《趁iau2日时》

 | | | 转寄

美 国 视 障 机 构 考 察 报 告

作者 林俊育 2008.05.18

前言
一九九○年移居美国波士顿郊外ê牛顿城 ( NEWTON ) ，有一工路过中央街 ( CENTRE STREET )，见tio̍h “ THE CARROLL CENTER FOR THE BLIND " ［佳乐盲人重建中心］ê招牌，我就行入去拜访。由公关部主任亚瑟・欧内尔 ( ARTHUR O'NELL) 出来接待，我真欢喜知影in每年暑假期间有一个「国际视障工作交换计画」，是tùi 1988年就开始，但台湾iáu无人参加过。我当场涌起参加ê意愿，亚瑟讲必须kap执行长蕾翠・罗森邦 ( RACHEL ROSENBAUM ) 谈。
按约定时间koh再去拜访该中心ê蕾翠执行长，伊讲必须是视障社工ê专业人员，chiah有资格参加为期八周ê教学交换计画。佳哉一九九一年度只有四位参加，我chiah被接纳，但只观摩而m̄免教学，附带条件是beh交十五页ê心得报告 ( PAPER ) ，chiah thang取得结业证书。
1988年tī双连教会开始从事关怀视障工作，我只有三年ê短浅经验，tio̍h用英文写十五页ê报告，真正是费了九牛二虎之力chiah完成，加上蕾翠执行长无嫌费气为我改正英文，终其尾取得结业证书。
我感觉既然有英文ê报告，mā thang用中文写出来kap国人分享，tùi án-ne写成「hō͘咱同齐来关怀盲人事工――美国盲人事工考察报告」，承蒙台湾盲人ê父陈五福博士代投稿「师大特教季刊」，双连教会ê蔡芳文长老mā代投「台湾教会公报」，结果lóng被刊登出来。这hō͘我真大ê鼓励，hō͘真少投稿ê我感觉「文章见报时」，mā是人生一大乐事。
因此，tī读者好友ê鼓励下，我陆续写关怀视障方面ê文章，来方便kap读者分享工作经验kap心得，并thang宣导关怀视障ê工作意义。主要iáu是视障朋友ê优良表现，激励我乐此不疲地写，jú写jú起劲，tī「噶玛兰ê烛光――陈五福医师传」ê作者曹永洋老师指导下，将chiah-ê文章收集编辑成册，册名叫「趁tio̍h白日」。
Tī顶面所讲ê考察报告中，我已简介过「国际交换计画」中考察ê视障机构，chit-ê为期一周ê实地考察hō͘我受益匪浅，一九九二年koh再次参加，koh-khah感觉那真适合国内视障工作人员参加。Tùi án-ne tī一九九三年邀请淡江大学盲生资源室辅导洪锡铭教官、慕光盲人重建中心卢明松秘书kap双连教会关怀盲朋友联谊会ê陈文钦牧师参加。一九九四年邀请视障协会张育豪理事长、爱盲文教基金会蔡再相副执行长kap慕光盲人重建中心ê刘册惟主任参加。今年原有三人计画参加，出发前二人因故bōe-sái成行，所以只有慕光ê张俪钟老师参加。每pái我lóng做义工开车带队，次次lóng有新ê收成。
考察ê对象lóng是波士顿kap大纽约地区ê有名机构，设备完善hō͘人羡慕bōe停。但机构ê负责人lóng提醒阮， mài误会所有ê美国视障者lóng享有chiah-ni̍h好ê福利，其它khah庄脚地区ê视障者，mā是tī khah差ê福利环境中过tio̍h乌暗ê日子。
谨就chit-pái参观ê视障机构做khah详细ê绍介，以供国内视障工作者参考。

一］加州盲人重建辅导中心
ORIENTATION CENTER FOR THE BLIND
400 ADAMS STREET
ALBANY, CALIFORNIA 94706, U.S.A.

林雪卿老师tī一九六一年政大新闻系毕业后，因视网膜剥落而失明，移居美国ê a舅建议伊到美国接受重建，结果m̄-nā ē-tàng使用导盲犬独立生活，iáu得tio̍h重建师执照，目前tī加州盲人重建辅导中心教生活技能。
林老师获知佳乐盲人重建中心ê国际交换计画而想参加，伊khà电话到佳乐中心时，我tú好mā tī该中心ê研究图书馆，所以有机会透过电话kap伊认识。伊kā我讲想tńg来台湾服务，二年前bat tńg来台湾试探了解，参观过新庄盲人重建院，对台湾ê盲人重建现况真失望，但koh chhōe bē-tio̍h回台服务ê tio̍h力点。我建议伊参加佳乐中心ê考察团，thang kap台湾来ê视障工作者认识，进一步了解台湾ê现况，希望伊真正ē-tàng回台，将伊所学ê贡献hō͘国内视障朋友。
因此，今年tùi台湾去考察ê第一khiā，安排到旧金山参观伊服务ê加州盲人重建辅导中心，然后koh再kap伊同齐到波士顿。不巧ê是，我kap张老师来到伊家时，伊因重感冒发高烧而bōe-sái成行，非常可惜。
加州盲人重建辅导中心隶属加利福尼亚州政府健康kap福利部ê重建局，十六岁以上ê视障者认为重建对伊ê生活有帮助者，拢ē-thàng申请接受重建，来方便ē-tàng像失明前仝款tī社区中独立生活。重建课程包括行动训练、点字kap phah字、日常生活技能、家庭管理、商业行为、体能训练、工业技能 kap个人kap就业协谈等。

二］佳乐盲人重建中心
THE CARROLL CENTER FOR THE BLIND
770 CENTRE STREET
NEWTON, MA 02158, U.S.A.

一九九四年，佳乐中心庆祝成立四十周年。该中心由汤姆士・佳乐神父（REVEREND THOMAS J. CARROLL）tī麻萨诸塞州ê小镇牛顿城创立，当时取名「圣保罗盲人重建中心」（ST.PAUL'S REHABILITATION FOR THE BLIND），是美国第一间收容后日失明ê tòa宿重建机构。佳乐神父tī一九七一年突然病逝，该中心为纪念伊ê贡献，tùi án-ne改名为佳乐盲人重建中心。
佳乐神父是当时视障工作界ê卓越开创者，伊bat服务tī退伍军人辅导局，担任军中牧师，对因二次大战失明而极想回乡工作ê退伍军人做重建服务，针对因失明而造成ê心理伤害，kap日常独立生活ê恢复，进行有意义ê重建计画。
蕾翠执行长讲，今á日ê成果应归功tī佳乐神父当初ê理念，犹原存在tī目前ê tòa宿重建计画中，包括长时间ê使用盲杖行动训练，帮助盲人恢复独立行动ê能力，提供日常生活ê适应方法，tùi基本ê灶脚家事到自我照顾lóng有。Iáu有一项创新ê感应训练，就是教视障者如何使用其残余ê视力，并hō͘ in定向行动训练，hō͘ in tī社区中提升生活ê品质。
佳乐神父创办无数新ê课程，到taⁿ iáu继续存在，如西洋剑kap木工。Chiah-ê m̄-nā教视障者特别ê技术，koh-khah重要ê是hō͘ in全盘ê信心。西洋剑thang训练视障者tī看bē-tio̍h ê空间移动，iáu thang锻练手腕来方便灵活使用盲杖。木工厂内使用电动工具ê声音，thang训练耳孔来方便过街时敏锐地辨认车声。
目前课程ê重点是tòa宿ê密集训练，原先为期十二周，后来改成十六周。一九六七年来该中心当行动训练师，现在担任训练部主任ê理查・康诺斯（RICHARD CONNORS）讲，佳乐神父ê主要远见之一是集体训练ê重要性，后日失明ê学员之间thang互相观摩学习，in tī课程设计上，一直引用chit-ê理念。
一九六一年出版由佳乐神父着作ê「失明：意义、状况kap如何适应」，该中心lóng根据其独有特殊ê见解，其中之一是调整协谈，包括集体kap个人ê心理治疗，对一个视障者kui-ê ê重建，扮演相当重要ê角色。
佳乐神父主事时代了后，tòa宿训练ê基本形态虽然无变，但方式有kóa变动。学员m̄免同时入学而编成一班，新学员随时加入，thang向有经验ê学员学习。新科技mā带来真chē课程ê变动，譬如沟通ê技能 m̄-nā是靠摸点字，语音电脑已大行其道。
光学弱视辅助器材ê发展，对iáu有kóa视力ê视障者帮助真大。弱视服务部主任罗勃・麦吉利佛瑞讲，当伊tú来佳乐中心时，所有ê学员lóng戴上眼罩接受各项训练，hō͘ in对新ê非视觉技能渐渐产生信心，但是现在咱ē-tàng帮助in尽量使用其残余ê视力。
尽管一九五四年到现在，技术方法lóng tī更新改变中，「圣保罗盲人重建中心」iáu kap「佳乐中心」仝款存在人间。Tú亲像康诺斯先生所讲ê：「我确信佳乐神父iáu认得伊ê课程设计，理由真简单，因hiah-ê犹原继续teh做，而且做得真好。」
视障者chhōe职业lóng会面临真chē障碍，tùi突破明眼人对视障者工作能力ê偏见kap歧视，到为in chhōe-tio̍h siōng适合ê职业生涯，lóng是困难重重。最近由个人管理指导员艾丽・马丁（ELLIE MARTIN）kap行动训练师保罗・哈斯丁（PAUL HASTINGS），联合创办ê「职业市场准备计画」，开始向chit-ê难题挑战。Chit-ê计画事先评估学员ê人生价值观、兴趣、技能 kap心态，因循诱导in行向生涯目标，切合实际koh ē-tàng满足个人ê愿望。马丁小姐讲：「阮ê计画是beh帮助视障者利用in ê潜能，建立信心来达到求职ê目的。」现代科技ê语音电脑，tī chit方面扮演非常重要ê角色。
一九九四年暑期，佳乐中心开办「青年转型计画」，phah破以往只收新英格兰地区视障生ê传统，兼收由密苏里州盲人服务局转介来ê学员。Koh kap公立学校ê视障生谘询协会合作，致使社区服务部ê业务时数比前四年增加57%，单比前一年就增加35%；人数上则比前四年增加80%而达777人。

三］全国点字出版社
NATIONAL BRAILLE PRESS INC.
88 SAIⁿT STEPHEN STREET
BOSTON, MA 02115, U.S.A.

一九二九年，一阵活跃ê视障工作志工，tī波士顿筹组成立chit-ê非营利机构，以点字出版为主要业务，hō͘全美国ê视障朋友活出kap明眼人仝款ê全方位生活型态。
咱ê世界是以印刷字为主要导向，无法度读印刷字ê人便成做主要残障。因此，视障者teh chhōe职业、参与社区活动kap tī社区中扮演角色，lóng是困难重重。全国点字出版社以廉价提供视障者各种资讯，hō͘ in有koh-khah好ê装备来应付生活ê挑战。
Chit-ê出版社设tī波士顿ê市中心，雇用三十七位员工，一半以上是视障者。使用高科技ê电脑编辑、转译、铝版制作、点字印刷、校对、装订、出货。一九九四年总共出版将近五万本ê点字读物，今年ê重点将集中tī视障者无容易接近ê「微软视窗」电脑操作系统，这是具有相当挑战性ê工作。

四］波金斯盲人学校
PERKINS SCHOOL FOR THE BLIND
175 NORTH BEACON STREET
WATERTOWN, MA 02172, U.S.A.

波金斯是世界上siōng有名ê盲童kap盲聋哑孩童ê学校，一八二九年由波士顿ê外科医生――萨母尔・格利得力・哈威博士所创立，一位波士顿ê富商汤姆・汉达西・波金斯将in-tau ê厝捐hō͘ chit-ê盲校，因á以伊ê名字当校名。哈威先生行遍全州，深入穷乡僻壤去chhōe盲童，结果带tńg来六个gín-á， 成做伊ê第一班学生。
Chit-ê学校siōng引认为傲ê是海伦・凯勒，其次是六十年后ê罗勃・史密斯达司（现任「海伦凯乐全国中心〈HELEN KELLER NATIONAL CENTER〉」ê助理执行长）。一百六十多年来，波金斯ê教职员为视障者、视听障者kap盲多重障碍者ê学生kap学员，提供高品质ê教育kap服务。
波金斯ê课程kap服务一再成长，重点tùi校园延伸到全美国kap全世界ê各种无仝ê角落。课程包括提供零到二十二岁之学生ê教育kap训练机会，iáu有成人ê重建服务计画有tòa宿ê、日间ê kap社区ê，lóng是尽力hō͘学生kap学员发展其siōng大ê潜能，并达到siōng高ê独立生活。
A) 校园内ê计画：
A) 学龄前计画：为三到六岁ê孩童做评估、个别指导kap支援服务。
B) 小学孩童计画：为七到十二岁ê学童做一个别指导kap支援服务。
C) 中学孩童计画：为十三到二十二岁ê学生做学术、职前、职业、独立生活kap社交技能训练。
D) 生活技能计画：为十二到二十二岁ê盲多障kap视听障学生做生活技能训练。
E) 视听障孩童计画：为五到二十二岁ê视听障学生做学术kap功能性生活技能训练，hō͘其ē-tàng kap别人沟通。
F) 成人服务：为十八岁以上ê盲多障、视听障kap智障成人，提供有效ê重建计画。
B) 校外ê社区计画：
A) 社区生活服务：为社区ê成人视听障者提供家庭管理服务。
B) 婴孩/学步孩童计画：到零到三岁婴孩/学步孩童ê厝里做评估kap训练，并提供社区参与计画ê谘询，有日间kap晚间ê父母团体班。
C) 学前孩童ê延伸服务计画：对麻州内ê视障孩童kap其家人，提供谘询kap直接ê服务。
E) 延伸服务计画：为新英格兰地区ê高中、初中和小学视障生，提供周末kap暑期活动，并为in ê父母kap老师提供支援服务。Tī麻州西部kap雪鱼角ê地区性办公室，mā为零到二十二岁ê孩童提供视力筛检巡回服务。
F) 弱视延伸服务：tī新英格兰地区为各年层ê个人，提供视力评估kap使用视力ê训练。
G) 老人ê延伸服务：对法定盲ê老年人，提供重建教育、评估kap训练。
H) 延伸服务ê专业人员培训：tī全新英格兰地区，对老师kap专业人员tī职训练。
C) 其他服务：
A) 诊断性ê评估服务：对来自麻州kap其他州ê盲多障者，提供诊断、测试kap评估。
B) 新英格兰地区视听障服务中心：对视听障者kap其家人，提供转介hō͘专业机构kap直接服务。
C) 父母kap家人ê服务：对视听障者kap其家人，提供谘询、协谈、会议kap专业训练。
D) 哈威工厂：制造贩卖波金斯点字机kap其他视障用品。
E) 波金斯点字kap有声图书馆：kap华盛顿国会图书馆合作，制作kap出借点字kap有声图书。
F) 志工服务：tī波金斯校内参与各种活动kap计画。
G) 波金斯活动俱乐部：秋季kap春季为校友kap视障成人，举办电脑研习、制作工艺品、手语训练、体能健身kap其它活动。
I) 研究图书馆：藏书kap出版刊物多达 29,000 册，号称世界siōng大ê视障kap视听障研究图书馆，任何有兴趣ê人lóng thang利用。
D) 希尔顿/波金斯国内kap国际计画：五年前由「康拉・希尔顿基金会」（CONRAD N. HILTON FOUNDATION）捐赠开办。最近，希尔顿基金会为未来ê第二个五年提出新ê挑战，只要波金斯学校ē-tàng募得五百万美金，该基金会tio̍h相对捐赠一千万美金。
A) 国内计画：对国内盲多障婴儿kap其家人、盲多障kap视听障孩童kap其家人kap老师，提供直接服务、谘询、支援kap训练材料。
B) 国际计画：对五十个以上ê国家，提供技术协助、训练kap材料ê发展。Chit-ê计画是设计来改进盲多障孩童kap其家人ê福利政策。

五］视觉基金会
VISION FOUNDATION, INC.
818 MT. AUBURN STREET
WATERTOWN, MA 02172, U.S.A.

一九七○年成立以来，tòe tio̍h年龄ê老化而视力减退变成弱视ê人jú来jú chē，chit-ê机构tùi án-ne快速成长，尤其是「支助团体」（SUPPORT GROUP）ê组织，chiah-ê人因未达法定盲而得bē-tio̍h政府机关ê照顾，in透过电话连络网或tī联谊活动中，彼此分享弱视方面ê资讯，并tī情感上互相支持。In mā tùi这机构得tio̍h真大ê帮助，chia ê电脑资讯中心ē-tàng提供全美国有关弱视方面ê消息。
目前ê「支助团体」，会员总共有492人，按地区kap视障等级分做30组，由组长连络安排定期聚会，有会员ê视觉经验分享kap专题演讲。Chit项活动hō͘ in不因视觉无方便而自闭厝内，互相支援ê友情hō͘ in ê生命火花不熄灭，活出koh-khah有意义ê人生。
Teh-beh成做弱视ê老年人，thang申请专业ê生活重建师到厝内，做「生活技能训练计画」，教弱视者如何在厝内安全起居，如何使用弱视ê灶脚技术kap各种生活辅助器材。Chit项计画hō͘ teh-beh失明ê人，对未来ê生活有安全感， bē因惊惶而陷入低潮，甚至失去人生ê意义。
Chit-ê基金会关怀视障ê各种计画lóng真特殊而实际，已受全美国视障界ê注视，mā深受麻州高龄服务部kap麻州视障委员会ê认同，chit-ê基金会是视障kap高龄ê联合服务机构。
目前tī波士顿学院修特殊教育博士学位ê余月霞老师，tī-chia机构从事辅导工作多年，旧年起被聘为该基金会ê董事。伊安排阮参观该基金会了后讲，台湾人口年龄老化mā jú来jú严重，应该赶快成立类似ê基金会，希望政府kap社会有心人士共同努力。

六］「眼线」导盲犬中心
THE SEEING EYE, INC.
P.O.BOX 375
MORRISTOWN, N.J. 07963, U.S.A.

Chit-ê世界第一间ê导盲犬训练中心，tùi一九二九年创立以来，一直lóng强调视障者ê独立、尊严kap自信。第一对「看眼」伙伴ê莫利斯・富兰克先生kap巴帝导盲犬是tī瑞士受训，了后有将近一万一千个视障者享受kap富兰克先生仝款ê独立生活，服务ê对象遍及美国kap加拿大。
成立之初只有二个视障者、二只狗kap一位训练师，目前有十八位训练师，每年供应三百只导盲犬。因为需求稳定增加，扩充计画一直teh进行，现在有四百五十只幼狗tī纽泽西州、宾夕凡尼亚州kap德拉威州ê志工厝内饲养。十四个月大ê小狗就beh送tńg去中心，接受为期三到五个月ê密集训练，由训练师带到莫利斯城ê大街小巷实地训练。
十六岁以上kap五十五到六十岁以下ê全盲而身心健康者，均thang申请导盲犬，筛选时则看其生活kap工作上ê环境kap需要性。核准ê盲人必须到中心接受为期四周ê教育kap训练，并适应将成做伊生活伴侣ê导盲犬。结训后，训练师陪同该盲人到伊ê厝，辅导伊tī日常生活kap工作上使用导盲犬。
导盲犬必须性情温和、机智灵敏、体格健壮kap有责任感，目前大多选用德国牧羊犬kap拉布拉多狗。Tī供无应该求ê现况下，除了加速繁殖之外，mā积极研究发展其它种狗。
一只导盲犬ê直接成本约为二万三千美金，为尊重使用者ê所有权，盲人需付一百五十美金来购买，并要求同意善待导盲犬。大约thang使用八到十年ê期间，中心lóng 不断观察其使用状况，若有无爽快应ê情况，则另换一只导盲犬hō͘伊，直到完全适应为止。如使用者有虐待导盲犬ê现象，该中心不予索回，而按动物保护法处理。
导盲犬达退休年龄就当宠物处理，该盲人thang向该中心申请另外一只新狗，手续上比第一只beh来得简单多了，但仝款tio̍h付一百五十美金。

七］菲德thang导盲犬基金会
FIDELCO GUIDE DOG FOUNDATION
P.O. BOX 142
BLOOMFIELD, CT 06002, U.S.A.

Chit-ê基金会tī一九六○年由查理士・卡门创立，卡门是菲德thang直升机制造公司ê董事长，tùi德国移民来美国，一直喜好饲养德国牧羊犬，并供应美国各导盲犬训练中心所需要ê狗。因为导盲犬ê需求不断增加，tī新英格兰地区（美国东北部ê六州）koh无导盲犬供应中心，欢喜接受新挑战ê卡门tùi án-ne筹组chit-ê导盲犬基金会，以「分享视觉」当做格言来服务视障朋友。
Chit-ê基金会首创「到家训练」ê方法，thang hō͘视障者无影响伊ê日常厝内生活kap工作，也thang hō͘周遭所有相关ê人，ē-tàng同时熟练导盲犬ê使用。一九九四年有四十三位盲人，有基金会提供ê导盲犬，二○○○年ê目标是每年供应一百只导盲犬。
每只直接成本约一万八千元ê导盲犬，视障者仝款tio̍h付一百五十元来购买。其它各项训练kap服务ê条件，lóng kap「看眼」导盲犬中心大同小异。

八］美国盲人基金会
AMERICAN FOUNDATION FOR THE BLIND
11 PENⁿ PLAZA, SUITE #300
NEW YORK, NY 10001, U.S.A.

一九二一年成立以来，tī海伦凯勒ê努力之下，公认是全美国siōng具领导地位ê视障服务机构，mā对一般大众服务。其主要任务是，tùi视障ê非医疗方面，hō͘视障者ē-tàng有公平ê机会来追求选择人生ê自由。
A) 资讯ê发展、收集kap传播
a) 每年回答十万人次视障者kap其家属、视障界专业人员kap一般大众，有关该基金会ê计画、服务kap其它视障相关ê谘询。
b) 透过出版部，出版有关视障ê专业书籍、简介、录影带kap期刊，其中ê「视障新闻」（JOURNAL OF VISUAL IMPAIRMENT & BLINDNESS）是业界siōng具领导地位ê刊物。
c) 储藏kap维修海伦凯勒文献资料室，宝藏服务美国盲人基金会四十年ê海伦凯勒所捐赠ê无价个人珍品。
d) 维持 M.C. MIGEL 记念图书馆，这是世界上siōng大ê视障相关印刷出版品ê收藏中心。
B) 视障相关提案的确认、分析kap解决
a) 确认视障者相关ê提案、确立优先顺序、分析政策ê选择、kap视障界ê专家kap相关人士共同推动适当而可行ê解决方案。
b) tī计画方案上提供专家ê知识，诸如教育、就业、年龄老化、科技，并转介视障机构、学校、组织kap专业人员。
c) 执行、评估并出版对视障者生活品质有正面影响ê政策研究。
d) 提倡并评估辅助器材ê发展kap可行性。
e) 维持「生涯kap科技资料库」（CAREERS & TECHNOLOGY INFORMATION BAⁿK），这是全美国kap加拿大视障者tī厝内、工作场所kap学校使用辅助科技ê网路，in ē-tàng而且愿意kap别人彼此分享心得。
C) 对大众kap决策者教育有关视障者ê需要kap能力
a) 谘商立法提案，并tī国会和政府机关代表视障者。
b) 透过出版物、视听媒体、展示kap大众服务宣导，增进公司机关kap社会大众对视障者能力ê了解。
D) 生产kap分发有声书籍kap其它有声资料
a) kap国会图书馆合约，录制并复制有声书籍。
b) 为各大公司kap财团法人机构，将其年度报告kap其它出版品，录制并复制成有声卡带，hō͘其无法度读印刷字ê雇员、客户kap股票持有人ē-tàng知其内容。
美国盲人基金会总部设tī纽约市，tī下列城市设分部：华盛顿（政府公关部）、亚特兰大、芝加哥、达拉斯、旧金山。

九］海伦凯勒国际服务中心
HELEN KELLER INTERNATIONAL
90 WASHINGTON STREET
NEW YORK, NY 10006, U.S.A.

Tī盲人改革家海伦凯勒kap一kóa有心ê美国人ê协助下，海伦凯勒国际服务中心tī一九一五年成立。这是siōng早mā是美国主要ê财团法人，tī国外kap失明战斗，进行防盲爱眼ê各项努力。八十年来，已经有八十个以上ê国家受tio̍h各项计画ê支援kap协助。
总部设tī纽约市，tī十三个国家设有分支机构，并定时tī二十五个以上ê开发中国家，执行护目爱盲计画。其对消除不必要失明ê努力，hō͘非洲、亚洲和美洲数百万人ê生活受益无穷。其主要ê业务如下：
A］kap世界上失明ê主要病因奋战，如白内障、青光眼、营养不良失明（每年有五十万孩童受害）、砂眼（数百万成人kap孩童受害）。
B］帮助sàn-chhiah人得tio̍h护目爱盲ê服务，mā协助开发中国家提供盲人ê重建服务。
C］进行「仁慈赠礼计画」，协助白内障者开刀，提供其它眼科器材hō͘本计画kap其它ê国外恢复视力计画。
D］敦促政府改进政策kap当地ê服务ē-tàng量，防止thang避免ê失明发生，并tī sàn-chhiah ê社区推动盲人就业kap教育等各项计画。
显着ê成果有：
1) 斯利兰卡：kap世界卫生组织（WORLD HEALTH ORGANIZATION, WHO） kap斯利兰卡ê卫生部合作，推动「全国防止视障计画」，结果hō͘一半左右ê人口（约八百五十万人）得tio̍h护目保健，斯利兰卡ê卫生部将成做未来基本护目计画ê领导者。
2) 菲律宾：海伦凯勒国际服务中心tī一九九四年ê「全国第一微量营养素日」，扮演技术设计、计画kap实施ê重要角色。因为长期参与维他命A ê补充kap主张提高婴儿孩童ê营养，该机构得tio̍h真chē技术上ê专业知识，ē-sái讲是国际上私人机构ê中间ê骄骄者。
3) 柬埔寨：海伦凯勒国际服务中心调查结果证实，少年孩童普遍缺乏维他命A，随时进行努力创造维他命A，推动家庭种植富维他命A之菜。
4) 巴西：海伦凯勒国际服务中心建立「白内障处理区」，举办视力检查、筛选白内障并开刀、iáu提供目镜hō͘低视力者。1988年到1994年之间，tī巴西设立五十四个「白内障处理区」，hō͘ 7,827人恢复视力，现在chit项服务mā推展到学童。
5) 印尼：一九九四年，海伦凯勒国际服务中心颁发「海伦凯勒精神奖」hō͘印尼总统，表扬该国对少年孩童因维他命A缺乏而失明ê奋战成果。
6) 尼日：1994年到1995年之间，海伦凯勒国际服务中心协助尼日政府，改进维他命丸ê分发，tùi零到九成ê孩童来领取。经过努力宣广了后，富维他命A之菜ê消费量就大增。

十］灯塔视障服务中心
THE LIGHTHOUSE INC.
111 EAST 59TH STREET
NEW YORK, NY 10022, U.S.A.

「灯塔」是全美siōng大ê视障服务中心，一九○六年成立以来，一直努力hō͘视障者完全主动参与工作、休闲kap社交活动。
本世纪中，「灯塔」扩充对大纽约地区kap其周围视障者ê直接服务，教导独立生活ê技能，弱视门诊、职业训练、就业辅导kap学前教育，主要ê目标是将学员ê独立能力siōng大功能化。服务ê对象不分老幼，mā不限定法定盲，只要视觉严重障碍而影响日常生活就thang来接受服务。Tī大纽约区内有真chē「灯塔」ê服务机构，mā有到学员ê工作地点、社区kap家庭去服务ê。
事先只要用电话申请服务，「灯塔」确定ē-tàng有所帮助时，就会要求客户提供眼科医生ê诊断报告，以方便「灯塔」ê职员评估其个别需要、确立服务项目kap付费来源。无保险kap经济能力khah差者，lóng bē被拒tī门外，有kóa服务是免费ê。
独立生活技能 ê课程有定向行动训练、个人kap家庭管理、教导读写点字、孩童kap青少年教育支助服务等。生涯服务项目有科技电脑等辅助器材ê训练、公司职员训练、就业选择ê协助、维持职业ê协助、高中程度ê补习学校、语言学校kap读册技能等。协谈及心理测验有一个人kap其家人对失明ê调适、生涯协谈、支助团体ê服务、心理测验kap评估等。支助服务有志工报读、点字转译（每页一角美金）、图书馆（有声、大体字kap点字）等。
「灯塔」设有学前视障孩童教育模式ê「孩童发展中心」，有kóa是盲多重障碍，家长mā同时接受教导。另有音乐学校教声乐、钢琴、小提琴kap其它乐器，使用大字体kap点字谱。
弱视诊疗服务有弱视门诊服务kap辅助器ê使用指导、白内障教育（八周课程包括应付白内障kap其相关ê丧失视力）、健康教育、听力测试kap辅助器ê评估。
其它iáu有娱乐服务，如艺术、工艺品、创意写作、舞蹈、空手道、体能运动。弱视辅助产品ê供销是「灯塔」ê服务项目之一，有门市kap邮购，十分方便。
应社会年龄老化ê需要，「灯塔」成立「视觉kap年龄老化中心」，提供资讯kap照顾ê各种资源。出版「年龄老化kap视觉消息」kap其它相关资料，并配合研究而举办专题演讲、研讨会kap示范。
「灯塔」首创训练眼科医生、验光师、眼科护士、技师，以提供对弱视者ê关照，由专家主导ê「继续教育」课程kap谘询，帮助各弱视服务机构ê门诊kap管理部门，tī美国kap国外建立或扩大其现有ê弱视服务。这ài归功tī美国医疗协会、美国验光协会和美国目镜公会ê共襄盛举。
研究部门是「灯塔」ê工作重点，透过研究ê结果来设计各项服务，并提供资讯hō͘全国kap国际各视觉重建机构。目前ê研究分三大部门：社会心理研究、视觉实验研究kap教育研究。
每年有一千二百个来自各阶层ê志工来协助「灯塔」ê各项服务计画，年龄siōng小ê只有十四岁，siōng大ê是九十岁，服务期间有长达四十五年ê。
「灯塔」发行各相关研究报告ê出版品kap录影带，供客户kap专业人员参考，对关怀视障ê宣导助益良多。

十一］犹太人盲人慈善机构
JEWISH GUILD FOR THE BLIND
15 WEST 65TH STREET
NEW YORK, NY 10023, U.S.A.

一九一四年由犹太人集团创立，但服务ê对象不分种族、宗教kap国别，tùi出生零岁到老年ê视障者kap盲多障者lóng thang接受服务。此机构协助kap训练视障者，加强in ê体能、情感kap智力ê各种功能。针对社会变迁ê需要，此机构为达到其宗旨，不时有弹性而创新ê服务内容。
增设「诊断kap处理中心」了后，视障者若有中风或精神创伤方面ê医疗问题，就thang得tio̍h服务。一九九四年成立ê「爱滋病关怀中心」是其它疗养机构所未有ê，对带有爱滋病之视障者ê疗养kap重建关怀，付出相当ê爱心；「爱滋病例管理计画」koh-khah提供六十五个病患kap其家人ê tòa宿。「早期关怀计画」对视障婴儿ê关怀，其父母mā同齐接受辅导，hō͘其心理做必要ê调适。
此机构之着名ê「慈善关怀」（GUILD-CARE），是对纽约州郊区日渐增加ê成年视障者ê服务。具有特性ê「心理门诊」，扩充服务到视障者ê朋友kap家人。「接触广播网」（Iⁿ TOUCH NETWORKS）hō͘美国kap加拿大境内五百万视障者tòa处，ē-tàng收听tio̍h报章杂志ê报读；其「有声图书馆」提供全球各地ê病院、图书馆kap视障订阅者ê有声图书服务。
推动「全国注意视觉」活动了后，此机构编印十二页ê「明眼人kap视障者相处需知」，邮寄赠阅hō͘美加ê数千万ê个人kap学校、眼科诊所、老人中心、病院kap重建机构。
「年老失明之家」是专收老年视障者ê养老院，座落tī纽约市北郊ê勇克斯（YONKERS），占地十一英亩，共有一七三个床位，使用率一直是百分之百。
一九九四年共有三七五位志工参加此机构ê各项工作，当助教、制作录音带、帮助喂食、郊游服务、帮视障者写phe kap付帐单等。大约有一百个志工每周花一到二小时，当「接触广播网」ê播音员，报读报章杂志，其中真chē是有名ê影歌星。

十二］海伦凯勒盲聋青少年kap成人重建中心
HELEN KELLER NATIONAL CENTER
FOR DEAF-BLIND YOUTHS AND ADULTS
111 MIDDLE NECK ROAD
SANDS POIⁿT, N.Y.11050, U.S.A.

海伦凯勒大学毕业五十年了后，罗勃・史密斯达司（ROBERT SMITHDAS）是世界上第二位盲聋人大学毕业生，mā是第一位得tio̍h硕士学位ê盲聋人。伊tī一九六七年ê职业重建修改法案中扮演重要ê角色，chit-ê法案授权成立「海伦凯勒青少年kap成人盲聋中心」。目前史密斯达司博士担任该中心ê助理执行长，以伊家己ê成就证明盲聋人应hō͘ in平等ê教育机会，照样会有辉煌ê成就。
此中心是tī「海伦凯勒盲人服务」（HELEN KELLER SERVICES FOR THE BLIND）ê管理之下营运，座落tī长岛ê头端，占地二十五英亩。训练、研究kap管理部ê建筑物lóng是为盲聋人设计ê，舒适方便koh安全。Tī全美国设有十个分支机构kap一kóa签合约ê机构，所有ê盲聋人lóng ē-tàng接受应有ê谘询kap转介服务。
学员来到中心了后，由个案经理安排一对一ê辅导，帮助伊了解评估ê过程，并安排适当ê训练课程。辅导员注重学员个人ê社交、情感kap生理ê需要，掠准家人沟通，并保证tùi家庭转到中心之旅途ê平安kap舒适。个案经理也tio̍h负责向资助该学员ê州政府相关单位报告该学员ê学习进度kap将来ê安排。
个人调整训练课程包括各种沟通技能、定向行动训练、基本教育、日常生活技能、家居管理、工业艺术、讲话、听力kap低视力训练、休闲活动、创造艺术kap独有特殊ê园艺。Iáu有工作训练，hō͘学员tńg来到伊ê社区ē-tàng chhōe-tio̍h工作。另有心理辅导kap医疗部门，lóng是一对一ê指导，按学员ê进步情况调整进度，直到ē-tàng就业或是达到依伊个人兴趣kap能力而订定ê将来生涯目标为止。
此中心ê目标lóng是一成无变ê：帮助盲聋人发展koh-khah高ê人格尊严，透过提升自信心kap siōng高程度ê独立可能性，坚定其信心来面对将来ê前途。
职业ê安排thang帮助盲聋人建立人格尊严ê发展，并thang实现其全部ê潜能，所以具有重大ê意义。此中心训练出来ê学员，真chē ē-tàng到庇护工厂工作，mā lóng不难谋得非技术性竞争ê职业，koh-khah有一kóa能力强而进取ê学员，tī技术kap专业ê职种上成功地胜任。
职业确定后，中心就派员到该学员ê家乡kap工作场所，进行定向kap行动训练，并观察其就业进度状况。此后mā继续其终生ê关怀，对学员本身、家人、雇主kap相关ê机构，提供必要ê支援、训练、谘询kap直接ê协助，hō͘盲聋人tī社会上犹原是活跃ê一份子。
一九九四年十一月十七日，「匹兹堡盲聋人狮子会」正式成立，盲聋人理查・麦根（RICHARD McGANN）被选为第一任会长。In beh证明盲聋人也ē-tàng回馈社会，以狮子会ê精神来帮助koh-khah chē ê盲聋人，hō͘ in变成社会ê生产者，而不再是社会ê负担。

十三］视觉设计公司
DESIGNS FOR VISION, INC.
760 KOEHLER AVENUE
RONKONKOMA, NY 11779, U.S.A.

视力ê提升mā就是减少视障者，chit间两代相传专营研究开发并制造低视力辅助器ê公司，唯一ê目标是hō͘弱视者ē-tàng利用其剩余ê有限视力来增进其生活kap就业能力。美国kap加拿大ê弱视者已普遍受惠，目前chit间公司tú-teh向外国推展业务。根据公司负责人ê计画，tī各国或地区需要有眼科医生代理检验kap开立处方订单，该公司收tio̍h订单后按其处方配制目镜，客户收tio̍h目镜若bē合适，该公司会负责调制到客户满意为止。
低视力辅助器ê规格有：
（1）全直径望远镜（FULL DIAMETER TELESCOPE）：这是加利略式ê小望远镜（GALILEAN TELESCOPE），装tī普通目镜片ê中央，是静止状态望远用ê，譬如看电视、电影、球赛kap学生看乌板，标准ê倍数有1.3X, 1.7X, 2.2X, 3.0X, 4.0X，广角ê倍数有2.2X, 3.0X。看册ê时chūn，tī镜头顶加个读册镜盖（READING CAP）to̍h ē-thang。
（2）双视望远镜（BIOPTIC TELESCOPE）：这mā是加利略式ê小望远镜，装tī普通目镜片ê上仰角，需要看远ê时chūn，只要小khóa àⁿ头而将目睭上仰透过小望远镜注视远处目标，平常thang移动身躯做一般ê tāi-chì。标准ê型-I大一点，倍数有2.2X, 3.0X kap 4.0X；型-Ṳ小一点，但倍数只有2,2X；广角ê倍数只有2.2X kap 3.0X。看册时仝款thang加读册镜盖。
（3）螺旋型扩大视野棱镜望远镜（SPIRAL EXPANDED FIELD PRISM TELESCOPE），mā称作地球形望远镜（TERRESTRIAL TELESCOPE）：chit种视野比「全直径」kap「双视」koh-khah大koh thang调焦距ê新产品，thang tī无限远kap 10寸之范围内调焦，使用上有koh-khah大弹性ê方便。倍数有2.0X, 3.0X, 4.0X, 5.0X, 6.0X, 7.0X, 8.0X kap 10.0X，距离比 10寸iáu近时，就必须加读册镜盖。Chit种小望远镜装tī普通目镜片ê位，kap「全直径」kap「双视」仝款，ài看使用者ê需要而定。
（4）螺旋型加利略式小望远镜（SPIRAL GALILEAN TELESCOPE）：这只是将「全直径」kap「双视」小望远镜改成thang调焦ê螺旋形，调焦范围是 12寸到无限远。「全直径」ê倍数有 1.7X, 2.2X, 3.0X, 4.0X，「双视」ê倍数有 3.0X, 4.0X。
（5）微小螺旋形加利略式望远镜（MICRO SPIRAL GALILEAN TELESCOPE）：这是革命性ê创新产品，微小ê外形thang增加使用者ê美观，koh thang配合使用者ê原目镜度数，加上调焦thang hō͘使用者看kah koh-khah清楚。倍数有 2.2X, 2.7X, 3.3X, 4.0X, 5.0X, 6.0X。
Chit间公司ê售后服务期限是使用者终生，六个月内如倍数bē合thang免费更换，但需付45美金ê材料人工费；超过六个月就ài重新购买。
高科技ê发展，ē-sái讲是神hō͘瞎眼ê ē-tàng koh再看见，希望台湾也ē-tàng大力引进chit种低视力辅助器，减少视障人口kap社会ê负担。

十四］波士顿盲人辅导中心
BOSTON AID TO THE BLIND
1980 CENTRE STREET
BOSTON, MA 02132, U.S.A.

每一个人lóng会变老而失明，瞎眼人mā是会变老；运命注定瞎眼会带hō͘人绝望kap隔绝，但那mā是ē-tàng克服ê另外一种挑战，只要透过训练而变成独立。」这是chit-ê中心成立八十多年ê服务精神kap准则。
这是麻萨诸塞州唯一专门服务快速增加ê年老失明人，五十岁以上ê视障者，不分种族、性别、宗教、原国别kap经济能力，lóng thang来接受内容丰富ê计画，包括重建、保健、休闲kap社交活动。
成人日间保健计画是特别为年老视障者设计ê医疗保健，对teh-beh进养老院ê候补者kā伊训练，hō͘伊tī厝内ē-tàng独立生活。 社会日间照顾计画是透过情绪kap实际ê支持，加强学员自我照料ê能力，帮助in克服因老化kap丧失视力所造成ê隔绝。
有位盲人担任全职ê协谈社工，kap学员kap其家人谈论并评估个人、家庭kap环境ê各种问题，方式有一个别协谈、团体协谈及家庭协谈，lóng thang得tio̍h压力ê舒解。
举办缝纫、绘画、编织、针织、钩织、刺缝、陶艺、木工等课程，以维持视障者触觉kap手指ê灵活度。Iáu有美术、音乐、歌剧、歌唱、爵士乐、参观艺术博物馆、听音乐会，lóng thang增加学员ê智能 kap情感ê继续发展。Koh-khah有为某一kóa需要ê学员开办保龄球、高尔夫球、siû水等运动课程。

以上是实地考察报告，将继续收集全美国视障机构ê资料，koh做全部ê简介。
1995.9.12