《趁iau2日时》

 | | | 转寄

神hō͘眼盲ē-tàng看见

作者 林俊育 2008.05.25

前言
一九九一年到美国参加盲人事工国际交换计画考察，tī短短八周间kap以后每年参加ê美国东岸盲人事工研究考察［STUDY TOUR］，hō͘我体验tio̍h神hō͘瞎眼ē-tàng看见ê真理kap事实。神使用各种人才kap科技，hō͘视障者透过各种方法也ē-tàng「看」tio̍h神所创造ê美好世界。

约翰福音九章三十九节，耶稣讲：「我到chit世间来ê目的是beh审判，hō͘瞎眼ê ē-tàng看见，ē-tàng看见ê颠倒瞎了眼。」肉眼看bē-tio̍h ê瞎眼人，in心灵ê目睭却是明亮ê；肉眼ē-tàng看见ê明眼人，in心灵ê目睭被世俗杂务掩盖teh，颠倒看bē-tio̍h真理之神ê存在。

肉眼瞎ê心眼却明亮
1988年起，我tī双连教会辅导盲朋友联谊会kap西罗亚合唱团，进一步koh参与台湾盲人社会工作，目前担任慕光盲人重建中心董事kap视障协会顾问。真chē人kā我讲伊非常感动我tī盲人事工上ê付出，其实我tùi盲人事工中所得tio̍h属灵kap信仰方面ê成长超过我ê付出koh-khah chē。尤其是in对信仰ê追求，明眼人lóng应该自觉惭愧，tī双连教会ê各班成人主日学中，盲人查经班ê出席人数永远是独占鳌头；真chē盲人去读神学院，毕业后mā lóng成做真好ê牧师，kap明眼牧师仝款牧养教会，传扬神ê福音。Iáu有西罗亚合唱团tùi诗班进一步koh成做诗歌布道团，充分实践in「西罗亚=奉差遣」ê崇高信仰；对百万残障同胞ê福音布道，到监狱kap国中去诗歌见证。有ê长执误解我kā in带得siuⁿ紧，会变成bē-tàng收拾ê局面。其实是我tòe in美好ê信仰脚步行，当我做完二任六年ê服务委员会主委了后，我便转来传道委员会，是in开启了我心灵ê目睭。我常常以chit-ê tāi-chì感谢神，并tī神ê面前纪念in，愿神赐我koh-khah有能力来服务视障朋友。

一九九三年十月二十六日，「以爱化解碍」百万残障同胞巡回布道会tī台中地区举行，西罗亚合唱团由吴月云团长串场，伊问台下ê听众：「目睭是灵魂之窗，对m̄-tio̍h？」大家异口同声讲「tio̍h」。吴团长反问：「阮眼盲e5boeh án怎chiah好neh？」台下一阵笑声了后，吴团长续落来讲：「阮m̄-nā有窗iáu有门，请听阮唱「阮若phah开心内ê门窗」」。

凡俗杂务hō͘咱成做「心亡」ê忙人，咱常常讲：「事大莫过于心死」，án-ne是指忙人m̄ hō͘神进入伊心内，无法度开启心灵ê目睭。圣经上有关耶稣医治眼盲ê记载，lóng是启示咱ài开启心灵ê目睭，因为he比肉眼koh-khah重要。Chiah-ê故事比喻mā lóng成做肉体眼盲ê安慰kap鼓励，mā是in siōng喜爱ê经节。M̄-koh，in无欢喜人叫in「chheⁿ-mê-á」，因为台语中加「仔」ê lóng带轻视ê意味。

新任圣经公会总干事赖俊明牧师是十六年前为我洗礼ê牧师，mā是我信仰ê启蒙师，我请教伊为何圣经m̄用「盲人」来取代「瞎子」？伊请教汉学大师后kā我讲：「盲」是指眼目死亡了，á「瞎」是指眼目害病而已，「瞎」比「盲」应该koh-khah好。我有所了解，但iáu是认为用「盲人」取代「瞎子」会koh-khah好，愿圣经boeh出新版本ê时，ē-tàng举行公听会，听盲人ê心声kap意见，因为in mā是神ê子民，koh-khah是圣经ê忠实读者。


弱视者残存宝贵ê视力
领有残障手册ê视障朋友中，有一半以上是弱视á iáu有一点视力。台湾政府规定视力经过校正了后tī 0.2以下就是法定盲人［siōng好改称视障人］，这kap美国ê标准仝款，北欧ê社会福利国家，有ê规定0.3甚至有ê 0.5以下。Chiah-ê人加减lóng iáu有视力，先进文明国家lóng真重视chiah-ê残余视力，尽力设法kā伊提升。

美国ê盲人机构kap重建中心lóng设有弱视服务部［LOW VISION DEPT.］，作低视力检查并绍介各种辅助器［LOW VISION AID］，提升其残存视力，hō͘ in tī生活上、行动上、就学上、就业上koh-khah方便。反观咱台湾，自夸经济奇迹，却无机构来服务弱视朋友，chhut-chāi伊处tī困难中度日，mā丧失了真chē就学、就业kap活动ê机会，国家亦流失了真chē thang造就ê人才kap就业人口，何等可惜。

一九九一年ê参观考察，到一间设tī纽约长岛ê弱视目镜ê专业工厂―― "DESIGNS FOR VISION, INC.［DVI］"，听完董事长 RICHARD E. FEINBLOOM ê简介kap参观电脑化一贯作业ê生产线了后，我就认为应该kā chit种目镜引进入来台湾，带tńg来所有ê目录资料，请教眼科医师陈五福博士，伊讲beh配chit种弱视目镜，费时koh bē thàn钱，国内无眼科医师愿意做，实在hō͘人惋惜。

一九九二年我koh到hit间工厂参观ê时，董事长koh再次强调in ê产品主要畅销美、加之外，其他国外mā真chē来采购，但台湾lóng无人来接洽过。同行有一位瑞士来ê小姐，旧年国际交换计画伊kap我同期，今年伊是专工为tio̍h研究弱视目镜而来，hō͘我koh-khah有使命感为台湾ê弱视朋友设法。回台后随时请友人chhōe马偕病院ê眼科医师，答案lóng是无兴趣。


引进弱视辅助器
一九九三年我邀请tī慕光盲人重建中心服务三十四年ê卢明松先生、tī淡江大学启明社服务盲生十七年ê洪锡敏教官kap双连教会负责盲人事工ê陈文钦牧师同齐参加盲人事工研究考察，in lóng认为应该赶紧引进chit种弱视目镜。尤其洪教官强调弱视ê学生配戴chit种目镜，上课ê时就thang看tio̍h乌板上ê字，这是台湾弱视者ê一大福音。我下定决心马上行动，因为前无久我tī波士顿认识荣总派去哈佛医学院眼科深造ê刘瑞玲医师，伊是台北市南门教会ê会友，我kap伊提起弱视目镜需要眼科医师ê验光处方，伊一嘴答应帮忙，并购好机票准备同齐去参观hit间工厂，可惜出发前一工伊破病soah取消同行，但伊ài我带一kóa样品tńg来试看看。

Chit-pái我鼓足勇气向厂方要求引进in ê弱视辅助器到台湾；董事长看我来了三pái，chit-pái台湾koh浩浩荡荡来了六个人。伊应我ê要求，to̍h即刻指示外销部负责人为我准备一kóa样品，并叫一个人教我使用样品kap写处方kap订单ê方法，我有淡薄á成就感来一一学习，希望ē-tàng赶紧帮助台湾ê弱视者，hō͘ in提升视力进一步koh扩展生活空间。

最近到美国波士顿，tú好tú-tio̍h「美国验光学会」［AMERICAN ACADEMY OF OPTOMETRY］举办ê一九九三年度ê展览会，我当然无错过chit-ê千载难逢ê机会，两工ê参观hō͘我对弱视辅助器有koh-khah深入ê了解。Siōng大ê收成是koh发现另一间公司叫「OCUTECH, INC.」，由负责人 DR. HENRY GREENE开发成功ê「视力加强系统」［VISION ENHANCING SYSTEM, VES］，其siōng大ê特点是免视力校正，to̍h是系统内自动校正，thang免去验光开处方ê手续。其目镜架框kap "DVI" ê无仝，同时引进二种，thang hō͘弱视朋友选择适合ê来配戴。Chit时，「神hō͘眼盲ē-tàng看见」一直tī我ê脑海裏跳跃，kap神同工hō͘我无限ê喜乐，真pháiⁿ用言语形容。


「我ē-tàng看tio̍h！」何等喜乐
样品带tńg来台湾，我随时chhōe二位弱视好友到荣总请刘瑞玲医师验光诊察，当in chhōe-tio̍h适合ê弱视辅助器，透过he 缩kah 极小ê精密望远镜， ē-tàng看tio̍h五十公尺外ê水塔，无戴chit种辅助器则一片白茫茫。In禁bē-tiâu叫出来：「感谢神，我ē-tàng看tio̍h。」我讲：「Lín根本to̍h无盲ah！」

一个周末下晡，我因tú回国厌倦加上时差，tú beh倒落去膨椅作一个小憩，电话铃响讲beh来看弱视辅助器，我了解he「我ē-tàng看见」ê迫切心理，不管ài困神gōa厚iáu是叫伊紧来，结果来了三位。In戴上辅助器，望tio̍h窗外对面约二十公尺外ê墙壁讲：「一块块ê砖块lóng看kah真清楚，我一生从来无看过chiah-ni̍h清楚，toh位thang配tio̍h chit种目镜？」我讲tī美国真chē，伊一屑á to无迟疑讲：「我买机票，你chhōa我去配好mah？」我kā伊讲m̄免去美国了，慕光盲人重建中心已经着手筹办「低视力检查kap光学辅助中心」，该中心成立了后就thang服务国内弱视朋友。

为tio̍h了解chit种「辅助低视力目镜」适合台湾弱视者ê程度，我亲自带样品到双连教会盲人查经班kap淡江大学盲生资源中心，请弱视者试戴并听取in ê意见。双连教会盲朋友联谊会mā举办一场说明会，五十gōa位弱视朋友参加，lóng期待赶紧ē-tàng配tio̍h chit种辅助目镜，以改善in ê视力，进一步koh来改善生活。愿神ê大能hō͘所有低视力ê弱视朋友lóng ē-tàng重见光明，o-ló神。
1993.12.9