咱周围ê土，iáu koh加上肥料。 当时做hip相机贸易出口ē-tàng thàn钱，但感觉家己开工厂生产thang thàn koh-khah chē钱，tùi án-ne贸然投资生产hip相机ê工厂。家己技术外行，聘请工厂经理koh用m̄-tio̍h人，一年落来负债累累，差不多boeh破产，佳哉来得及kā工厂叫停，m̄-koh四界欠债ài每工走三点半。有一位教会长老知影我ê情况了后，随时由长老娘陪我到银行用伊户头ê钱处理掉一kóa紧急ê大金额票据，hō͘我渡过难关。我一再感谢伊ê救急，但伊讲m̄免感谢伊，á ài我以后用仝款ê精神来帮助需要帮忙ê人。

感谢神透过chit对长老夫妇来挖松我周围ê土，mā kā我ak肥。经历chit-pái ê痛苦经验，我深深体会tio̍h家己能力ê有限，无祈祷得神应允，就自不量力ê乱闯，一定有苦头食。M̄-koh m̄是信了耶稣ê基督徒就bē有苦难，á是beh tī大难当头ê时ē-tàng óa靠神ê大能kap智慧，化阻力为助力，致使食古不化ê信仰根基会得thang被挖松来重新调整并施肥，chiah ē-tàng结出圣灵ê好果子。

Hō͘盲朋友公平ê机会
后来我tī教会推动关怀盲人事工，感谢一位长老ê提醒：「什么lóng m̄ bat,tio̍h beh从事盲人事工，ài慎重考虑chiah做。」Chit种ê松土施肥，hō͘我有所觉悟，tùi án-ne每年参加美国盲人机构考察kap国际盲人事工交换计画，mā hō͘我jú事奉jú甘甜。

残障福利法规定私人企业至少tio̍h雇用百分之一ê残障人士，tī教会办ê并号称世界上siōng大ê双连幼稚园有一百人以上ê员工，我tī聚会中力争雇用残障人士，竟然有一位长老讲：「我宁可hông罚万gōa kho͘(元)，mā无愿意开二万kho͘雇用残障人士。」Chit-pái ê松土施肥，提醒我雇用残障人士应该tùi我家己做起。Tùi那时chūn起，我tī只有四位员工ê迷你公司里，增加一位视障者工作伙伴。对伊来讲，m̄-nā每月得tio̍h一份kap非残障人仝款ê薪水作生活费，iáu重新拾回kap非残障人同工ê信心，koh-khah提供伊行入一般社交生活ê机会。

真chē人质疑讲：「盲人行出算命就是按摩，行出按摩就是碰壁，怎样有可能tī你ê贸易公司上班？」我ê回答lóng是仝款：「机会是你hō͘伊ê,只要你会晓教伊什么，伊就会照你教伊ê去做。有时chūn做kah比明眼人koh-khah好，m̄信来我公司看看就知影，其实失明人、明眼人无什么无仝，你用肉眼看，伊用触摸kap心灵ê目睭看，常常比你明眼人看kah koh-khah清楚，请你多交几个视障朋友就会明白。」

行出教会，进入社会
神tī人生中hō͘咱真chē松土施肥ê机会，tio̍h把握机会结好果子，hō͘你周遭需要人帮助ê厝边得tio̍h利益，mā就是beh荣神益人。咱也tio̍h了解生命ê有限性，时时准备奉主差遣，做世上ê盐kap光，行出教会，进入社会。只停留tī教会内ê基督徒，ná亲像瓶内ê盐，khǹg久了后就tâm湿to̍h倒bē出来；mā ná亲像khǹg tī桌á下脚ê灯，照bē-tio̍h需要光ê乌暗所在。 社会chiah是福音ê大工场，马上就ē-tàng做工， mài等到周围ê土被挖松。约翰福音九章4 节耶稣讲：「时iáu是日时，咱tio̍h做差我ê ê工；暝时beh到，hit-tia̍p就无人能做工。」［华语：旷野 67 期，1995 年 7 月号］