《趁iau2日时》

 | | | 转寄

宗教信仰kap失明

作者 林俊育 2008.04.27

残障者心态上ê障碍，有其宗教信仰ê根thang寻。残障界ê专业工作者有责任来处理其心态上ê变化，并提供促进chit种变化ê专业知识。本文boeh探讨宗教信仰ê态度kap失明之间ê关系，并举一kóa我所接触ê失明基督徒ê例来佐证，koh-khah boeh建议一kóa方法，来改变历史传统ê消极负面心态。

人类对身体残障ê心态，tòe历史文化ê演变，历经消极ê可怜、同情kap保护，转而尊重kap积极ê教育kap重建，其间宗教信仰扮演tio̍h重要ê角色。咱beh tùi宗教信仰来学习了解，残障者需要ê是爱ê关怀，m̄是高姿态ê可怜kap同情。

对残障者来讲，心态上ê障碍比歹接近ê环境koh-khah有挫折感；siōng好接近ê无障碍环境kap内容充实ê重建计画，如果家人、朋友、同事kap雇主iáu继续抱tio̍h负面ê态度，boeh调整一个视障者是无法度ê。Siōng好ê立法mā只有ē-tàng消除建筑物kap就业ê障碍，提供奖助学金、生活辅助器、独立ê生活中心kap专业研究，但只有人ê正面心态chiah ē-tàng改变残障人。

一般社会大众对视障者ê看法是，无助ê、温顺ê、依赖性ê、忧郁ê kap唯美主义者，tùi án-ne认为失明是一种耻辱，koh-khah hō͘明眼人bōe-sái接纳视障者，甚至tī将in当做异类看待。Chiah-ê lóng是根深蒂固ê传统思想，而宗教是反应传统思想kap态度kap实际生活关联ê交hō͘关系。所以，透过宗教历史ê考证， ē-tàng追根究底来查出对失明心态ê形成原因。

Tī人类历史有文字记载chìn前，宗教ê态度无文献thang查；真chē目前对失明人ê心态，lóng来自古代ê神话kap圣经文学。希腊神话有真chē kā失明看做是一种天罚ê故事，tùi án-ne继续影响宗教ê历史发展。旧约圣经对失明有双重ê态度，失明人被描述成可怜、无助kap被排斥，摩西律法保护失明人。犹太律法赋予失明人有特权，但mā被禁止参加某一kóa宗教仪式；因为失明hō͘一个人无法度研究律法，所以被认为是神对一个罪人ê惩罚。Tī旧约时代，失明人一方面受保护，某一kóa方面mā受排斥，但chit种矛盾ê社会并无阻止失明人超越其身体ê障碍，而成为圣哲、学者kap作家等。但一般ê失明人tī宗教历史上，是无迹thang寻ê。

新约圣经改变对失明tī身体残障方面ê强调，转为探究其成因kap治疗，有真chē失明人得tio̍h医治ê神迹。耶稣特别关心失明人，kā失明看做一种需要治疗ê残障，所以行真chē神迹hō͘失明人ē-tàng看见。M̄-koh，耶稣mā以负面ê态度，引用「失明」chit-ê字来比喻无知kap自欺。失明被看做缺陷、惩罚、惊人ê剥夺kap负面ê含意，基督徒ê慈悲意念形成失明乞丐ê次文化，早期基督教ê教会koh-khah是为甚。Chit种惩罚kap保护ê混淆，tòe历史ê发展，一直hō͘明眼人困惑bē了解。

保罗kap伊ê门徒将基督教传遍罗马帝国，tī四世纪成做国教，以后koh-khah传遍kui-ê欧洲。失明乞丐受鼓励到天主教堂大门前唱特别ê祈祷诗歌，法国到十三世纪就有失明乞丐ê慈善兄弟会，受教会、法律kap封建制度ê庇护。Chit种对失明消极ê负面心态、惊惶kap混淆，一直teh人类ê潜意识中无法度祛除。

其他ê宗教kap各种文化，对失明ê解释mā lóng含糊不清。佛教认为失明是对前世罪孽ê惩罚，墨西哥ê印地安人视失明为tio̍h这生ê行为不检，缅甸人叫失明为巫师ê做法术，韩国人则崇敬失明人有内心ê异象。目前深植人心ê矛盾心态，埋藏tī chiah-ê文化kap历史ê起源中，比咱想像ê iáu深。

人类tùi中央价值系统中决定其心态kap行为，将所有ê惊惶、敬畏、否定、考虑kap期待，tùi根深蒂固ê宗教信仰转变成做对失明ê心态kap行为表现。明眼人潜意识中持有chiah-ê价值观，既hō͘ tī智力上获胜，明眼人tī潜意识形成ê心态上iáu是改变不了ê。如果真tú beh改变心态，明眼人就ài面对in之间kap伊个人对失明ê看法，mā ài面对沾满污点ê失明原始意义ê考量。态度无法度为人而改，必须tùi人本身ê意愿来改。

宗教ê领导人，诸如犹太教ê拉比、天主教ê神父kap基督教ê牧师，in负责诠释信仰ê信息，并以灵性领导者ê地位，来克服人类自我中心ê软弱。以公义净化社会ê重担落tī各宗教领导人ê肩膀上，in boeh以道德ê权威，对人类ê不安全感提出公正ê回答，in ê态度被认为是一个示范标准。In态度ê偏见或是不明确，对社会文化ê冲击比一般大众ê偏见大。In ê神学教育就必须注重对失明ê正确态度，而其神学ê理论基础必须突破历史文化ê传统。

据我ê了解，一般神学教育真少重视残障福音，台湾ê残障福音mā是由残障神职人员推动，譬如轮椅上ê陈博文牧师，四界宣讲残障福音，ē-sái讲是跟tòe伊ê脚步ê明眼神职人员iáu是凤毛鳞角。其实身体残障者siōng需要福音来重建in ê心灵，尤其是视障者ê肉体目睭被关闭，心灵ê目睭却是明亮ê，若有机会接触好ê宗教信仰，一定会超越身体ê障碍，燃烧koh-khah辉煌ê生命，照亮乌暗ê社会。

辅导西罗亚盲人合唱团七年gōa来，我一直teh观察团员为何有án-ne热心服事神ê心志，tùi in ê诗歌见证中，我写过一kóa文章，mā写几篇个人ê心路历程。我发现神ê爱ē-tàng点每一个视障者ê生命蜡烛，尤其是「将灭ê灯火，伊不吹熄。」视障者自细汉就不被家人接纳，koh-khah受社会大众以异样ê眼光对待，in tam bē-tio̍h爱，koh-khah m̄知影什么叫做爱。有机会进入由基督教创办ê台中惠明盲校了后，tī基督ê爱裏，in开始有欢笑kap喜乐，有真chē学生寒暑假boeh留在学校煞无愿意tńg去厝里；有真chē学生tī惠明盲校受洗成做基督徒。但毕业一行出校门，残酷ê社会koh逼in自我锁闭tī厝内狭窄ê空间内，甚至m̄敢koh再行入教堂。双连教会成立台北市盲朋友联谊会和西罗亚合唱团了后，in koh感觉神ê恩典koh再光临，生命ê火花koh再燃烧，甚至点to̍h生命ê光辉，四界为神ê爱做见证。

教会常讲beh「做光、做盐」，但却mā常常将教会筑起高墙，看bē-tio̍h［=盲］社区中ê弱势团体。希望神学院办好视障福音ê教育训练，教会也ē-tàng tī神职人员ê领导下，举办视障福音研习营，大家同齐来突破视障者kap明眼人e之间ê障碍，以爱化解碍来广传福音。

Tī陈博文牧师ê鼓励下，西罗亚合唱团将kap高雄手语教会联合，koh再举办「百万残障福音巡回布道会」，希望各教会ē-tàng参与chit项残障福音运动，愿神继续带领，将一切荣耀归予神。


参考资料：“JOURNAL OF VISUAL IMPAIRMENT AND BLINDNESS” JUNE, 1987. “RELIGION AND BLINDNESS：INHERITANCE TO OPPORTUNITY”BY V.E. BISHOP.
［台湾教会公报2264 期 1995.7.23］