《趁iau2日时》

 | | | 转寄

Hō͘咱同齐来关怀盲人事工―美国盲人事工考察报告

作者 林俊育 2008.05.11

前言
盲人是弱势中ê弱势，所以是siōng需要关怀kap鼓励ê一阵朋友。圣经约翰福音第九章中耶稣讲：视障ê m̄是伊或伊ê父母有罪，却是上帝ài tī伊身上显明伊ê作为。视障朋友虽然肉眼看bē-tio̍h，心灵ê目睭却是明亮ê，其它ê潜能koh-khah是丰富，只要咱伸出关怀kap鼓励ê手，in ê成就bē输hō͘明眼人，tī某一kóa事工上koh-khah赢一坎，海伦凯勒博士kap双连教会西罗亚合唱团便是真好ê例。

我深受慕光盲人重建中心创办人陈五福博士ê精神感召，tī 1988年邀同几位有志同工tī双连教会成立跨教会ê「台北市盲朋友联谊会」，我这chiah真正开始盲人关怀事工。一九九一年koh-khah有机会参加由「THE CARROLL CENTER FOR THE BLIND」举办ê国际盲人事工交换活动，有英国、瑞士、澳洲、以色列kap台湾去ê我共五位。阮除交换教学kap分享盲人事工经验外，iáu参观拜访波士顿、纽约kap纽泽西ê盲人机构，我愿kap国人分享心得。


美国ê盲人事工机构简介
美国ê盲人事工机构kap台湾仝款大多是财团法人组织，财务预算大部分来自个人遗嘱捐款kap企业捐赠，另外一半则由地方政府支付。Tī-chia绍介一kóa我所参观ê机构供国人参考，希望对有心从事盲人事工ê人有所助益。


1) The Carroll Center For The Blind
770 Centre Street
Newton, MA 02158, U.S.A.
Fax:(617)969-6204

一九三六年Carroll神父创立chit-ê盲人重建中心，二次大战中目睭受害变盲ê退伍军人tī-chia接受重建而受益无穷。目前ê事工如下：

(1)国际交换活动：美国人最近认为真chē先进国家ê盲人事工ê设计有值得学习ê所在，tùi án-ne tī 1988年开始举办为期八周ê国际教学交换，第一年参加ê有约旦、德国、比利时、瑞士kap西班牙；一九八九年参加ê有英国、瑞士kap丹麦；一九九○年参加ê有日本、芬兰(二人)kap以色列；一九九二年参加ê有孟加拉、中国、葡萄牙、以色列kap南非；一九九三年参加ê有日本、以色列、迦萨行廊、匈牙利kap肯亚。今年参加ê有阿根廷、新几内亚、坦萨尼亚、日本kap新加坡。活动结束后，参加者必须提出一份心得报告，由该中心汇集出版并提供国际各盲人机构参考。

(2)重建服务：为期十六周，包括定向kap行动训练、感应训练、人际交通、个人事务管理、工作能力诊断kap评估、弱视训练kap心理协谈。

(3)盲用电脑教育kap就业辅导课程：为期二周ê课程hō͘学员对电脑有基本ê了解，并教授如何使用电脑来帮助就业，教育kap个人事务管理。

(4)弱视者ê就业辅导：透过弱视重建专家评估其视力减弱对工作ê影响，并训练伊siōng有效力地使用伊所chhun ê视力。

(5)户外活动节目：tī夏令营或春令营中，透过义工ê协助举办登山、滑雪、溜冰、划船、协力车、帆船、健行kap西洋剑等活动。


2) Perkins School For The Blind
175 North Beacon Street
Watertown, MA 02172, U.S.A.
Fax:(617)926-2027
这是海伦凯勒ê母校，一八二九年成立，是大众lóng知世界上siōng有名ê盲校。因近代医学发达kap孩童ê优良营养保健，盲童jú来jú少。此校则倾向多重障碍ê孩童教育，透过高科技设计出来ê教学方法，称这学校为「世界之光」实无为过。

校内设有盲人事工研究图书馆，收集世界各国有关盲人事工ê书籍kap杂志，包罗万象，应有尽有，尤其是馆长 Ken Stuckey 无所m̄知而亲切ê服务态度，叫你m̄甘离开。

此校校园占地三十四英亩，校园内ê课程单元有学前孩童三~六岁，小学孩童七~十二岁，中学生十二~十七岁，严重多重障碍班十~二十二岁，盲聋语言及生活技能训练班五~二十二岁，成年ê盲人、盲聋kap智障者重建班十八岁以上。

另有校外ê社区服务项目，有四个以社区为据点ê养护中心，tùi出生到三岁ê家庭辅导kap协谈，为社区ê少年视障者举办各种周末活动，举办视障事工ê师资训练，学前视障孩童ê家庭辅导kap协谈等。

Chit间世界历史siōng悠久ê盲校特别关心到国外视障事工ê师资训练，设有HILTON/PERKINS INTERNATIONAL PROGRAM--GRADUATE RESEARCH GRANTS PROGRAM，亚太地区thang向其tī泰国ê代表申请：MR. KIRK HORTON, FOUNDATION FOR THE BLIND, 420 RAJAVITHI ROAD, BANGKOK 10400, THAILAND.


3) Vision Foundation, Inc.
818 Mt. Auburn Street
Watertown, MA 02172, U.S.A.
TelNo. (617)926-4232
一九七○由一kóa未达法定视障ê弱视妇女们共同成立chit-ê机构，in互相分享弱视方面ê资讯并tī情感上互相支持。tòe年龄ê老化而视力减退成弱视ê人jú来jú chē，chiah-ê人得bē-tio̍h政府机关ê照顾，但是tùi这机构得tio̍h真大ê帮助，chia ê电脑资讯中心ē-tàng提供全美国有关弱视方面ê消息。

这机构mā雇用一kóa专业人员到社区去访问kap辅导teh-beh成做弱视ê老年人，tī台北启明学校教十年册而自费到波士顿学院进修特殊教育ê余月霞老师，mā tī-chia机构从事chit方面ê工作多年，一九九四年起应邀担任董事。


4) Boston Aid To The Blind
1980 Centre Street
Boston, MA 02132, U.S.A.
TelNo. (617)323-5111
这是麻州唯一专收五十岁以上盲人ê机构，已经有八十年ê历史，社区ê年老盲人来chia学习日常生活ê技能、唱歌、跳舞、运动、学手工艺、学裁缝、phah高尔夫球。如果你m̄相信盲人phah高尔夫球，请你去看in一年一度ê盲人高尔夫球巡回赛，你就会了解美国社会现在追求ê m̄是男女平等而已，in koh-khah努力tī对残障人士ê教育平等、就业平等、甚至要求休闲机会平等，这chiah是真正ê文明社会。


5) American Foundation For The Blind
15 West 16th Street
New York, N.Y. 10011, U.S.A.
FaxNo. (212)227-7418
这是美国siōng大ê盲人基金会，对个别盲人kap盲人服务机构提供各种资讯kap服务，mā对世界各国提供服务。其定期出版ê各种有关盲人杰作文章，hō͘世界各国lóng ē-tàng分享。
这机构有一个部门负责评估盲人用品kap器具，真chē有心ê个人或企业团体设计ê产品送来请求hō͘伊评估kap意见。
有声书籍录音带ê一贯作业制作mā是一大特色，美国国会图书馆ê盲用录音带书籍就是委托in制作。

6) The Lighthouse, Inc.
111 East 59th Street
New York, N.Y. 10022, U.S.A.
FaxNo. (212)821-9707
一kóa高科技ê研究人员tī-chia埋头苦干，努力boeh利用现代科技来帮助盲人独立生活kap就业，koh-khah设计一kóa科学仪器来帮助解决人类ê视力问题，譬如精密ê电脑验光、弱视辅助器ê开发kap发展。

7) Designs For Vision, Inc.
760 Koehler Avenue
Ronkonkowa, N.Y. 11779, U.S.A.
FaxNo. (516)585-3404

这是两代相传专营研究开发并制造弱视用ê目镜，hō͘弱视者ē-tàng利用其剩余ê有限视力来增进生活kap就业能力。美国kap加拿大ê弱视者已普遍受惠，目前chit间公司tú-teh向外国推展业务。根据公司负责人ê计画，tī各国或地区需要一位眼科医生代理检验kap开立处方订单，该公司收tio̍h订单后按其处方配制目镜，客户收tio̍h目镜若bē合适，该公司会负责调制到客户满意为止。一九九三年我再度kap卢明松、洪锡铭kap陈文钦参观该厂后，决定引进此产品来嘉惠台湾ê弱视朋友，慕光盲人重建中心已申请tio̍h内政部补助二百万元ê验光设备，完成后thang免费为弱视朋友验光并代购弱视用目镜。


建议
台湾跟tòe经济发达，政府kap民间lóng渐渐注重对残障人士ê关怀，chit种文明社会ê提升，是大家所乐见ê。Tī-chia谨提出一kóa个人ê意见kap各位分享。

1］筹组盲人事工联谊会：
请内政部出面邀请盲人事工从事者kap学者成立联谊会，定期联谊，分享并协调计画各项事工，定期出版会讯报导各种事工ê现况kap发展计画。Chiah-ê资讯thang供各有心从事盲人事工ê参考，koh再透过联谊协调，尽量避免事工ê重复kap不平衡ê发展。台湾ê盲人事工已khah欧美先进国家落后多年，不堪koh再浪费有限ê人力kap财力tī重复ê事工上。

2］专业人才ê培训：
盲人事工需要真chē专业人才，尤其需要吸收先进国家ê专业知识，派人到国外受训或深造，经费kap语言常是伤脑筋ê大问题。请国外专家来台开班讲习，透过翻译thang解决语言障碍，开班讲习则chē人受益，mā khah符合经济原则。举办国际教学交换计画mā是真好ê办法，thang利用暑假举办盲童夏令营，设计如盲用电脑、音乐、体能训练等特殊课程，聘请国内教师kap国外专家共同分享教学经验。

3］加强盲人事工ê宣导
请大众传播siuⁿ加报导盲人事工，hō͘社会大众多了解盲人，多关怀盲人，koh-khah接近盲人。前无外久，台北市政府tī中山北路人行道铺设导盲砖，真chē汽机车停tī导盲砖上，阻碍盲人行路。一直到一九九○年行宪纪念日，双连教会西罗亚合唱团应市政府之邀到国父纪念馆演唱时，黄市长亲耳听tio̍h盲人ê心声，随时下令改善。由此可见，宣导是事工成功ê要件之一。

4］多kap盲人沟通协商
人常欢喜以家己明眼人ê想法来从事盲人事工，结果常落到食力不讨好。盲人ê银行开户，选举ê选票处理，盲人ê福利设施等，请相关单位tī事前多kap盲人团体沟通协商，则thang 皆大欢喜，何乐而无为？

5］认同盲人ê能力kap地位
台湾社会对盲人ê歧视iáu真严重，尤其tī教育kap就业机会上，咱一直无法度提供公平ê环境，真chē学校m̄收盲生，有收mā限科系。就业环境koh-khah惨，大学历史系kap音乐系ê毕业生iáu是beh靠传统ê按摩工作来谋生，hō͘咱同齐来为盲人创造一个平等ê教育kap就业环境。

结语
台湾目前ê经济状况ài做好盲人福利是轻而易举ê事，tāi先政府官员ài有心来策划推动，民间团体也tio̍h整合起来配合，希望chit篇考察报告kap建议ē-tàng帮助咱ê盲人福利早日jiok-tio̍h欧美等先进国家。

(原作tī 1991年11月，1994年9月改写)，［台湾教会公报 期 kap师大特殊教育季刊］